Wheat Flour Laddu / Godhi Hittina Unde

ಗೋಧಿಹಿಟ್ಟಿನ ಉಂಡೆ:

ಗೋಧಿಹಿಟ್ಟು - ಒಂದು ಬಟ್ಟಲು
ಬೆಲ್ಲದಪುಡಿ- ಒಂದು ಬಟ್ಟಲು
ದ್ರಾಕ್ಷಿ ಮತ್ತು ಗೋಡಂಬಿ
ಏಲಕ್ಕಿ
ತುಪ್ಪ

ತಯಾರಿ:

ನಾನ್ ಸ್ಟಿಕ್ ಪ್ಯಾನ್/ ಬಾಣಲೆಗೆ ತುಪ್ಪ ಹಾಕಿ ದ್ರಾಕ್ಷಿ ಮತ್ತು ಗೋಡಂಬಿಯನ್ನು ಹುರಿದುಕೊಂಡು ಆ ಕಡೆ ಇಡಿ.
ಅದೇ ಬಾಣಲೆಯಲ್ಲಿ ಗೋಧಿಹಿಟ್ಟಿಗೆ ಸ್ವಲ್ಪ ತುಪ್ಪ ಹಾಕಿ ಹಸಿವಾಸನೆ ಹೋಗುವವರೆಗೂ ಅಂದರೆ ಹಿಟ್ಟಿನ ಬಣ್ಣ ತೆಳು ಕಂದು ಬಣ್ಣ ಬರುವವರೆಗೂ ಹುರಿದುಕೊಂಡು ಅದಕ್ಕೆ ಬೆಲ್ಲದಪುಡಿ, ಏಲಕ್ಕಿ ಪುಡಿ ಹಾಕಿ ಚೆನ್ನಾಗಿ ಬೆರೆಸಿ. ತುಪ್ಪದಲ್ಲಿ ಹುರಿದ ದ್ರಾಕ್ಷಿ ಮತ್ತು ಗೋಡಂಬಿಯನ್ನು ಹಾಕಿ ಅದೆಲ್ಲವನ್ನು ಕೈ ಬಿಡದೇ ತಳ ಹತ್ತದಂತೆ ಐದು ನಿಮಿಷ ಹುರಿದು, ಮತ್ತೆರಡು ಚಮಚ ತುಪ್ಪ ಹಾಕಿ ,ಬೆರೆಸಿ, ಒಲೆಯಿಂದ ಇಳಿಸಿ. ಇದನ್ನು ತಯಾರಿಸುವಾಗ ಹಾಲು / ನೀರು ಏನನ್ನು ಬೆರೆಸುವುದಿಲ್ಲ. ಹಿಟ್ಟು ಮತ್ತು ಬೆಲ್ಲ ಮಾತ್ರ. ಇದು ಸ್ವಲ್ಪ ತಣ್ಣಗಾದ ಬಳಿಕ (ತುಂಬಾ ತಣ್ಣಗಾಗಬಾರದು) ಇನ್ನೂ ಸ್ವಲ್ಪ ಬಿಸಿ ಇರುವಾಗಲೇ ತುಪ್ಪ ಅಥವಾ ಹಾಲಿನಲ್ಲಿ ಕೈಯನ್ನು ಸವರಿಕೊಂಡು ನಿಮಗೆ ಬೇಕಾದ ಆಕಾರದಲ್ಲಿ ಉಂಡೆಯನ್ನು ತಯಾರಿಸಿಕೊಂಡು, ತಣ್ಣಗಾದ ಮೇಲೆ ಡಬ್ಬಿಯಲ್ಲಿ ಹಾಕಿಡಬಹುದು, ಸುಮಾರು ದಿನ ಚೆನ್ನಾಗಿ ಇರುತ್ತದೆ. ಇದು ತುಂಬಾ ಆರೋಗ್ಯಕರವಾದ ಉಂಡೆ. ಇದನ್ನು ತಯಾರಿಸಲು ತುಂಬಾ ಸಮಯ ತೆಗೆದುಕೊಳ್ಳುವುದಿಲ್ಲ

Carrot Payasa - ಕ್ಯಾರೆಟ್ ಪಾಯಸ/ಖೀರು:

ಕ್ಯಾರೆಟ್ ಪಾಯಸ/ಖೀರು:

ಬೇಕಾಗುವ ಸಾಮಗ್ರಿಗಳು:

ಕ್ಯಾರೆಟ್ - ಒಂದು ಬಟ್ಟಲು ಹೆಚ್ಚಿದ್ದು
ಸಕ್ಕರೆ ರುಚಿಗೆ
ಹಾಲು - ಅಗತ್ಯವಿದ್ದಷ್ಟು
ದ್ರಾಕ್ಷಿ ಮತ್ತು ಗೋಡಂಬಿ
ಕೇಸರಿ ದಳಗಳು
ಗುಲಾಬಿ ನೀರು (ರೋಸ್ ವಾಟರ್)
ತುಪ್ಪ

ವಿಧಾನ:

ಮೊದಲು ಕ್ಯಾರೆಟ್ ಅನ್ನು ಬೇಯಿಸಿಕೊಂಡು, ಸ್ವಲ್ಪ ನೀರು ಅಥವ ಹಾಲು ಹಾಕಿಕೊಂಡು ಅದನ್ನು ರುಬ್ಬಿಕೊಳ್ಳಿ. ಕೇಸರಿಯನ್ನು ಸ್ವಲ್ಪ ಹಾಲಿನಲ್ಲಿ ನೆನೆಹಾಕಿ.
ಒಂದು ಪಾತ್ರೆಗೆ ತುಪ್ಪ ಹಾಕಿ , ಕರಗಿದ ತುಪ್ಪದಲ್ಲಿ ದ್ರಾಕ್ಷಿ ಮತ್ತು ಗೋಡಂಬಿಯನ್ನು ಹುರಿದು, ಅದಕ್ಕೆ ಹಾಲನ್ನು ಹಾಕಿ, ರುಬ್ಬಿದ ಕ್ಯಾರೆಟ್ ಮಿಶ್ರಣವನ್ನು ಹಾಕಿ, ಚೆನ್ನಾಗಿ ಕುದಿಸಿ, ತಿರುಗಿಸುತ್ತಿರಿ. ಕುದಿ ಬರುವಾಗ ಸಕ್ಕರೆ ಮತ್ತು ಕೇಸರಿಹಾಲನ್ನು ಸೇರಿಸಿ. ಸಕ್ಕರೆ ಕರಗುವಂತೆ ಕ್ಯಾರೆಟ್ ಮಿಶ್ರಣವನ್ನು ಚೆನ್ನಾಗಿ ಕುದಿಸಿ.ಇಳಿಸಿ. ಇದಕ್ಕೆ ಒಂದು ಚಮಚ ಗುಲಾಬಿ ನೀರು ಹಾಕಿ. ಇದೀಗ ಪೌಷ್ಠಿಕರವಾದ, ನೋಡಲು ಸುಂದರವಾದ, ಕುಡಿಯಲು ರುಚಿಯಾದ ಆರೋಗ್ಯಕ್ಕೆ ಹಿತಕರವಾದ ಕ್ಯಾರೆಟ್ ಪಾಯಸ/ಖೀರು ತಯಾರಾಗಿದೆ.

Karjikaayi - ಕರ್ಜಿಕಾಯಿ:

ಕರ್ಜಿಕಾಯಿ:

ಬೇಕಾಗುವ  ಸಾಮಗ್ರಿಗಳು:

ಮೈದಾಹಿಟ್ಟು - ಒಂದು ಬಟ್ಟಲು
ಚಿಟಿಕೆ ಉಪ್ಪು
ಎರಡು ಚಮಚ ತುಪ್ಪ
ಕಡ್ಲೆ - ಒಂದು ಬಟ್ಟಲು
ಕೊಬ್ಬರಿತುರಿ
ಸಕ್ಕರೆಪುಡಿ
ಏಲಕ್ಕಿ ಪುಡಿ
ಗಸಗಸೆ
ಎಳ್ಳು
ಕರಿಯಲು ಎಣ್ಣೆ

ತಯಾರಿಸುವ ವಿಧಾನ:

ಗಸಗಸೆಯನ್ನು ಸ್ವಲ್ಪ ಹುರಿದು, ಕುಟ್ಟಿಕೊಳ್ಳಿ.

ಮೊದಲು ಮೈದಾಹಿಟ್ಟಿಗೆ,ಚಿಟಿಕೆ ಉಪ್ಪು ಮತ್ತು ತುಪ್ಪವನ್ನು ಹಾಕಿ ಚೆನ್ನಾಗಿ ಬೆರೆಸಿ. ಅದಕ್ಕೆ ಸ್ವಲ್ಪ ನೀರು ಹಾಕಿ ಪೂರಿ ಹಿಟ್ಟಿನ ಹದಕ್ಕಿಂತ ಸ್ವಲ್ಪ ಗಟ್ಟಿಯಾಗಿ ಕಲೆಸಿ. ಇದನ್ನು ಚೆನ್ನಾಗಿ ನಾದಿ ಹದಿನೈದು ನಿಮಿಷ ಮುಚ್ಚಿಡಿ. ಇದನ್ನು ’ಕಣಕ’ ಎನ್ನುತ್ತಾರೆ.

ಕಡ್ಲೆಯನ್ನು ಪುಡಿ ಮಾಡಿಕೊಂಡು ಅದಕ್ಕೆ ಸಕ್ಕರೆಪುಡಿ,ಕೊಬ್ಬರಿತುರಿ,ಗಸಗಸೆ,ಎಳ್ಳು ಮತ್ತು ಏಲಕ್ಕಿ ಪುಡಿಯನ್ನು ಹಾಕಿ ಎಲ್ಲವನ್ನು ಸರಿಯಾಗಿ ಹೊಂದಿಕೊಳ್ಳುವಂತೆ ಚೆನ್ನಾಗಿ ಬೆರೆಸಿಡಿ. ಇದನ್ನು’ಹೂರಣ’ ಎನ್ನುತ್ತಾರೆ.

ನಂತರ ಮೈದಾಹಿಟ್ಟಿನ ಕಣಕದಿಂದ ಚಿಕ್ಕ ಚಿಕ್ಕ ಉಂಡೆ ಮಾಡಿಕೊಂಡು, ಅದರಿಂದ ಪುಟ್ಟ ಪುಟ್ಟ ಪೂರಿಯಂತೆ ಲಟ್ಟಿಸಿ. ಆ ಪೂರಿಯೊಳಗೆ ಕಡ್ಲೆ ಮಿಶ್ರಣದ ಹೂರಣವನ್ನು ಒಂದೆರಡು ಚಮಚ ತುಂಬಿ, ಪೂರಿಯನ್ನು ಅರ್ಧ ಭಾಗಕ್ಕೆ ಮಡಿಸಿ, ಅದರ ಎರಡು ಬದಿಯ ಅಂಚುಗಳನ್ನು ಒಟ್ಟಿಗೆ ಹಿಡಿದು ಅದುಮಿ , ಸರಿಯಾಗಿ ಎಲ್ಲಾ ಕಡೆಯೂ ಅದನ್ನು ಕ್ಲೋಸ್ ಮಾಡಿ, ಅಂಚು ಮಡಿಸುವ ವಿಧಾನ ತಿಳಿದಿರುವವರು ಅದನ್ನು ಸುತ್ತಿ ಸುತ್ತಿ ಅಂಚಿಗೆ ಚಿತ್ತಾರ ಮಾಡಬಹುದು. ಅದು ಬರದೇ ಇರುವವರು ಚೆನ್ನಾಗಿ ಅದುಮಿ ಮುಚ್ಚಿದ ಅಂಚಿನ ತುದಿ ಭಾಗ ಮಾತ್ರ ಕಟ್ಟರ್ ನಿಂದ ಕಟ್ ಮಾಡಬಹುದು. ಕಟ್ಟರ್ ಸಿಗುತ್ತದೆ ಅದರಿಂದ ಕಟ್ ಮಾಡಿದ ಮೇಲೆ ಮತ್ತೆ ಎಲ್ಲಾ ಕಡೆ ಅಂಟಿಕೊಂಡಿದೆಯಾ ಪರೀಕ್ಷಿಸಿ. ಏಕೆಂದರೆ ಅದನ್ನು ಎಣ್ಣೆಯಲ್ಲಿ ಕರಿಯುವಾಗ ಬಿಟ್ಟುಕೊಳ್ಳುತ್ತದೆ. ಎಣ್ಣೆಯಲ್ಲಿ ಪುಡಿಯಲ್ಲ ಆಚೆ ಬರುತ್ತದೆ. ಇದನ್ನು ತಯಾರಿಸುವಾಗ ನೋಡಿಕೊಂಡು ಸರಿಯಾಗಿ ತಯಾರಿಸಿಕೊಳ್ಳಿ, ಈ ರೀತಿ ತಯಾರಿಸಿದ ಕಡುಬುಗಳನ್ನು ಕಾದಿರುವ ಎಣ್ಣೆಯಲ್ಲಿ ಹಾಕಿ, ಸರಿಯಾದ ಉರಿಯಲ್ಲಿ ಎರಡು ಬದಿ ಹೊಂಬಣ್ಣ ಬರುವವರೆಗೂ ಬೇಯಿಸಿ. ನಂತರ ತಣ್ಣಗಾದ ಬಳಿಕ ಗಾಳಿಯಾಡದ ಡಬ್ಬಿಯಲ್ಲಿ ತುಂಬಿಡಿ, ಇದು ಸುಮಾರು ದಿನ ಹಾಳಾಗದೇ ಚೆನ್ನಾಗಿಯೇ ಇರುತ್ತದೆ. ಬೇಕಾದಾಗ ತಿನ್ನಬಹುದು. ಊಟಕ್ಕು ಸಿಹಿ ತರಹ ನೀಡಬಹುದು.

* ಪೂರಿಯೊಳಗೆ ಪುಡಿಯನ್ನು ತುಂಬುವಾಗ ಸರಿಯಾಗಿ ನೋಡಿ,ಆ ಕಡೆ-ಈ ಕಡೆ ಬರದಂತೆ ಮಧ್ಯಭಾಗದಲ್ಲಿ ಮಾತ್ರ ಇರುವಂತೆ ಹಾಕಿ ಮಡಿಸಿಕೊಳ್ಳಬೇಕು

Habbada aduge - ಹಬ್ಬದ ಊಟ

Saagu/Vegetable masala-ಮಸಾಲಾ/ಕುರ್ಮಾ

ತರಕಾರಿ ಸಾಗು ಅಥವ ಕೂಟು ಎಲ್ಲವುದಕ್ಕು ಹೊಂದಿಕೊಳ್ಳುವಂತಹದ್ದು. ಅಂದರೆ ಇದನ್ನು ದೋಸೆ, ಚಪಾತಿ,ಪರೋಟ,ರೊಟ್ಟಿ,ಪೂರಿ ಮತ್ತು ಅನ್ನದ ಜೊತೆಯಲ್ಲಿ ತಿನ್ನಬಹುದು. ಜೊತೆಯಲ್ಲಿ ಪೌಷ್ಠಿಕವಾಗಿಯೂ ಆರೋಗ್ಯಕ್ಕೆ ಉತ್ತಮವಾಗಿಯೂ ಇರುತ್ತದೆ.

ಸಾಗು ರೆಸಿಪಿಯನ್ನು ಮಸಾಲಾ/ಕುರ್ಮಾ ಲೇಬಲ್ ನಲ್ಲಿ ನೋಡಬಹುದು.

palakpaneer

ಪಾಲಕ್ ಪನ್ನೀರು ಮಕ್ಕಳಿಗೆ ಇಷ್ಟವಾಗುವಂತದ್ದು, ಸೊಪ್ಪು ಪೇಸ್ಟ್ ಮಾಡುವುದರಿಂದ ಸೊಪ್ಪು ತಿನ್ನಲು ಹಿಂಜರಿಯುವ ಮಕ್ಕಳಿಗೆ ಹೀಗೆ ತಯಾರಿಸಿ ಕೊಡುವುದರಿಂದ ಖುಷಿಯಿಂದ ತಿನ್ನುತ್ತಾರೆ. ಅದರ ಜೊತೆ ಪನ್ನೀರು ಒಂದು ರುಚಿ ಕೊಡುತ್ತದೆ. ಇದು ಚಪಾತಿ, ಪರೋಟ, ನಾನ್,ಕುಲ್ಚ, ಬಟರ್ ನಾನ್, ತಂದೂರಿ ರೋಟಿ ಮತ್ತು ಪೂರಿ ಎಲ್ಲಕ್ಕೂ ಸೈ.

huli

ಮೂಲಂಗಿ ಹುಳಿ:

ತೊಗರಿಬೇಳೆ

ಮೂಲಂಗಿ, ಹೆಚ್ಚಿದ್ದು

ಈರುಳ್ಳಿ ಸ್ವಲ್ಪ

ಕಾಯಿತುರಿ ಸ್ವಲ್ಪ

ಸಾರಿನ ಪುಡಿ

ಹುಣಸೇರಸ - ೧ ಚಮಚ

ಅರಿಶಿಣದ ಪುಡಿ

ಎಣ್ಣೆ

ಉಪ್ಪು



ತೊಗರಿಬೇಳೆಗೆ ಅರಿಶಿಣ ಮತ್ತು ಸ್ವಲ್ಪ ಎಣ್ಣೆಯನ್ನು ಹಾಕಿ ಬೇಯಿಸಿಕೊಂಡು ಅದಕ್ಕೆ ಮೂಲಂಗಿ ಮತ್ತು ಟಮೋಟ ಹಾಕಿ, ಮೂಲಂಗಿ ಬೇಯುವವರೆಗೂ ಬೇಯಿಸಿ, ನಂತರ ಸಾರಿನಪುಡಿ, ಹುಣಸೇರಸ ,ಉಪ್ಪು ಮತ್ತು ರುಬ್ಬಿದ ಮಿಶ್ರಣ ಹಾಕಿ, ಚೆನ್ನಾಗಿ ಕುದಿಸಿ. ನಂತರ ಅದಕ್ಕೆ ಒಗ್ಗರಣೆ ಸೇರಿಸಿ. ಇಳಿಸಿ.

*ರುಬ್ಬಲು - ಕಾಯಿತುರಿ, ಈರುಳ್ಳಿ ಮತ್ತು ಸಾರಿನಪುಡಿಯನ್ನು ಸೇರಿಸಿ ರುಬ್ಬಿಕೊಳ್ಳಿ.

*ಒಗ್ಗರಣೆ - ಎಣ್ಣೆ ಹಾಕಿ, ಸಾಸಿವೆ, ಇಂಗು, ಕರಿಬೇವು ಮತ್ತು ಚುಟುಕ ಈರುಳ್ಳಿ ಹಾಕಿ ಬಾಡಿಸಿ.

* - ರುಬ್ಬಿಕೊಳ್ಳಲು ವೇಳೆ/ಬಿಡುವು ಇಲ್ಲದವರು ಕಾಯಿತುರಿ ರುಬ್ಬಿಕೊಳ್ಳದೆ ಆಗೆ ಕೂಡ ಸಾಂಬಾರ್ ತಯಾರಿಸಿಕೊಳ್ಳಬಹುದು. ಆಗ ಸಾರಿಗೆ ರುಬ್ಬಿದ ಮಿಶ್ರಣದ ಹಾಕುವ ಬದಲು ಬರೀ ಸಾರಿನ ಪುಡಿ ಹಾಕಿ ಕುದಿಸಿದರೆ ಆಯಿತು. ಈ ಸಾಂಬಾರ್ ಕೂಡ ರುಚಿಯಾಗಿಯೇ ಇರುತ್ತದೆ.

* ಮೂಲಂಗಿ ಜೊತೆ ಹುರುಳಿಕಾಯಿ/ಆಲೂಗೆಡ್ಡೆ/ಕ್ಯಾರೆಟ್ ಸಹ ಸೇರಿಸಿ ತಯಾರಿಸಬಹುದು.

DoodPeda:

usali

ಹುರುಳೀಕಾಯಿಕಾಳು ಉಸಲಿ:

ನಮ್ಮ ದೇಶದಲ್ಲಿ ಹುರುಳೀಕಾಯಿಕಾಳು ಸುಮಾರು ಬಣ್ಣಗಳಲ್ಲಿ ಬರುತ್ತದೆ. ಇದು ಹುರುಳಿಕಾಯಿಯಲ್ಲಿ ಸಿಗುತ್ತದೆ, ಇದು ಸಿಪ್ಪೆ ಸಮೇತ ಸಿಗುತ್ತದೆ. ಅಲ್ಲದೇ ಒಣಗಿದ ಕಾಳುಗಳು ಸಿಗುತ್ತವೆ ಮತ್ತು ಈಗ ಕ್ಯಾನ್ ನಲ್ಲಿ ಸಹ ಸಿಗುತ್ತದೆ.ಎಲ್ಲಕ್ಕಿಂತ ಹಸಿಕಾಳಿನಕಾಯಿ ತಂದು ಕಾಳು ಬಿಡಿಸಿ ಮಾಡುವುದು ಹೆಚ್ಚು ರುಚಿಯಾಗಿರುತ್ತದೆ ಮತ್ತು ಬೇಗ ಬೇಯುತ್ತದೆ. ಕ್ಯಾನ್ ನಲ್ಲಿ ಕೂಡ ಬಿಳಿ ಕಿಡ್ನಿ ಬೀನ್ಸ್ ಮತ್ತು ಕೆಂಪು ಕಿಡ್ನಿ ಬೀನ್ಸ್ ಗಳು ಸಿಗುತ್ತವೆ.

ಸಾಮಗ್ರಿಗಳು:

ಹುರುಳೀಕಾಯಿಕಾಳು ಒಂದು ಬಟ್ಟಲು

ಹೆಚ್ಚಿದ ಈರುಳ್ಳಿ ಸ್ವಲ್ಪ

ಹೆಚ್ಚಿದ ಹಸಿಮೆಣಸಿನಕಾಯಿ

ಎಣ್ಣೆ, ಸಾಸಿವೆ

ಕರಿಬೇವು

ಉಪ್ಪು ರುಚಿಗೆ

ಕೊತ್ತುಂಬರಿಸೊಪ್ಪು

ಕಾಯಿತುರಿ

ವಿಧಾನ:

ಹುರುಳೀಕಾಳನ್ನು ಬಿಡಿಸಿಕೊಂಡು ಕುಕ್ಕರ್ ಗೆ ಕಾಳುಗಳನ್ನು ಹಾಕಿ ಒಂದು ಲೋಟ ನೀರು ಹಾಕಿ,ಉಪ್ಪು ಮತ್ತು ಎಣ್ಣೆ ಸ್ವಲ್ಪ ಹಾಕಿ. ಬೇಯಿಸಿಕೊಳ್ಳಿ. ನೀರು ಜಾಸ್ತಿ ಹಾಕಿದ್ದರೆ ನೀರು ಬಸಿಯಿರಿ. ನೀರು ಎಷ್ಟು ಬೇಕೋ ಅಷ್ಟು ಮಾತ್ರ ಹಾಕಿ, ಕಾಳುಗಳು ಕರಗದಂತೆ ಗಟ್ಟಿಯಾಗಿ ಬೇಯಿಸಿಕೊಳ್ಳಿ.

ಪಾತ್ರೆ/ಬಾಣಲೆಗೆ ಒಂದೆರಡು ಚಮಚ ಎಣ್ಣೆ ಹಾಕಿ, ಸಾಸಿವೆ,ಕರಿಬೇವು,ಹಸಿಮೆಣಸಿನಕಾಯಿ, ಈರುಳ್ಳಿಯನ್ನು ಹಾಕಿ,ಕೆಲವು ನಿಮಿಷ ಹುರಿಯಿರಿ,ಈರುಳ್ಳಿಯೂ ಸ್ವಲ್ಪ ಬಣ್ಣ ನಂತರ ಚಿಟಿಕೆ ಉಪ್ಪು ಹಾಕಿ , ಬೇಯಿಸಿರುವ ಕಾಳನ್ನು ಹಾಕಿ, ಎಲ್ಲವನ್ನು ಚೆನ್ನಾಗಿ ಬೆರೆಸಿ. ಕಾಯಿತುರಿ ಮತ್ತು ಕೊತ್ತುಂಬರಿ ಸೊಪ್ಪನ್ನು ಹಾಕಿ ಸರಿಯಾಗಿ ಬೆರೆಸಿ.ಇಳಿಸಿ,ಇದನ್ನು ಊಟಕ್ಕೆ ನೆಂಚಿಕೊಳ್ಳಲು ಚೆನ್ನಾಗಿರುತ್ತದೆ.

*ಕ್ಯಾನ್ ಬೀನ್ಸ್ ಉಪಯೋಗಿಸುವುದಾದರೆ ಬೇಯಿಸದೆ, ಕಾಳುಗಳಿಗೆ ನೇರವಾಗಿ ಒಗ್ಗರಣೆಯನ್ನು ಬೆರೆಸಿ, ಕೆಲವು ನಿಮಿಷ ಅದರಲ್ಲೆ ಹುರಿದು ಚೆನ್ನಾಗಿ ಬೆರೆಸಿ.

dosehittu

Vegetable Saagu

ತರಕಾರಿ ಸಾಗು:

ಸಾಮಗ್ರಿಗಳು:

ತರಕಾರಿಗಳು ನಿಮ್ಮ ಇಷ್ಟ--
ಕ್ಯಾರೆಟ್,ಹುರುಳಿಕಾಯಿ,ಬಟಾಣಿ
ಹೂಕೋಸು, ಎಲೆಕೋಸು,ಹೀರೆಕಾಯಿ
ಬದನೆಕಾಯಿ,ಆಲೂಗೆಡ್ಡೆ,ಟಮೋಟ
ಕಾರ್ನ್ ( ಮೆಕ್ಕೆಜೋಳದ ಕಾಳುಗಳು)-ಕ್ಯಾನ್ ಅಥವ ಫ಼್ರೆಶ್
ಅಚ್ಚ ಖಾರದ ಪುಡಿ
ಧನಿಯ ಪುಡಿ
ಸಾರಿನಪುಡಿ
ಗರಂಮಸಾಲಾ
ಈರುಳ್ಳಿ
ಎಣ್ಣೆ,ಸಾಸಿವೆ,ಜೀರಿಗೆ
ಕರಿಬೇವು, ಅರಿಸಿನ
ಉಪ್ಪು,
ಕಾಯಿತುರಿ / ಕೊಬ್ರಿತುರಿ
ಕೊತ್ತುಂಬರಿಸೊಪ್ಪು

ವಿಧಾನ:
ಬಟಾಣಿಯನ್ನು ಬಿಟ್ಟು ಮಿಕ್ಕ ಎಲ್ಲಾ ತರಕಾರಿಗಳನ್ನು ಹೆಚ್ಚಿಕೊಳ್ಳಿ.
ಕುಕ್ಕರ್ ನಲ್ಲಿ ಸ್ವಲ್ಪ ಎಣ್ಣೆಯನ್ನು ಹಾಕಿ,ಕಾದ ಬಳಿಕ ಸಾಸಿವೆ,ಜೀರಿಗೆ ,ಈರುಳ್ಳಿ ಹಾಕಿ ಒಂದೆರಡು ನಿಮಿಷ ಹುರಿದು, ಹೆಚ್ಚಿದ ತರಕಾರಿಗಳನ್ನು ಹಾಕಿ, ಚೆನ್ನಾಗಿ ಬೆರೆಸಿ,ಕೆಲವು ನಿಮಿಷ ತಿರುಗಿಸಿ ಬಟಾಣಿಕಾಳುಗಳನ್ನು ಹಾಕಿ ಅದನ್ನು ಬೆರೆಸಿ, ಒಂದೆರಡು ನಿಮಿಷದ ನಂತರ ಅರಿಸಿನ,ಕರಿಬೇವು,ಕಾರದಪುಡಿ,ಧನಿಯಾಪುಡಿ,ಸ್ವಲ್ಪ ಸಾರಿನಪುಡಿ ಮತ್ತು ಉಪ್ಪು ಹಾಕಿ, ಚೆನ್ನಾಗಿ ತಿರುಗಿಸಿ, ಅಗತ್ಯವಿರುವಷ್ಟು ನೀರು ಹಾಕಿ ಉಪ್ಪು,ಕಾಯಿತುರಿ/ಕೊಬ್ರಿತುರಿ ಮತ್ತು ಸ್ವಲ್ಪ ಕೊತ್ತುಂಬರಿಸೊಪ್ಪನ್ನು ಹಾಕಿ ಎಲ್ಲವನ್ನು ಸರಿಯಾಗಿ ಬೆರೆಸಿ, ಗರಂಮಸಾಲ ಸಹ ಹಾಕಿ ತಿರುಗಿಸಿ. ಮುಚ್ಚಳ ಹಾಕಿ. ಬೇಯಿಸಿ. ತರಕಾರಿಗಳನ್ನು ತುಂಬಾ ಬೇಯಿಸಬಾರದು. ನೋಡಿಕೊಂಡು ಒಲೆಯಿಂದ ಇಳಿಸಿ.
ಮತ್ತೆ ಕೊತ್ತುಂಬರಿಸೊಪ್ಪನ್ನು ಹಾಕಿ ತಿರುಗಿಸಿ. ತರಕಾರಿ ಸಾಗು ತಯಾರಾಗುತ್ತದೆ. ಇದನ್ನು ಚಪಾತಿ,ಪೂರಿ,ಪರೋಟ ಮತ್ತು ದೋಸೆಯೊಂದಿಗೆ ಸಹ ತಿನ್ನಬಹುದು. ಅನ್ನಕ್ಕು ತುಂಬಾ ಚೆನ್ನಾಗಿರುತ್ತದೆ. ಮಕ್ಕಳಿಗೆ ಸಾಗು ಅನ್ನ ಇಷ್ಟವಾಗುತ್ತದೆ. ಯಾವುದಕ್ಕಾದರೂ ಸರಿ ಇಲ್ಲವೆಂದರೆ ಊಟಕ್ಕೂ ಕೂಡ ನೆಂಚಿಕೊಳ್ಳಬಹುದು.

*ಎಲ್ಲಾ ತರಕಾರಿಗಳು ಬೇಕೇಬೇಕು ಅಂತ ಏನು ಇಲ್ಲ. ಕೆಲವು ನಿಮಗೆ ಬೇಕೆನಿಸಿದಂತೆ ಹಾಕಿಕೊಳ್ಳಬಹುದು.

Dose/Dosa Saagu- ದೋಸೆ ಸಾಗು:

ದೋಸೆ ಸಾಗು:
ಸಾಮಗ್ರಿಗಳು:
ಅಕ್ಕಿ - ನಾಲ್ಕು ಕಪ್
ಕುಸುಬಲಕ್ಕಿ- ಅರ್ಧಕಪ್
ಉದ್ದಿನಬೇಳೆ -ಒಂದು ಕಪ್
ಮೆಂತ್ಯದ ಕಾಳು - ಒಂದು ದೊಡ್ಡ ಚಮಚ
ತೊಗರಿಬೇಳೆ - ಎರಡು ಚಮಚ
ಕಡ್ಲೆಬೇಳೆ -ಎರಡು ಚಮಚ

ವಿಧಾನ:

ಅಕ್ಕಿಯನ್ನು ನಾಲ್ಕು ಅಥವ ಐದು ಗಂಟೆಗಳ ಕಾಲ ನೆನೆಸಿ,ಅದನ್ನು ನುಣ್ಣಗೆ ರುಬ್ಬಿಕೊಳ್ಳಿ. ಅದನ್ನು ಏಳೆಂಟು ಗಂಟೆ ಅಥವಾ ರಾತ್ರಿ ಆಗೇಯೇ ಬಿಡಿ. ಅದು ಮಾರನೆದಿನ ಬೆಳಗ್ಗೆ ಹೊತ್ತಿಗೆ ಹುಳಿ/ಹುಬ್ಬಿ ಬಂದಿರುತ್ತದೆ. ಹೀಗೆ ಹುಳಿ/ಹುದುಗು ಬಂದರೆ ದೋಸೆ ಚೆನ್ನಾಗಿರುತ್ತದೆ. ಬೆಳಗ್ಗೆ ಉಪ್ಪು ಮತ್ತು ಸೋಡ ಸೇರಿಸಿ,ಚೆನ್ನಾಗಿ ಬೆರೆಸಿ ಅರ್ಧ ಗಂಟೆ ಬಿಟ್ಟು ತವಾ ಒಲೆಯ ಮೇಲಿಟ್ಟು,ಕಾಯಿಸಿ,ತುಪ್ಪ /ಎಣ್ಣೆ ಹಾಕಿ ಸವರಿ,ಅದರ ಮೇಲೆ ಒಂದು ಸೌಟು ರುಬ್ಬಿದ ಮಿಶ್ರಣವನ್ನು ಹಾಕಿ ದೋಸೆಯಂತೆ ಮಾಡಿ,ಬೇಯಿಸಿ ತೆಗೆಯಿರಿ. ಇದೇ ರೀತಿ ಎಷ್ಟು ಬೇಕೋ ತಯಾರಿಸಿಕೊಳ್ಳಿ. ದೋಸೆಯೊಂದಿಗೆ ಸಾಗು ತುಂಬಾ ಚೆನ್ನಾಗಿರುತ್ತದೆ.
***********************************
ಸಾಗು ತಯಾರಿಸುವ ಬಗೆ;

ತರಕಾರಿ ಸಾಗು:

ಸಾಮಗ್ರಿಗಳು:

ತರಕಾರಿಗಳು ನಿಮ್ಮ ಇಷ್ಟ--
ಕ್ಯಾರೆಟ್,ಹುರುಳಿಕಾಯಿ,ಬಟಾಣಿ
ಹೂಕೋಸು, ಎಲೆಕೋಸು,ಹೀರೆಕಾಯಿ
ಬದನೆಕಾಯಿ,ಆಲೂಗೆಡ್ಡೆ,ಟಮೋಟ
ಕಾರ್ನ್ ( ಮೆಕ್ಕೆಜೋಳದ ಕಾಳುಗಳು)-ಕ್ಯಾನ್ ಅಥವ ಫ್ರೆಶ್
ಅಚ್ಚ ಖಾರದ ಪುಡಿ
ಧನಿಯ ಪುಡಿ
ಸಾರಿನಪುಡಿ
ಗರಂಮಸಾಲಾ
ಈರುಳ್ಳಿ
ಎಣ್ಣೆ,ಸಾಸಿವೆ,ಜೀರಿಗೆ
ಕರಿಬೇವು, ಅರಿಸಿನ
ಉಪ್ಪು,
ಕಾಯಿತುರಿ / ಕೊಬ್ರಿತುರಿ
ಕೊತ್ತುಂಬರಿಸೊಪ್ಪು

ವಿಧಾನ:

ಬಟಾಣಿಯನ್ನು ಬಿಟ್ಟು ಮಿಕ್ಕ ಎಲ್ಲಾ ತರಕಾರಿಗಳನ್ನು ಹೆಚ್ಚಿಕೊಳ್ಳಿ.
ಕುಕ್ಕರ್ ನಲ್ಲಿ ಸ್ವಲ್ಪ ಎಣ್ಣೆಯನ್ನು ಹಾಕಿ,ಕಾದ ಬಳಿಕ ಸಾಸಿವೆ,ಜೀರಿಗೆ ,ಈರುಳ್ಳಿ ಹಾಕಿ ಒಂದೆರಡು ನಿಮಿಷ ಹುರಿದು, ಹೆಚ್ಚಿದ ತರಕಾರಿಗಳನ್ನು ಹಾಕಿ, ಚೆನ್ನಾಗಿ ಬೆರೆಸಿ,ಕೆಲವು ನಿಮಿಷ ತಿರುಗಿಸಿ ಬಟಾಣಿಕಾಳುಗಳನ್ನು ಹಾಕಿ ಅದನ್ನು ಬೆರೆಸಿ, ಒಂದೆರಡು ನಿಮಿಷದ ನಂತರ ಅರಿಸಿನ,ಕರಿಬೇವು,ಕಾರದಪುಡಿ,ಧನಿಯಾಪುಡಿ,ಸ್ವಲ್ಪ ಸಾರಿನಪುಡಿ ಮತ್ತು ಉಪ್ಪು ಹಾಕಿ, ಚೆನ್ನಾಗಿ ತಿರುಗಿಸಿ, ಅಗತ್ಯವಿರುವಷ್ಟು ನೀರು ಹಾಕಿ ಉಪ್ಪು,ಕಾಯಿತುರಿ/ಕೊಬ್ರಿತುರಿ ಮತ್ತು ಸ್ವಲ್ಪ ಕೊತ್ತುಂಬರಿಸೊಪ್ಪನ್ನು ಹಾಕಿ ಎಲ್ಲವನ್ನು ಸರಿಯಾಗಿ ಬೆರೆಸಿ, ಗರಂಮಸಾಲ ಸಹ ಹಾಕಿ ತಿರುಗಿಸಿ. ಮುಚ್ಚಳ ಹಾಕಿ. ಬೇಯಿಸಿ. ತರಕಾರಿಗಳನ್ನು ತುಂಬಾ ಬೇಯಿಸಬಾರದು. ನೋಡಿಕೊಂಡು ಒಲೆಯಿಂದ ಇಳಿಸಿ.
ಮತ್ತೆ ಕೊತ್ತುಂಬರಿಸೊಪ್ಪನ್ನು ಹಾಕಿ ತಿರುಗಿಸಿ. ತರಕಾರಿ ಸಾಗು ತಯಾರಾಗುತ್ತದೆ.

ಈ ದೋಸೆಗಳ ಜೊತೆ ಆಲೂಗೆಡ್ಡೆ ಪಲ್ಯ ಮತ್ತು ಚಟ್ನಿಯನ್ನು ಕೊಡಿ.

ಜೀರಿಗೆ ಮತ್ತು ಶುಂಠಿ ಪಾನೀಯ/ CuminGinger juice

ಜೀರಿಗೆ ಮತ್ತು ಶುಂಠಿ ಎರಡು ಆರೋಗ್ಯಕ್ಕೆ ತುಂಬಾ ಉಪಯುಕ್ತವಾಗಿವೆ. ಅದರ ಪಾನೀಯವನ್ನು ಆಗಾಗ್ಗೆ ಸೇವಿಸುವುದರಿಂದ ಅನೇಕ ತೊಂದರೆಗಳಿಗೆ ಅನುಕೂಲವಾಗುತ್ತದೆ.

ಜೀರಿಗೆ ಮತ್ತು ಶುಂಠಿ ಪಾನೀಯ /ಪಾನಕ;

ಸಾಮಾನುಗಳು:
ಕುಟ್ಟಿದ ಜೀರಿಗೆ ಸ್ವಲ್ಪ
ಜಜ್ಜಿದ ಶುಂಠಿ ಸ್ವಲ್ಪ
ನಿಂಬೆರಸ ಒಂದು ಚಮಚ
ಜೇನುತುಪ್ಪ

ವಿಧಾನ:
ಒಂದು ಲೋಟ ನೀರಿಗೆ ಜಜ್ಜಿದ ಶುಂಠಿ ಮತ್ತು ಕುಟ್ಟಿದ ಜೀರಿಗೆ ಹಾಕಿ ಕುದಿಸಿ, ಸೋಸಿ, ನಿಂಬೆರಸ ಮತ್ತು ಜೇನುತುಪ್ಪವನ್ನು ಬೆರೆಸಿ. ಸೇವಿಸಿ.
*ಕಾಳು ಮೆಣಸಿನ ಪುಡಿ ಬೇಕಾದವರು ಸೇರಿಸಿಕೊಳ್ಳಬಹುದು.

Kidney Beans Masala Curry - ಬೀನ್ಸ್ ಕಾಳು ಸಾರು:

ಹುರುಳೀಕಾಯಿ ಕಾಳುಗಳು ಹಸಿಯಾಗಿಯೂ ಸಿಗುತ್ತವೆ . ಒಣಗಿದ ಕಾಳುಗಳು ಸಿಗುತ್ತವೆ. ಅದರಲ್ಲಿ ವಿವಿಧ ಬಣ್ಣಗಳಿವೆ, ಬಿಳಿ ಮತ್ತು ಕೆಂಪು ಹೆಚ್ಚಾಗಿವೆ. ಈ ಕಾಳುಗಳು ಹುರುಳಿಕಾಯಿ ಎಂದು ಮಾರ್ಕೆಟ್ ಗಳಲ್ಲಿ ಸಿಗುತ್ತವೆ. ಹಸಿಕಾಳುಗಳು ತುಂಬಾ ರುಚಿಯಾಗಿರುತ್ತವೆ. ಒಣಗಿದ ಕಾಳುಗಳು ಪರವಾಗಿಲ್ಲ. ಒಣಗಿದ ಕಾಳುಗಳು ಉಪಯೋಗಿಸುವುದಾದರೆ ಚೆನ್ನಾಗಿ ನೆನೆಸಿಡಬೇಕು.

ಬೀನ್ಸ್ ಕಾಳು ಸಾರು:

ಬೇಕಾಗುವ ಸಾಮಗ್ರಿಗಳು:

ಹುರುಳೀಕಾಯಿ ಕಾಳು (ಬೀನ್ಸ್ ಕಾಳು)- ಎರಡು ಬಟ್ಟಲು
ತೆಂಗಿನಕಾಯಿ -ಅರ್ಧ ಬಟ್ಟಲು
ಈರುಳ್ಳಿ- ಎರಡು
ಬೆಳ್ಳುಳ್ಳಿ- ನಾಲ್ಕೈದು ಎಸಳು
ಶುಂಠಿ -ಒಂದಿಂಚು
ಹಸಿಮೆಣಸಿನಕಾಯಿ - ಒಂದು
ಹುರಿಗಡಲೆ ಸ್ವಲ್ಪ
ಗಸಗಸೆ-ಒಂದು ಚಿಕ್ಕ ಚಮಚ
ಅಚ್ಚಖಾರದ ಪುಡಿ
ಧನಿಯಾ ಪುಡಿ
ಚೆಕ್ಕೆ,ಲವಂಗ,ಏಲಕ್ಕಿ,ಮೊಗ್ಗು,ಮೆಣಸು
ಕೊತ್ತುಂಬರಿ ಸೊಪ್ಪು
ಪುದೀನ ಸೊಪ್ಪು
ತರಕಾರಿ-
ಆಲೂಗೆಡ್ಡೆ,ಬದನೆಕಾಯಿ,ಹೂಕೋಸು
ಟಮೋಟೊ - ಎರಡು,ಹೆಚ್ಚಿಕೊಳ್ಳಿ
ಉಪ್ಪು
ಎಣ್ಣೆ

ತಯಾರಿಸುವ ವಿಧಾನ:
ಹುರುಳೀಕಾಯಿಕಾಳು (ಬೀನ್ಸ್ ಕಾಳು) ತಾಜಾ ಅಥವ ಕ್ಯಾನ್ ಅಥವ ಫ್ರೋಜನ್ ಕಾಳುಗಳಾದರೆ, ಆಗೇ ತಯಾರಿಸಬಹುದು, ಆದರೆ ಒಣಗಿದ ಕಾಳುಗಳಾದರೆ, ಹಿಂದಿನ ರಾತ್ರಿಯೇ ನೆನೆಸಿಡಬೇಕು.

ಮಸಾಲೆ ತಯಾರಿಸಲು:
ಈರುಳ್ಳಿಯನ್ನು ಸುಮಾರಾಗಿ ಹೆಚ್ಚಿಕೊಂಡು ಅದನ್ನು ಬೆಳ್ಳುಳ್ಳಿ ಮತ್ತು ಶುಂಠಿಯೊಂದಿಗೆ ಒಂದು ಚಮಚ ಎಣ್ಣೆಯನ್ನು ಹಾಕಿ ಹುರಿದುಕೊಳ್ಳಿ. ಅದಕ್ಕೆ ಚೆಕ್ಕೆ, ಲವಂಗ,ಏಲಕ್ಕಿ,ಮೊಗ್ಗು,ಮೆಣಸು,ಹಸಿಮೆಣಸಿನಕಾಯಿ,ಪುದೀನ ಸೊಪ್ಪು ಮತ್ತು ಕೊತ್ತುಂಬರಿಸೊಪ್ಪು ಕೂಡ ಹಾಕಿ ಒಂದೆರಡು ನಿಮಿಷ ಹುರಿದುಕೊಳ್ಳಿ. ಹುರಿದ ಈ ಮಿಶ್ರಣದ ಜೊತೆಗೆ ಟಮೋಟೊ,ಹುರಿಗಡಲೆ,ಅಚ್ಚಖಾರದ ಪುಡಿ,ಧನಿಯಾಪುಡಿ,ಗಸಗಸೆ ಮತ್ತು ತೆಂಗಿನಕಾಯಿ ತುರಿ ಎಲ್ಲವನ್ನೂ ಸೇರಿಸಿ, ನುಣ್ಣಗೆ ರುಬ್ಬಿಕೊಳ್ಳಿ. ಮಸಾಲೆ ರೆಡಿಯಾಯಿತು.

ಮೊದಲು ಪಾತ್ರೆಗೆ ಸ್ವಲ್ಪ ಎಣ್ಣೆಯನ್ನು ಹಾಕಿ,ಅದಕ್ಕೆ ಚಿಟಿಕೆ ಸಾಸಿವೆ ಹಾಕಿ,ಚಟಪಟ ಅಂದ ಮೇಲೆ ತರಕಾರಿ ಹಾಕಿ,ಒಂದೆರಡು ನಿಮಿಷ ಹುರಿದು, ಕಾಳುಗಳನ್ನು ಹಾಕಿ ಅದನ್ನು ಐದು/ಆರು ನಿಮಿಷ ಹುರಿದು,ಅರಿಶಿಣ,ಉಪ್ಪು ಮತ್ತು ರುಬ್ಬಿದ ಮಸಾಲೆ ಹಾಕಿ ಚೆನ್ನಾಗಿ ತಿರುವಿ,ಉಪ್ಪು ಮತ್ತು ಕಾರ ನಿಮ್ಮ ರುಚಿಗೆ ತಕ್ಕಷ್ಟು ಬೆರೆಸಿ,ನೀರು ಹಾಕಿ ಮುಚ್ಚಿಟ್ಟು ಬೇಯಿಸಿ.ಕಾಳುಗಳು ಬೇಯುವವರೆಗು ಬೇಯಿಸಿ.ಇಳಿಸಿ ಬೀನ್ಸ್ ಕಾಳು ಸಾರು ತಯಾರಾಗುತ್ತದೆ. ಇದನ್ನು ಬಿಳಿಅನ್ನ,ಚಪಾತಿ,ಪೂರಿ,ಪರೋಟ ಅಥವಾ ರೊಟ್ಟಿ ಯಾವುದರೊಂದಿಗಾದರೂ ಸರ್ವ್ ಮಾಡಿ.ಈ ಮಸಾಲೆ ಸಾರಿಗೆ ರಾಗಿಮುದ್ದೆ ಕೂಡಾ ಚೆನ್ನಾಗಿರುತ್ತದೆ. ಈ ರೀತಿ ಮಸಾಲೆ ಸಾರುಗಳು ಸ್ವಲ್ಪ ಖಾರವಾಗಿದ್ದರೆ ತುಂಬಾ ಚೆನ್ನಾಗಿರುತ್ತದೆ.

* ಕುಕ್ಕರ್ ನಲ್ಲಿಯಾದರೆ ಒಂದು ಕೂಗು ಸಾಕು.ಅದರಲ್ಲಿ ಬೇಗ ಬೇಯುತ್ತದೆ ಕಾಳುಗಳು.ಸಾರಿಗೆ ನೀರು ನಿಮಗೆ ಹೇಗೆ ಬೇಕೋ ಸೇರಿಸಿಕೊಳ್ಳಿ.ಅನ್ನಕ್ಕೆ ಸ್ವಲ್ಪ ತೆಳು ಮಾಡಿಕೊಳ್ಳಿ. ಬೇರೆ ಸೈಡ್ ಡಿಶ್ ಗಾದರೆ ಗಟ್ಟಿಯಾಗಿ ತಯಾರಿಸಿ..

Nuggekaayi saaru/ Drumstick samber

ನುಗ್ಗೆಕಾಯಿ ಸಾರು/ಸಾಂಬಾರ್:

ಬೇಕಾಗುವ ಸಾಮಗ್ರಿಗಳು:

ನುಗ್ಗೆಕಾಯಿ - 2 ಅಥವ 3 ಇಂಚಿನಷ್ಟು ಕತ್ತರಿಸಿಕೊಳ್ಳಿ
ತೊಗರಿಬೇಳೆ - 1 ಬಟ್ಟಲು
ಈರುಳ್ಳಿ ಹೆಚ್ಚಿದ್ದು ಸ್ವಲ್ಪ
ಟಮೋಟ ಹೆಚ್ಚಿದ್ದು ಸ್ವಲ್ಪ
ಹುಣಸೆರಸ ಒಂದು ಚಮಚ
ಸಾಂಬಾರ್ / ಸಾರಿನ ಪುಡಿ ರುಚಿಗೆ
ಉಪ್ಪು ರುಚಿಗೆ
ಎಣ್ಣೆ, ಸಾಸಿವೆ
ಅರಿಶಿಣ
ಇಂಗು ಕರಿಬೇವಿನ ಸೊಪ್ಪು

ತಯಾರಿಸುವ ರೀತಿ:

ಮೊದಲು ತೊಗರಿಬೇಳೆಯನ್ನು ನೀರು ,ಅರಿಶಿಣ ಮತ್ತು ಒಂದು ಚಮಚ ಎಣ್ಣೆ ಹಾಕಿ,ಬೇಯಿಸಿಕೊಂಡು ಅದಕ್ಕೆ ನುಗ್ಗೆಕಾಯಿ, ಟಮೋಟ, ಹುಣಸೆರಸ, ಸಾಂಬಾರ್ ಪುಡಿ ಮತ್ತು ಉಪ್ಪು ಹಾಕಿ ನುಗ್ಗೆಕಾಯಿ ಬೇಯುವವರೆಗೂ ಬೇಯಿಸಿ, ಸಾರಿನ ಹದಕ್ಕೆ ತಕ್ಕಂತೆ ನೀರು ಬೆರೆಸಿಕೊಳ್ಳಿ. ಕಾಯಿ ಸ್ವಲ್ಪ ಗಟ್ಟಿಯಾಗಿರುವಾಗಲೆ ಇಳಿಸಿ. ಇದಕ್ಕೆ ಒಗ್ಗರಣೆ ಹಾಕಿ ಬೆರೆಸಿ.

ಒಗ್ಗರಣೆಗೆ- ಪುಟ್ಟ ಪಾತ್ರೆಯಲ್ಲಿ ಒಂದೆರಡು ಚಮಚ ಎಣ್ಣೆಯನ್ನು ಬಿಸಿಮಾಡಿ ಸಾಸಿವೆ ಹಾಕಿ ಚಟಪಟ ಸಿಡಿದ ನಂತರ ಕರಿಬೇವು, ಇಂಗು ಮತ್ತು ಈರುಳ್ಳಿ ಹಾಕಿ ಚೆನ್ನಾಗಿ ಬೆರೆಸಿ. ಒಂದೆರಡು ನಿಮಿಷ ಬಾಡಿಸಿದ ನಂತರ ಅದನ್ನು ಸಾರಿಗೆ ಬೆರೆಸಿ. ನುಗ್ಗೆಕಾಯಿ ಸಾರು ಸಿದ್ಧ. ಇದನ್ನು ಅನ್ನದ ಜೊತೆ ಕೊಡಿ.

*-ನುಗ್ಗೆಕಾಯಿಯನ್ನು ಮೊದಲೆ ಬೇರೆ ಪಾತ್ರೆಯಲ್ಲಿ ಬೇಯಿಸಿ ಕೂಡ ಹಾಕಬಹುದು, ಇದು ಬೇಯಲು ಹೆಚ್ಚು ಸಮಯ ತೆಗೆದುಕೊಳ್ಳುವುದಿಲ್ಲ. ಮೈಕ್ರೋವೆವ್ ಇರುವವರು ಅದರಲ್ಲಿ ಬೇಯಿಸಿಕೊಳ್ಳಬಹುದು, ಇದು ಬಹಳ ಸುಲಭ ಮತ್ತು ಬೇಗ ಆಗುತ್ತದೆ. ತುಂಬಾ ಕುಕ್ ಮಾಡಿದರೆ ನುಗ್ಗೆಕಾಯಿಗಳು ಒಡೆದು ಹೋಗುತ್ತವೆ. ನೋಡಿಕೊಂಡು ಬೇಯಿಸಿಕೊಳ್ಳಿ.

*- ಕಾಯಿ ಬೇಯಿಸಿ ಹಾಕಿದರೆ ಬೇಳೆ ಜೊತೆ ಹಾಕಿದಾಗ ಒಂದೆರಡು ಕುದಿ ಕುದ್ದ ಮೇಲೆ ಸ್ಟೌವ್ ಆಫ್ ಮಾಡಿ.

Carrot Salad / carrot kosumabari-ಕ್ಯಾರೆಟ್ ಕೋಸುಂಬರಿ

ಕ್ಯಾರೆಟ್ ಕೋಸುಂಬರಿ:

ಸಾಮಗ್ರಿಗಳು:

ಕ್ಯಾರೆಟ್ ತುರಿದಿದ್ದು
ಈರುಳ್ಳಿ ಸಣ್ಣಗೆ ಹೆಚ್ಚಿದ್ದು
ಹಸಿಮೆಣಸಿನ ಕಾಯಿ ಪೇಸ್ಟ್ ಅಥವ ಸಣ್ಣಗೆ ಹೆಚ್ಚಿದ್ದು
ಕಾಯಿತುರಿ ಬೇಕಾದರೆ
ಕೊತ್ತುಂಬರಿ ಸೊಪ್ಪು ಹೆಚ್ಚಿದ್ದು ಸ್ವಲ್ಪ

ಉಪ್ಪು ರುಚಿಗೆ

ತಯಾರಿಸುವ ವಿಧಾನ:
ಉಪ್ಪು ಮಾತ್ರ ಬಿಟ್ಟು ಎಲ್ಲಾ ಸಾಮಗ್ರಿಗಳನ್ನು ಹಾಕಿ ಚೆನ್ನಾಗಿ ಬೆರೆಸಿ, ಉಪ್ಪನ್ನು ನೀಡುವಾಗ ಬೆರೆಸಿ ಕೊಡಿ. ಇದು ಅತೀ ಸುಲಭ ಕೋಸುಂಬರಿ ಮತ್ತು ರುಚಿ ಕೂಡ ಹಾಗೂ ಹಸಿಯಾಗಿ ಕ್ಯಾರೆಟ್ ಸೇವಿಸುವುದರಿಂದ ಆರೋಗ್ಯಕ್ಕೂ ಉತ್ತಮ.

Cucumber Lassi-ಸೌತೆಕಾಯಿ ಲಸ್ಸಿ

ಸೌತೆಕಾಯಿ ಲಸ್ಸಿ / ಪಾನೀಯ:

ಬೇಕಾಗುವ ಸಾಮಗ್ರಿಗಳು:

ಒಂದು ಸೌತೆಕಾಯಿ ತುರಿದಿದ್ದು/ ಹೆಚ್ಚಿದ್ದು - ಎರಡು ಚಮಚ
ಒಂದು ಬಟ್ಟಲು ಮೊಸರು
ಹಸಿಮೆಣಸಿನಕಾಯಿ - ಒಂದು
ಕೊತ್ತುಂಬರಿ ಸೊಪ್ಪು ಹೆಚ್ಚಿದ್ದು ಸ್ವಲ್ಪ
ಜೀರಿಗೆ ಕಾಲು ಚಮಚ
ಉಪ್ಪು ರುಚಿಗೆ

ತಯಾರಿಸುವ ರೀತಿ:

ಮೇಲೆ ತಿಳಿಸಿರುವ ಎಲ್ಲಾ ಸಾಮಗ್ರಿಗಳನ್ನು ಮಿಕ್ಸಿಗೆ ಹಾಕಿ, ರುಬ್ಬಿ.
ತಂಪಾದ ಪಾನೀಯ ತಯಾರಾಗುತ್ತದೆ. ಇದು ರುಚಿಯಾಗಿ ಕೂಡ ಇರುತ್ತದೆ. ಆರೋಗ್ಯಕ್ಕೂ ಒಳ್ಳೆಯದು.

Puris / ಪೂರಿ

ಪೂರಿ:

ಬೇಕಾಗುವ ಸಾಮಗ್ರಿಗಳು:

ಮೈದಾ ಹಿಟ್ಟು - ಒಂದು ಬಟ್ಟಲು

ಗೋಧಿಹಿಟ್ಟು - ಒಂದು ಬಟ್ಟಲು
ಸ್ವಲ್ಪ ಉಪ್ಪು
ಡಾಲ್ಡ ಅಥವ ವೆಜಿಟಬಲ್ ತುಪ್ಪ- ಒಂದು ದೊಡ್ಡ ಚಮಚ

ತಯಾರಿಸುವ ರೀತಿ:

ಮೈದಾಹಿಟ್ಟು,ಗೋಧಿಹಿಟ್ಟು,ಉಪ್ಪು ಮತ್ತು ಡಾಲ್ಡ ಹಾಕಿ, ಎಲ್ಲವನ್ನೂ ಚೆನ್ನಾಗಿ ಬೆರೆಸಿ,ಅವಶ್ಯಕತೆ ಇರುವಷ್ಟು ನೀರು ಹಾಕಿ, ಚಪಾತಿ ಹಿಟ್ಟಿನ ಹದಕ್ಕಿಂತ ಸ್ವಲ್ಪ ಗಟ್ಟಿಯಾಗಿ ಕಲೆಸಿ,ಚೆನ್ನಾಗಿ ನಾದಿ,ಹದಿನೈದು ನಿಮಿಷ ಬಿಡಿ. ನಂತರ ಹಿಟ್ಟಿನಿಂದ ಚಿಕ್ಕ ಚಿಕ್ಕ ಉಂಡೆ ಮಾಡಿಕೊಂಡು ಪುಟ್ಟ ಪುಟ್ಟ ಚಪಾತಿಯಂತೆ ಲಟ್ಟಿಸಿ, ಅದನ್ನು ಮಧ್ಯಮ ಉರಿಯಲ್ಲಿ ಕಾಯಿಸಿರುವ ಎಣ್ಣೆಯಲ್ಲಿ ಬೇಯಿಸಿ.ಹೊಂಬಣ್ಣ ಬರುವವರೆಗೂ ಕರಿಯಿರಿ ಅಥವಾ ಬೆಂದಿದೆ ಎನಿಸಿದ ತಕ್ಷಣ ಎಣ್ಣೆಯಿಂದ ತೆಗೆದು ಅಗಲವಾದ ತಟ್ಟೆಗೆ ಹಾಕಿ. ಪೂರಿಯನ್ನು ಯಾವುದಾದರು ಗೊಜ್ಜು / ಚಟ್ನಿ / ಪಲ್ಯ ಜೊತೆ ತಿನ್ನಲು ನೀಡಿ. ಮಕ್ಕಳಿಗೆ ಪ್ರಿಯವಾದ ಪೂರಿ ತಯಾರ್.

Kidney Beans Sabji - ಹುರುಳೀಕಾಯಿಕಾಳು ಉಸಲಿ:

ಹುರುಳೀಕಾಯಿಕಾಳು ಉಸಲಿ:
ನಮ್ಮ ದೇಶದಲ್ಲಿ ಹುರುಳೀಕಾಯಿಕಾಳು ಸುಮಾರು ಬಣ್ಣಗಳಲ್ಲಿ ಬರುತ್ತದೆ. ಇದು ಹುರುಳಿಕಾಯಿಯಲ್ಲಿ ಸಿಗುತ್ತದೆ, ಇದು ಸಿಪ್ಪೆ ಸಮೇತ ಸಿಗುತ್ತದೆ. ಅಲ್ಲದೇ ಒಣಗಿದ ಕಾಳುಗಳು ಸಿಗುತ್ತವೆ ಮತ್ತು ಈಗ ಕ್ಯಾನ್ ನಲ್ಲಿ ಸಹ ಸಿಗುತ್ತದೆ.ಎಲ್ಲಕ್ಕಿಂತ ಹಸಿಕಾಳಿನಕಾಯಿ ತಂದು ಕಾಳು ಬಿಡಿಸಿ ಮಾಡುವುದು ಹೆಚ್ಚು ರುಚಿಯಾಗಿರುತ್ತದೆ ಮತ್ತು ಬೇಗ ಬೇಯುತ್ತದೆ. ಕ್ಯಾನ್ ನಲ್ಲಿ ಕೂಡ ಬಿಳಿ ಕಿಡ್ನಿ ಬೀನ್ಸ್ ಮತ್ತು ಕೆಂಪು ಕಿಡ್ನಿ ಬೀನ್ಸ್ ಗಳು ಸಿಗುತ್ತವೆ.

ಸಾಮಗ್ರಿಗಳು:

ಹುರುಳೀಕಾಯಿಕಾಳು ಒಂದು ಬಟ್ಟಲು
ಹೆಚ್ಚಿದ ಈರುಳ್ಳಿ ಸ್ವಲ್ಪ
ಹೆಚ್ಚಿದ ಹಸಿಮೆಣಸಿನಕಾಯಿ
ಎಣ್ಣೆ, ಸಾಸಿವೆ
ಕರಿಬೇವು
ಉಪ್ಪು ರುಚಿಗೆ
ಕೊತ್ತುಂಬರಿಸೊಪ್ಪು
ಕಾಯಿತುರಿ

ವಿಧಾನ:

ಹುರುಳೀಕಾಳನ್ನು ಬಿಡಿಸಿಕೊಂಡು ಕುಕ್ಕರ್ ಗೆ ಕಾಳುಗಳನ್ನು ಹಾಕಿ ಒಂದು ಲೋಟ ನೀರು ಹಾಕಿ,ಉಪ್ಪು ಮತ್ತು ಎಣ್ಣೆ ಸ್ವಲ್ಪ ಹಾಕಿ.ಬೇಯಿಸಿಕೊಳ್ಳಿ. ನೀರು ಜಾಸ್ತಿ ಹಾಕಿದ್ದರೆ ನೀರು ಬಸಿಯಿರಿ. ನೀರು ಎಷ್ಟು ಬೇಕೋ ಅಷ್ಟು ಮಾತ್ರ ಹಾಕಿ,ಕಾಳುಗಳು ಕರಗದಂತೆ ಗಟ್ಟಿಯಾಗಿ ಬೇಯಿಸಿಕೊಳ್ಳಿ.
ಪಾತ್ರೆ/ಬಾಣಲೆಗೆ ಒಂದೆರಡು ಚಮಚ ಎಣ್ಣೆ ಹಾಕಿ,ಸಾಸಿವೆ,ಕರಿಬೇವು,ಹಸಿಮೆಣಸಿನಕಾಯಿ,ಈರುಳ್ಳಿಯನ್ನು ಹಾಕಿ,ಕೆಲವು ನಿಮಿಷ ಹುರಿಯಿರಿ,ಈರುಳ್ಳಿಯೂ ಸ್ವಲ್ಪ ಬಣ್ಣ ನಂತರ ಚಿಟಿಕೆ ಉಪ್ಪು ಹಾಕಿ ,ಬೇಯಿಸಿರುವ ಕಾಳನ್ನು ಹಾಕಿ,ಎಲ್ಲವನ್ನು ಚೆನ್ನಾಗಿ ಬೆರೆಸಿ. ಕಾಯಿತುರಿ ಮತ್ತು ಕೊತ್ತುಂಬರಿ ಸೊಪ್ಪನ್ನು ಹಾಕಿ ಸರಿಯಾಗಿ ಬೆರೆಸಿ.ಇಳಿಸಿ,ಇದನ್ನು ಊಟಕ್ಕೆ ನೆಂಚಿಕೊಳ್ಳಲು ಚೆನ್ನಾಗಿರುತ್ತದೆ.
*ಕ್ಯಾನ್ ಬೀನ್ಸ್ ಉಪಯೋಗಿಸುವುದಾದರೆ ಬೇಯಿಸದೆ,ಕಾಳುಗಳಿಗೆ ನೇರವಾಗಿ ಒಗ್ಗರಣೆಯನ್ನು ಬೆರೆಸಿ,ಕೆಲವು ನಿಮಿಷ ಅದರಲ್ಲೆ ಹುರಿದು ಚೆನ್ನಾಗಿ ಬೆರೆಸಿ.

Capsicum Aloo Masala / ಆಲೂಗೆಡ್ಡೆ ಮಸಾಲೆ:

ದಪ್ಪಮೆಣಸಿನಕಾಯಿ ಮತ್ತು ಆಲೂಗೆಡ್ಡೆ ಮಸಾಲೆ:

ಬೇಕಾಗುವ ಸಾಮಗ್ರಿಗಳು:

ಈರುಳ್ಳಿ - ಸಣ್ಣಗೆ ಹೆಚ್ಚಿದ್ದು

ಬೆಳ್ಳುಳ್ಳಿ ಮತ್ತು ಶುಂಠಿ ಪೇಸ್ಟ್ - 1 ಚಮಚ

ಆಲೂಗೆಡ್ಡೆ ಮತ್ತು ದಪ್ಪ ಮೆಣಸಿನಕಾಯಿ - ಹೆಚ್ಚಿಕೊಳ್ಳಿ( ಸ್ವಲ್ಪ ದಪ್ಪ ಇರಲಿ-ಪೀಸ್ ಗಳು)

ಟೋಮೋಟೋ ಪ್ಯೂರಿ -2 ಚಮಚ

ಗೋಡಂಬಿ ಪೇಸ್ಟ್ ಸ್ವಲ್ಪ

ದಪ್ಪ ಮೆಣಸಿನಕಾಯಿ ಹೋಳುಗಳು ಸ್ವಲ್ಪ

ಧನಿಯಾಪುಡಿ - 2 ಚಮಚ

ಅಚ್ಚಕಾರದ ಪುಡಿ

ಗರಂ ಮಸಾಲ - 1 ಚಮಚ

ಕೊತ್ತುಂಬರಿ ಸೊಪ್ಪು ಹೆಚ್ಚಿದ್ದು

ಉಪ್ಪು
ಎಣ್ಣೆ - 2ಚಮಚ

ತಯಾರಿಸುವ ರೀತಿ:

ಮೊದಲು ತವಾ ಬಿಸಿ ಮಾಡಿ ಅದಕ್ಕೆ ಎಣ್ಣೆ ಹಾಕಿ ಕಾದ ಮೇಲೆ ಈರುಳ್ಳಿ ಹಾಕಿ ಬಾಡಿಸಿ, ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಹಾಕಿ, ಒಂದೆರಡು ನಿಮಿಷ ಹುರಿದು ಧನಿಯಾಪುಡಿ,ಗರಂಮಸಾಲಾ ಮತ್ತು ಟಮೋಟ ಫ್ಯೂರಿ ಹಾಕಿ ಬಾಡಿಸಿ, ಆಲೂಗೆಡ್ಡೆ ತುಂಡುಗಳನ್ನು ಹಾಕಿ, ಐದಾರು ನಿಮಿಷ ಚೆನ್ನಾಗಿ ಬಾಡಿಸಿ ಮತ್ತು ಗೋಡಂಬಿ ಪೇಸ್ಟ್, ದಪ್ಪ ಮೆಣಸಿನಕಾಯಿ ಹಾಕಿ ಒಂದೆರಡು ನಿಮಿಷ ಹುರಿದು ನಂತರ ಅಚ್ಚಮೆಣಸಿನಪುಡಿ,ಉಪ್ಪು, ಕೊತ್ತುಂಬರಿ ಸೊಪ್ಪು ಸ್ವಲ್ಪ ಹಾಕಿ, ಎಲ್ಲವನ್ನು ಚೆನ್ನಾಗಿ ಬೆರೆಸಿ, ಕಾಲು ಕಪ್ ನೀರು ಹಾಕಿ ಬೇಯಲು ಬಿಡಿ. ಆಲೂ ಮತ್ತು ಮೆಣಸಿನಕಾಯಿ ಬೆಂದು ಅದರ ನೀರು ಎಲ್ಲಾ ಡ್ರೈ ಆದ ಮೇಲೆ ಮತ್ತೆ ಸ್ವಲ್ಪ ಕೊತ್ತುಂಬರಿ ಸೊಪ್ಪು ಹಾಕಿ, ಚೆನ್ನಾಗಿ ಬೆರೆಸಿ.ಇದನ್ನು ಚಪಾತಿ,ಪೂರಿ,ಪರೋಟ ಅಥವಾ ಊಟಕ್ಕೆ ನೆಂಚಿಕೊಳ್ಳಲು ನೀಡಬಹುದು.

* ಉಪ್ಪು ಮತ್ತು ಕಾರ ನಿಮ್ಮ ರುಚಿಗೆ ತಕ್ಕಂತೆ ಬೆರೆಸಿಕೊಳ್ಳಿ.

* ಈ ಮಸಾಲ ತುಂಬಾ ತೆಳ್ಳಗೆ ಇರುವುದಿಲ್ಲ. ಮಸಾಲೆ ಸ್ವಲ್ಪ ಗಟ್ಟಿಯಾಗಿದ್ದರೆ ಚೆನ್ನಾಗಿರುತ್ತದೆ.

* ತರಕಾರಿಗಳನ್ನು ಬಹಳ ಬೇಯಿಸಬಾರದು.

Onion Pakoda / Erulli pakoda-ಈರುಳ್ಳಿ ಪಕೋಡ:

ಈರುಳ್ಳಿ ಪಕೋಡ:

ಬೇಕಾಗುವ ಸಾಮಗ್ರಿಗಳು:

ಈರುಳ್ಳಿ - ಎರಡು ದೊಡ್ಡದು

ಕಡ್ಲೆಹಿಟ್ಟು - ಒಂದು ಕಪ್
ಖಾರದ ಪುಡಿ ( ಅಚ್ಚ ಮೆಣಸಿನ ಪುಡಿ) - ರುಚಿಗೆ ತಕ್ಕಷ್ಟು
ಉಪ್ಪು - ರುಚಿಗೆ ತಕ್ಕಷ್ಟು
ಓಮಕಾಳು - ಅರ್ಧ ಚಮಚ( ಬೇಕಾದರೆ)
ಚಿಟಿಕೆ ಅಡಿಗೆ ಸೋಡಾ
ಕರಿಯಲು ಎಣ್ಣೆ

ತಯಾರಿಸುವ ವಿಧಾನ:

ಮೊದಲು ಈರುಳ್ಳಿಯನ್ನು ಅರ್ಧಕ್ಕೆ ಕತ್ತರಿಸಿ ಉದ್ದಕ್ಕೆ ಹೆಚ್ಚಿಕೊಳ್ಳಿ ಅಥವಾ ಮಧ್ಯಕ್ಕೆ ಕತ್ತರಿಸಿ ಸ್ಲೈಸ್ ಮಾಡಿಕೊಂಡು ಅದನ್ನು ಬೇರ್ಪಡಿಸಿಟ್ಟುಕೊಳ್ಳಿ.

ನಂತರ ಒಂದು ಪಾತ್ರೆಗೆ ಕಡ್ಲೆಹಿಟ್ಟು, ಖಾರದ ಪುಡಿ, ಓಮಕಾಳು, ಸೋಡಾ ಮತ್ತು ಉಪ್ಪು ಹಾಕಿ ಬೆರೆಸಿ, ಅದಕ್ಕೆ ಕತ್ತರಿಸಿದ ಈರುಳ್ಳಿಯನ್ನು ಮತ್ತು ಒಂದೆರಡು ಚಮಚ ಕಾದ ಎಣ್ಣೆಯನ್ನು ಹಾಕಿ, ಚೆನ್ನಾಗಿ ಕಲೆಸಿ. ನೀರು ಅವಶ್ಯಕತೆ ಇದ್ದರೆ ಮಾತ್ರ ಸ್ವಲ್ಪ ಹಾಕಿಕೊಳ್ಳಿ, ಯಾಕೆಂದರೆ ಈರುಳ್ಳಿಯು ಕಲೆಸಿದಾಗ ನೀರು ಬಿಡುತ್ತದೆ. ತುಂಬಾ ತೆಳ್ಳಗೆ ಹಿಟ್ಟನ್ನು ಕಲೆಸಬೇಡಿ, ಕೈ ಅಥವ ಚಮಚದಲ್ಲಿ ತೆಗೆದುಕೊಳ್ಳುವಷ್ಟು ಕಲೆಸಿಕೊಳ್ಳಿ. ನಂತರ ಈ ಕಲೆಸಿದ ಮಿಶ್ರಣವನ್ನು ಕಾದ ಎಣ್ಣೆಯಲ್ಲಿ ಸ್ವಲ್ಪ ತೆಳುವಾಗಿ ಸ್ವಲ್ಪ ಸ್ವಲ್ಪವೇ ಹಿಟ್ಟು ಪಕೋಡಾ ತರಹ ಹಾಕಿ ಕರಿಯಿರಿ. ತುಂಬಾ ದಪ್ಪ ಮಿಶ್ರಣ ಹಾಕಿದರೆ ಒಳಗೆ ಹಿಟ್ಟು ಬೇಯುವುದಿಲ್ಲ, ಅದಕ್ಕೆ ತೆಳುವಾಗಿ ಹಾಕಿ. ಗೊಲ್ಡನ್ ಬ್ರೌನ್ ಬಣ್ಣ ಬರುವವರೆಗೂ ಅಥವಾ ಗರಿಗರಿಯಾಗುವವರೆಗು ಕರಿದು, ಪೇಪರ್ ಟವಲ್ ಮೇಲೆ ಹಾಕಿ, ಹೆಚ್ಚುವರಿ ಎಣ್ಣೆ ಕಮ್ಮಿ ಆಗುತ್ತದೆ, ನಂತರ ತಿನ್ನಲು ನೀಡಿ. ಬಿಸಿಯಾಗಿರುವಾಗ ತಿನ್ನಲು ತುಂಬಾ ರುಚಿಯಾಗಿರುತ್ತದೆ. ಇದನ್ನು ಊಟಕ್ಕೆ ನೆಂಚಿಕೊಳ್ಳಲು / ಕಾಫಿ ಹೊತ್ತಿಗೆ ಅಥವ ಯಾರಾದರೂ ಅತಿಥಿಗಳಿಗೆ ನೀಡಲು ತಕ್ಷಣ ತಯಾರಿಸಿಕೊಳ್ಳಬಹುದು. ಇದಕ್ಕೆ ಚಟ್ನಿಯ ಅವಶ್ಯಕತೆ ಇಲ್ಲ, ಬೇಕಾದರೆ ತಯಾರಿಸಿಕೊಳ್ಳಬಹುದು.

Kadlepuri Churumuri - ಕಡ್ಲೆಪುರಿ ಚುರುಮುರಿ:

ಚುರುಮುರಿ /ಕಡ್ಲೆಪುರಿ ಚುರುಮುರಿ:

ಕಡ್ಲೆಪುರಿ ಚುರುಮುರಿಯನ್ನು ನಮ್ಮ ಅಜ್ಜಿ ತುಂಬಾ ತುಂಬಾ ಚೆನ್ನಾಗಿ ಮಾಡುತ್ತಿದ್ದರು. ಚುರುಮುರಿ ಮಾಡಿದರೆ ಮನೆಯೆಲ್ಲಾ ಘಂ ಎನ್ನುವ ವಾಸನೆ ಬರುತ್ತಿತ್ತು. ಅಷ್ಟು ರುಚಿಯಾಗಿ ಮಾಡುತ್ತಿದ್ದರು. ನಾವು ತಯಾರಿಸೋದು ಅದೇ ತರಹ ಇದ್ದರೂ ಸಹ ಅವರ ಕೈನಲ್ಲಿ ತಯಾರಿಸುತ್ತಿದ್ದ ರುಚಿಯೇ ಒಂಥರ ಚೆನ್ನ. ಅಜ್ಜಿ ಕೈರುಚಿ, ಅಮ್ಮನ ಕೈ ರುಚಿ ಅಂತಾರಲ್ಲ ಆಗೇ.ಈಗಲೂ ಅದೇ ಚುರುಮುರಿ ನೆನಪು ಬರುತ್ತದೆ. ಅದೆಷ್ಟು ಹದವಾಗಿ ತಯಾರಿಸುತ್ತಿದ್ದರು ಆಗಿನ ಕಾಲದಲ್ಲಿ. ತಯಾರಾದ ತಕ್ಷಣ ತಟ್ಟೆ ತುಂಬಾ ಹಾಕಿಕೊಂಡು ತಿನ್ನುವುದೇ ದೊಡ್ಡ ಕೆಲಸ ಆಗ. ಅದರ ಹಿಂದೆ ಎಷ್ಟು ಕೆಲಸ ಇರುತ್ತೆ ಅಂತ ಗೊತ್ತಾಗುತ್ತೆ ಈಗ. ಕಾರವಾಗಿದ್ದರಂತೂ ಇನ್ನು ಚೆಂದ. ಕಡ್ಲೆಪುರಿ ಚುರುಮುರಿಗೆ ಚಳಿ ಮತ್ತು ಮಳೆಗಾಲದಲ್ಲಿ ತುಂಬಾ ಡಿಮ್ಯಾಂಡ್. ಈಗಂತೂ ಹೇಗೇ ತಯಾರು ಮಾಡಿದರು ಅಜ್ಜಿ ಮಾಡುತ್ತಿದ್ದ ಚುರುಮುರಿ ಚೆನ್ನಾಗಿತ್ತೇನೋ ಎನಿಸುತ್ತೆ. ಓಕೆ ಈಗ ಇಲ್ಲಿ ನಾವು ಚುರುಮುರಿ ತಯಾರಿಸೋಣ.

ಬೇಕಾಗುವ ಸಾಮಾಗ್ರಿಗಳು:

ಕಡ್ಲೆಪುರಿ - 1 ಕೆಜಿ

ಕಡ್ಲೆಕಾಯಿಬೀಜ - 2 ಕಪ್

ಕಡ್ಲೆ-1 ಕಪ್

ಬೆಳ್ಳುಳ್ಳಿ - ಸಿಪ್ಪೆ ಸಮೇತ 1 ಹಿಡಿ

ಕೊಬ್ರಿ ಸಣ್ಣದಾಗಿ ಕತ್ತರಿಸಿದ್ದು - 1 ಕಪ್

ಕರಿಬೇವು ಸ್ವಲ್ಪ

ಅರಿಶಿಣ - 1/2 ಚಮಚ

ಅಚ್ಚಖಾರದ ಪುಡಿ - 1 ಟೀ ಚಮಚ ಅಥವ ರುಚಿಗೆ ತಕ್ಕಷ್ಟು

ಉಪ್ಪು ರುಚಿಗೆ

ಎಣ್ಣೆ 2ಟೇಬಲ್ ಚಮಚ

ಚಿಟಿಕೆ ಸಾಸಿವೆ

ತಯಾರಿಸುವ ವಿಧಾನ:

ದೊಡ್ಡದಾದ ಅಗಲವಿರುವ ಪಾತ್ರೆಯಲ್ಲಿ ಮೊದಲು ಎಣ್ಣೆಯನ್ನು ಹಾಕಿ,ಸಾಸಿವೆ ಹಾಕಿ ಸಣ್ಣ ಉರಿಯಲ್ಲಿಯೇ ಇರಲಿ, ಅದಕ್ಕೆ ಕಡ್ಲೆಕಾಯಿಬೀಜವನ್ನು ಹಾಕಿ ಅದನ್ನು ಸರಿಯಾಗಿ ಚೆನ್ನಾಗಿ ಹುರಿದುಕೊಳ್ಳಿ, ಬೆಳ್ಳುಳ್ಳಿ ಹಾಕಿ ಅದು ಸ್ವಲ್ಪ ನಸುಗೆಂಪು ಬಂದ ನಂತರ ಕೊಬ್ರಿಯನ್ನು ಹಾಕಿ ಅದು ತಿಳಿಕಂದು ಬಣ್ಣ ಬರುವವರೆಗೂ ಹುರಿದು, ತಕ್ಷಣವೇ ಕಡ್ಲೆಯನ್ನು ಹಾಕಿ ಹಾಗೆ ಸ್ವಲ್ಪ ಒಂದು ನಿಮಿಷ ಹುರಿದು, ಕರಿಬೇವು ಹಾಕಿ ಅದು ಗರಿಗರಿಯಾದ ಮೇಲೆ ಅರಿಶಿಣ, ಅಚ್ಚಖಾರದ ಪುಡಿ ಮತ್ತು ಉಪ್ಪು ಹಾಕಿ, ಚೆನ್ನಾಗಿ ಬೆರೆಸಿದ ನಂತರ ಕಡ್ಲೆಪುರಿಯನ್ನು ಹಾಕುತ್ತಾ ತಿರುಗಿಸುತ್ತಿರಿ. ಅದೇ ಸಣ್ಣ ಉರಿಯಲ್ಲಿಯೇ ಪುರಿಯನ್ನು ಚೆನ್ನಾಗಿ ಬೆರೆಸುತ್ತಾ ಇದ್ದರೆ ಮಸಾಲೆ ಸರಿಯಾಗಿ ಹೊಂದಿಕೊಳ್ಳುತ್ತದೆ ಹಾಗು ಪುರಿ ಕೂಡ ಗರಿಗರಿಯಾಗಿ ಆಗುತ್ತದೆ. ಉಪ್ಪು ಮತ್ತು ಖಾರ ನಿಮಗೆ ಸರಿ ಎನಿಸುವಷ್ಟು ಮತ್ತೆ ಸೇರಿಸಿಕೊಳ್ಳಬಹುದು ಈ ಸಮಯದಲ್ಲಿ. ಪುರಿ ಗರಿಗರಿಯಾದ ನಂತರ ಒಲೆ ಆರಿಸಿ, ತಣ್ಣಗಾದ ಮೇಲೆ ಗಾಳಿಯಾಡದ ಡಬ್ಬಿಯಲ್ಲಿ ತುಂಬಿಡಿ. ಬೇಕಾದಾಗ ತಿನ್ನಬಹುದು ಅಥವಾ ಸಂಜೆ ಕಾಫಿಯೊಂದಿಗೆ ಸೊಗಸಾಗಿರುತ್ತದೆ.

ಟಿಪ್ಸ್:-* ಇನ್ನು ಹೆಚ್ಚಿನ ಕಡ್ಲೆಬೀಜವನ್ನು ಸೇರಿಸಿಕೊಳ್ಳಬಹುದು, ಹೆಚ್ಚು ಹಾಕಿದರೆ ಕೂಡ ಚೆನ್ನಾಗಿರುತ್ತದೆ.

*ಕಡ್ಲೆಬೀಜ, ಕೊಬ್ರಿ ಮತ್ತು ಬೆಳ್ಳುಳ್ಳಿ ಮೆತ್ತಗೆ ಹುರಿಯಬೇಡಿ ಅದು ಗರಿಗರಿಯಾಗಿ ಇರಬೇಕು, ಇಲ್ಲ ಅಂದರೆ ಪುರಿ ಕೂಡ ಬೇಗ ಮೆತ್ತಗೆ ಆಗುತ್ತದೆ.

Hesarukaalina chapati / Greengram paratha

ಹೆಸರುಕಾಳಿನ ಚಪಾತಿ:

ಹೆಸರುಕಾಳು - 1 ಕಪ್
ಗೋಧಿಹಿಟ್ಟು - 2 ಕಪ್
ಎಣ್ಣೆ ಬೇಕಾಗುವಷ್ಟು
ಉಪ್ಪು ರುಚಿಗೆ ತಕ್ಕಷ್ಟು
ಜೀರಿಗೆ ಪುಡಿ - ಅರ್ಧ ಚಮಚ

ತಯಾರಿಸುವ ವಿಧಾನ:

ಮೊದಲು ಹೆಸರುಕಾಳನ್ನು 24 ಗಂಟೆ ನೆನೆಸಿಡಿ. ಕುಕ್ಕರ್ ನಲ್ಲಿ ಚೆನ್ನಾಗಿ ಬೇಯಿಸಿಕೊಳ್ಳಿ. ಮಿಕ್ಸಿಗೆ ಹಾಕಿ ರುಬ್ಬಿಕೊಂಡು ಗೋಧಿಹಿಟ್ಟು,ಉಪ್ಪು ಮತ್ತು ಜೀರಿಗೆಪುಡಿಯೊಂದಿಗೆ ಚಪಾತಿ ಹಿಟ್ಟಿನಂತೆ ಕಲಸಿ, ಚಪಾತಿ ಮಾಡಿ ಬೇಯಿಸಿ.

ಚಟ್ನಿ ಅಥವಾ ಮಸ್ಸೊಪ್ಪು ಸಾರಿನೊಂದಿಗೆ ತಿನ್ನಲು ನೀಡಿ. ಆರೋಗ್ಯಕ್ಕೆ ತುಂಬಾ ಒಳ್ಳೆಯ ಆಹಾರ.

Bengalgram kootu -ಕಡ್ಲೆಬೇಳೆ ಕಾಳು /ಕಡಲೆಬೇಳೆ ತಾಳು:

ಕಡ್ಲೆಬೇಳೆ ಕಾಳು /ಕಡಲೆಬೇಳೆ ತಾಳು:

ಸಾಮಾಗ್ರಿಗಳು:

ಕಡ್ಲೆಬೇಳೆ - ಒಂದು ಬಟ್ಟಲು
ವಿವಿಧರೀತಿಯ ಹೆಚ್ಚಿದ ತರಕಾರಿಗಳು-ಕ್ಯಾರೆಟ್, ಆಲೂಗೆಡ್ಡೆ, ಪಡವಲಕಾಯಿ, ಹೂಕೋಸು, ಸೋರೆಕಾಯಿ, ಟಮೋಟೋ
ಈರುಳ್ಳಿ ಸಣ್ಣಗೆ ಹೆಚ್ಚಿದ್ದು
ಒಂದು ಹಸಿಮೆಣಸಿನ ಕಾಯಿ ಮದ್ಯಕ್ಕೆ ಸೀಳಿದ್ದು
ಎಣ್ಣೆ, ಸಾಸಿವೆ, ಕರಿಬೇವು
ಅರಿಶಿಣದ ಪುಡಿ
ಧನಿಯಾಪುಡಿ
ಖಾರದಪುಡಿ
ಸಾಂಬಾರ್ ಪುಡಿ (ಸಾರಿನ ಪುಡಿ)
ಉಪ್ಪು
ತೆಂಗಿನತುರಿ ಬೇಕಾದರೆ
ಕೊತ್ತುಂಬರಿಸೊಪ್ಪು
ವಿಧಾನ:

ಕಡ್ಲೆಬೇಳೆಯನ್ನು,ಎಣ್ಣೆ ಒಂದು ಚಮಚ,ಸ್ವಲ್ಪ ಅರಿಶಿಣ ಹಾಕಿ,ಸ್ವಲ್ಪ ಗಟ್ಟಿಯಾಗಿಯೇ ಬೇಯಿಸಿಕೊಂಡು(ಕಡ್ಲೆಬೇಳೆಯನ್ನು ತುಂಬಾ ಮೆತ್ತಗೆ ಅಥವಾ ನುಣ್ಣಗೆ ಬೇಯಿಸ ಬೇಡಿ) ಅದಕ್ಕೆ ಹೆಚ್ಚಿದ ತರಕಾರಿಗಳು,ಸಾರಿನಪುಡಿ,ಖಾರದಪುಡಿ,ಧನಿಯಾಪುಡಿ,ಉಪ್ಪು ಮತ್ತು ಹಸಿಮೆಣಸಿನಕಾಯಿ ಹಾಕಿ,ಚೆನ್ನಾಗಿ ಬೆರೆಸಿ,ತರಕಾರಿಗಳು ಬೇಯುವವರೆಗೂ ಬೇಯಿಸಿಕೊಳ್ಳಿ.ಈ ಸಮಯದಲ್ಲಿ ಬೇಳೆ ಹದವಾಗಿ ಬೇಯುತ್ತದೆ. ಕೊನೆಯಲ್ಲಿ ತೆಂಗಿನತುರಿ ಮತ್ತು ಕೊತ್ತುಂಬರಿ ಸೊಪ್ಪು ಮತ್ತು ಒಗ್ಗರಣೆಯನ್ನು ಹಾಕಿ,ಚೆನ್ನಾಗಿ ಬೆರೆಸಿ,ಒಂದೆರಡು ನಿಮಿಷ ಕುದಿಸಿ,ಇಳಿಸಿ. ಇದನ್ನು ಊಟಕ್ಕೆ ಅಥವಾ ಚಪಾತಿ ಅಥವಾ ಪೂರಿಯೊಂದಿಗೆ ತಿನ್ನಲು ಕೊಡಿ. ಈ ಕಾಳು ಅಥವಾ ತಾಳನ್ನು ಹಬ್ಬದಲ್ಲಿ ವಿಶೇಷವಾಗಿ ತಯಾರಿಸಲಾಗುತ್ತದೆ.

* ಒಗ್ಗರಣೆ - ಎಣ್ಣೆಯನ್ನು ಬಿಸಿಮಾಡಿ, ಸಾಸಿವೆ, ಕರಿಬೇವು ಮತ್ತು ಈರುಳ್ಳಿಯನ್ನು ಹಾಕಿ ಒಂದೆರಡು ನಿಮಿಷ ಹದವಾಗಿ ಹುರಿದು ಅದನ್ನು ಬೆರೆಸಿ.
*ಕುಕ್ಕರ್ ನಲ್ಲಿ ತಯಾರಿಸುವುದಾದರೆ ಬೇಳೆಯನ್ನು ಮೊದಲು 5-10 ನಿಮಿಷ ಬೇಯಿಸಿಕೊಂಡು, ಎಲ್ಲವನ್ನೂ ಹಾಕಿ ಮುಚ್ಚಿಟ್ಟು ಒಂದು ಕೂಗು ಕೂಗಿಸಿ ಇಳಿಸಿ.

Hesarubele Kosumbari / Moongdal salad-ಹೆಸರುಬೇಳೆ ಕೋಸುಂಬರಿ:

ಹೆಸರುಬೇಳೆ ಕೋಸುಂಬರಿ:

ಸಾಮಾಗ್ರಿಗಳು:

ಹೆಸರುಬೇಳೆ - 1/4 ಕಪ್
ಸೌತೆಕಾಯಿ - ಒಂದು, ಸಣ್ಣಗೆ ಹೆಚ್ಚಿಕೊಳ್ಳಿ
ಎಣ್ಣೆ - ಒಂದು ಚಮಚ
ಸಾಸಿವೆ
ಹಸಿಮೆಣಸಿನಕಾಯಿ ರುಚಿಗೆ,ಹೆಚ್ಚಿಕೊಳ್ಳಿ
ಒಣಮೆಣಸಿನಕಾಯಿ ಒಂದೆರಡು
ಕರಿಬೇವಿನ ಸೊಪ್ಪು
ಕೊತ್ತುಂಬರಿ ಸೊಪ್ಪು
ಉಪ್ಪು ರುಚಿಗೆ ತಕ್ಕಷ್ಟು
ತೆಂಗಿನತುರಿ
ಕ್ಯಾರೆಟ್ ತುರಿ (ಬೇಕಾದರೆ)

ತಯಾರಿಸುವ ವಿಧಾನ:

ಮೊದಲಿಗೆ ಹೆಸರುಬೇಳೆಯನ್ನು ಚೆನ್ನಾಗಿ ತೊಳೆದು,ಒಂದೆರಡು ಗಂಟೆ ನೆನೆಸಿಡಿ. ನಂತರ ಒಗ್ಗರಣೆ ಮಾಡಿಕೊಳ್ಳಿ, ಎಣ್ಣೆ ಕಾಯಿಸಿಕೊಂಡು ಅದು ಬಿಸಿಯಾದ ಮೇಲೆ ಸಾಸಿವೆ, ಮೆಣಸಿನಕಾಯಿಗಳು ಮತ್ತು ಕರಿಬೇವು ಹಾಕಿ ಒಂದು ನಿಮಿಷ ಹುರಿದು ತೆಗೆದಿಡಿ. ನೆನೆಸಿರುವ ಹೆಸರುಬೇಳೆಯನ್ನು ನೀರು ಇಲ್ಲದಂತೆ ಸೋಸಿಕೊಂಡು, ಅದಕ್ಕೆ ಈ ಒಗ್ಗರಣೆ, ಉಪ್ಪು,ಕೊತ್ತುಂಬರಿ, ಸೌತೆಕಾಯಿ ಮತ್ತು ತೆಂಗಿನತುರಿಯನ್ನು ಸೇರಿಸಿ, ಚೆನ್ನಾಗಿ ಬೆರೆಸಿ. ಕ್ಯಾರೆಟ್ ತುರಿ ಬೆರೆಸುವವರು ಅದನ್ನು ಬೆರೆಸಿ. ಇದನ್ನು ಯಾವ ಊಟಕ್ಕಾದರೂ ಸರ್ವ್ ಮಾಡಬಹುದು, ಯಾವಾಗ ಬೇಕಾದರೂ ತಿನ್ನಬಹುದು. ಹಸಿಯಾಗಿರುವುದರಿಂದ ಆರೋಗ್ಯಕ್ಕೂ ಹಿತಕರ.

Raagi Halwa / Raagi kilasa - ರಾಗಿ ಹಲ್ವ / ರಾಗಿ ಕೀಲಸ

ರಾಗಿ ಹಲ್ವ / ರಾಗಿ ಕೀಲಸ

ಕೀಲಸ ಎಂಬ ಪದ ನಿಮಗೆಲ್ಲಾ ಅಥವ ಕೆಲವರಿಗೆ ಹೊಸದಾಗಿ ಎನಿಸುತ್ತಿರಬೇಕು ಅಲ್ಲವೇ? ಇದು ನನ್ನ ಅಜ್ಜಿಯ ಕಾಲದಲ್ಲಿ ಬಳಸುತ್ತಿದ್ದ ಪದ. ಈಗಲೂ ಕೆಲವು ಕಡೆ ರೂಢಿಯಲ್ಲಿದೆ. ನನ್ನ ಅಜ್ಜಿಯ ನೆನಪಿಗಾಗಿ ನಾನು ಅದೇ ಪದವನ್ನು ಬಳಸುತ್ತೇನೆ ಯಾವಾಗಲೂ, ನನ್ನ ಮಕ್ಕಳಿಗೂ ಕೂಡ ”ರಾಗಿ ಕೀಲಸ’ ಎಂದೇ ಹೇಳುತ್ತೇನೆ ಹೊರತು ರಾಗಿ ಹಲ್ವ ಅಂತ ಹೇಳಲ್ಲ. ಇಲ್ಲ ಅಂದರೆ ಹಳೆಯ ಕಾಲದ ಕೆಲವು ಅಪರೂಪದ ಪದಗಳು ನಮಗೆ ಗೊತ್ತಿಲ್ಲದೆ ಕಣ್ಮರೆಯಾಗುತ್ತವೆ. ಈಗೆಲ್ಲ ಸುಮಾರು ಪದಗಳು ಹೆಸರಿಲ್ಲದೆ ಕಣ್ಮರೆಯಾಗಿದೆ. ಕೆಲವರಂತೂ ಹಳೆಯ ಕಾಲದ ಸಾಂಪ್ರದಾಯಿಕ ಪದಗಳನ್ನು ಬಳಸಿದರೆ ಅಥವಾ ಹೇಳಿದರೆ ಮರ್ಯಾದೆ ಹೋಗುತ್ತೆ ಅನ್ನೋ ತರಹ ಆಡುತ್ತಾರೆ. ಆ ಪದಗಳನ್ನು ಉಪಯೋಗಿಸಿದರೆ ಎಲ್ಲಿ ಹಳ್ಳಿಗುಗ್ಗು ಅನ್ಕೋತಾರೋ ಅಂತ ಅಂಜುತ್ತಾರೆ. ಹಳೆ ಪದಗಳಲ್ಲಿ ಇರುವ ಸೊಗಡು ಈಗಿನ ಆಧುನಿಕ ಭಾಷೆಯಲ್ಲಿ ಎಲ್ಲಿದೆ ಅಲ್ಲವೇ? ಅದರಲ್ಲಿ ನಮ್ಮ ಹಿರಿಯರ ಭಾವನೆ, ಅದು ಬಳಸುತ್ತಿದ್ದ ರೀತಿ ಎಲ್ಲವೂ ಚೆನ್ನ. ಹಾಯ್, ಬಾಯ್ ಹೇಳುವ ಈ ಕಾಲವೆಲ್ಲಿ, ಆ ಕಾಲವೆಲ್ಲಿ. ಸಧ್ಯ ನಮ್ಮ ಕಾಲದಲ್ಲಿ ಅಷ್ಟಾದರೂ ಇನ್ನು ಹಳೆಯ ಕಂಪು ಇತ್ತಲ್ಲ, ಅದನ್ನು ನಾವು ತಿಳಿದಿದ್ದೇವಲ್ಲ ಅನ್ನುವುದೇ ಹೆಮ್ಮೆಯ ವಿಷಯವಾಗಿದೆ,ಅದಕ್ಕಾಗಿ ಸಂತೋಷ ಪಡಬೇಕು ಅಷ್ಟೇ . ನನಗಂತೂ ಈ ರಾಗಿಯ ಕೀಲಸವೆಂದರೆ ಅಚ್ಚುಮೆಚ್ಚು. ಇದನ್ನು ತಯಾರಿಸಲು ಯಾವಾಗಲೂ ನನ್ನ ಪ್ರೀತಿಯ ಅಜ್ಜಿಗೆ ನಾನು ಸದಾ ಕೇಳುತ್ತಿದ್ದೆ, ಅನ್ನುವುದಕ್ಕಿಂತ ಕೀಲಸ ಮಾಡಿಕೊಡು ಅಂತ ಕಾಟ ಮಾಡುತ್ತಿದ್ದೆ ಅನ್ನುವ ಪದವೇ ಸೂಕ್ತ ಎನಿಸುತ್ತೆ. ಆಗ ಅಜ್ಜಿ ತಯಾರಿಸುತ್ತಿದ್ದ ರೀತೀಯೇ ಬೇರೆ. ಅವರು ಒಳ್ಳೆಯ ಆರಿಸಿದ ರಾಗಿಯನ್ನು ತೊಳೆದು, ಜಾಲಿಸಿ, ನೆನೆಹಾಕಿ, ಅದನ್ನು ಒರಳು ಕಲ್ಲಿನಲ್ಲಿ ರುಬ್ಬುತ್ತಿದ್ದರು, ಅಷ್ಟು ನುಣ್ಣಗೆ ರಾಗಿಯನ್ನು ರುಬ್ಬಿ, ಒಳ್ಳೆಯ ಬಿಳಿ ಮಲ್ ಪಂಚೆಯಲ್ಲಿ ಸೋಸಿ,ಸೋಸಿ ರಾಗಿಹಾಲನ್ನು ತೆಗೆದು, ಅದನ್ನು ಪಾತ್ರೆಗೆ ಹಾಕಿ , ಬೇಯಿಸಿ ತೆಗೆಯುತ್ತಿದ್ದರು. ರುಬ್ಬುವುದು ಮತ್ತು ಸೋಸುವುದು ಎರಡು ಕಷ್ಟದ ಕೆಲಸ. ಆ ರೀತೀ ತಯಾರಿಸಿದ ನಮ್ಮ ಅಜ್ಜಿ ಮಾಡುತ್ತಿದ್ದ ಆ ಕೀಲಸಕ್ಕೂ , ಈಗಿನ ನಮ್ಮ ಕೀಲಸಕ್ಕೂ ತುಂಬಾನೇ ವ್ಯತ್ಯಾಸ. ಒರಳಲ್ಲಿ ರುಬ್ಬಿದರೆ ರುಚಿ ಹೆಚ್ಚು. ನಮಗೆ ಆಗ ಅಷ್ಟು ಕಷ್ಟ ಅಂತ ಗೊತ್ತಾಗುತ್ತಿರಲಿಲ್ಲ. ಕೇಳುತ್ತಿದ್ದೆವು. ಅವರು ಸಹ ಇಲ್ಲ ಅನ್ನದೇ ಮಾಡಿಕೊಡುತ್ತಿದ್ದರು. ಈಗ ನಮ್ಮ ಕಾಲದಲ್ಲಿ ನಾವು ಅಡುಗೆಗಳನ್ನು ಮಾಡುವಾಗ ತಿಳಿಯುತ್ತದೆ. ಆಗ ನಮ್ಮ ಅಜ್ಜಿ ಎಷ್ಟು ಕಷ್ಟಪಟ್ಟು ಮಾಡಿಕೊಡುತ್ತಿದ್ದರು ಅಂತ. ಈಗ ನಾವು ತಯಾರಿಸೋದೆಲ್ಲ ಒಂಥರ ಇನ್ ಸ್ಟಂಟ್ ಆಗಿರಬೇಕು. ಕಷ್ಟ ಆಗಿರಬಾರದು. ಎಷ್ಟು ವ್ಯತ್ಯಾಸ ಅಲ್ಲವೇ? ಈಗ ನಾವುಗಳು ಏನೇ ಮಿಕ್ಸಿ /ಫುಡ್ ಪ್ರೊಸೆಸರ್ / ಬ್ಲೆಂಡರ್ / ಮಿಕ್ಸರ್ / ಬೀಟರ್ ಅಂತ ಯಾವ್ಯಾವುದೋ ಅಂಗಡಿಗೆ ಬಂದಿದ್ದೆಲ್ಲಾ ತಂದು ಉಪಯೋಗಿಸುತ್ತಾ,ಪ್ರದರ್ಶನಕ್ಕೆ ಇಟ್ಟು ಸಮಯ ಉಳಿಸುತ್ತೇವೆ ಅಂತ ಅನ್ಕೊತೀವಿ. ಬೊಜ್ಜು ಕರಗಿಸಲು ಎಷ್ಟು ಸಮಯ ಹಾಳು ಮಾಡುತ್ತೀವಿ ಅಂತ ಯೋಚಿಸೋದೇ ಇಲ್ಲ. ಅವುಗಳಿಗೂ ಅಷ್ಟೇ ಸಮಯ ತಗೊಳ್ಳುತ್ತೆ ಗೊತ್ತಾಗಲ್ಲ ಅಷ್ಟೇ. ಬರೀ ಸ್ವಿಚ್ ಹಾಕಿದರೆ ಎಷ್ಟು ಸುಲಭ ಅನ್ಕೋತೀವಿ, ಆದರೆ ಅದರ ಹಿಂದೆ ಮಾಡಿಕೊಳ್ಳು ಪ್ರಿಪರೇಶನ್ (ತಯಾರಿಕೆ)ಗೆ ಕೊಟ್ಟ ಸಮಯದ ಅರಿವು ಇರೋದಿಲ್ಲ. ಆಗಿನ ಕಾಲದಲ್ಲಿ ಅವರಿಗೆ ಅದೆಲ್ಲಾ ಮನೆಕೆಲಸದ ಜೊತೆ ರುಬ್ಬುವುದು,ಕುಟ್ಟುವುದು, ನಿಗಾವಹಿಸಿ ಅಡುಗೆ ಮಾಡುವುದು, ಇದೇ ಅವರಿಗೆ ವ್ಯಾಯಾಮವಾಗುತ್ತಿತ್ತು. ನಮ್ಮ ಅಜ್ಜಿ ಒಳ್ಳೆಯ ಕೆಂಪನೆಯ ರಾಗಿಯಲ್ಲಿ ,ರುಬ್ಬಿ,ಸೋಸಿ ತಯಾರಿಸುತ್ತಿದ್ದ ರಾಗಿ ಕೀಲಸಕ್ಕೆ ಸಮನಾಗಿ ಅಲ್ಲದಿದ್ದರು, ಈಗಿನ ನಮ್ಮ ಪ್ರಕಾರಕ್ಕೆ ಈ ಹಲ್ವವನ್ನು ನಾನು ತಯಾರಿಸುತ್ತಿರುತ್ತೇನೆ. ಅಜ್ಜಿ ಮಾಡುತ್ತಿದ್ದ ಕೀಲಸದ ಮುಂದೆ ಇದೇನು ಅಲ್ಲ. ಆ ರೀತಿಯ ಒಳ್ಳೆಯ ರುಚಿಯಾದ ಆಹಾರವನ್ನು ನಾವು ತಿಂದು ಬೆಳೆದಿದೀವಲ್ಲಾ ಅನ್ನುವುದೇ ಖುಷಿಯ ಸಂಗತಿ, ಆಗಾಗಿ ಇದನ್ನೆಲ್ಲಾ ಬರೆದಿರುವೆ.
ಇದೇನಪ್ಪಾ ತಯಾರಿಸುವ ರೀತಿಗಿಂತ ಪೀಠಿಕೆಯೇ ದೊಡ್ಡದಾಗಿದೆ ಅನ್ಕೋತೀರಾ!! ಆಶ್ಚರ್ಯವಿಲ್ಲ! ಏಕೆಂದರೆ ಆಗ ಹೇಗೆ ತಯಾರಿಸುತ್ತಿದ್ದರೆಂದು ತಿಳಿಯವುದಕ್ಕೋಸ್ಕರ ಬರೆದಿರುವೆ.ಅಷ್ಟೊಂದು ಕಷ್ಟಪಟ್ಟು ಅಡಿಗೆ ಮಾಡಿಕೊಡುತ್ತಿದ್ದ ನನ್ನ ಅಜ್ಜಿಗೆ ಇದರಿಂದಲಾದರೂ ಒಂದು ಕೃತಘ್ನತೆಯನ್ನು,ಧನ್ಯವಾದವನ್ನು ತಿಳಿಸೋಣ ಅಂತ ಬರೆದಿರುವೆ. ಕೆಲವರಿಗೆ ಕೀಲಸ ಅನ್ನುವ ಪದ ಗೊತ್ತಿರುವುದಿಲ್ಲ ಅದಕ್ಕಾಗಿ ಇಲ್ಲಿ ರಾಗಿ ಹಲ್ವ ಅಂತ ಕೂಡ ತಿಳಿಸಿರುವೆ.

ಬೇಕಾಗುವ ಸಾಮಾಗ್ರಿಗಳು:

ರಾಗಿ -ಒಂದು ಕಪ್
ಹಾಲು - ಒಂದು ಕಪ್
ಸಕ್ಕರೆ ಅಥವಾ ಬೆಲ್ಲ ರುಚಿಗೆ ತಕ್ಕಷ್ಟು
ಒಂದೆರಡು ಚಮಚ ತುಪ್ಪ
ಏಲಕ್ಕಿ ಪುಡಿ
ಗಸಗಸೆ ಮತ್ತು ಕೊಬ್ರಿ (ಬೇಕಾದರೆ - ಅಲಂಕರಿಸಲು)
ಗೋಡಂಬಿ ಸ್ವಲ್ಪ( ಬೇಕಾದರೆ)

ತಯಾರಿಸುವ ವಿಧಾನ:

ರಾಗಿಯನ್ನು ಹಿಂದಿನ ದಿನ ರಾತ್ರಿಯೇ ನೀರಿನಲ್ಲಿ ಚೆನ್ನಾಗಿ ತೊಳೆದು, ನೆನೆಸಿಡಿ, ಮಾರನೇ ದಿನ ಅದನ್ನು ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ನಂತರ ಅದನ್ನು ಸೋಸಿಕೊಂಡು, ಸೋಸಿದಾಗ ಬರುವಂತ ರಾಗಿ ಪುಡಿಗೆ ಮತ್ತೆ ನೀರು ಸೇರಿಸಿ ರುಬ್ಬಿ, ಸೋಸಿಕೊಳ್ಳಿ. ರಾಗಿಯ ಹಾಲು ಬರುವವರೆಗು ಹೀಗೆ ಒಂದೆರಡು ಬಾರಿ ರುಬ್ಬಿ.ಸೋಸಿಕೊಳ್ಳಿ. ರಾಗಿಯ ಹಾಲು ಗಟ್ಟಿಯಾಗಿ ತೆಗೆದುಕೊಂಡ ನಂತರ ಅದರ ತಿರುಳನ್ನು ಬಿಸಾಕಿ, ತೆಗೆದ ಹಾಲಿಗೆ,ಬೆಲ್ಲ ಮತ್ತು ಹಸಿಹಾಲು ಹಾಕಿ ಒಲೆಯ ಮೇಲೆ ದಪ್ಪ ತಳದ ಪಾತ್ರೆಗೆ ಹಾಕಿ ಕುದಿಯಲು ಇಟ್ಟು, ಅದನ್ನು ಕೈ ಬಿಡದೆ ತಿರುಗಿಸುತ್ತಿರಿ,ಕೈಗೆ ಸಿಡಿಯುತ್ತದೆ ಹುಷಾರಾಗಿರಿ,ಸ್ವಲ್ಪ ಉದ್ದವಿರುವ ಸೌಟ್ ತೆಗೆದುಕೊಳ್ಳಿ ತಿರುವಲು. ಇದನ್ನು ಚೆನ್ನಾಗಿ ಬೇಯಿಸಬೇಕು. ನೋಡು ನೋಡುತ್ತಿದ್ದಂತೆ ಬೇಗ ಗಟ್ಟಿಯಾಗುತ್ತದೆ. ಹಾಗೂ ಬೇಗ ತಳ ಹಿಡಿಯುತ್ತದೆ ಸಹ. ಆಗಾಗಿ ಮೊದಲೆ ಒಂದು ತಟ್ಟೆಗೆ ತುಪ್ಪ ಸವರಿಟ್ಟು ಕೊಂಡಿರಿ. ತಿರುವುತ್ತಿರುವಾಗಲೇ ಏಲಕ್ಕಿ ಪುಡಿ ಮತ್ತು ತುಪ್ಪವನ್ನು ಸೇರಿಸಿ, ಈ ಮಿಶ್ರಣವು ಹಲ್ವದ ಹದಕ್ಕೆ ಬಂದ ತಕ್ಷಣ ಜಿಡ್ಡು ಸವರಿದ ತಟ್ಟೆಗೆ ಸುರಿದು,ಮೇಲೆ ಗಸಗಸೆ,ಕೊಬ್ಬರಿತುರಿ ಮತ್ತು ಗೋಡಂಬಿಯಿಂದ ಅಲಂಕರಿಸಿ. ನಿಮಗೆ ಯಾವ ರೀತಿ ಬೇಕೋ ಆ ತರಹ ಕತ್ತರಿಸಿ, ಅಲಂಕರಿಸಿ. ತಿನ್ನಲು ರುಚಿಯಾದ ಮತ್ತು ತಂಪಾದ ರಾಗಿಯ ಹಲ್ವ ತಯಾರ್. ಇದನ್ನು ಸ್ವಲ್ಪ ತಣ್ಣಗಾದ ಮೇಲೆ ತಿನ್ನಬೇಕು. ರಾತ್ರಿ ಕೀಲಸ ತಯಾರಿಸಿಟ್ಟು ಬೆಳಗ್ಗೆ ತಿಂದರೆ ಇನ್ನೂ ಚೆನ್ನಾಗಿರುತ್ತದೆ. ಆರೋಗ್ಯಕರವಾದ,ಪೌಷ್ಠಿಕಾಂಶಗಳಿರುವ ಅನಾರೋಗ್ಯಕ್ಕೆ ರಾಮಬಾಣವಾದ ರಾಗಿಯಲ್ಲಿ ತಯಾರಿಸಿದ ರಾಗಿಯ ಕೀಲಸ ಅಥವ ರಾಗಿಯ ಹಲ್ವ ಸಿದ್ಧವಾಗುತ್ತದೆ.

* ರಾಗಿಯ ಹಿಟ್ಟಿನಲ್ಲೂ ತಯಾರಿಸಬಹುದು, ಆದರೆ ಅದು ರಾಗಿಯನ್ನು ರುಬ್ಬಿ ತಯಾರಿಸಿದಷ್ಟು ರುಚಿಯಿರುವುದಿಲ್ಲ.
* ರಾಗಿಯ ಹಾಲನ್ನು ತೆಗೆದಿಟ್ಟುಕೊಂಡರೆ ನಂತರದ ಕೆಲಸ ಸುಲಭ.
* ಬೆಲ್ಲವನ್ನು ಹಾಕಿದರೆ ಹೆಚ್ಚು ರುಚಿಯಾಗಿರುತ್ತದೆ.
* ಗಸಗಸೆಯನ್ನು ತಿರುವುತ್ತಿರುವಾಗಲೂ ಕೂಡ ಸೇರಿಸಬಹುದು.
* ರೆಫ್ರಿಜರೇಟರ್ ನಲ್ಲಿ ಇಟ್ಟರೆ ಮೂರರಿಂದ ನಾಲ್ಕು ದಿನ ಚೆನ್ನಾಗಿ ಇರುತ್ತದೆ. ಆಚೆ ಕಡೆ ಒಂದು ದಿನ ಮಾತ್ರ ಚೆನ್ನಾಗಿರುತ್ತದೆ.

GoLibaje - ಗೋಳಿ ಬಜೆ:

ಗೋಳಿ ಬಜೆ:

ಬೇಕಾಗುವ ಸಾಮಗ್ರಿಗಳು:

ಮೈದಾ ಹಿಟ್ಟು - ಒಂದು ಬಟ್ಟಲು
ಮೊಸರು - ಒಂದು ಬಟ್ಟಲು/ ಕಲೆಸಲು ಬೇಕಾಗುವಷ್ಟು
ತೆಂಗಿನಕಾಯಿ ಚೂರು- ಸ್ವಲ್ಪ
ಹಸಿಮೆಣಸಿನ ಕಾಯಿ- ರುಚಿಗೆ ತಕ್ಕಷ್ಟು
ಕೊತ್ತುಂಬರಿ ಸೊಪ್ಪು ಸ್ವಲ್ಪ
ಈರುಳ್ಳಿ-1
ಓಂ ಕಾಳು - ಅರ್ಧ ಚಮಚ
ಸೋಡ- ಚಿಟಿಕೆ
ಉಪ್ಪು- ರುಚಿಗೆ ಬೇಕಾಗುವಷ್ಟು
ಎಣ್ಣೆ - ಕರಿಯಲು

ತಯಾರಿಸುವ ವಿಧಾನ:

ಈರುಳ್ಳಿ, ಹಸಿಮೆಣಸಿನಕಾಯಿ ಮತ್ತು ಕೊತ್ತುಂಬರಿ ಸೊಪ್ಪನ್ನು ಸಣ್ಣಗೆ ಹೆಚ್ಚಿಟ್ಟುಕೊಳ್ಳಿ.
ಬಾಣಲೆಗೆ ಎಣ್ಣೆ ಹಾಕಿ ಕಾಯಲು ಇಡಿ.
ಬಟ್ಟಲಿಗೆ ಮೈದಾ ಹಿಟ್ಟು, ತೆಂಗಿನಚೂರು, ಈರುಳ್ಳಿ, ಹಸಿಮೆಣಸಿನಕಾಯಿ,ಕೊತ್ತುಂಬರಿ ಸೊಪ್ಪು, ಓಂ ಕಾಳು, ಉಪ್ಪು ಮತ್ತು ಸೋಡ ಎಲ್ಲವನ್ನೂ ಚೆನ್ನಾಗಿ ಬೆರೆಸಿ, ಅದಕ್ಕೆ ಮೊಸರು ಹಾಕಿ, ಎಲ್ಲವನ್ನು ಸೇರಿಸಿ ಚೆನ್ನಾಗಿ ಕಲೆಸಿಕೊಳ್ಳಿ. ಈ ಮಿಶ್ರಣವೂ ಹೆಚ್ಚು ಗಟ್ಟಿ ಅಥವಾ ತುಂಬಾ ತೆಳ್ಳಗೂ ಇರಬಾರದು. ಬಜ್ಜಿ ಹಿಟ್ಟಿನ ಹದಕ್ಕಿಂತ ಸ್ವಲ್ಪ ಗಟ್ಟಿ ಇರಲಿ. ಕೈನಲ್ಲಿ ಅಥವಾ ಚಮಚದಲ್ಲಿ ನೇರವಾಗಿ ಕಾದ ಎಣ್ಣೆಗೆ ಚಿಕ್ಕ ಚಿಕ್ಕ ಉಂಡೆಯಂತೆ ಬಿಡಿ. ಹೊಂಬಣ್ಣ ಬರುವವರೆಗೂ ಕರಿದು, ಪೇಪರ್ ಮೇಲೆ ಹಾಕಿ. ಈಗ ಗೋಳಿಬಜೆ ತಿನ್ನಲು ರೆಡಿ,ಇದನ್ನು ಬಿಸಿ-ಬಿಸಿಯಾಗಿ ತಿಂದರೆ ರುಚಿ ಹೆಚ್ಚು. ಪುದೀನ ಚಟ್ನಿ ಅಥವಾ ಟಮೋಟ ಸಾಸ್ ಜೊತೆ ತಿನ್ನಲು ನೀಡಬಹುದು.

Cucumber Raita -ಸೌತೆಕಾಯಿ ರಾಯಿತ:

ಮೊಸರು ಸೌತೆಕಾಯಿ ರಾಯಿತ:

ಸೌತೆಕಾಯಿಯನ್ನು ತುರಿದುಕೊಂಡು ಅದಕ್ಕೆ ಹೆಚ್ಚಿದ ಈರುಳ್ಳಿ,ಹಸಿಮೆಣಸಿನಕಾಯಿ,ಉಪ್ಪು ಮತ್ತು ಮೆಣಸಿನಪುಡಿ ಬೆರೆಸಿ. ನಂತರ ಇದಕ್ಕೆ ಮೊಸರು ಬೀಟ್ ಮಾಡಿ ಹಾಕಿ ಬೆರೆಸಿ.

==================================
ಸೌತೆಕಾಯಿ ರಾಯಿತ:

ಸೌತೆಕಾಯಿ ರುಬ್ಬಿ,ಅದಕ್ಕೆ ಮೊಸರು ಹಾಕಿ ಕಡೆಯಿರಿ.ಆಮೇಲೆ ಅದಕ್ಕೆ ಮೆಣಸಿನಪುಡಿ,ಉಪ್ಪು,ಕೊತ್ತುಂಬರಿಸೊಪ್ಪು ಹಾಕಿ.ಪ್ಯಾಪ್ರಿಕ ಪೌಡರ್ ಹಾಕಿ,ಬೆರೆಸಿ.

Bitter Gourd / ಹಾಗಲಕಾಯಿ ಪಲ್ಯ:

ಹಾಗಲಕಾಯಿ ಪಲ್ಯ:

ಬೇಕಾಗುವ ಪದಾರ್ಥಗಳು;

ಹಾಗಲಕಾಯಿ-ಎರಡು
ಈರುಳ್ಳಿ - ಒಂದು
ಹಸಿಮೆಣಸಿನಕಾಯಿ
ಹುಣಸೇರಸ ಸ್ವಲ್ಪ
ಬೆಲ್ಲ
ಕಾಯಿತುರಿ,ಕೊತ್ತುಂಬರಿಸೊಪ್ಪು
ಎಣ್ಣೆ,ಸಾಸಿವೆ
ಕರಿಬೇವು
ಅರಿಶಿನ
ಉಪ್ಪು

ವಿಧಾನ:
ಮೊದಲು ಹಾಗಲಕಾಯಿಯನ್ನು ಸಣ್ಣಗೆ ಅಥವ ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿ.
ಬಾಣಲೆಗೆ ಎಣ್ಣೆ ಹಾಕಿ, ಕಾದ ಬಳಿಕ,ಸಾಸಿವೆ,ಈರುಳ್ಳಿ,ಹಸಿಮೆಣಸಿನಕಾಯಿ ಹಾಕಿ,ಬಾಡಿಸಿ,ಕರಿಬೇವು,ಅರಿಶಿನ ಮತ್ತು ಉಪ್ಪು ಹಾಕಿ ಒಂದೆರಡು ನಿಮಿಷ ಹುರಿದು, ಈರುಳ್ಳಿ ಬೆಂದಿದೆ ಎನಿಸಿದ ಬಳಿಕ ಹಾಗಲಕಾಯಿಯನ್ನು ಸೇರಿಸಿ,ಸ್ವಲ್ಪ ಹೊತ್ತು ಅದರಲ್ಲಿಯೇ ಹುರಿದು ಬೇಯಿಸಿ. ಹುಣಸೇರಸ ಹಾಕಿ ಚೆನ್ನಾಗಿ ತಿರುವಿ. ನೀರು ಸ್ವಲ್ಪ ಹಾಕಿ ಹಾಗಲಕಾಯಿ ಬೇಯುವವರೆಗು ಬೇಯಿಸಿ. ಸ್ವಲ್ಪ ಬೆಲ್ಲ ಹಾಕಿ,ಚೆನ್ನಾಗಿ ಬೆರೆಸಿ,ಕಾಯಿತುರಿ ಮತ್ತು ಕೊತ್ತುಂಬರಿ ಸೊಪ್ಪು ಎಲ್ಲವನ್ನು ಹಾಕಿ ಬೆರೆಸಿ.ಇಳಿಸಿ.

Dates Laddu/Ladu - ಖರ್ಜೂರದ ಉಂಡೆ:

ಖರ್ಜೂರದ ಉಂಡೆ:
ಖರ್ಜೂರವೂ ಒಣಗಿದ ಹಣ್ಣು(ಡ್ರೈ ಫ್ರೂಟ್ಸ್)ಗಳಲ್ಲೆಲ್ಲಾ ತುಂಬಾ ರುಚಿಯಾದ ಹಣ್ಣು. ಇದರಲ್ಲಿ ಕಬ್ಬಿಣಾಂಶ ಹೇರಳವಾಗಿದೆ. ಈ ಹಣ್ಣು ತುಂಬಾ ಉಷ್ಣ.
ಇದನ್ನು ತುಪ್ಪದ ಜೊತೆ ತಿಂದರೆ ಒಳ್ಳೆಯದು. ಖರ್ಜೂರದಲ್ಲಿ ಹಲವು ಬಗೆಗಳಿವೆ. ಖರ್ಜೂರವನ್ನು ಕಾಯಿಯಿಂದ ಹಿಡಿದು ಕೂಡ ಹಂತ ಹಂತವಾಗಿ ಬೆಳೆಯುತ್ತಿರುವ ಯಾವುದನ್ನು ತಿಂದರೂ,ಚೆನ್ನಾಗಿ ಹಣ್ಣಾಗಿರುವವರೆಗೂ ಕೂಡ ಒಂದೊಂದು ತರಹ ರುಚಿ ಕೊಡುತ್ತದೆ. ಒಂದೊಂದು ಹಂತದಲ್ಲಿ ಒಂದೊಂದು ರುಚಿ ಕೊಡುತ್ತದೆ. ಕಾಯಿಯಿಂದ ಹಣ್ಣಾಗುವವರೆಗಿನ ಯಾವ ಸಮಯದಲ್ಲಾದರೂ ಕಿತ್ತು ತಿನ್ನಬಹುದಾದಂತಹ ಹಣ್ಣು ಖರ್ಜೂರ. ಚೆನ್ನಾಗಿ ಹಣ್ಣಾದ ಮೇಲೂ ಕೂಡ ಅದು ಉಪಯೋಗಕ್ಕೆ ಬರುತ್ತದೆ,ಮುಂದೆ ಅದನ್ನೇ ಒಣಗಿಸಿ,'ಉತ್ತತ್ತಿ' ಅಂತ ತಯಾರಿಸುತ್ತಾರೆ. ಅದಂತೂ ವರುಷಗಟ್ಟಲೆ ಹಾಳಾಗದೆ ಇರುವುದರಿಂದ,ಯಾವಾಗಲೂ ಮನೆಯಲ್ಲಿ ಇಟ್ಟುಕೊಳ್ಳಬಹುದು. ಇದನ್ನು ಪಾಯಸ ಮತ್ತು ಇತರೆ ಉಂಡೆ ಮತ್ತು ಸಿಹಿಗಳಿಗೆ ಬೇಕಾದಾಗ ಉಪಯೋಗಿಸುತ್ತೇವೆ. ಈಗ ಇಲ್ಲಿ ಖರ್ಜೂರದಿಂದ ಉಂಡೆ/ಉಂಡಿಯನ್ನು ತಯಾರಿಸೋಣ.

ಬೇಕಾಗುವ ಸಾಮಗ್ರಿಗಳು:

ಖರ್ಜೂರ - ಒಂದು ಬಟ್ಟಲು
ಬೆಲ್ಲ - ರುಚಿಗೆ
ತುಪ್ಪ ಅಥವ ಬೆಣ್ಣೆ - ಎರಡು ಚಮಚ
ದ್ರಾಕ್ಷಿ ಮತ್ತು ಗೋಡಂಬಿ ಸ್ವಲ್ಪ
ಏಲಕ್ಕಿ ಪುಡಿ

ತಯಾರಿಸುವ ರೀತಿ:

ಮೊದಲಿಗೆ ಬಾಣಲೆಗೆ ತುಪ್ಪ/ಬೆಣ್ಣೆಯನ್ನು ಹಾಕಿ ಅದಕ್ಕೆ ಖರ್ಜೂರ ಮತ್ತು ಬೆಲ್ಲವನ್ನು ಹಾಕಿ,ಚೆನ್ನಾಗಿ ಕೆದಕಿ,ಅದನ್ನು ಹಾಗೇ ಐದು ನಿಮಿಷ ತಿರುಗಿಸುತ್ತಿರಿ. ಖರ್ಜೂರವೂ ಮೆತ್ತಾಗಾಗಿ ಮತ್ತು ಬೆಲ್ಲವೆಲ್ಲಾ ಕರಗಿ ಸ್ವಲ್ಪ ಉಂಡೆ ಹದಕ್ಕೆ ಬಂದಿದೆ ಎನಿಸಿದಾಗ, ತುಪ್ಪದಲ್ಲಿ ಕರಿದ ದ್ರಾಕ್ಷಿ ಮತ್ತು ಗೋಡಂಬಿಯನ್ನು,ಏಲಕ್ಕಿ ಪುಡಿಯನ್ನು ಹಾಕಿ, ಎಲ್ಲವನ್ನು ಚೆನ್ನಾಗಿ ಬೆರೆಸಿ. ತುಂಬಾ ಗಟ್ಟಿಯಾಗುವ ಮೊದಲೇ ಒಲೆಯಿಂದ ಕೆಳಗಿಳಿಸಿ. ಸ್ವಲ್ಪ ಆರಿದ ನಂತರ ಚಿಕ್ಕ ಚಿಕ್ಕ ಉಂಡೆ ಕಟ್ಟಿ. ಈಗ ಪೌಷ್ಠಿಕವಾಗಿರುವಂತ ಖರ್ಜೂರದ ಉಂಡೆ ತಯಾರಾಗುತ್ತದೆ. ಮಕ್ಕಳಿಗೆ ತುಂಬಾ ಒಳ್ಳೆಯದು.

Peas Pulao/Palav - ಬಟಾಣಿ ಪಲಾವ್

ಬಟಾಣಿ ಪಲಾವ್

ಸಾಮಗ್ರಿಗಳು:

ಬಟಾಣಿ
ಈರುಳ್ಳಿ ಹೆಚ್ಚಿದ್ದು
ಹಸಿಮೆಣಸಿನಕಾಯಿ -ರುಚಿಗೆ
ಜೀರಿಗೆ
ಚೆಕ್ಕೆ, ಲವಂಗ,ಏಲಕ್ಕಿ ಮತ್ತು ಪತ್ರೆ
ಕಾಯಿತುರಿ
ಅಕ್ಕಿ - ನೆನೆಸಿದ್ದು
ಕೊತ್ತುಂಬರಿ ಸೊಪ್ಪು
ನಿಂಬೆರಸ
ಉಪ್ಪು
ಎಣ್ಣೆ
ಗೋಡಂಬಿ ಅಲಂಕರಿಸಲು

ತಯಾರಿಸುವ ವಿಧಾನ:

ಕುಕ್ಕರ್ ಗೆ ಎಣ್ಣೆಯನ್ನು ಹಾಕಿ ಕಾದ ಮೇಲೆ ಜೀರಿಗೆ, ಚೆಕ್ಕೆ,ಲವಂಗ,ಪತ್ರೆ ಮತ್ತು ಏಲಕ್ಕಿ ಹಾಕಿ, ಕೆದಕಿ,ಈರುಳ್ಳಿಯನ್ನು ಮತ್ತು ಹಸಿಮೆಣಸಿನಕಾಯಿಯನ್ನು ಹಾಕಿ,ಈರುಳ್ಳಿ ಸ್ವಲ್ಪ ಕೆಂಪಾಗುವವರೆಗೂ ಬಾಡಿಸಿ, ಬಟಾಣಿ ಕಾಳುಗಳನ್ನು ಹಾಕಿ ಅದನ್ನು ಒಂದೆರಡು ನಿಮಿಷ ಹುರಿದು, ಅದಕ್ಕೆ ಉಪ್ಪು, ಕಾಯಿತುರಿ ಮತ್ತು ಅಳತೆ ನೀರನ್ನು ಹಾಕಿ, ನೆನೆಸಿದ ಅಕ್ಕಿಯನ್ನು ಹಾಕಿ, ನಿಂಬೆರಸ ಮತ್ತು ಕೊತ್ತುಂಬರಿ ಸೊಪ್ಪು ಹಾಕಿ, ಚೆನ್ನಾಗಿ ಬೆರೆಸಿ, ಮುಚ್ಚಿಟ್ಟು ಒಂದು ವಿಷ್ಹಲ್ ಕೂಗಿಸಿ ಒಲೆಯಿಂದ ಇಳಿಸಿ. ಮತ್ತೆ ಸ್ವಲ್ಪ ಕೊತ್ತುಂಬರಿ ಸೊಪ್ಪಿನಿಂದ ಅಲಂಕರಿಸಿ. ಗೋಡಂಬಿಯನ್ನು ತುಪ್ಪದಲ್ಲಿ ಹುರಿದು ಹಾಕಿ.ಅಲಂಕರಿಸಿ. ಮೊಸರಿನ ರಾಯತದೊಂದಿಗೆ ಬಡಿಸಿ.

Mysore Paak / ಮೈಸೂರ್ ಪಾಕ್

ಮೈಸೂರ್ ಪಾಕ್:
ಬೇಕಾಗುವ ಸಾಮಾಗ್ರಿಗಳು:
ಕಡಲೆಹಿಟ್ಟು-ಒಂದು ಕಪ್
ಸಕ್ಕರೆ - ಒಂದುವರೆ ಕಪ್
ನೀರು - ಎರಡು ಕಪ್
ತುಪ್ಪ - ಎರಡು ಕಪ್

ತಯಾರಿಸುವ ವಿಧಾನ:
ಮೊದಲಿಗೆ ಪಾಕವನ್ನು ತಯಾರಿಸಬೇಕು. ದಪ್ಪ ತಳದ ಪಾತ್ರೆಗೆ ಸಕ್ಕರೆಯನ್ನು ಹಾಕಿ ನೀರಿನೊಂದಿಗೆ ಬೆರೆಸಿ, ಕರಗಿ ಅದು ಎಳೆಪಾಕ ಬರುವವರೆಗೂ ಕುದಿಸಿ. ಎರಡು ಬೆರಳುಗಳ ಮದ್ಯೆ ಒಂದುಹನಿ ಪಾಕ ತೆಗೆದುಕೊಂಡು ನೋಡಿ ಪಾಕ ಬೆರಳುಗಳ ಮದ್ಯೆ ಎಳೆಯಂತೆ ಅಥವಾ ನಾರಿನಂತೆ ಬಂದ ತಕ್ಷಣ ಸ್ವಲ್ಪ ಸಣ್ಣ ಉರಿ ಮಾಡಿಕೊಂಡು ಸ್ವಲ್ಪ ಸ್ವಲ್ಪವೇ ಕಡಲೆಹಿಟ್ಟು ಮತ್ತು ತುಪ್ಪವನ್ನು ಜೊತೆಯಲ್ಲಿಯೇ ಹಾಕುತ್ತಾ ಕೈ ಬಿಡದಂತೆ ತಿರುಗಿಸುತ್ತಿರಿ, ಗಂಟು ಗಂಟಾಗದಂತೆ ನೋಡಿಕೊಳ್ಳಿ. ಇದೇ ರೀತಿ ಎಲ್ಲಾ ಹಿಟ್ಟು ಮತ್ತು ತುಪ್ಪವನ್ನು ಹಾಕಿ, ಚೆನ್ನಾಗಿ ತಿರುಗಿಸುತ್ತಿರಿ. ಈ ಮಿಶ್ರಣವೂ ಗಟ್ಟಿಯಾಗುತ್ತಾ ಗೂಡು ಗೂಡಿನಂತೆ ಬಂದು ಪಾತ್ರೆಯ ತಳ ಬಿಡುತ್ತಾ ಬಂದ ತಕ್ಷಣ ಹದ ನೋಡಿಕೊಂಡು ಜಿಡ್ಡು ಸವರಿದ ತಟ್ಟೆಗೆ ಸುರಿದು ಆಯುತಾಕಾರವಾಗಿ ಅಥವಾ ಚೌಕಾಕಾರವಾಗಿ ಕತ್ತರಿಸಿ. ತಣ್ಣಗಾಗುವ ಮೊದಲೆ ಕತ್ತರಿಸಿ, ನಂತರ ಗಟ್ಟಿಯಾಗುತ್ತದೆ. ಒಮ್ಮೊಮ್ಮೆ ಹದ ಸರಿಯಾಗಿ ಬರದೇ ಇದ್ದಾಗ ಮೈಸೂರ್ ಪಾಕ್ ಗಟ್ಟಿಯಾಗಿ ಅಥವಾ ಮೆತ್ತಗೂ ಬರಬಹುದು, ಆದರೂ ತಿನ್ನಲು ರುಚಿಯಂತು ಇರುತ್ತದೆ. ಸವಿಯಾದ ಮೈಸೂರ್ ಪಾಕ್ ಸವಿಯಲು ಸಿದ್ದ.

Hayagreeva / ಹಯಗ್ರೀವ

ಹಯಗ್ರೀವ :
ಬೇಕಾಗುವ ಪದಾರ್ಥಗಳು:
ಕಡಲೆಬೇಳೆ 1 ಕಪ್
ಬೆಲ್ಲ 11/2 ಕಪ್
ಶುಂಠಿ -ಅರ್ಧ ಇಂಚು
ಎಣ್ಣೆ - 1 ಚಮಚ
ಅರಿಶಿಣ - 1/2ಚಮಚ
ಚಿಟಿಕೆ ಉಪ್ಪು
ಗಸಗಸೆ 2ಟೇಬಲ್ ಚಮಚ
ಕೊಬ್ಬರಿ ತುರಿ ಸ್ವಲ್ಪ
ಗೋಡಂಬಿ
ಒಣದ್ರಾಕ್ಷಿ
ಬಾದಾಮಿ ಮತ್ತು ಪಿಸ್ತ(ಬೇಕಾದರೆ)
ಲವಂಗ 5-6
ತುಪ್ಪ
ಏಲಕ್ಕಿ ಪುಡಿ

ತಯಾರಿಸುವ ವಿಧಾನ:
ಕಡಲೆಬೇಳೆಯನ್ನು ಚೆನ್ನಾಗಿ ತೊಳೆದು ಬೇಯಲು ಎಷ್ಟು ಬೇಕೋ ಅಷ್ಟು ಮಾತ್ರ ನೀರನ್ನು ಹಾಕಿ, ಎಣ್ಣೆ, ಅರಿಶಿಣ,ಚಿಟಿಕೆ ಉಪ್ಪು ಮತ್ತು ಶುಂಠಿ ಹಾಕಿ ಬೇಯಿಸಿಟ್ಟುಕೊಳ್ಳ ಬೇಕು. ತುಂಬಾ ನುಣ್ಣಗೆ ಬೇಯಿಸದೆ ಸ್ವಲ್ಪ ಗಟ್ಟಿಯಾಗಿರುವಂತೆ ಬೇಯಿಸಿ (ಅಂಚು ಒಡೆದು ಬೇಯೋದು ಅಂತರಲ್ಲಾ ಹಾಗೆ) ಅಕಸ್ಮಾತ್ ನೀರು ಜಾಸ್ತಿ ಆಯಿತು ಎನಿಸಿದರೆ ಬೇಳೆಯನ್ನು ಬಸಿದುಕೊಳ್ಳಿ. ಬೆಂದ ಮೇಲೆ ಶುಂಠಿಯನ್ನು ಹೊರಗೆ ತೆಗೆದು ಹಾಕಿ.
ನಂತರ ಬೇರೆ ಪಾತ್ರೆಯಲ್ಲಿ ಕುಟ್ಟಿದ ಬೆಲ್ಲದ ಪುಡಿ ಮತ್ತು ಸ್ವಲ್ಪ ನೀರು ಹಾಕಿ ಬೆಲ್ಲ ಕರಗಿ ಸಣ್ಣ ಪಾಕ ಬಂದ ನಂತರ ಅದಕ್ಕೆ ಬೇಯಿಸಿದ ಕಡಲೆಬೇಳೆಯನ್ನು ಹಾಕಿ ಬೆಲ್ಲ ಮತ್ತು ಬೇಳೆ ಚೆನ್ನಾಗಿ ಹೊಂದಿಕೊಳ್ಳುವವರೆಗೂ ತಿರುಗಿಸುತ್ತಿರಿ, ಕೈ ಬಿಡದೇ ತಿರುಗಿಸುತ್ತಾ ತಳ ಹತ್ತದಂತೆ ನೋಡಿಕೊಳ್ಳಿ. ಬೇಗ ತಳ ಹತ್ತುತ್ತದೆ. ನಂತರ ಅದಕ್ಕೆ ಒಣಕೊಬ್ಬರಿತುರಿ, ತುಪ್ಪದಲ್ಲಿ ಹುರಿದ ದ್ರಾಕ್ಷಿ, ಗೋಡಂಬಿ ಮತ್ತು ಲವಂಗವನ್ನು ಹಾಕಿ,ಬಾದಾಮಿ,ಪಿಸ್ತ ಹಾಕುವುದಾದರೆ ಅದನ್ನು ಹಾಕಿ. ಕೊನೆಯಲ್ಲಿ ಏಲಕ್ಕಿ ಪುಡಿ ಮತ್ತು ಗಸಗಸೆಯನ್ನು ಸೇರಿಸಿ ಮತ್ತೆ ಚೆನ್ನಾಗಿ ಬೆರೆಸಿ,ಇಳಿಸಿ. ಮೇಲೆ ಒಂದೆರಡು ಚಮಚ ತುಪ್ಪ ಹಾಕಿ. ಸವಿಸವಿಯಾದ,ರುಚಿರುಚಿಯಾದ,ಗುರುರಾಯರಿಗೆ ಪ್ರಿಯವಾದ ಹಯಗ್ರೀವ ಸಿದ್ದ.

Raagi Mudde /ರಾಗಿ ಮುದ್ದೆ

ರಾಗಿ ಮುದ್ದೆ:

ಬೇಕಾಗುವ ಸಾಮಗ್ರಿಗಳು:

ರಾಗಿಹಿಟ್ಟು - ಒಂದು ಬಟ್ಟಲು
ನೀರು - ಎರಡು-ಮೂರು ಬಟ್ಟಲು
ಚಿಟಿಕೆ ಉಪ್ಪು

ತಯಾರಿಸುವ ವಿಧಾನ:

ಮೊದಲು ಸ್ವಲ್ಪ ಆಳ ಮತ್ತು ಅಗಲವಾಗಿರುವ ಪಾತ್ರೆಯಲ್ಲಿ ಅಳತೆ ನೀರನ್ನು ಮತ್ತು ಉಪ್ಪು ಹಾಕಿ ಅದು ಚೆನ್ನಾಗಿ ಕುದಿಯಲು ಬಿಡಿ. ನಂತರ ನಿಧಾನವಾಗಿ ರಾಗಿಹಿಟ್ಟನ್ನು ನೀರಿನ ಮಧ್ಯ ಭಾಗಕ್ಕೆ ಬರುವಂತೆ ಹಾಗೆ ಒಟ್ಟಿಗೆ ಹಾಕಿ, ಹಿಟ್ಟನ್ನು ಮತ್ತೆ ಮುಟ್ಟದೆ ಅದು ಚೆನ್ನಾಗಿ ಹತ್ತರಿಂದ ಹದಿನೈದು ನಿಮಿಷ ಬೇಯಲು ಬಿಟ್ಟು. ಅದು ಬೆಂದಿದೆ ಎನಿಸಿದ ತಕ್ಷಣ ಒಂದು ಸೌಟ್ ಅಥವಾ ಮರದ ಕೋಲಿನಿಂದ ಹಿಟ್ಟಿನ ಮಧ್ಯದಿಂದ ಹಾಗೇ ಒಂದೇಸಾರಿ ಎಲ್ಲಾ ಹಿಟ್ಟನ್ನು ಚೆನ್ನಾಗಿ ಕೈ ಆಡಿಸಿ. ಪೂರ್ತಿ ಹಿಟ್ಟು ಮತ್ತು ನೀರನ್ನು ಸರಿಯಾಗಿ ಬೆರೆಸಿ, ಗಂಟಿಲ್ಲದಂತೆ ಬೆರೆಸಿ. ಸ್ವಲ್ಪ ಗಟ್ಟಿ ಎನಿಸಿದರೆ ಮತ್ತೆ ಸ್ವಲ್ಪ ನೀರು ಹಾಕಿಕೊಂಡು ಬೆರೆಸಿ. ನಂತರ ಬೆರೆಸಿದ ಪೂರ್ತಿ ರಾಗಿಹಿಟ್ಟನ್ನು ತಟ್ಟೆ ಅಥವಾ ಚಾಪಿಂಗ್ ಬೋರ್ಡ್ ಅಥವಾ ಮರದ ಮಣೆ, ಮೇಲೆ ಹಾಕಿಕೊಂಡು, ಸ್ವಲ್ಪ ಲಘುವಾಗಿ ನಾದಿ ನಿಮಗೆ ಎಷ್ಟು ಬೇಕೋ ಅಷ್ಟು ಗಾತ್ರದ ಉಂಡೆಯನ್ನು ತಯಾರಿಸಿಕೊಳ್ಳಿ. ಕೈಗೆ ಸ್ವಲ್ಪ ತುಪ್ಪ ಮತ್ತು ನೀರನ್ನು ಸವರಿಕೊಂಡು ನಾದಿ. ಹೀಗೆ ತಯಾರಿಸಿದಾಗ ರಾಗಿಮುದ್ದೆ ತಯಾರಾಗುತ್ತದೆ. ಈ ರಾಗಿಮುದ್ದೆಯನ್ನು ಸೊಪ್ಪಿನ ಬಸ್ಸಾರು ಅಥವ ಮಸಾಲೆಸಾರು ಅಥವ ನಾನ್ ವೆಜ್ ಸಾರುಗಳೊಂದಿಗೆ ಸರ್ವ್ ಮಾಡಿ. ನಮ್ಮ ಕರ್ನಾಟಕದಲ್ಲಿ ರಾಗಿಮುದ್ದೆ ಬಸ್ಸಾರು ತುಂಬಾ ಪ್ರಸಿಧ್ಧವಾಗಿದೆ.ಸಾಮಾನ್ಯವಾಗಿ ಎಲ್ಲರಿಗೂ ಇಷ್ಟವಾಗುವುದು ಮತ್ತು ರೋಗಗಳಿಗೆ ಮದ್ದಾಗಿರುವುದು ಈ ರಾಗಿಮುದ್ದೆ.

*ಕೆಲವರು ಮೊದಲೆ ನೀರಿಗೆ ಸ್ವಲ್ಪವೇ ಅಂದರೆ ಒಂದೆರಡು ಚಮಚ ರಾಗಿಹಿಟ್ಟನ್ನು ಕಲಸಿ,ಒಲೆಯ ಮೇಲೆ ಇಟ್ಟು ಅದನ್ನು ತಿರುಗಿಸುತ್ತಿದ್ದು,ನೀರು ಕುದಿ ಬಂದ ನಂತರ ಉಳಿದ ಎಲ್ಲಾ ಹಿಟ್ಟನ್ನು ಒಮ್ಮೆಲೆ ಹಾಕಿ,ಬೇಯಿಸಿ,ನಂತರ ಬೆರೆಸುತ್ತಾರೆ.ಹಾಗೂ ತಯಾರಿಸಬಹುದು.

Sabbakki Shyavige Payasa /ಸಬ್ಬಕ್ಕಿ-ಶ್ಯಾವಿಗೆ ಪಾಯಸ

ಸಬ್ಬಕ್ಕಿ-ಶ್ಯಾವಿಗೆ ಪಾಯಸ:

ಸಾಮಗ್ರಿಗಳು:

ಸಬ್ಬಕ್ಕಿ - ಒಂದು ಕಪ್
ಶ್ಯಾವಿಗೆ - ಅರ್ಧ ಕಪ್
ಹಾಲು - ಒಂದು ಕಪ್
ಸಕ್ಕರೆ ಅಥವ ಬೆಲ್ಲ ರುಚಿಗೆ
ದ್ರಾಕ್ಷಿ ಮತ್ತು ಗೋಡಂಬಿ
ತುಪ್ಪ
ಏಲಕ್ಕಿ ಪುಡಿ

ತಯಾರಿಸುವ ರೀತಿ:
ಒಂದೆರಡು ಚಮಚ ತುಪ್ಪವನ್ನು ಕಾಯಿಸಿ ದ್ರಾಕ್ಷಿ ಮತ್ತು ಗೋಡಂಬಿಯನ್ನು ಹುರಿದು ತೆಗೆದಿಡಿ. ಅದೇ ತುಪ್ಪದಲ್ಲಿ ಶ್ಯಾವಿಗೆಯನ್ನು ಹಾಕಿ ಚೆನ್ನಾಗಿ ಹುರಿದಿಡಿ. ಅದಕ್ಕೆ ಸಬ್ಬಕ್ಕಿಯನ್ನು ಸೇರಿಸಿ, ಸ್ವಲ್ಪ ನೀರು ಹಾಕಿ ಬೇಯಿಸಿ. ಅರ್ಧ ಬೆಂದಿದೆ ಎನಿಸಿದಾಗ ಹಾಲು ಮತ್ತು ಸಕ್ಕರೆ ಸೇರಿಸಿ ಕುದಿಸಿ. ಸಬ್ಬಕ್ಕಿ ಮತ್ತು ಶ್ಯಾವಿಗೆ ಎರಡು ಚೆನ್ನಾಗಿ ಬೇಯಿಸಿ, ಅದಕ್ಕೆ ಏಲಕ್ಕಿ ಪುಡಿ,ಮತ್ತೆ ಒಂದೆರಡು ಚಮಚ ತುಪ್ಪ ಸೇರಿಸಿ.ಬೆರೆಸಿ. ಸಬ್ಬಕ್ಕಿಯು ದುಂಡಾಗಿ ಆಗಿ ಬೆಂದಿದೆ ಎನಿಸಿದ ಮೇಲೆ ಇಳಿಸಿ. ದ್ರಾಕ್ಷಿ ಮತ್ತು ಗೋಡಂಬಿ ಸೇರಿಸಿ. ಕೇಸರಿ ದಳಗಳನ್ನು ಹಾಲಿನಲ್ಲಿ ನೆನೆಸಿ ಹಾಕಬಹುದು ಬೇಕಾದರೆ. ಅಥವ ನಿಮಗೆ ಇಷ್ಟವಾದ ಎಸೆನ್ಸ್ ಹಾಕಿಕೊಳ್ಳಬಹುದು. ಬರೀ ಶ್ಯಾವಿಗೆ ಪಾಯಸ ತಯಾರಿಸುವ ಬದಲು,ಈ ತರಹ ಬೇರೆ ರೀತಿಯಲ್ಲಿ ತಯಾರಿಸಬಹುದು. ಸಬ್ಬಕ್ಕಿ-ಶ್ಯಾವಿಗೆ ಪಾಯಸ ತಯಾರ್.
* ಸಬ್ಬಕ್ಕಿ ಮತ್ತು ಶ್ಯಾವಿಗೆಯನ್ನು ಮೊದಲೇ ಬೇಯಿಸಿ ಕೂಡ ಇಟ್ಟುಕೊಳ್ಳಬಹುದು.
* ಸಬ್ಬಕ್ಕಿಯಲ್ಲಿ ಕೆಲವು ತರ ಇದೆ. ನೀವು ಉಪಯೋಗಿಸುವ ಸಬ್ಬಕ್ಕಿ ಯಾವುದೆಂದು ತಿಳಿದು,ಅದಕ್ಕೆ ಯಾವ ರೀತಿ ತಯಾರಿಸಬೇಕೋ. ಆ ರೀತಿ ತಯಾರಿಸಿ.ಸಬ್ಬಕ್ಕಿ ಬೇಗ ಬೇಯುತ್ತದೆ. ಬೆಂದ ಮೇಲೆ ನೋಡಲು ಚೆನ್ನಾಗಿ ಕಾಣುತ್ತದೆ.

Coconut Burfi / Kobbari Mithayi - ಕೊಬ್ಬರಿ ಮಿಠಾಯಿ

ಕೊಬ್ಬರಿ ಮಿಠಾಯಿಬೇಕಾಗುವ ಸಾಮಗ್ರಿಗಳು :

ತೆಂಗಿನಕಾಯಿ ತುರಿ - 1 ಬಟ್ಟಲು ಬಿಳಿ ಭಾಗ ಮಾತ್ರ ತುರಿದಿದ್ದು
ಸಕ್ಕರೆ - 3/4 ಬಟ್ಟಲು ಅಥವ 1 ಬಟ್ಟಲು
ಹಾಲು - 1ಕಪ್
ಏಲಕ್ಕಿ ಪುಡಿ - ಒಂದು ಚಮಚ
ತುಪ್ಪ ತಟ್ಟೆಗೆ ಸವರಲು
ದ್ರಾಕ್ಷಿ ಮತ್ತು ಗೋಡಂಬಿ (ಹಾಕ ಬೇಕಾಗಿಲ್ಲ,ಬೇಕೆನಿಸಿದರೆ)

ತಯಾರಿಸುವ ವಿಧಾನ :
ಒಂದು ದಪ್ಪತಳದ ಪಾತ್ರೆಯಲ್ಲಿ ಕೊಬ್ಬರಿ ಮತ್ತು ಸಕ್ಕರೆ ಬೆರಸಿ, ನಂತರ ಹಾಲು ಕೂಡ ಹಾಕಿ ಕೆದಕುತ್ತಿರಿ. ಮೊದಲು ಚೆನ್ನಾಗಿ ಕುದಿಬರುವವರೆಗು ಸರಿಯಾದ ಉರಿಯಲ್ಲಿ ಕೈ ಬಿಡದೆ ತಿರುವುತ್ತಿರಿ, ಏಲಕ್ಕಿ ಪುಡಿ ಸೇರಿಸಿ, ದ್ರಾಕ್ಷಿ , ಗೋಡಂಬಿ ಹಾಕುವುದಿದ್ದರೆ ಈಗ ಕೂಡ ಹಾಕಬಹುದು, ಆಮೇಲೆ ಮಿಶ್ರಣ ತಳ ಬಿಡುತ್ತಾ ಬರುವಾಗ ಸಣ್ಣ ಉರಿ ಮಾಡಿಕೊಂಡು ಹಾಗೇಯೆ ತಿರುಗಿಸುತ್ತಿರಿ, ಹದ ಬಂದ ತಕ್ಷಣ ತುಪ್ಪ ಸವರಿದ ತಟ್ಟೆಗೆ ಸುರಿದು ಸಮನಾಗಿ ಹರಡಿ, ದ್ರಾಕ್ಷಿ, ಗೋಡಂಬಿಯಿಂದ ಅಲಂಕರಿಸಿ . ಸ್ವಲ್ಪ ತಣ್ಣಗಾದ ಮೇಲೆ ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿ.

Carrot Halwa / ಕ್ಯಾರೆಟ್ ಹಲ್ವ

ಕ್ಯಾರೆಟ್ ಹಲ್ವ:
ಬೇಕಾಗುವ ಸಾಮಗ್ರಿಗಳು:

ಒಂದು ಕಪ್ ಕ್ಯಾರೆಟ್ ತುರಿ,
ಎರಡು ಕಪ್ ಹಾಲು,
ಸಕ್ಕರೆ ರುಚಿಗೆ ತಕ್ಕಷ್ಟು
ಏಲಕ್ಕಿ ಪುಡಿ,
ತುಪ್ಪ
ಸ್ವಲ್ಪ ಕೇಸರಿ ದಳ (ಬೇಕಿದ್ದರೆ)

ತಯಾರಿಸುವ ವಿಧಾನ:
ತುರಿದ ಕ್ಯಾರೆಟನ್ನು ಎರಡು ಚಮಚ ತುಪ್ಪದಲ್ಲಿ ಸ್ವಲ್ಪ ಹುರಿದುಕೊಳ್ಳಿ. ನಂತರ ಅದಕ್ಕೆ ಹಾಲು ಹಾಕಿ ಚೆನ್ನಾಗಿ ಬೇಯಿಸಿ. ಬೇಯಿಸುವಾಗ ತಳ ಹಿಡಿಯದಂತೆ ಮದ್ಯೆ ಮದ್ಯೆ ತಿರುವುತ್ತಿರಿ. ಬೇಗ ತಳ ಹತ್ತುತ್ತದೆ, ಸರಿಯಾಗಿ ತಿರುವುತ್ತಿರಿ, ಇಲ್ಲ ಅಂದರೆ ಹಲ್ವ ಸೀದ ವಾಸನೆ ಬರುತ್ತದೆ. ಕ್ಯಾರೆಟ್ ತುರಿ ಬೆಂದ ನಂತರ ಸಕ್ಕರೆ ಹಾಕಿ ಅದು ಕರಗುತ್ತಿದ್ದಂತೆಯೇ ಚೆನ್ನಾಗಿ ಹೊಂದಿಕೊಳ್ಳುವಂತೆ ಬೆರೆಸಿ .ಕೇಸರಿ ಹಾಕುವುದಾದರೆ ಅದನ್ನು 2 ಚಮಚ ಹಾಲಿನಲ್ಲಿ ಮೊದಲೆ ನೆನೆಸಿಟ್ಟು,ಈಗ ಹಾಕಿ. ಮತ್ತೆರಡು ಚಮಚ ತುಪ್ಪ ಸೇರಿಸಿ.ತುಪ್ಪದಲ್ಲಿ ಹುರಿದುಕೊಂಡ ದ್ರಾಕ್ಷಿ ಗೋಡಂಬಿ ಸೇರಿಸಿ.ಚೆನ್ನಾಗಿ ಬೆರೆಸಿ. ಕ್ಯಾರೆಟ್ ಹಲ್ವ ರೆಡಿ.

ಟಿಪ್ಸ್: ಮೈಕ್ರೋವೆವ್ ಇರುವವರು - ಹುರಿದ ಮೇಲೆ ಕ್ಯಾರೆಟ್ ಮತ್ತು ಹಾಲನ್ನು ಸೇಫ್ ಡಿಶ್ ಗೆ ಹಾಕಿ ಬೇಯಿಸಿಕೊಳ್ಳಿ ಮತ್ತು ಬೆಂದ ಮೇಲೆ ಅದಕ್ಕೆ ಸಕ್ಕರೆ ಹಾಕಿ ಮತ್ತೆ ಕುಕ್ ಮಾಡಿ, ಆಮೇಲೆ ತುಪ್ಪ, ದ್ರಾಕ್ಷಿ ಮತ್ತು ಗೋಡಂಬಿ ಸೇರಿಸಿ. ಇದು ತುಂಬಾ ಸುಲಭ ತಳಹತ್ತುವ ಭಯ ಇರಲ್ಲ, ಬೇಗ ಕೂಡ ಆಗುತ್ತದೆ.
ಮೈಕ್ರೋವೆವ್ ಇಲ್ಲದಿರುವವರು- ಕುಕ್ಕರ್ ನಲ್ಲಿ ಬೇಯಿಸಿಕೊಂಡು ತಯಾರಿಸಬಹುದು.

channamasala

Ragi Roti / Rotti - ರಾಗಿರೊಟ್ಟಿ:

ರಾಗಿರೊಟ್ಟಿ:

ಸಾಮಗ್ರಿಗಳು:

ರಾಗಿಹಿಟ್ಟು - ಎರಡು ಬಟ್ಟಲು
ಗೋಧಿಹಿಟ್ಟು - ನಾಲ್ಕು ಚಮಚ
ಉಪ್ಪು ಸ್ವಲ್ಪ
ಬಿಸಿನೀರು

ವಿಧಾನ:

ಮೇಲೆ ತಿಳಿಸಿರುವ ಎಲ್ಲಾ ಸಾಮಗ್ರಿಗಳನ್ನು ಚೆನ್ನಾಗಿ ಬೆರೆಸಿ, ಬಿಸಿನೀರು ಹಾಕಿ ರೊಟ್ಟಿಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ.
ಕಿತ್ತಳೆ ಗಾತ್ರದಲ್ಲಿ ಉಂಡೆಗಳನ್ನು ತೆಗೆದುಕೊಂಡು, ರೊಟ್ಟಿ ತಟ್ಟಿ ತವಾ ಮೇಲೆ ಹಾಕಿ ಬೇಯಿಸಿ. ಎರಡು ಬದಿ ಸರಿಯಾಗಿ ಬೇಯಿಸಿ, ರಾಗಿರೊಟ್ಟಿ ತಯಾರಾಗುತ್ತದೆ. ಇದನ್ನು ಚಟ್ನಿಯೊಂದಿಗೆ ಸರ್ವ್ ಮಾಡಿ. ಬೆಣ್ಣೆ ಮತ್ತು ಖಾರಚಟ್ನಿ ಜೊತೆ ಸಹ ಕೊಡಬಹುದು.ಕೊತ್ತುಂಬರಿಸೊಪ್ಪಿನ ಚಟ್ನಿಯೂ ಹೊಂದುತ್ತದೆ. ಈ ಚಟ್ನಿಗೆ ಕೆಲವರು ಗೊಡ್ಡುಖಾರ ಅಂತ ಕರೆಯುತ್ತಾರೆ. ಈ ರಾಗಿರೊಟ್ಟಿ ಮತ್ತು ಗೊಡ್ಡುಖಾರ ಜೊತೆ ತಿಂದರೆ ಗಂಟಲು ನೋವಿಗೆ ಸ್ವಲ್ಪ ಉಪಶಮನ ಸಿಗುತ್ತದೆ.

* ರೊಟ್ಟಿ ತಟ್ಟುವಾಗ ಮತ್ತು ಬೇಯಿಸುವಾಗ ಎಣ್ಣೆ ಹಾಕಿಕೊಳ್ಳಬಹುದು.
* ಕಲೆಸಿಕೊಳ್ಳುವಾಗ ಅನ್ನವನ್ನು ಸಹ ಚೆನ್ನಾಗಿ ಮಿದ್ದು (ಪೇಸ್ಟ್) ಸೇರಿಸಬಹುದು.

amodephoto

KadleHittina Burfi-- ಕಡ್ಲೆಹಿಟ್ಟಿನ ಬರ್ಫಿ

ಕಡ್ಲೆಹಿಟ್ಟಿನ ಬರ್ಫಿ:

ಬೇಕಾಗುವ ಸಾಮಗ್ರಿಗಳು:
ಕಡ್ಲೆಹಿಟ್ಟು- ಒಂದು ಕಪ್
ಸಕ್ಕರೆ - ಒಂದು ಕಪ್/ರುಚಿಗೆ ತಕ್ಕಷ್ಟು
ಹಾಲು - ಅರ್ಧ ಕಪ್
ತುಪ್ಪ - ಎರಡು ದೊಡ್ಡ ಚಮಚ
ಏಲಕ್ಕಿ ಪುಡಿ ಸ್ವಲ್ಪ

ತಯಾರಿಸುವ ವಿಧಾನ:

ಕಡ್ಲೆಹಿಟ್ಟನ್ನು ಪ್ಯಾನ್ ನಲ್ಲಿ ಹಾಕಿ ಒಂದು ಚಮಚ ತುಪ್ಪ ಹಾಕಿಕೊಂಡು ಹಿಟ್ಟಿನ ಹಸಿವಾಸನೆ ಹೋಗುವವರೆಗೂ ಅಥವಾ ಸ್ವಲ್ಪ ಬಣ್ಣ ಬದಲಾಗುತ್ತದೆ,ಅಲ್ಲಿವರೆಗು ಹುರಿದು ತೆಗೆದಿಡಿ(ಹಿಟ್ಟನ್ನು ಸೀದಿಸಬೇಡಿ). ಒಂದು ಪಾತ್ರೆಗೆ ಕಡ್ಲೆಹಿಟ್ಟನ್ನು ಹಾಕಿ,ಸ್ವಲ್ಪ ಉರಿಯಲ್ಲಿ ಇಟ್ಟು ಅದಕ್ಕೆ ಸಕ್ಕರೆ ಮತ್ತು ಹಾಲು ಹಾಕಿ ಬೆರೆಸಿ,ಮಧ್ಯೆ ಬಿಟ್ಟು ಬಿಟ್ಟು ಕೆದಕುತ್ತಿರಿ, ಸ್ವಲ್ಪ ಹೊತ್ತಿನ ನಂತರ ತುಪ್ಪ ಮತ್ತು ಏಲಕ್ಕಿ ಪುಡಿಯನ್ನು ಸೇರಿಸಿ.ಕೈ ಬಿಡದೇ ಚೆನ್ನಾಗಿ ಕೆದಕುತ್ತಿರಿ,ತಳ ಹಿಡಿಯದಂತೆ ತಿರುಗಿಸಿ,ಸ್ವಲ್ಪ ಹೊತ್ತಿಗೆ ಅದು ತಳ ಬಿಡುತ್ತಾ ಬರುತ್ತದೆ. ತುಪ್ಪ ಒಂದು ಕಡೆ ಬೇರೆಯಾಗುತ್ತಾ ಬರುವಾಗ,ಬರ್ಫಿಯ ಹದ ಬಂದಿದೆ ಎನಿಸಿದ ತಕ್ಷಣ ತುಪ್ಪ ಸವರಿದ ತಟ್ಟೆಗೆ ಹಾಕಿ, ಸಮ ಮಾಡಿ. ಸ್ವಲ್ಪ ತಣ್ಣಗಾದ ಮೇಲೆ ಡೈಮೆಂಡ್ ಆಕಾರ ಅಥವಾ ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿ. ತಿನ್ನಲು ಕಡ್ಲೆಹಿಟ್ಟಿನ ಬರ್ಫಿ ತಯಾರಾಗುತ್ತದೆ.

channamasala

Masala Dose - ಮಸಾಲೆದೋಸೆ;

ಮಸಾಲೆದೋಸೆ:

ಸಾಮಗ್ರಿಗಳು:

ಅಕ್ಕಿ - ಮೂರು ಕಪ್
ಕುಸುಬಲಕ್ಕಿ - ಒಂದು ಕಪ್
ಉದ್ದಿನಬೇಳೆ -ಒಂದು ಕಪ್
ಮೆಂತ್ಯದ ಕಾಳು - ಒಂದು ದೊಡ್ಡ ಚಮಚ
ತೊಗರಿಬೇಳೆ - ಎರಡು ಚಮಚ
ಕಡ್ಲೆಬೇಳೆ -ಎರಡು ಚಮಚ

ವಿಧಾನ;

ದೋಸೆಗೆ ತಿಳಿಸಿರುವ ಎಲ್ಲಾ ಸಾಮಗ್ರಿಗಳನ್ನು ನಾಲ್ಕು ಅಥವ ಐದು ಗಂಟೆಗಳ ಕಾಲ ನೆನೆಸಿ,ಅದನ್ನು ನುಣ್ಣಗೆ ರುಬ್ಬಿಕೊಳ್ಳಿ. ಅದನ್ನು ಏಳೆಂಟು ಗಂಟೆ ಅಥವಾ ರಾತ್ರಿ ಆಗೇಯೇ ಬಿಡಿ. ಅದು ಮಾರನೆದಿನ ಬೆಳಗ್ಗೆ ಹೊತ್ತಿಗೆ ಹುಳಿ/ಹುಬ್ಬಿ ಬಂದಿರುತ್ತದೆ. ಹೀಗೆ ಹುಳಿ/ಹುದುಗು ಬಂದರೆ ದೋಸೆ ಚೆನ್ನಾಗಿರುತ್ತದೆ. ಬೆಳಗ್ಗೆ ಉಪ್ಪು ಮತ್ತು ಸೋಡ ಸೇರಿಸಿ, ಚೆನ್ನಾಗಿ ಬೆರೆಸಿ ಅರ್ಧ ಗಂಟೆ ಬಿಟ್ಟು ತವಾ ಒಲೆಯ ಮೇಲಿಟ್ಟು,ಕಾಯಿಸಿ,ತುಪ್ಪ / ಎಣ್ಣೆ ಹಾಕಿ ಸವರಿ, ಅದರ ಮೇಲೆ ಒಂದು ಸೌಟು ರುಬ್ಬಿದ ಮಿಶ್ರಣವನ್ನು ಹಾಕಿ ದೋಸೆಯಂತೆ ಮಾಡಿ, ಬೇಯಿಸಿ ತೆಗೆಯಿರಿ.
ತವಾ ಮೇಲೆ ದೋಸೆಯನ್ನು ಮಾಡಿ,ಸ್ವಲ್ಪ ತುಪ್ಪ ಹಾಕಿ ಬೇಯಿಸಿ.ಅದರ ಮಧ್ಯ ಭಾಗದಲ್ಲಿ ಆಲೂಗೆಡ್ಡೆ ಪಲ್ಯವನ್ನು ತುಂಬಿ,ಬೇಕಾದ ಆಕಾರಕ್ಕೆ ಮಡಿಸಿ, ಮೇಲೆ ಬೆಣ್ಣೆಯನ್ನು ಹಾಕಿ ಕೊಡಿ. ಜೊತೆಯಲ್ಲಿ ಸಾಗು ಅಥವಾ ಚಟ್ನಿ ಮತ್ತು ಪಲ್ಯವನ್ನು ನೀಡಿ.
* ದೋಸೆಗೆ ಮೊದಲು ಚಟ್ನಿಯನ್ನು ಸವರಿ ನಂತರ ಪಲ್ಯವನ್ನು ತುಂಬಬಹುದು.
*ಖಾರಚಟ್ನಿ ತಯಾರಿಸಿ ಕೂಡ ಮೊದಲು ಅದನ್ನು ಹಚ್ಚಿ, ಪಲ್ಯವನ್ನು ತುಂಬಿ ಮಸಾಲೆ ದೋಸೆ ತಯಾರಿಸಿ.

Coriander leaves Chutney- ಕೊತ್ತುಂಬರಿಸೊಪ್ಪಿನ ಚಟ್ನಿ

ಕೊತ್ತುಂಬರಿಸೊಪ್ಪಿನ ಚಟ್ನಿ:

ಸಾಮಗ್ರಿಗಳು:ಕೊತ್ತುಂಬರಿಸೊಪ್ಪು
ಹಸಿಮೆಣಸಿನಕಾಯಿ
ಹುಣಸೇಹಣ್ಣು ಚೂರು
ಬೆಳ್ಳುಳ್ಳಿ - ನಾಲ್ಕು ಎಸಳು
ಉಪ್ಪು ರುಚಿಗೆ

ವಿಧಾನ:

ಹಸಿಮೆಣಸಿನಕಾಯಿ,ಕೊತ್ತುಂಬರಿಸೊಪ್ಪು,ಬೆಳ್ಳುಳ್ಳಿ,ಹುಣಸೇಹಣ್ಣು ಮತ್ತು ಉಪ್ಪು ಸೇರಿಸಿ,ರುಬ್ಬಿಕೊಳ್ಳಿ.
ಇದನ್ನು ಸಹ ಸಲಾಡ್ ಗಳಿಗೆ, ಸೌತೆಕಾಯಿ,ರಾಯತ,ಪಚ್ಚಡಿ ಮುಂತಾದವುಗಳಿಗೆ ಬೇಕಾದಾಗ ಉಪಯೋಗಿಸಬಹುದು.
ಇದು ರಾಗಿರೊಟ್ಟಿಗೆ ತುಂಬಾ ಚೆನ್ನಾಗಿರುತ್ತದೆ.

Bread Butter Pudding / ಬ್ರೆಡ್ ಬಟರ್ ಪುಡ್ಡಿಂಗ್:

ಬ್ರೆಡ್ ಬಟರ್ ಪುಡ್ಡಿಂಗ್:

ಬೇಕಾಗುವ ಸಾಮಗ್ರಿಗಳು:1 ಪೌಂಡ್ ಬ್ರೆಡ್ ಅಥವ 12 ಪೀಸಸ್, ಅಂಚು ಕತ್ತರಿಸಿಟ್ಟುಕೊಳ್ಳಿ.
1 ಲೀಟರ್ ಹಾಲು
7-8 ಮೊಟ್ಟೆ - ಒಡೆದು, ಬಟ್ಟಲಲ್ಲಿ ಹಾಕಿ ಚೆನ್ನಾಗಿ ಗೊಟಾಯಿಸಿಡಿ (ಬ್ಲೆಂಡ್ ಮಾಡಿ)
1/4 ಕೆಜಿ ಸಕ್ಕರೆ
50 ಗ್ರಾಂ ಬೆಣ್ಣೆ
1/2 ಚಮಚ ಜಾಯಿಕಾಯಿ ರಸ (ತೇದಿದ್ದು)
ಸ್ವಲ್ಪ ಗೋಡಂಬಿ - ದ್ರಾಕ್ಷಿ
ಬಾದಾಮಿ ಬೇಕಾದರೆ
1ಚಮಚ ತುಪ್ಪ ( ಇದರಲ್ಲಿ ಗೋಡಂಬಿ, ದ್ರಾಕ್ಷಿ ಹುರಿದು ಇಟ್ಟುಕೊಳ್ಳಿ)

ತಯಾರಿಸುವ ವಿಧಾನ:

ಹಾಲು ಚೆನ್ನಾಗಿ ಕಾಯಿಸಿ, ಅದಕ್ಕೆ ಸಕ್ಕರೆ, ಬೀಟ್ ಮಾಡಿದ ಮೊಟ್ಟೆ ಹಾಕಿ, ಕೈ ಬಿಡದೇ ತಳ ಹತ್ತದಂತೆ ಚೆನ್ನಾಗಿ ತಿರುವುತ್ತಿರಿ, ಮದ್ಯೆ ಜಾಯಿಕಾಯಿ ರಸ ಹಾಕಿ, ತಿರುವಿ. ಹಾಲಿನ ಮಿಶ್ರಣ ಅರ್ಧ ಭಾಗದಷ್ಟು ಆದಾಗ ಅದನ್ನು ಕೆಳಗಿಳಿಸಿ. ಕಾವಲಿ ಅಥವ ಒಂದು ಅಗಲವಾದ ಬಟ್ಟಲಿಗೆ ಬೆಣ್ಣೆಯನ್ನು ಸವರಿ, ಅದರಲ್ಲಿ ಬ್ರೆಡ್ ತುಂಡುಗಳನ್ನು ಜೋಡಿಸಿಟ್ಟು, ಅದರ ಮೇಲೆ ಈ ಹಾಲಿನ ಮಿಶ್ರಣವನ್ನು ಸುರಿದು ಸಮನಾಗಿ ಹರಡಿ, ತುಪ್ಪದಲ್ಲಿ ಕರಿದ ದ್ರಾಕ್ಷಿ, ಗೋಡಂಬಿಯಿಂದ ಅಲಂಕರಿಸಿ, ಈ ಬಟ್ಟಲನ್ನು ಕುಕ್ಕರ್ ಅಥವ ದೊಡ್ಡ ಪಾತ್ರೆಗೆ ನೀರು ಹಾಕಿ, ಅದರಲ್ಲಿ ಇಟ್ಟು, ಮುಚ್ಚುಳ ಮುಚ್ಚಿ ಡಬ್ಬಲ್ ಬಾಯ್ಲರ್ ರೀತಿ ಆವಿಯಲ್ಲಿ, ಮ೦ದ ಉರಿಯಲ್ಲಿ 45 ನಿಮಿಷ ಬೇಯಿಸಿ. ನಂತರ ತಣ್ಣಗಾದ ಮೇಲೆ ತಿನ್ನಲು ರೆಡಿಯಾಗಿರಿ. ಇದು ತುಂಬಾ ರುಚಿಯಾಗಿರುತ್ತದೆ. ಮಕ್ಕಳಿಗೆ ತುಂಬಾ ಇಷ್ಟ ವಾಗುತ್ತದೆ ಮತ್ತು ಪೌಷ್ಠಿಕವಾಗಿಯೂ ಇರುತ್ತದೆ.
* ಮನೆಯಲ್ಲಿ ಒವನ್ ಇದ್ದರೆ, ಹಾಲಿನ ಮಿಶ್ರಣವನ್ನು ಜಿಡ್ಡು ಸವರಿದ ಬೇಕಿಂಗ್ ಡಿಶ್ ಗೆ ಹಾಕಿ 20 ರಿಂದ 25 ನಿಮಿಷ ಬೇಕ್ ಮಾಡಿ. ಅಥವಾ ತೆಳುವಾದ ಕಂದು ಬಣ್ಣ ( ಗೋಲ್ಡನ್ ಬ್ರೌನ್ ) ಬಂದ ನಂತರ ತೆಗೆಯಿರಿ.

Moolangi Salad / Radish salad

ಮೂಲಂಗಿ ಸಲಾಡ್:

ಕ್ಯಾರೆಟ್ ತುರಿ
ಮೂಲಂಗಿ ತುರಿ
ಹಸಿಮೆಣಸಿನ ಕಾಯಿ ಪೇಸ್ಟ್ ಅಥವ ಸಣ್ಣಗೆ ಹೆಚ್ಚಿದ್ದು
ಕಾಯಿತುರಿ ಬೇಕಾದರೆ
ಹುರಿದ ಜೀರಿಗೆ ಪುಡಿ ಸ್ವಲ್ಪ
ಕೊತ್ತುಂಬರಿ ಸೊಪ್ಪು ಹೆಚ್ಚಿದ್ದು ಸ್ವಲ್ಪ
ಉಪ್ಪು ರುಚಿಗೆ

ಉಪ್ಪು ಮಾತ್ರ ಬಿಟ್ಟು ಎಲ್ಲಾ ಸಾಮಗ್ರಿಗಳನ್ನು ಹಾಕಿ ಚೆನ್ನಾಗಿ ಬೆರೆಸಿ, ಉಪ್ಪನ್ನು ನೀಡುವಾಗ ಬೆರೆಸಿ ಕೊಡಿ. ಇದು ಅತೀ ಸುಲಭ ಕೋಸುಂಬರಿ ಮತ್ತು ರುಚಿ ಕೂಡ ಹಾಗೂ ಹಸಿಯಾಗಿ ಮೂಲಂಗಿ ಸೇವಿಸುವುದರಿಂದ ಆರೋಗ್ಯಕ್ಕೂ ಉತ್ತಮ. ಹುರಿದ ಜೀರಿಗೆಯ ಪರಿಮಳದಿಂದ ಇನ್ನೂ ಚೆನ್ನಾಗಿ ಇರುತ್ತದೆ.

Bread Toast

Amla Raita - ನೆಲ್ಲಿಕಾಯಿ ರಾಯತ / ಪಚ್ಚಡಿ:

ನೆಲ್ಲಿಕಾಯಿ ರಾಯತ / ಪಚ್ಚಡಿ:

ಸಾಮಗ್ರಿಗಳು:
ಬೆಟ್ಟದ ನೆಲ್ಲಿಕಾಯಿ
ತೆಂಗಿನತುರಿ
ಹಸಿಮೆಣಸಿನಕಾಯಿ
ಬೆಲ್ಲ
ಉಪ್ಪು
ಕಾಳುಮೆಣಸಿನಪುಡಿ
ಮೊಸರು

ವಿಧಾನ:

ತೆಂಗಿನತುರಿ,ನೆಲ್ಲಿಕಾಯಿ,ಹಸಿಮೆಣಸಿನಕಾಯಿ,ಬೆಲ್ಲ ಮತ್ತು ಉಪ್ಪು ಎಲ್ಲವನ್ನು ಸ್ವಲ್ಪ ನೀರಿನೊಂದಿಗೆ ನುಣ್ಣಗೆ ರುಬ್ಬಿಕೊಳ್ಳಿ.
ರುಬ್ಬಿದ್ದನ್ನು ಮೊಸರಿನೊಂದಿಗೆ ಬೆರೆಸಿ, ಅದಕ್ಕೆ ಮೆಣಸಿನಪುಡಿ ಹಾಕಿ.ರಾಯತ ಸಿದ್ಧವಾಗುತ್ತದೆ.

Khara Bhath - ಖಾರ ಭಾತ್:

ಖಾರ ಭಾತ್:

ಸಾಮಗ್ರಿಗಳು:
ರವೆ
ಎಣ್ಣೆ
ಸಾಸಿವೆ
ಹೆಚ್ಚಿದ ಹಸಿಮೆಣಸಿನಕಾಯಿ
ಹೆಚ್ಚಿದ ಈರುಳ್ಳಿ
ಕರಿಬೇವು ಸ್ವಲ್ಪ
ಕಡ್ಲೆಬೇಳೆ
ಉದ್ದಿನಬೇಳೆ
ಶುಂಠಿ ತುರಿ - ಒಂದು ಚಮಚ
ತರಕಾರಿಗಳು- ಒಂದು ಬಟ್ಟಲು
ಕ್ಯಾರೆಟ್,ಬೀನ್ಸ್,
ಆಲೂ,ಬಟಾಣಿ
ಉಪ್ಪು
ಕಾಯಿತುರಿ ಸ್ವಲ್ಪ
ಕೊತ್ತುಂಬರಿಸೊಪ್ಪು
ನಿಂಬೆರಸ

ವಿಧಾನ:

ರವೆಗೆ ಒಂದೆರಡು ಚಮಚ ಎಣ್ಣೆ ಹಾಕಿ ಹುರಿದುಕೊಳ್ಳಿ,ರವೆಯನ್ನು ಸೀದೀಸದೆ,ಘಂ ಎನ್ನುವ ವಾಸನೆ ಬರುವವರೆಗೂ ಹುರಿದು ತೆಗೆದಿಡಿ.
ಬಾಣಲೆಯಲ್ಲಿ ನಾಲ್ಕು/ಆರು ಚಮಚ ಎಣ್ಣೆ ಹಾಕಿ,ಕಾದ ಬಳಿಕ ಸಾಸಿವೆ,ಕರಿಬೇವು,ಕಡ್ಲೆಬೇಳೆ ಉದ್ದಿನಬೇಳೆ,ಹಸಿಮೆಣಸಿನಕಾಯಿ ಹಾಕಿ,ಹಾಕಿ,ಬೆರೆಸಿ.ಶುಂಠಿ ತುರಿ ಮತ್ತು ಈರುಳ್ಳಿಯನ್ನು ಹಾಕಿ ಹಾಗೆ ಸ್ವಲ್ಪ ಹೊತ್ತು ಹುರಿಯಿರಿ. ನಂತರ ತರಕಾರಿಗಳನ್ನು ಹಾಕಿ,ಹುರಿದು. ಕೆಲವು ನಿಮಿಷ ಬೇಯಿಸಿದ ನಂತರ ಉಪ್ಪು ಹಾಕಿ,ಅಗತ್ಯವಿದ್ದಷ್ಟು ನೀರು ಹಾಕಿ,ಎಲ್ಲಾ ಹೊಂದಿಕೊಳ್ಳುವಂತೆ ಸರಿಯಾಗಿ ಬೆರೆಸಿ. ಕುದಿಯಲು ಬಿಡಿ. ನೀರು ಒಂದು ಕುದಿ ಬಂದ ತಕ್ಷಣ ರವೆಯನ್ನು ಕುದಿಯುತ್ತಿರುವ ನೀರಿಗೆ ನಿಧಾನವಾಗಿ ಹಾಕುತ್ತಾ,ಆಗೆ ಗಂಟು ಬರದಂತೆ ತಿರುವುತ್ತಿರಿ. ಪೂರ್ತಿ ರವೆ ಹಾಕಿದ ನಂತರ ಅದಕ್ಕೆ ಕಾಯಿತುರಿ,ಕೊತ್ತುಂಬರಿಸೊಪ್ಪು ಮತ್ತು ನಿಂಬೆರಸ ಹಾಕಿ ಚೆನ್ನಾಗಿ ಬೆರೆಸಿ. ಬಿಸಿ ಬಿಸಿಯಾಗಿರುವಾಗಲೆ ಈ ತರಕಾರಿ ಉಪ್ಪಿಟ್ಟನ್ನು ತಿನ್ನಿ.
* ಫ್ರೊಜ಼ನ್ ತರಕಾರಿಗಳನ್ನು ಉಪಯೋಗಿಸಬಹುದು. ಮಿಕ಼್ಸೆಡ್ ವೆಜೆಟಬಲ್ಸ್ ತಗೊಂಡರೆ ಅನುಕೂಲ.ಇದು ಬೇಗ ಮತ್ತು ಸುಲಭವಾಗುತ್ತದೆ.
* ತರಕಾರಿ ಹೆಚ್ಚಿಕೊಳ್ಳುವ ಸಮಯ ಉಳಿಯುತ್ತದೆ ಹಾಗೂ ತರಕಾರಿ ಸಹ ಫ಼್ರೆಶ್ ಇರುತ್ತದೆ.

JavaLikaayiGorikaayi Palya-ಜವಳಿಕಾಯಿ/ಗೋರಿಕಾಯಿಪಲ್ಯ:

ಜವಳಿಕಾಯಿ/ಗೋರಿಕಾಯಿಪಲ್ಯ:

ಸಾಮಗ್ರಿಗಳು:

ಜವಳಿಕಾಯಿ/ಗೋರಿಕಾಯಿ
ಈರುಳ್ಳಿ
ಹಸಿಮೆಣಸಿನಕಾಯಿ
ಕರಿಬೇವು
ಚಿಟಿಕೆ ಸಕ್ಕರೆ/ಬೆಲ್ಲ
ಕಾಯಿತುರಿ
ಕೊತ್ತುಂಬರಿಸೊಪ್ಪು
ಉಪ್ಪು
ಜೀರಿಗೆ
ಎಣ್ಣೆ

ತಯಾರಿಸುವ ರೀತಿ:

ಮೊದಲು ಜವಳಿಕಾಯಿಯನ್ನು ಬಿಡಿಸಿಕೊಂಡು,ಅದನ್ನು ಸಣ್ಣಗೆ ಹೆಚ್ಚಿಕೊಳ್ಳಿ.ಬಾಣಲೆಗೆ ಎಣ್ಣೆ ಹಾಕಿ ಜೀರಿಗೆ,ಹಸಿಮೆಣಸಿನಕಾಯಿ,ಕರಿಬೇವು ಮತ್ತು ಈರುಳ್ಳಿಯನ್ನು ಹಾಕಿ,ಬಾಡಿಸಿ. ಈರುಳ್ಳಿ ಸ್ವಲ್ಪ ಬೇಯುವವರೆಗು ಹುರಿದು,ಜವಳಿಕಾಯಿ ಹಾಕಿ ಹಾಗೇ ಹುರಿಯಿರಿ. ನಂತರ ಅದಕ್ಕೆ ಬೆಲ್ಲ ಮತ್ತು ಉಪ್ಪು ಹಾಕಿ ಕಾಲು ಲೋಟ ನೀರು ಹಾಕಿ,ನಂತರ ಕಾಯಿತುರಿ ಮತ್ತು ಕೊತ್ತುಂಬರಿ ಸೊಪ್ಪು ಎರಡನ್ನು ಬೆರೆಸಿ. ಗೋರಿಕಾಯಿ ಬೇಯುವವರೆಗು ಬೇಯಿಸಿ. ಕುಕ್ಕರ್ ನಲ್ಲಿಯಾದರೆ ಒಂದು ವಿಷ್ಹಲ್ ಸಾಕು.ಒಲೆಯಿಂದ ಇಳಿಸಿ. ಇದನ್ನು ಊಟಕ್ಕೆ ನೆಂಚಿಕೊಳ್ಳಲು ಅಥವ ಚಪಾತಿ ಮತ್ತು ರೊಟ್ಟಿ ಜೊತೆಯಲ್ಲಿ ತಿನ್ನಲು ಕೊಡಬಹುದು. ರೊಟ್ಟಿಗೆ ತುಂಬಾ ಚೆನ್ನಾಗಿರುತ್ತದೆ. ಕಾಯಿತುರಿಯನ್ನು ಬೇಯಿಸುವಾಗಲೇ ಹಾಕುವುದರಿಂದ ಅದರ ರಸ ಬಿಡುವುದರಿಂದ ರುಚಿ ಹೆಚ್ಚುತ್ತದೆ. ಮೇಲೆ ಮತ್ತೆ ಬೇಕಾದರೆ ಕೊತ್ತುಂಬರಿ ಮತ್ತು ಕಾಯಿತುರಿಯನ್ನು ಸೇರಿಸಬಹುದು.

Mint / Pudina Chutney - ಪುದೀನ ಸೊಪ್ಪಿನ ಚಟ್ನಿ:

ಪುದೀನ ಸೊಪ್ಪಿನ ಚಟ್ನಿ:

ಸಾಮಗ್ರಿಗಳು:

ಪುದೀನ ಸೊಪ್ಪು
ಹಸಿಮೆಣಸಿನಕಾಯಿ
ಕೊತ್ತುಂಬರಿಸೊಪ್ಪು
ಉಪ್ಪು
ವಿನಿಗರ್ ಒಂದು ಚಮಚ

ವಿಧಾನ:

ಪುದೀನ,ಹಸಿಮೆಣಸಿನಕಾಯಿ,ಕೊತ್ತುಂಬರಿಸೊಪ್ಪು,ವಿನಿಗರ್ ಮತ್ತು ಉಪ್ಪು ರುಬ್ಬಿಕೊಳ್ಳಿ.
ಇದನ್ನು ಸಲಾಡ್ ಗಳಿಗೆ, ಸೌತೆಕಾಯಿ,ರಾಯತ,ಪಚ್ಚಡಿ ಮುಂತಾದವುಗಳಿಗೆ ಬೇಕಾದಾಗ ಉಪಯೋಗಿಸಬಹುದು.
ಫ್ರಿಡ್ಜ್ ನಲ್ಲಿ ಕೆಲವು ದಿನ ಹಾಳಾಗದೆ ಇರುತ್ತದೆ.

Moolangi chutni/Radish chutney

ಮೂಲಂಗಿ ಚಟ್ನಿ:

ಮೂಲಂಗಿ ಜಜ್ಜಿದ್ದು ಅರ್ಧ ಬಟ್ಟಲು
ಕಾಯಿತುರಿ ಒಂದು ಬಟ್ಟಲು
ಹಸಿಮೆಣಸಿನಕಾಯಿ
ಜೀರಿಗೆ
ಉಪ್ಪು
ಕೊತ್ತುಂಬರಿ ಸೊಪ್ಪು

ತಯಾರಿಸುವ ವಿಧಾನ:

ಕಾಯಿತುರಿ,ಉಪ್ಪು,ಹಸಿಮೆಣಸಿನಕಾಯಿ,ಜೀರಿಗೆ ಮತ್ತು ಕೊತ್ತುಂಬರಿ ಸೊಪ್ಪು ಎಲ್ಲಾ ಹಾಕಿ,ಚಟ್ನಿಯಂತೆ ರುಬ್ಬಿ.ಇದಕ್ಕೆ ಜಜ್ಜಿದ ಮೂಲಂಗಿಯನ್ನು ಬೆರೆಸಿ. ಇದು ರುಚಿಕರವಾಗಿರುತ್ತದೆ. ಯಾವ ಊಟಕ್ಕಾದರೂ ನೆಂಚಿಕೊಳ್ಳಬಹುದು.

Aloo Palya/Potato bhaji - ಆಲೂಗೆಡ್ಡೆ ಪಲ್ಯ:

ಆಲೂಗೆಡ್ಡೆ ಪಲ್ಯ:

ಸಾಮಗ್ರಿಗಳು:

ಆಲೂಗೆಡ್ಡೆ
ಎಣ್ಣೆ
ಸಾಸಿವೆ
ಜೀರಿಗೆ
ಹಸಿಮೆಣಸಿನಕಾಯಿ
ಈರುಳ್ಳಿ
ಕರಿಬೇವು
ಕಡ್ಲೆಬೇಳೆ
ಉದ್ದಿನಬೇಳೆ
ಅರಿಶಿನ
ಉಪ್ಪು
ಕಾಯಿತುರಿ
ಕೊತ್ತುಂಬರಿಸೊಪ್ಪು
ನಿಂಬೆರಸ

ವಿಧಾನ:

ಮೊದಲಿಗೆ ಆಲೂಗೆಡ್ಡೆಯನ್ನು ಸಿಪ್ಪೆ ಸಮೇತ ಬೇಯಿಸಿಕೊಳ್ಳಿ, ನಂತರ ತಣ್ಣಗಾದ ಮೇಲೆ ಸಿಪ್ಪೆ ತೆಗೆದು, ಪುಡಿ ಅಂದರೆ ಅದನ್ನು ಕೈನಲ್ಲಿಯೇ ಅದುಮಿದರೆ ಸಾಕು ಪುಡಿಯಾಗುತ್ತದೆ.
ಬಾಣಲೆಯಲ್ಲಿ ಒಂದೆರಡು ಚಮಚ ಎಣ್ಣೆ ಹಾಕಿ ,ಕಾದ ಬಳಿಕ ಸಾಸಿವೆ,ಜೀರಿಗೆ,ಕರಿಬೇವು,ಕಡ್ಲೆಬೇಳೆ,ಉದ್ದಿನಬೇಳೆ,ಹಸಿಮೆಣಸಿನಕಾಯಿ ಹಾಕಿ,ಹಾಕಿ ಬೆರೆಸಿ. ಈರುಳ್ಳಿ ಹಾಕಿ ಹಾಗೆ ಸ್ವಲ್ಪ ಹೊತ್ತು ಹುರಿಯಿರಿ. ಒಂದೆರಡು ನಿಮಿಷದ ನಂತರ ಉಪ್ಪು ಮತ್ತು ಅರಿಶಿನ ಹಾಕಿ,ಪುಡಿ ಮಾಡಿದ ಆಲೂಗೆಡ್ಡೆಯನ್ನು ಹಾಕಿ,ಎಲ್ಲಾ ಹೊಂದಿಕೊಳ್ಳುವಂತೆ ಸರಿಯಾಗಿ ಬೆರೆಸಿ. ಅದನ್ನು ಬೆರೆಸಿದ ಮೇಲೆ ಕಾಯಿತುರಿ,ಕೊತ್ತುಂಬರಿಸೊಪ್ಪು ಮತ್ತು ನಿಂಬೆರಸ ಹಾಕಿ ಚೆನ್ನಾಗಿ ಬೆರೆಸಿ. ಇದನ್ನು ದೋಸೆಗೆ,ಚಪಾತಿಗೆ ಮತ್ತು ಪೂರಿಗೆ ಜೊತೆಯಾಗಿ ತಿನ್ನಲು ಉಪಯೋಗಿಸಬಹುದು.

Red Chutney-ಖಾರಚಟ್ನಿ/ಕೆಂಪು ಚಟ್ನಿ:

ಖಾರಚಟ್ನಿ/ಕೆಂಪು ಚಟ್ನಿ:

ಸಾಮಗ್ರಿಗಳು:

ಕೆಂಪುಮೆಣಸಿನಕಾಯಿ / ಒಣಮೆಣಸಿನಕಾಯಿ
ಉಪ್ಪು
ಹುಣಸೇಹಣ್ಣು ಚೂರು
ಬೆಳ್ಳುಳ್ಳಿ ಸ್ವಲ್ಪ

ವಿಧಾನ:

ಇವೆಲ್ಲವನ್ನು ಸ್ವಲ್ಪ ನೀರು ಹಾಕಿ ಗಟ್ಟಿಯಾಗಿ ರುಬ್ಬಿ, ಕೆಂಪು ಚಟ್ನಿ ಅಥವ ಖಾರ ಚಟ್ನಿ ತಯಾರಾಗುತ್ತದೆ.

Plain Pulao Rice / ಪಲಾವ್

ಪಲಾವ್:

ಸಾಮಗ್ರಿಗಳು:

ಈರುಳ್ಳಿ ಹೆಚ್ಚಿದ್ದು
ಹಸಿಮೆಣಸಿನಕಾಯಿ
ಅಚ್ಚಖಾರದ ಪುಡಿ
ಜೀರಿಗೆ
ಅರಿಶಿಣದ ಪುಡಿ
ಚೆಕ್ಕೆ, ಲವಂಗ,ಏಲಕ್ಕಿ ಮತ್ತು ಪತ್ರೆ
ಕಾಯಿತುರಿ
ಅಕ್ಕಿ - ನೆನೆಸಿದ್ದು
ಕೊತ್ತುಂಬರಿ ಸೊಪ್ಪು
ನಿಂಬೆರಸ
ಉಪ್ಪು
ಎಣ್ಣೆ

ತಯಾರಿಸುವ ವಿಧಾನ:

ಕುಕ್ಕರ್ ಗೆ ಎಣ್ಣೆಯನ್ನು ಹಾಕಿ ಕಾದ ಮೇಲೆ ಜೀರಿಗೆ,ಚೆಕ್ಕೆ,ಲವಂಗ,ಪತ್ರೆ ಮತ್ತು ಏಲಕ್ಕಿ ಹಾಕಿ,ಕೆದಕಿ,ಈರುಳ್ಳಿಯನ್ನು ಮತ್ತು ಹಸಿಮೆಣಸಿನಕಾಯಿಯನ್ನು ಹಾಕಿ,ಈರುಳ್ಳಿ ಸ್ವಲ್ಪ ಕೆಂಪಾಗುವವರೆಗೂ ಬಾಡಿಸಿ,ಅದನ್ನು ಒಂದೆರಡು ನಿಮಿಷ ಹುರಿದು,ಅದಕ್ಕೆ ಅರಿಶಿಣ,ಕಾರದಪುಡಿ,ಉಪ್ಪು,ಕಾಯಿತುರಿ ಮತ್ತು ನೀರನ್ನು ಹಾಕಿ,ನೆನೆಸಿದ ಅಕ್ಕಿಯನ್ನು ಹಾಕಿ,ನಿಂಬೆರಸ ಮತ್ತು ಕೊತ್ತುಂಬರಿ ಸೊಪ್ಪು ಹಾಕಿ,ಚೆನ್ನಾಗಿ ಬೆರೆಸಿ,ಮುಚ್ಚಿಟ್ಟು ಒಂದು ವಿಷ್ಹಲ್ ಕೂಗಿಸಿ ಒಲೆಯಿಂದ ಇಳಿಸಿ. ಮತ್ತೆ ಸ್ವಲ್ಪ ಕೊತ್ತುಂಬರಿ ಸೊಪ್ಪಿನಿಂದ ಅಲಂಕರಿಸಿ. ಮೊಸರಿನ ರಾಯತದೊಂದಿಗೆ ಬಡಿಸಿ.

Water Melon Juice/ಕಲ್ಲಂಗಡಿ ಹಣ್ಣಿನ ಪಾನೀಯ:

ಕಲ್ಲಂಗಡಿ ಹಣ್ಣಿನ ಪಾನೀಯ:

ಕಲ್ಲಂಗಡಿ ಹಣ್ಣು
ಉಪ್ಪು
ಮೆಣಸಿನಪುಡಿ
ಜೇನುತುಪ್ಪ
ನಿಂಬೆರಸ

ವಿಧಾನ:

ಕಲ್ಲಂಗಡಿ ಹಣ್ಣಿನ ಹೋಳುಗಳನ್ನು ಮಿಕ್ಸಿಗೆ ಹಾಕಿ, ಸ್ವಲ್ಪ ನೀರು ಮತ್ತು ಜೇನುತುಪ್ಪ ಹಾಕಿ ಬ್ಲೆಂಡ್ ಮಾಡಿಕೊಳ್ಳಿ. ಅದನ್ನು ಲೋಟಕ್ಕೆ ಹಾಕಿ ಚಿಟಿಕೆ ಉಪ್ಪು ಮತ್ತು ಕಾಳುಮೆಣಸಿನಪುಡಿ ಹಾಕಿ.ನಿಂಬೆರಸ ಸೇರಿಸಿ ಕಲಕಿ.ಸರ್ವ್ ಮಾಡಿ.ತಣ್ಣಗೆ ಬೇಕಾದವರು ಐಸ್ ಕ್ಯೂಬ್ಸ್ ಹಾಕಿಕೊಳ್ಳಬಹುದು.

Radish raita - ಮೂಲಂಗಿ ರಾಯತ ಅಥವ ಪಚ್ಚಡಿ:

ಮೂಲಂಗಿ ರಾಯತ ಅಥವ ಪಚ್ಚಡಿ:

ಮೂಲಂಗಿ ತುರಿಗೆ ಮೊಸರು,ಉಪ್ಪು,ಕಾಳುಮೆಣಸಿನಪುಡಿ,ಹೆಚ್ಚಿದ ಕೊತ್ತುಂಬರಿಸೊಪ್ಪು ಹಾಕಿ ಬೆರೆಸಿ.ಇದಕ್ಕೆಬೇಕೆನಿಸಿದರೆ ಸ್ವಲ್ಪ ಬೆಲ್ಲ ಹಾಕಬಹುದು. ಕೊನೆಯಲ್ಲಿ ನಿಂಬೆರಸ ಹಾಕಿದರೆ ರಾಯತ ರೆಡಿ.

idli

Aambode /Kadlebele Vade - ಕಡ್ಲೆಬೇಳೆ ಆಂಬೋಡೆ:

ಕಡ್ಲೆಬೇಳೆ ಆಂಬೋಡೆ:

ಬೇಕಾಗುವ ಸಾಮಗ್ರಿಗಳು:

ಕಡ್ಲೆಬೇಳೆ - ಒಂದು ಬಟ್ಟಲು
ಹಸಿಮೆಣಸಿನಕಾಯಿ
ಒಂದು ಚೆಕ್ಕೆ, ಲವಂಗ
ಶುಂಠಿ - ಒಂದು ಇಂಚು
ಕೊತ್ತುಂಬರಿ ಸೊಪ್ಪು
ಸಣ್ಣಗೆ ಹೆಚ್ಚಿದ ಈರುಳ್ಳಿ
ಹೆಚ್ಚಿದ ಸಬ್ಬಸ್ಸಿಗೆ ಸೊಪ್ಪು
ಉಪ್ಪು ರುಚಿಗೆ

ತಯಾರಿಸುವ ವಿಧಾನ:

ಮೊದಲಿಗೆ ಕಡ್ಲೆಬೇಳೆಯನ್ನು ಮೂರು ಗಂಟೆ ನೆನೆಸಿ.
ನೆನೆದ ಕಡ್ಲೆಬೇಳೆಯನ್ನು, ನೀರು ಸೋಸಿಕೊಂಡು ಅದನ್ನು ಹಸಿಮೆಣಸಿನಕಾಯಿ,ಚೆಕ್ಕೆ,ಲವಂಗ,ಶುಂಠಿ,ಉಪ್ಪು ಮತ್ತು ಕೊತ್ತುಂಬರಿಸೊಪ್ಪು ಹಾಕಿ ಗಟ್ಟಿಯಾಗಿ ಮತ್ತು ತರಿತರಿಯಾಗಿ ರುಬ್ಬಿಕೊಳ್ಳಿ. ಈ ರುಬ್ಬಿದ ಮಿಶ್ರಣಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ ಮತ್ತು ಹೆಚ್ಚಿದ ಸಬ್ಬಸ್ಸಿಗೆ ಸೊಪ್ಪನ್ನು ಹಾಕಿ ಚೆನ್ನಾಗಿ ಬೆರೆಸಿ.ಕಲೆಸುವಾಗ ನೀರು ಹಾಕಬೇಡಿ,ಈರುಳ್ಳಿಯನ್ನು ಮತ್ತು ಸೊಪ್ಪಿನಲ್ಲಿ ನೀರಿನ ಅಂಶ ಇರುವುದರಿಂದ ಅದೇ ಸಾಕಾಗುತ್ತದೆ. ಕಲೆಸಲು, ಎಲ್ಲವನ್ನೂ ಚೆನ್ನಾಗಿ ಹೊಂದಿಕೊಳ್ಳುವಂತೆ ಕಲೆಸಿ. ಸಣ್ಣ ಸಣ್ಣ ಉಂಡೆ ಮಾಡಿಕೊಂಡು, ಅದನ್ನು ಅಂಗೈನಲ್ಲಿ ಸ್ವಲ್ಪ ದಪ್ಪವಾಗಿ ತಟ್ಟಿಕೊಂಡು ಕಾದಿರುವ ಎಣ್ಣೆಯಲ್ಲಿ ಒಂದೊಂದಾಗಿ ಹಾಕಿ, ಬೇಯಿಸಿ. ಎಣ್ಣೆಗೆ ಹಾಕಿದ ತಕ್ಷಣ ಜಾಲರಿ ಹಾಕಿ ಅಲ್ಲಾಡಿಸಬೇಡಿ. ವಡೆಯ ಬಣ್ಣ ಸ್ವಲ್ಪ ಬದಲಾದ ನಂತರ ತಿರುವಿ ಹಾಕಿ, ಎರಡು ಬದಿ ಹೊಂಬಣ್ಣ ಬರುವವರೆಗೂ ಬೇಯಿಸಿ. ಎಣ್ಣೆಯಿಂದ ತೆಗೆದು ಪೇಪರ್ ಟವಲ್ ಮೇಲೆ ಹಾಕಿ. ಇದೇ ರೀತಿ ಮಿಕ್ಕ ಎಲ್ಲಾ ವಡೆಗಳನ್ನು ತಯಾರಿಸಿ. ರುಚಿಯಾದ ಸಬ್ಬಸ್ಸಿಗೆ ಕಡ್ಲೆಬೇಳೆ ಆಂಬೋಡೆ ತಿನ್ನಲು ಸಿದ್ಧವಾಗುತ್ತದೆ. ಇದನ್ನು ಬಿಸಿಬಿಸಿಯಾಗಿಯೂ / ತಣ್ಣಗೂ ತಿನ್ನಬಹುದು. ಜೊತೆಗೆ ಏನು ಇಲ್ಲದಿದ್ದರೂ ಚೆನ್ನಾಗಿರುತ್ತೆ, ಅದರ ಜೊತೆ ಚಟ್ನಿ/ಸಾಸ್/ಕೆಚಪ್ ಕೂಡ ಸರ್ವ್ ಮಾಡಬಹುದು.

Palak Potato Curry-ಆಲೂ-ಪಾಲಕ್ ಗೊಜ್ಜು,

ಆಲೂ-ಪಾಲಕ್ ಮಸಾಲೆ:

ಬೇಕಾಗುವ ಸಾಮಗ್ರಿಗಳು;ಪಾಲಕ್ ಸೊಪ್ಪು
ಆಲೂಗೆಡ್ಡೆಯನ್ನು ಹೆಚ್ಚಿಕೊಳ್ಳಿ
ಹೆಚ್ಚಿದ ಈರುಳ್ಳಿ
ಒಂದು ಹಸಿಮೆಣಸಿನಕಾಯಿ
ಅಚ್ಚಖಾರದಪುಡಿ
ಧನಿಯ
ಜೀರಿಗೆಪುಡಿ
ಗರಂಮಸಾಲಾ
ಬೆಣ್ಣೆ - ಎರಡು ಚಮಚ
ಕೊತ್ತುಂಬರಿಸೊಪ್ಪು
ಎಣ್ಣೆ, ಜೀರಿಗೆ, ಕರಿಬೇವು
ಉಪ್ಪು ರುಚಿಗೆ

ವಿಧಾನ;
ಮೊದಲು ಪಾಲಕ್ ಸೊಪ್ಪನ್ನು ಶುಚಿಗೊಳಿಸಿ,ಚೆನ್ನಾಗಿ ಉಪ್ಪು ಮತ್ತು ವಿನಿಗರ್ ನೀರಿನಲ್ಲಿ ತೊಳೆದು,ಅದನ್ನು ಐದು ನಿಮಿಷ ಸ್ವಲ್ಪ ಬಿಸಿನೀರಿನಲ್ಲಿ ಬೇಯಿಸಿಕೊಂಡು ಪೇಸ್ಟ್ ತರಹ ರುಬ್ಬಿಕೊಳ್ಳಿ
ಪಾತ್ರೆಗೆ ಎಣ್ಣೆಯನ್ನು ಹಾಕಿ, ಜೀರಿಗೆ ಹಾಕಿ ಚಟಪಟ ಅಂದಾಗ ಕರಿಬೇವು,ಹಸಿಮೆಣಸಿನಕಾಯಿ ಮತ್ತು ಈರುಳ್ಳಿಯನ್ನು ಹಾಕಿ ಬಾಡಿಸಿ. ಎರಡು ನಿಮಿಷದ ನಂತರ ಆಲೂಗೆಡ್ಡೆಯನ್ನು ಹಾಕಿ. ಒಂದೆರಡು ನಿಮಿಷ ಹುರಿದು ರುಬ್ಬಿದ ಪಾಲಕ್ ಪೇಸ್ಟ್ ಅನ್ನು ಹಾಕಿ,ಅದರ ಜೊತೆಗೆ ಅರಿಶಿನ ಮತ್ತು ಉಪ್ಪನ್ನು ಹಾಕಿ ಚೆನ್ನಾಗಿ ಬೆರೆಸಿ. ಐದಾರು ನಿಮಿಷ ಹುರಿದು,ಕಾರದಪುಡಿ,ಧನಿಯ ಮತ್ತು ಜೀರಿಗೆಪುಡಿಯನ್ನು ಹಾಕಿ,ಒಂದೆರಡು ನಿಮಿಷ ಬಾಡಿಸಿ. ಎಷ್ಟು ಅಗತ್ಯವೋ ಅಷ್ಟು ಮಾತ್ರ ನೀರನ್ನು ಹಾಕಿ,ಆಲೂಗೆಡ್ಡೆ ಬೇಯುವವರೆಗೆ ಬೇಯಿಸಿ, ಕೊನೆಯಲ್ಲಿ ಕೊತ್ತುಂಬರಿಸೊಪ್ಪು ಮತ್ತು ಗರಂಮಸಾಲ ಬೆರೆಸಿ.ಬೆಣ್ಣೆಯನ್ನು ಬೆರೆಸಿ, ಒಂದು ನಿಮಿಷದ ನಂತರ ಇಳಿಸಿ,ಮತ್ತೆ ಸ್ವಲ್ಪ ಕೊತ್ತುಂಬರಿ ಸೊಪ್ಪು ಹಾಕಿ,ಈ ಮಸಾಲೆಯನ್ನು ಚಪಾತಿ ಮತ್ತು ಪರೋಟದೊಂದಿಗೆ ನೀಡಬಹುದು.

Simple Salads / ದಿಡೀರ್ ಸಲಾಡ್

ದಿಡೀರ್ ಸಲಾಡ್:

ಟಮೋಟ ಸಲಾಡ್:

ಟಮೋಟ ಸಣ್ಣಗೆ ಕತ್ತರಿಸಿ,ಅದಕ್ಕೆ ಹೆಚ್ಚಿದ ಈರುಳ್ಳಿ,ಉಪ್ಪು,ಕರಿ ಮೆಣಸಿನ ಪುಡಿ,ಕೊತ್ತುಂಬರಿಸೊಪ್ಪು ಬೆರೆಸಿ.
*********************************

ಕ್ಯಾರೆಟ್ ಸಲಾಡ್:

ಕ್ಯಾರೆಟ್ ಅನ್ನು ತುರಿದುಕೊಂಡು ಅದಕ್ಕೆ ಕಾರ,ಮೆಣಸಿನಪುಡಿ ಮತ್ತು ಉಪ್ಪು ಹಾಕಿ ಚೆನ್ನಾಗಿ ಬೆರೆಸಿ. ನಂತರ ಕಾಯಿತುರಿ ಮತ್ತು ಕೊತ್ತುಂಬರಿಸೊಪ್ಪು ಹಾಕಿ.
*********************************

ಈರುಳ್ಳಿ ಸಲಾಡ್:

ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಂಡು,ಅದಕ್ಕೆ ಹೆಚ್ಚಿದ ಕೊತ್ತುಂಬರಿ,ಕಾಯಿತುರಿ,ಉಪ್ಪು ಮತ್ತು ಮೆಣಸಿನಕಾರ ಹಾಕಿ ಕಲೆಸಿ. ನಿಂಬೆರಸ ಸಹ ಹಾಕಬಹುದು.

Potato Wedges - ಆಲೂ ಟಿಕ್ಕಿ/ಆಲೂ ವೆಡ್ಜಸ್:

ಆಲೂಗೆಡ್ಡೆಯಿಂದ ತಯಾರಿಸದ ತಿಂಡಿಗಳೇ ಇಲ್ಲ. ಆಲೂ ಮನೆಯಲ್ಲಿ ಸಾಮಾನ್ಯವಾಗಿ ಸದಾ ಸ್ಟಾಕ್ ಇದ್ದೇಇರುತ್ತದೆ. ಸಾಮಾನ್ಯವಾಗಿ ಇದನ್ನು ಜಾಸ್ತಿ ಅಡಿಗೆಗಳಿಗೆ ಬಳಸುತ್ತೇವೆ. ಆಲೂಗೆಡ್ಡೆಯಿಂದ ಯಾವುದೇ ಪದಾರ್ಥ ತಯಾರಿಸಿದರೂ,ಅದು ರುಚಿಯಾಗಿಯೇ ಇರುತ್ತದೆ. ಮಕ್ಕಳಿಗಂತೂ ಪೊಟ್ಯಾಟೋ ಅಂದರೆ ಒಂದು ಖುಷಿ. ಅದರಲ್ಲೂ ಎಲ್ಲಕ್ಕಿಂತ ಹೆಚ್ಚಾಗಿ ಫ್ರೆಂಚ್ ಫ್ರೈಸ್ ಮತ್ತು ಆಲೂಗೆಡ್ಡೆ ಬಜ್ಜಿ ಎಂದರೆ ಯಾವ ಸಮಯದಲ್ಲಾದರೂ ಸರಿ ತಿನ್ನುತ್ತಾರೆ. ಈ ರೀತಿ ಫ್ರೈಸ್ ನಲ್ಲಿ ಎಣ್ಣೆಯ ಅಂಶ ಜಾಸ್ತಿ ಇರುತ್ತದೆ. ಅದಕ್ಕಾಗಿ ಆಲೂ ವೆಡ್ಜಸ್ ತಯಾರಿಸಿ ಕೊಡಿ. ಇದು ಹೆಚ್ಚು ಎಣ್ಣೆ ತೆಗೆದುಕೊಳ್ಳುವುದಿಲ್ಲ.ಮಕ್ಕಳು ಕೂಡ ತಿನ್ನಲು ಬೇಡಾ ಎನ್ನುವುದಿಲ್ಲ.ಜೊತೆಲಿ ದೊಡ್ಡವರು ಸಹ! ಇದನ್ನು ತಯಾರಿಸಲು ಸಮಯ ತುಂಬಾ ಬೇಕಾಗಿಲ್ಲ.

ಆಲೂ ಟಿಕ್ಕಿ/ಆಲೂ ವೆಡ್ಜಸ್:

ಬೇಕಾಗುವ ಸಾಮಗ್ರಿಗಳು:
ಆಲೂಗೆಡ್ಡೆಯನ್ನು ಉದ್ದಕ್ಕೆ ಹೆಚ್ಚಿಕೊಳ್ಳಿ
ಮೆಣಸಿನಪುಡಿ
ಧನಿಯಾ ಪುಡಿ
ಅರಿಶಿನ ಸ್ವಲ್ಪ
ಗರಂ ಮಸಾಲಾ ಸ್ವಲ್ಪ
ಉಪ್ಪು ರುಚಿಗೆ
ಎಣ್ಣೆ

ವಿಧಾನ:

ಪ್ಯಾನ್ ಗೆ ಒಂದೆರಡು ಚಮಚ ಎಣ್ಣೆಯನ್ನು ಹಾಕಿ, ಅದಕ್ಕೆ ಆಲೂಗೆಡ್ಡೆ ಹೋಳುಗಳನ್ನು ಹಾಕಿ,ಹಾಗೇ ಹುರಿಯುತ್ತಿರಿ. ಆಲೂ ಬಣ್ಣ ಬದಲಾಗುವವರೆಗೂ ಅಂದರೆ ಅದು ಚೆನ್ನಾಗಿ ಎಣ್ಣೆಯಲ್ಲಿಯೇ ಹೊಂಬಣ್ಣ ಬರುವವರೆಗು ಹುರಿದುಕೊಂಡು, ಆಮೇಲೆ ಅರಿಶಿನ ಮತ್ತು ಉಪ್ಪು ಹಾಕಿ ಬೆರೆಸಿ . ನಂತರ ಅದಕ್ಕೆ ಅಚ್ಚಮೆಣಸಿನಪುಡಿ, ಧನಿಯಾಪುಡಿ ಮತ್ತು ಗರಂಮಸಾಲ ಹಾಕಿ ಚೆನ್ನಾಗಿ ಬೆರೆಸಿ,ಪೂರ್ತಿ ಎಲ್ಲಾ ಹೋಳುಗಳಿಗೂ ಮಸಾಲೆ ಹತ್ತಿದ ಮೇಲೆ ಕೆಳಗಿಳಿಸಿ. ಇದನ್ನು ಸ್ನಾಕ್ಸ್ ತರಹ/ಊಟಕ್ಕೆ ನೆಂಜಿಕೊಳ್ಳಲು/ಊಟಕ್ಕೆ ಮೊದಲು ನೀಡಬಹುದು. ಮಕ್ಕಳಿಗಂತೂ ತುಂಬಾ ಪ್ರಿಯವಾಗುತ್ತದೆ. ಫ್ರೆಂಚ್ ಫ್ರೈ ಗಳಿಗಿಂತ ಇದು ಉತ್ತಮ. ಎಣ್ಣೆಯಲ್ಲಿ ಕರಿಯದೇ ಇರುವುದರಿಂದ ಮಕ್ಕಳಿಗೆ ಒಳ್ಳೆಯದು.

Snake Gourd Sabji-PaduvalaKaayi Palya

ಪಡವಲಕಾಯಿ ಪಲ್ಯ:

ಸಾಮಗ್ರಿಗಳು:
ಪಡವಲಕಾಯಿ
ಈರುಳ್ಳಿ
ಹಸಿಮೆಣಸಿನಕಾಯಿ
ಕರಿಬೇವು
ಚಿಟಿಕೆ ಸಕ್ಕರೆ/ಬೆಲ್ಲ
ಕಾಯಿತುರಿ
ಕೊತ್ತುಂಬರಿಸೊಪ್ಪು
ಉಪ್ಪು
ಜೀರಿಗೆ
ಎಣ್ಣೆ

ತಯಾರಿಸುವ ರೀತಿ:
ಮೊದಲು ಪಡವಲ ಕಾಯಿಯನ್ನು ಸಣ್ಣಗೆ ಹೆಚ್ಚಿಕೊಳ್ಳಿ.ಬಾಣಲೆಗೆ ಎಣ್ಣೆ ಹಾಕಿ ಜೀರಿಗೆ,ಹಸಿಮೆಣಸಿನಕಾಯಿ,ಕರಿಬೇವು ಮತ್ತು ಈರುಳ್ಳಿಯನ್ನು ಹಾಕಿ, ಬಾಡಿಸಿ. ಈರುಳ್ಳಿ ಸ್ವಲ್ಪ ಬೇಯುವವರೆಗು ಹುರಿದು,ಪಡುವಲಕಾಯಿ ಹಾಕಿ ಹಾಗೇ ಹುರಿಯಿರಿ. ನಂತರ ಅದಕ್ಕೆ ಬೆಲ್ಲ ಮತ್ತು ಉಪ್ಪು ಹಾಕಿ ಒಂದೆರಡು ಚಮಚ ನೀರು ಹಾಕಿ, ಮುಚ್ಚಿಡಿ.
ಇದು ಬೇಗ ಬೇಯುತ್ತದೆ. ಬೆಂದ ನಂತರ ಕಾಯಿತುರಿ ಮತ್ತು ಕೊತ್ತುಂಬರಿ ಸೊಪ್ಪು ಎರಡನ್ನು ಬೆರೆಸಿ. ಒಲೆಯಿಂದ ಇಳಿಸಿ. ಇದನ್ನು ಊಟಕ್ಕೆ ನೆಂಚಿಕೊಳ್ಳಲು ಅಥವ ಚಪಾತಿ ಜೊತೆಯಲ್ಲಿ ತಿನ್ನಲು ಕೊಡಬಹುದು. ಪಡುವಲಕಾಯಿ ಆರೋಗ್ಯಕ್ಕೆ ಉತ್ತಮ.

Vangibath - ವಾಂಗೀಭಾತ್:

ವಾಂಗೀಭಾತ್:

ಸಾಮಗ್ರಿಗಳು:

ಬದನೆಕಾಯಿ
ಅನ್ನ- ಎರಡು ಬಟ್ಟಲು
ಉದ್ದಕ್ಕೆ ಹೆಚ್ಚಿದ ಈರುಳ್ಳಿ
ಒಣಮೆಣಸಿನಕಾಯಿ-ರುಚಿಗೆ
ಧನಿಯ-ಎರಡು ಚಮಚ
ಮೆಣಸು-ಸ್ವಲ್ಪ
ಕಡ್ಲೆಬೇಳೆ-ಒಂದು ಚಮಚ
ಉದ್ದಿನಬೇಳೆ-ಅರ್ಧ ಚಮಚ
ಇಂಗು ಸ್ವಲ್ಪ,ಅರಿಶಿನ
ತುಪ್ಪ ಮತ್ತು ಎಣ್ಣೆ, ಸಾಸಿವೆ
ಕರಿಬೇವು,ಇಂಗು ಚಿಟಿಕೆ
ಚೆಕ್ಕೆ,ಲವಂಗ,ಪತ್ರೆ,ಏಲಕ್ಕಿ
ಉಪ್ಪು ರುಚಿಗೆ
ಹುಣಸೇರಸ -ಅರ್ಧಚಮಚ
ಕಾಯಿತುರಿ ಮತ್ತು ಕೊಬ್ಬರಿ ಸ್ವಲ್ಪ
ಕೊತ್ತುಂಬರಿ ಸೊಪ್ಪು


ತಯಾರಿಸುವ ವಿಧಾನ:

ಮೊದಲು ಉದುರುಉದುರಾಗಿ ಅನ್ನ ಮಾಡಿಟ್ಟಿರುವುದಕ್ಕೆ ಸ್ವಲ್ಪ ಎಣ್ಣೆ ಹಾಕಿ ಬೆರೆಸಿ,ತಣ್ಣಗಾಗಲು ಬಿಡಿ.

ವಾಂಗೀಭಾತ್ ಮಸಾಲ ಪುಡಿ:

ಒಣಮೆಣಸಿನಕಾಯಿ,ಧನಿಯ,ಮೆಣಸು,ಕಡ್ಲೆಬೇಳೆ,ಉದ್ದಿನಬೇಳೆ ಎಲ್ಲವನ್ನು ಹುರಿದುಕೊಂಡು ಇಂಗು ಮತ್ತು ಕೊಬ್ಬರಿ ತುರಿಯೊಂದಿಗೆ ಸೇರಿಸಿ ಪುಡಿ ಮಾಡಿಟ್ಟುಕೊಳ್ಳಿ.
ಬದನೆಕಾಯಿ ಹೆಚ್ಚಿಕೊಂಡು ಉಪ್ಪು ನೀರಿಗೆ ಹಾಕಿಡಿ.
ಒಂದು ಪಾತ್ರೆಗೆ ಸಾಕಾಷ್ಟು ಎಣ್ಣೆ ಹಾಕಿ,ಅದಕ್ಕೆ ಚೆಕ್ಕೆ,ಲವಂಗ,ಪತ್ರೆ,ಏಲಕ್ಕಿ,ಕರಿಬೇವು,ಇಂಗು ಎಲ್ಲವನ್ನು ಹಾಕಿ ಒಂದು ನಿಮಿಷ ಹುರಿಯಿರಿ.ಈರುಳ್ಳಿಯನ್ನು ಹಾಕಿ,ಒಂದೆರಡು ನಿಮಿಷ ಹುರಿದು,ನಂತರ ಅದಕ್ಕೆ ಬದನೆಕಾಯಿ ಹಾಕಿ,ಅದರಲ್ಲಿಯೇ ಹುರಿಯಿರಿ,ಎಲ್ಲಾ ಬದನೆಕಾಯಿ ಹೋಳುಗಳು ಚೆನ್ನಾಗಿ ಫ್ರೈ ಮಾಡಿಕೊಂಡು,ಅದು ಬೆಂದಿದೆ ಎನಿಸಿದ ಮೇಲೆ,ಅದಕ್ಕೆ ಅರಿಶಿನ,ಹುರಿದು ಪುಡಿ ಮಾಡಿದ ಮಸಾಲೆಯನ್ನು ಮತ್ತು ಹುಣಸೇರಸ ಹಾಕಿ,ಬಾಡಿಸಿ.ಉಪ್ಪು ಹಾಕಿ. ನೀರು ಹಾಕಬಾರದು. ಎಲ್ಲ ಮಸಾಲೆ ಚೆನ್ನಾಗಿ ಬೆರೆಯುವಂತೆ ಕೆದಕುತ್ತಿರಿ. ನಂತರ ಅದನ್ನು ಇಳಿಸಿ. ಎಷ್ಟು ಬೇಕೋ ಅಷ್ಟು ಮಾತ್ರ ಮಸಾಲೆ ತೆಗೆದುಕೊಂಡು ಅನ್ನಕ್ಕೆ ಹಾಕಿ,ಚೆನ್ನಾಗಿ ಕಲೆಸಿ,ಕಾಯಿತುರಿ ಮತ್ತು ಕೊತ್ತುಂಬರಿಸೊಪ್ಪು ಸಹ ಹಾಕಿ ಎಲ್ಲವೂ ಸರಿಯಾಗಿ ಬೆರೆಯುವಂತೆ ಕಲೆಸಿ. ವಾಂಗೀಭಾತ್ ತಯಾರಾಗುತ್ತದೆ. ಇದನ್ನು ರಾಯಿತ/ಚಟ್ನಿ ಜೊತೆ ಸರ್ವ್ ಮಾಡಿ.

* ಬದನೆಕಾಯಿ ಬೇಯಲು ನೀರು ಹಾಕಬಾರದು.
* ಒಗ್ಗರಣೆಗೆ ಎಣ್ಣೆ ಜಾಸ್ತಿ ಹಾಕಿ, ಅದರಲ್ಲಿಯೇ ಬದನೆ ಬೇಯುತ್ತದೆ.
* ಕಲೆಸುವಾಗ ಉಪ್ಪು-ಕಾರ ನೋಡಿಕೊಳ್ಳಿ.
* ತಕ್ಷಣ ತಿನ್ನುವುದಕ್ಕಿಂತ ಸ್ವಲ್ಪ ಹೊತ್ತಿನ ಬಳಿಕ ತಿಂದರೆ ಹೆಚ್ಚು ರುಚಿಯಾಗಿರುತ್ತದೆ. ಇದನ್ನು ತಿಂಡಿ/ಊಟ ಯಾವುದಕ್ಕಾದರೂ ಬಳಸಬಹುದು.
* ವಾಂಗೀಭಾತ್ ಮಸಾಲೆ ಎಷ್ಟು ಬೇಕೋ ಅಷ್ಟು ಮಾತ್ರ ಕಲೆಸಿ, ಮಿಕ್ಕಿದ್ದು ಎತ್ತಿಡಬಹುದು. ಯಾವಾಗ ಬೇಕಾದರೂ ಉಪಯೋಗಿಸಬಹುದು.

Tomato Juice/Sharabat-ಟಮೋಟ ಶರಬತ್ತು:

ಟಮೋಟ ಶರಬತ್ತು:
ಸಾಮಾನುಗಳು:

ಚೆನ್ನಾಗಿ ಹಣ್ಣಾಗಿರುವ ಟಮೋಟ
ಸಕ್ಕರೆ
ಏಲಕ್ಕಿ ಪುಡಿ

ವಿಧಾನ:

ಟಮೋಟವನ್ನು ಚೆನ್ನಾಗಿ ತೊಳೆದು,ಮಿಕ್ಸಿಗೆ ಹಾಕಿ,ಅದರೊಂದಿಗೆ ಸಕ್ಕರೆ,ಏಲಕ್ಕಿಪುಡಿ ಮತ್ತು ನೀರನ್ನು ಹಾಕಿ ,ರುಬ್ಬಿಕೊಳ್ಳಿ(ಬ್ಲೆಂಡ್ ಮಾಡಿಕೊಳ್ಳಿ). ಇದನ್ನು ಸೋಸಿದರೆ ಟಮೋಟ ಶರಬತ್ತು ತಯಾರಾಗುತ್ತದೆ.ಟಮೋಟೋ ಹಣ್ಣಿನ ನೈಜ ಬಣ್ಣದ ಈ ಶರಬತ್ತು ನೋಡಲು ಕೂಡ ಚೆನ್ನಾಗಿರುತ್ತದೆ. ತಣ್ಣಗೆ ಬೇಕಾದವರು ತಣ್ಣನೆ ನೀರನ್ನು ಹಾಕಿಕೊಳ್ಳಿ ರುಬ್ಬಿಕೊಳ್ಳುವಾಗ. ಈ ಶರಬತ್ತನ್ನು ತಯಾರಿಸಿದ ತಕ್ಷಣ ಕುಡಿದರೆ ಒಳ್ಳೆಯದು,ರುಚಿಯಾಗಿರುತ್ತದೆ. ಸ್ವಲ್ಪ ಹೊತ್ತಿನ ನಂತರ ಅದರ ರುಚಿ ಬದಲಾದಂತೆ ಎನಿಸುತ್ತದೆ.
* ಚಿಟಿಕೆ ಉಪ್ಪು ಮತ್ತು ಕಾಳು ಮೆಣಸಿನ ಪುಡಿಯನ್ನು ಬೇಕಾದರೆ ಸೇರಿಸಿ ಕುಡಿಯಬಹುದು. ಈ ಶರಬತ್ತು ದಣಿವನ್ನು ನಿವಾರಿಸುತ್ತದೆ. ಆಯಾಸಕ್ಕೆ ಒಳ್ಳೆಯ ಮದ್ದು.

Besan Laddu/Ladu-ಬೇಸನ್ಉಂಡೆ/ಕಡ್ಲೆಹಿಟ್ಟಿನ ಉಂಡೆ:

ಬೇಸನ್ ಉಂಡೆ/ಕಡ್ಲೆಹಿಟ್ಟಿನ ಉಂಡೆ:

ಸಾಮಗ್ರಿಗಳು;
ಕಡ್ಲೆಹಿಟ್ಟು - ಒಂದು ಬಟ್ಟಲು
ಚಿರೋಟಿ ರವೆ - ಅರ್ಧ ಬಟ್ಟಲು
ಹಾಲು - ಒಂದು ಕಪ್
ಸಕ್ಕರೆ - ಎರಡು ಬಟ್ಟಲು
ಏಲಕ್ಕಿ ಪುಡಿ ಸ್ವಲ್ಪ
ತೆಂಗಿನತುರಿ / ಕೊಬ್ಬರಿತುರಿ

ತಯಾರಿಸುವ ರೀತಿ:
ಕಡಲೆಹಿಟ್ಟು ಮತ್ತು ಚಿರೋಟಿ ರವೆಯನ್ನು ಬೇರೆ ಬೇರೆಯಾಗಿ ಘಂ ಎನ್ನುವ ವಾಸನೆ ಬರುವಂತೆ ಹುರಿಯಬೇಕು.
ಹಾಲಿಗೆ ಸಕ್ಕರೆ,ತೆಂಗಿನತುರಿ ಸೇರಿಸಿ,ಕಾಯಲು ಇಡಿ. ಹಾಲು ಕಾದು ಸಕ್ಕರೆ ಕರಗಿ ಸ್ವಲ್ಪ ಪಾಕ ಬಂದಾಗ ಹುರಿದಿಟ್ಟಿರುವ ಕಡ್ಲೆಹಿಟ್ಟನ್ನು ಮತ್ತು ರವೆಯನ್ನು ಹಾಕಿ, ಚೆನ್ನಾಗಿ ಗೊಟಾಯಿಸುತ್ತಿರಿ,ಏಲಕ್ಕಿ ಪುಡಿ ಸಹ ಸೇರಿಸಿ,ಹೀಗೆಯೇ ಎಲ್ಲಾ ಮಿಶ್ರಣವೂ ಚೆನ್ನಾಗಿ ಹೊಂದಿಕೊಂಡು ಸ್ವಲ್ಪ ಬೆಂದ ನಂತರ ಅದನ್ನು ಕೆಳಗಿಳಿಸಿ,ಸ್ವಲ್ಪ ತಣ್ಣಗಾದ ಮೇಲೆ ನಿಮಗೆ ಬೇಕಾದ ರೀತಿಯಲ್ಲಿ ಉಂಡೆ ಕಟ್ಟಿರಿ.

*ದ್ರಾಕ್ಷಿ , ಗೋಡಂಬಿ ಬೇಕಾದರೆ ಸೇರಿಸಬಹುದು.

Sabbassige Soppina Bhath - ಸಬ್ಬಸ್ಸಿಗೆ ಸೊಪ್ಪಿನ ಭಾತ್:

ಸಬ್ಬಸ್ಸಿಗೆ ಸೊಪ್ಪಿನ ಭಾತ್:

ಬೇಕಾಗುವ ಸಾಮನುಗಳು:

ಅಕ್ಕಿ - ಎರಡು ಕಪ್
ಸಬ್ಬಸ್ಸಿಗೆ ಸೊಪ್ಪು
ಬಟಾಣಿ,ಕ್ಯಾರೆಟ್,ಬೀನ್ಸ್ (ಪ್ರೆಶ್/ಫ಼್ರೋಜ಼ನ್)-ಅರ್ಧ ಬಟ್ಟಲು
ಹೆಚ್ಚಿದ ಈರುಳ್ಳಿ
ಒಂದೆರಡು ಹಸಿಮೆಣಸಿನಕಾಯಿ
ಟಮೋಟ ಹಣ್ಣು - ಒಂದು
ಅಚ್ಚಮೆಣಸಿನ ಪುಡಿ-ಅರ್ಧ ಚಮಚ
ಧನಿಯ ಪುಡಿ - ಒಂದುವರೆ ಚಮಚ
ಗರಂ ಮಸಾಲ-ಅರ್ಧ ಚಮಚ
ಸಾರಿನಪುಡಿ - ಅರ್ಧಚಮಚ
ಕೊಬ್ರಿತುರಿ/ ಕಾಯಿತುರಿ
ಚೆಕ್ಕೆ, ಲವಂಗ, ಪತ್ರೆ, ಏಲಕ್ಕಿ
ಎಣ್ಣೆ, ಸಾಸಿವೆ,ಜೀರಿಗೆ
ಕರಿಬೇವು, ಅರಿಸಿನ
ಕೊತ್ತುಂಬರಿಸೊಪ್ಪು
ನಿಂಬೆರಸ
ಉಪ್ಪು

ತಯಾರಿಸುವ ರೀತಿ:

ಅಕ್ಕಿಯನ್ನು ತೊಳೆದು ಅರ್ಧ ಗಂಟೆ ನೆನೆಸಿಡಿ.
ಸಬ್ಬಸ್ಸಿಗೆ ಸೊಪ್ಪನ್ನು ಶುಚಿಗೊಳಿಸಿ,ಚೆನ್ನಾಗಿ ತೊಳೆದುಕೊಂಡು,ಸಣ್ಣಗೆ ಹೆಚ್ಚಿಡಿ.
ಮೊದಲು ಎಣ್ಣೆಯನ್ನು ಕಾಯಿಸಿ,ಅದಕ್ಕೆ ಸಾಸಿವೆ,ಜೀರಿಗೆ,ಚೆಕ್ಕೆ,ಲವಂಗ,ಏಲಕ್ಕಿ,ಪತ್ರೆ,ಹಸಿಮೆಣಸಿನಕಾಯಿ,ಕರಿಬೇವು ಮತ್ತು ಈರುಳ್ಳಿಯನ್ನು ಕ್ರಮವಾಗಿ ಹಾಕಿ,ಒಂದೆರಡು ನಿಮಿಷ ಹುರಿಯಿರಿ. ಟಮೋಟ ಹಾಕಿ,ಅರಿಸಿನ,ಹೆಚ್ಚಿಟ್ಟ ಸೊಪ್ಪು,ಕ್ಯಾರೆಟ್,ಬೀನ್ಸ್ ಮತ್ತು ಬಟಾಣಿ ಹಾಕಿ ಐದಾರು ನಿಮಿಷ ಬಾಡಿಸಿ. ನಂತರ ಅಚ್ಚ ಮೆಣಸಿನಪುಡಿ,ಧನಿಯಾ ಪುಡಿ,ಸಾರಿನಪುಡಿ ಮತ್ತು ಗರಂ ಮಸಾಲಾ ಹಾಕಿ,ಚೆನ್ನಾಗಿ ಬೆರೆಸಿ,ಕೊತ್ತುಂಬರಿಸೊಪ್ಪು,ತೆಂಗಿನತುರಿ,ಉಪ್ಪು ಮತ್ತು ಅಕ್ಕಿಯನ್ನು ಹಾಕಿ,ಅಳತೆಗೆ ತಕ್ಕ ನೀರು ಹಾಕಿ ಎಲ್ಲವೂ ಸರಿಯಾಗಿ ಹೊಂದಿಕೊಳ್ಳುವಂತೆ ಬೆರೆಸಿ,ನಿಂಬೆರಸ ಸಹ ಸೇರಿಸಿ.ಮುಚ್ಚಳ ಮುಚ್ಚಿ. ಅಕ್ಕಿ ಮತ್ತು ಎಲ್ಲಾ ಮಿಶ್ರಣವು ಬೆಂದಿದೆ ಎನಿಸಿದ ತಕ್ಷಣ/ ಒಂದು ವಿಷ್ಹಲ್ ಕೂಗಿಸಿ. ಮುಚ್ಚಳ ತೆಗೆದ ಮೇಲೆ ಮತ್ತೆ ಎಲ್ಲಾ ಚೆನ್ನಾಗಿ ಬೆರೆಸಿ.

ಸಬ್ಬಸ್ಸಿಗೆ ಸೊಪ್ಪಿನ ಪರಿಮಳದ ಘಮ ಘಮಿಸುವ ಸಬ್ಬಸ್ಸಿಗೆ ಸೊಪ್ಪಿನಭಾತ್ ತಯಾರಾಗಿದೆ.
ಮೊಸರು ಪಚ್ಚಡಿ ಅಥವ ಯಾವುದಾದರೊಂದು ರಾಯತದೊಂದಿಗೆ ಬಡಿಸಿ. ಜೊತೆಯಲ್ಲಿ ನಿಂಬೆಹಣ್ಣು ಮತ್ತು ಸೌತೆಕಾಯಿ ಸಲಾಡ್ ನೀಡಿ.
ತರಕಾರಿ ಬೇಡವೆಂದರೆ ಸಬ್ಬಸ್ಸಿಗೆಸೊಪ್ಪು ಮಾತ್ರ ಹಾಕಿ ತಯಾರಿಸಬಹುದು.

Sibehanninaraita - Guava Raita

ಸೀಬೆ/ಪೇರಲ/ಚ್ಯಾಪೆ ಹಣ್ಣಿನ ರಾಯತ:

ಪದಾರ್ಥಗಳು:
ಮೊಸರು ಒಂದು ಬಟ್ಟಲು
ಸೀಬೆಹಣ್ಣು
ಹೆಚ್ಚಿದ ಕೊತ್ತುಂಬರಿಸೊಪ್ಪು
ಕಾಳು ಮೆಣಸಿನಪುಡಿ
ಉಪ್ಪು

ರೀತಿ:
ಸೀಬೆಹಣ್ಣನ್ನು ಸಣ್ಣಗೆ ಹೆಚ್ಚಿಕೊಂಡು, ಮೊಸರಿನೊಂದಿಗೆ ಬೆರೆಸಿ ಅದಕ್ಕೆ ಉಪ್ಪು ಮತ್ತು ಮೆಣಸಿನಪುಡಿ ಹಾಕಿ ಬೆರೆಸಿ.ಕೊತ್ತುಂಬರಿಸೊಪ್ಪು ಉದುರಿಸಿ. ಸೀಬೆಹಣ್ಣಿನ ರಾಯತ ತಯಾರಾಗುತ್ತದೆ.

Bread Uppittu-ಬ್ರೆಡ್ ಉಪ್ಪಿಟ್ಟು:

ಬ್ರೆಡ್ ಉಪ್ಪಿಟ್ಟು:

ಸಾಮಗ್ರಿಗಳು:
ಬ್ರೆಡ್
ಈರುಳ್ಳಿ
ಹಸಿಮೆಣಸಿನಕಾಯಿ
ಎಣ್ಣೆ, ಸಾಸಿವೆ, ಜೀರಿಗೆ, ಕರಿಬೇವು
ಉದ್ದಿನಬೇಳೆ, ಕಡ್ಲೆಬೇಳೆ
ಟಮೋಟ ಹಣ್ಣು
ಉಪ್ಪು ರುಚಿಗೆ
ನಿಂಬೆರಸ
ಕೊತ್ತುಂಬರಿಸೊಪ್ಪು
ಕಾಯಿತುರಿ

ವಿಧಾನ:
ಬ್ರೆಡ್ ಅನ್ನು ಸಣ್ಣ ಸಣ್ಣ ಚೂರುಗಳಾಗಿ ಕತ್ತರಿಸಿಕೊಳ್ಳಿ.
ಪಾತ್ರೆಗೆ ಎಣ್ಣೆ ಹಾಕಿ,ಕಾದ ಬಳಿಕ ಸಾಸಿವೆ,ಜೀರಿಗೆ,ಕಡ್ಲೆಬೇಳೆ,ಉದ್ದಿನಬೇಳೆ,ಕರಿಬೇವು ಹಾಕಿ,ನಂತರ ಹೆಚ್ಚಿದ ಈರುಳ್ಳಿ,ಹಸಿಮೆಣಸಿನಕಾಯಿ ಹಾಕಿ, ಮೂರ್ನಾಲ್ಕು ನಿಮಿಷ ಬಾಡಿಸಿ. ಈರುಳ್ಳಿಯ ಬಣ್ಣ ಸ್ವಲ್ಪ ಬದಲಾದ ನಂತರ ಹೆಚ್ಚಿದ ಟಮೋಟ ಹಾಕಿ, ಒಂದೆರಡು ನಿಮಿಷ ಹುರಿದು,ಉಪ್ಪು,ನಿಂಬೆರಸ, ಸ್ವಲ್ಪ ಕೊತ್ತುಂಬರಿಸೊಪ್ಪು ಹಾಕಿ,ಜೊತೆಯಲ್ಲಿಯೇ ಬ್ರೆಡ್ ಚೂರುಗಳನ್ನು ಹಾಕಿ,ಎಲ್ಲಾ ಒಗ್ಗರಣೆ ಬೆರೆಯುವಂತೆ ಸರಿಯಾಗಿ ಬೆರೆಸಿ. ಕಾಯಿತುರಿ ಸಹ ಬೆರೆಸಿ. ಇಳಿಸಿ.ಇದು ಬ್ರೆಡ್ ಇದ್ದ ತಕ್ಷಣ ತಯಾರಿಸಬಹುದು. ಬೇಗ ಆಗುತ್ತದೆ ಮತ್ತು ಸರಳವಾಗಿಯೂ ಇದೆ. ಬ್ರೆಡ್ ಉಪ್ಪಿಟ್ಟು ತಯಾರಿಸದ ತಕ್ಷಣ ತಿನ್ನಬೇಕು. ಇಲ್ಲ ಅಂದರೆ ಒಂಥರ ಮೆತ್ತಗೆ ಆಗುತ್ತದೆ ಬೇಗ. ಆಗ ತಿನ್ನಲು ರುಚಿ ಅಷ್ಟಾಗಿ ಚೆನ್ನಾಗಿರುವುದಿಲ್ಲ.

Almond/Badam Burfi-ಬಾದಾಮಿ ಬರ್ಫಿ:

ಬಾದಾಮಿ ಬರ್ಫಿ:

ಬೇಕಾಗುವ ಸಾಮಗ್ರಿಗಳು:

ಬಾದಾಮಿ- ಒಂದು ಕಪ್
ಸಕ್ಕರೆ - ಒಂದು ಕಪ್/ರುಚಿಗೆ ತಕ್ಕಷ್ಟು
ಕಂಡೆನ್ಸ್ಡ್ ಮಿಲ್ಕ್ - ಒಂದು ಟಿನ್
ತುಪ್ಪ - ಎರಡು ದೊಡ್ಡ ಚಮಚ
ಏಲಕ್ಕಿ ಪುಡಿ ಸ್ವಲ್ಪ

ತಯಾರಿಸುವ ವಿಧಾನ:

ಬಾದಾಮಿಯನ್ನು ಒಂದು ಗಂಟೆ ನೆನೆಸಿ, ಅದರ ಸಿಪ್ಪೆ ತೆಗೆದು, ನೀರು ಹಾಕದೆ ನುಣ್ಣಗೆ ಪೇಸ್ಟ್ ತರಹ ಮಾಡಿಕೊಂಡು,ಅದನ್ನು ಒಂದು ಪಾತ್ರೆಗೆ ಹಾಕಿ,ಸ್ವಲ್ಪ ಉರಿಯಲ್ಲಿ ಇಟ್ಟು ಹಸಿವಾಸನೆ ಹೋಗುವವರೆಗೂ ಕೈಆಡಿಸುತ್ತಿರಿ,ಅದರ ಬಣ್ಣ ಸ್ವಲ್ಪ ಬದಲಾದ ಮೇಲೆ ಅದಕ್ಕೆ ಸಕ್ಕರೆ ಮತ್ತು ಕಂಡೆನ್ಸ್ಡ್ ಮಿಲ್ಕ್ ಹಾಕಿ ಬೆರೆಸಿ,ಮಧ್ಯೆ ಬಿಟ್ಟು ಬಿಟ್ಟು ಕೆದಕುತ್ತಿರಿ,ಸ್ವಲ್ಪ ಹೊತ್ತಿನ ನಂತರ ತುಪ್ಪ ಮತ್ತು ಏಲಕ್ಕಿ ಪುಡಿಯನ್ನು ಸೇರಿಸಿ. ಕೈ ಬಿಡದೇ ಚೆನ್ನಾಗಿ ಕೆದಕುತ್ತಿರಿ,ತಳ ಹಿಡಿಯದಂತೆ ತಿರುಗಿಸಿ,ಸ್ವಲ್ಪ ಹೊತ್ತಿಗೆ ಅದು ತಳ ಬಿಡುತ್ತಾ ಬರುತ್ತದೆ. ತುಪ್ಪ ಒಂದು ಕಡೆ ಬೇರೆಯಾಗುತ್ತಾ ಬರುವಾಗ,ಬರ್ಫಿಯ ಹದ ಬಂದಿದೆ ಎನಿಸಿದ ತಕ್ಷಣ ತುಪ್ಪ ಸವರಿದ ತಟ್ಟೆಗೆ ಹಾಕಿ,ಸಮ ಮಾಡಿ. ಸ್ವಲ್ಪ ತಣ್ಣಗಾದ ಮೇಲೆ ಡೈಮೆಂಡ್ ಆಕಾರ ಅಥವಾ ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿ. ತಿನ್ನಲು ಬಾದಾಮಿ ಬರ್ಫಿ ತಯಾರಾಗುತ್ತದೆ. ಮಕ್ಕಳಿಗೆ ಪ್ರಿಯವಾದ ಬಾದಾಮಿ ಬರ್ಫಿಗಳು ತಯಾರು.

Palak Soppina Palya /Palak sabji

ಪಾಲಕ್ ಸೊಪ್ಪಿನ ಪಲ್ಯ :
ಬೇಕಾಗುವ ಸಾಮಗ್ರಿಗಳು:

ಪಾಲಕ ಸೊಪ್ಪು ಒಂದು ಅಥವಾ ಎರಡು ಕಟ್ಟು,
ಈರುಳ್ಳಿ ಒಂದು, ಹೆಚ್ಚಿಕೊಳ್ಳಿ
ಚಿಕ್ಕ ಆಲೂಗಡ್ಡೆ ಒಂದು ಸಣ್ಣದಾಗಿ ಹೆಚ್ಚಿಕೊಳ್ಳಿ,
ಟಮೋಟ ಒಂದು ಹೆಚ್ಚಿಕೊಳ್ಳಿ,
ಹಸಿಮೆಣಸಿನಕಾಯಿ ಒಂದು ಮದ್ಯಕ್ಕೆ ಸೀಳಿದ್ದು,
ರುಚಿಗೆ ತಕ್ಕಷ್ಟು ಸಾರಿನ ಪುಡಿ ಅಥವಾ ರಸಂ ಪುಡಿ,
ರುಚಿಗೆ ತಕ್ಕಷ್ಟು ಉಪ್ಪು
ಎಣ್ಣೆ ಎರಡು ಚಮಚ
ಜೀರಿಗೆ,ಸಾಸಿವೆ

ಮಾಡುವ ವಿಧಾನ :

ಪಾಲಕ್ ಚೆನ್ನಾಗಿ ಶುಚಿಗೊಳಿಸಿ,ತೊಳೆದು ನಂತರ ಸಣ್ಣಗೆ ಹೆಚ್ಚಿಕೊಳ್ಳಿ.
ಬಾಣಲೆಗೆ ಎಣ್ಣೆ ಹಾಕಿ ಕಾದ ನಂತರ ಜೀರಿಗೆ, ಸಾಸಿವೆ ಹಾಕಿ, ಈರುಳ್ಳಿ ಹಾಕಿ ಚೆನ್ನಾಗಿ ಹುರಿದುಕೊಂಡು ನಂತರ ಅದಕ್ಕೆ ಆಲೂಗಡ್ಡೆ ಹಾಕಿ ಎರಡು,ಮೂರು ನಿಮಿಷ ಹಾಗೆ ಹುರಿದು , ಟಮೋಟ ಹಾಕಿ. ಆಮೇಲೆ ಪಾಲಕ್ ಸೊಪ್ಪು ಹಾಕಿ ಚೆನ್ನಾಗಿ ಅದರಲ್ಲಿಯೇ ಬೆರೆಸಿ, ಉಪ್ಪು ,ಹಸಿಮೆಣಸಿನಕಾಯಿ ಮತ್ತು ಸಾರಿನ ಪುಡಿಹಾಕಿ ಮುಚ್ಚಿಡಿ, ನೀರು ಹಾಕುವ ಅವಶ್ಯಕತೆ ಇಲ್ಲ, ಅದು ಮುಚ್ಚಿದಾಗ ಆವಿಯಲ್ಲಿಯೇ ಬೇಯುತ್ತದೆ. ಮದ್ಯೆ ಒಮ್ಮೆ ತಿರುವಿ.ಐದು ನಿಮಿಷದಲ್ಲಿ ಬೇಯುವುದು. ನಂತರ ಕೊತ್ತಂಬರಿ ಸೊಪ್ಪು ಮತ್ತು ಕಾಯಿತುರಿ ಬೇಕಾದರೆ ಹಾಕಿಕೊಳ್ಳಿ. ಇದು ಊಟಕ್ಕೆ ಅಥವಾ ಚಪಾತಿಗೆ ನೆಂಚಿಕೊಳ್ಳಬಹುದು.

Dil leaves Pakoda-ಸಬ್ಬಸ್ಸಿಗೆ ಸೊಪ್ಪಿನ ಪಕೋಡ:

ಸಬ್ಬಸ್ಸಿಗೆ ಸೊಪ್ಪಿನ ಪಕೋಡ:

ಬೇಕಾಗುವ ಸಾಮಗ್ರಿಗಳು:

ಕಡ್ಲೆಹಿಟ್ಟು - ಒಂದು ಕಪ್
ಸಣ್ಣಗೆ ಹೆಚ್ಚಿದ ಈರುಳ್ಳಿ
ಹಸಿಮೆಣಸಿನಕಾಯಿ -ಪೇಸ್ಟ್/ಹೆಚ್ಚಿದ್ದು
ಸಬ್ಬಸ್ಸಿಗೆ ಸೊಪ್ಪು -ಸ್ವಲ್ಪ/ನಿಮಗೆ ಬೇಕಾದಂತೆ
ಚಿಟಿಕೆ ಸೋಡ
ಕಾಯಿಸಿದ ಎಣ್ಣೆ - ಒಂದು ಚಮಚ
ಕಾರದ ಪುಡಿ
ಉಪ್ಪು
ಕೊತ್ತುಂಬರಿಸೊಪ್ಪು
ಎಣ್ಣೆ-ಕರಿಯಲು ಬೇಕಾಗುವಷ್ಟು

ತಯಾರಿಸುವ ವಿಧಾನ:

ಸಬ್ಬಸ್ಸಿಗೆ ಸೊಪ್ಪನ್ನು ಶುಚಿಗೊಳಿಸಿ, ಚೆನ್ನಾಗಿ ತೊಳೆದು,ಸಣ್ಣಗೆ ಹೆಚ್ಚಿ. ನಂತರ ತಿಳಿಸಿರುವ ಎಲ್ಲಾ ಸಾಮಗ್ರಿಗಳನ್ನು ಸ್ವಲ್ಪ ನೀರು ಹಾಕಿಕೊಂಡು ಚೆನ್ನಾಗಿ ಗಂಟಿಲ್ಲದಂತೆ ಕಲೆಸಿ. ತುಂಬಾ ತೆಳುವಾಗಿರಬಾರದು. ಈ ಪಕೋಡಕ್ಕೆ ಸ್ವಲ್ಪ ಗಟ್ಟಿಯಾಗಿ ಕಲೆಸಿ ಕೈನಲ್ಲಿ ಸ್ವಲ್ಪ ತೆಗೆದುಕೊಂಡು ಅದರಿಂದ ಚಿಕ್ಕ ಚಿಕ್ಕ ಉಂಡೆಗಳನ್ನು ಹಾಗೇ ನೇರವಾಗಿ ಕಾದಿರುವ ಎಣ್ಣೆಗೆ ಒಂದೊಂದಾಗಿ ಬಿಡಿ. ಉಂಡೆ ಅಂದರೆ ಉಂಡೆ ರೀತಿ ಗುಂಡಾಗಿ ಮಾಡಿ ಹಾಕಬೇಡಿ,ಆಗೇ ತೆಗೆದು ಎಣ್ಣೆಗೆ ಹಾಕಬೇಕು.ಅಥವಾ ಒಂದು ಚಮಚದಿಂದ ಸಹ ತೆಗೆದುಕೊಂಡು ಪುಟ್ಟ ಪುಟ್ಟದಾಗಿ ನೇರವಾಗಿ ಎಣ್ಣೆಗೆ ಹಾಕಿ,ಅವುಗಳನ್ನು ಹದವಾದ ಉರಿಯಲ್ಲಿ ಚೆನ್ನಾಗಿ ಬೇಯಿಸಿ,ತೆಗೆಯಿರಿ.ಸಬ್ಬಸ್ಸಿಗೆ ಸೊಪ್ಪಿನಪಕೋಡ ರೆಡಿಯಾಗುತ್ತದೆ.ಇದರ ಪರಿಮಳ ತುಂಬಾ ಚೆನ್ನಾಗಿರುತ್ತದೆ ರುಚಿ ಕೂಡ. ಬಿಸಿಕಾಫಿಯೊಂದಿಗೆ ಸವಿಯಿರಿ.


* ಸೊಪ್ಪು ಜಾಸ್ತಿ ಹಾಕಿದರೂ ಚೆನ್ನಾಗಿರುತ್ತದೆ.
* ಈ ರೀತಿ ಪಕೋಡಗಳು ಕರಿದ ಮೇಲೆ ಬಿಸಿ-ಬಿಸಿಯಾಗಿ ಸವಿದರೆ ರುಚಿ ಹೆಚ್ಚು. ಸಬ್ಬಸ್ಸಿಗೆ ಪಕೋಡ ತಣ್ಣಗಾದ ಮೇಲೆ ಸಹ ರುಚಿಯಾಗಿರುತ್ತದೆ.
* ಸೊಪ್ಪು ತಿನ್ನದ ಮಕ್ಕಳಿಗೆ ಈ ರೀತಿ ಪಕೋಡ ತಯಾರಿಸಿಕೊಟ್ಟರೆ, ಇಷ್ಟಪಟ್ಟು ತಿನ್ನುತ್ತಾರೆ.

Idli- Samabar / ಇಡ್ಲಿ - ಸಾಂಬಾರ್

ಇಡ್ಲಿ ಮತ್ತು ವಡೆ ಸಾಂಬಾರ್ ಸಾಮಾನ್ಯವಾಗಿ ನಮ್ಮ ದಕ್ಷಿಣ ಭಾರತದಲ್ಲಿ ತುಂಬಾ ಪ್ರಸಿದ್ಧಿಯನ್ನು ಪಡೆದಿದೆ. ಇಡ್ಲಿ ಯಾವ ಕಾಲದಲ್ಲಿಯಾಗಲಿ,ಯಾರೇ ಆಗಲಿ ತಿನ್ನಬಹುದಾದಂತ,ಆರೋಗ್ಯಕರವಾದಂತ ಉತ್ತಮ ತಿಂಡಿಯಾಗಿದೆ.
ನಮ್ಮ ಅಜ್ಜಿ ಮಿಕ್ಸಿ ಇದ್ದರೂ ಸಹ ಒರಳು ಕಲ್ಲಿನಲ್ಲಿ ಹಿಟ್ಟನ್ನು ರುಬ್ಬುತ್ತಿದ್ದರು,ಅವರು ತಯಾರಿಸುತ್ತಿದ್ದ ಇಡ್ಲಿ ಅಥವಾ ದೋಸೆಗಳ ರುಚಿಯಂತೂ ಈಗಲೂ ಮರೆಯಲು ಸಾಧ್ಯವಿಲ್ಲ. ಅದೆಷ್ಟು ಚೆನ್ನಾಗಿ ಹದವಾಗಿ,ರುಬ್ಬಿ ತಯಾರಿಸುತ್ತಿದ್ದರು. ಈಗ ನಾವುಗಳು ಸೋಮಾರಿಗಳಂತೆ ಅದೇನೋ ಗ್ರೈಂಡರ್ ಮತ್ತು ಮಿಕ್ಸಿ ಅಂತ ಉಪಯೋಗಿಸುತ್ತ ಇರುತ್ತೇವೆ. ಇದು ಸಾಲದೆಂದು ರೆಡಿಮೇಡ್ ರವೆ ಅಂತ ಬೇರೆ ತಂದು ಉಪಯೋಗಿಸುತ್ತೇವೆ. ಅದಂತೂ ಇದ್ದಿದ್ದು ಕೆಲಸ ಕಮ್ಮಿ. ಇಡ್ಲಿಯಲ್ಲಿ ಈಗಂತೂ ಬಹಳ ತರವಾಗಿ,ವಿವಿಧವಾಗಿ ತಯಾರಿಸುತ್ತೇವೆ. ಕೆಲವು ಸಾರಿ ಇಡ್ಲಿ -ಸಾಂಬಾರ್ ಜೊತೆ ರುಚಿ ಎನಿಸಿದರೆ,ಕೆಲವೊಮ್ಮೆ ಕಾಯಿಚಟ್ನಿ ಮತ್ತು ಸಿಹಿ ಚಟ್ನಿಯೊಂದಿಗೂ ಹಾಗು ಕೆಂಪು ಚಟ್ನಿಯೊಂದಿಗೂ ತುಂಬಾ ರುಚಿಯಾಗಿರುತ್ತದೆ.ಎಲ್ಲಕ್ಕಿಂತ ಹೆಚ್ಚಿನ ರುಚಿ ಸಾಂಬಾರ್ ಜೊತೆ ಮಾತ್ರ. ಆಗ ಕೈನಲ್ಲಿ ರುಬ್ಬುತ್ತಿದ್ದು ಮಾಡುತ್ತಿದ್ದ ಅಡುಗೆಗಳ ರುಚಿನೇ ರುಚಿ.ಇಲ್ಲಿ ಈಗ ಮಾಮುಲಿ ಇಡ್ಲಿ ಮತ್ತು ಸಾಂಬಾರ್ ತಯಾರಿಸುವ ವಿಧಾನವನ್ನು ತಿಳಿಯೋಣ.

ಇಡ್ಲಿ:

ಬೇಕಾಗುವ ಸಾಮಗ್ರಿಗಳು:

ಅಕ್ಕಿ - ಮೂರು ಕಪ್
ಕುಸುಬಲಕ್ಕಿ (ಬಾಯಲ್ಡ್ ರೈಸ್)- ಒಂದು ಕಪ್
ಉದ್ದಿನಬೇಳೆ - ಒಂದು ಕಪ್
ಅವಲಕ್ಕಿ, ಸಬ್ಬಕ್ಕಿ - ಒಂದೊಂದು ಚಮಚ
ಮೆಂತ್ಯಕಾಳು - ಒಂದು ದೊಡ್ಡ ಚಮಚ
ಉಪ್ಪು

ತಯಾರಿಸುವ ರೀತಿ:

ಅಕ್ಕಿ + ಮೆಂತ್ಯ ಮತ್ತು ಉದ್ದಿನಬೇಳೆಯನ್ನು ಚೆನ್ನಾಗಿ ತೊಳೆದು,ಬೇರೆ ಬೇರೆಯಾಗಿ ಐದರಿಂದ ಆರು ಗಂಟೆಗಳವರೆಗೂ ನೆನೆಸಿಡಿ. ನಂತರ ಉದ್ದಿನಬೇಳೆಯನ್ನು ಚೆನ್ನಾಗಿ ಹುದುಗು ಬರುವಂತೆ ಸ್ವಲ್ಪ ಗಟ್ಟಿಯಾಗಿ ರುಬ್ಬಿಕೊಳ್ಳಿ. ಅದರ ಜೊತೆಗೆ ಅಕ್ಕಿಯನ್ನು ಬೆರೆಸಿ ಅಗತ್ಯವಿದ್ದಷ್ಟು ನೀರು ಹಾಕಿ ರುಬ್ಬಿಕೊಳ್ಳಿ.ಅವಲಕ್ಕಿ ಮತ್ತು ಸಬ್ಬಕ್ಕಿಯನ್ನು ಹಾಕುವುದಾದರೆ, ಅವಲಕ್ಕಿಯನ್ನು ಮತ್ತು ಸಬ್ಬಕ್ಕಿಯನ್ನು ನೆನೆಸಿಟ್ಟು( ಅರ್ಧ ಗಂಟೆ),ಅಕ್ಕಿಯೊಂದಿಗೆ ರುಬ್ಬುವಾಗ ಹಾಕಿ, ರುಬ್ಬಿಕೊಳ್ಳಿ. ಅಕ್ಕಿಯೂ ಸ್ವಲ್ಪ ಕೈಗೆ ತರಿತರಿಯಾಗಿ ಸಿಗುವಂತೆ ರುಬ್ಬಿ. ಮುಚ್ಚಿಡಿ.ರಾತ್ರಿಯೆಲ್ಲಾ ಅದೇರೀತಿ ಇದ್ದಾಗ,ಅದು ಹಿಟ್ಟು ಬೆಳಗ್ಗೆ ಹುದುಗು/ಹುಳಿ/ಉಬ್ಬಿ ಬಂದಿರುತ್ತದೆ. ಮಾರನೇದಿನ ಹುದುಗು ಬಂದ ಹಿಟ್ಟಿಗೆ ರುಚಿಗೆ ಸ್ವಲ್ಪ ಉಪ್ಪು ಬೆರೆಸಿ,ತುಂಬಾ ಜೋರಾಗಿ
ತಿರುಗಿಸದೇ ಹಗುರವಾಗಿ ತಿರುಗಿಸಿ. ಈ ಹಿಟ್ಟನ್ನು ಇಡ್ಲಿಯ ತಟ್ಟೆ/ಪಾತ್ರೆ/ ಮೋಲ್ಡ್ ಗಳಿಗೆ ಹಾಕಿ ಹಬೆಯಲ್ಲಿ ಏಳೆಂಟು ನಿಮಿಷಗಳವರೆಗೆ ಬೇಯಿಸಿ. ತೆಗೆಯಿರಿ. ಇಡ್ಲಿಯನ್ನು ಸಾಂಬಾರ್ ಮತ್ತು ಚಟ್ನಿಯೊಂದಿಗೆ ಸವಿಯಲು ನೀಡಿ.

ಸಾಂಬಾರ್: (ಇಡ್ಲಿ ಸಾಂಬಾರ್)

ಸಾಂಬಾರ್ ಎಂದರೆ ವಿವಿಧ ಬಗೆಗಳಿವೆ,ಇದು ಇಲ್ಲಿ ತಯಾರಿಸುತ್ತಿರುವುದು. ಇಡ್ಲಿಗೆ ಮಾತ್ರವೇ ಚೆನ್ನಾಗಿರುತ್ತದೆ. ಅನ್ನಕ್ಕೆ ಅಷ್ಟು ರುಚಿಯಿರುವುದಿಲ್ಲ,ಆಗಾಗಿ ಇದನ್ನು ಸಾಮಾನ್ಯವಾಗಿ ಇಡ್ಲಿಗೆ ಮಾತ್ರ ತಯಾರಿಸಲಾಗುತ್ತದೆ.

ಬೇಕಾಗುವ ಸಾಮಗ್ರಿಗಳು:

ಇದೆಲ್ಲವೂ ಸಾಂಬಾರ್ ಗಾಗಿ ಮಸಾಲೆಪುಡಿ ಮಾಡಿಕೊಳ್ಳಲು:-

ಒಣಮೆಣಸಿನಕಾಯಿ ರುಚಿಗೆ
ಮೆಣಸು - ಒಂದು ಚಮಚ
ಕಡ್ಲೆಬೇಳೆ - ಒಂದು ಚಮಚ
ಉದ್ದಿನಬೇಳೆ - ಒಂದುವರೆ ಚಮಚ
ಮೆಂತ್ಯ- ಕಾಲು ಚಮಚ
ಜೀರಿಗೆ - ಎರಡು ಚಮಚ
ಧನಿಯ - ನಾಲ್ಕು ಚಮಚ
ಚೆಕ್ಕೆ- ಒಂದು ಸಣ್ಣ ಚೂರು
ಲವಂಗ - ಎರಡು
ಮೊಗ್ಗು - ಒಂದು ಚಿಕ್ಕದು

ಮೇಲೆ ತಿಳಿಸಿರುವ ಎಲ್ಲಾ ಸಾಮಗ್ರಿಗಳನ್ನು ಹುರಿದುಕೊಂಡು,ಪುಡಿ ಮಾಡಿಕೊಳ್ಳಿ,ಆ ಪುಡಿಗೆ ಸ್ವಲ್ಪ ಕೊಬ್ಬರಿ ತುರಿಯನ್ನು ಸೇರಿಸಿ ಮತ್ತೆ ನುಣ್ಣಗೆ ಪುಡಿ ಮಾಡಿಕೊಳ್ಳಿ.

ಬೇಯಿಸಲು ಬೇಕಾಗುವ ಸಾಮಗ್ರಿಗಳು:

ತೊಗರಿಬೇಳೆ- ಒಂದು ಬಟ್ಟಲು / ನಿಮಗೆ ಬೇಕಾಗುವಷ್ಟು
ತರಕಾರಿ - ಇಷ್ಟವೆನಿಸಿದರೆ ಹಾಕಬಹುದು, ಹಾಕುವುದಾದರೆ-
ಆಲೂಗೆಡ್ಡೆ, ಕ್ಯಾರೆಟ್ ,ಬೀನ್ಸ್ ಮತ್ತು ಬದನೆಕಾಯಿ - ಇದು ಹೆಚ್ಚಿದ್ದು ಎಲ್ಲಾ ಸೇರಿ ಒಂದು ಬಟ್ಟಲು
ಟಮೋಟ ಹಣ್ಣು - ಹೆಚ್ಚಿದ್ದು ಸ್ವಲ್ಪ
ಸಾಂಬಾರ್ ಈರುಳ್ಳಿ - ಹತ್ತು - ಹನ್ನರೆಡು ಇದ್ದರೆ,(ಹಾಕಲೇಬೇಕು ಅಂತ ಕಡ್ಡಾಯವಿಲ್ಲ)
-ಮಾಮುಲಿ ಈರುಳ್ಳಿಯನ್ನು ದಪ್ಪವಾಗಿ ಕತ್ತರಿಸಿ ಹಾಕಬಹುದು
ಪಾಲಕ್ ಸೊಪ್ಪಿನ ಎಲೆಗಳು - ಹತ್ತು ( ಬೇಕಾದರೆ)- ಇದನ್ನು ಹಾಕಿದರೆ ರುಚಿ ಇನ್ನು ಹೆಚ್ಚುತ್ತದೆ.
ಅರಿಸಿನ - ಒಂದು ಚಮಚ
ಎಣ್ಣೆ - ಎರಡು ಚಮಚ
ಬೆಲ್ಲ - ಒಂದು ದಪ್ಪ ಗೋಲಿ ಗಾತ್ರದ್ದು
ಹುಣಸೇಹಣ್ಣಿನ ರಸ/ಪೇಸ್ಟ್ - ಒಂದು ದೊಡ್ಡ ಚಮಚ
ಉಪ್ಪು ರುಚಿಗೆ ತಕ್ಕಷ್ಟು


ತಯಾರಿಸುವ ರೀತಿ:

ತೊಗರಿಬೇಳೆಯನ್ನು ಅರಿಸಿನ ಮತ್ತು ಎಣ್ಣೆಯನ್ನು ಹಾಕಿ ಬೇಯಿಸಿಕೊಂಡು,ಅದಕ್ಕೆ ಹೆಚ್ಚಿದ ಎಲ್ಲಾ ತರಕಾರಿಗಳನ್ನು,ಟಮೋಟ,ಹೆಚ್ಚಿದ ಪಾಲಕ್ ಎಲೆಗಳು ಮತ್ತು ಈರುಳ್ಳಿ ಎಲ್ಲವನ್ನು ಹಾಕಿ ಮತ್ತೆ ಸ್ವಲ್ಪ ಬೇಯಿಸಿ. ತರಕಾರಿಗಳು ಬೆಂದಿದೆ ಎನಿಸಿದ ತಕ್ಷಣ ಮಸಾಲೆ ಪುಡಿಯನ್ನು ಹಾಕಿ,ಪುಡಿ ಮಾಡಿದ್ದೆಲ್ಲಾ ಪೂರ್ತಿ ಹಾಕದೇ ರುಚಿಗೆ ನೋಡಿಕೊಂಡು ಹಾಕಿ,ಕುದಿಯುವಾಗ ಹುಣಸೇಹಣ್ಣಿನ ರಸ,ಬೆಲ್ಲ ಮತ್ತು ಉಪ್ಪು ಹಾಕಿ,ಎಲ್ಲ ಚೆನ್ನಾಗಿ ಕುದಿಸಿ,ತಿರುಗಿಸುತ್ತಿರಿ. ಇದಕ್ಕೆ ಒಗ್ಗರಣೆ ಬೆರೆಸಿ,ಇಳಿಸಿ.
ರುಚಿ-ರುಚಿಯಾದ ಸಾಂಬಾರ್ ತಯಾರಾಗುತ್ತದೆ.

ಒಗ್ಗರಣೆಗೆ -

ಎಣ್ಣೆ - ನಾಲ್ಕು ಚಮಚ
ತುಪ್ಪ - ಒಂದು/ಎರಡು ಚಮಚ
ಸಾಸಿವೆ
ಜೀರಿಗೆ
ಇಂಗು
ಕರಿಬೇವು
ಗೋಡಂಬಿ (ಬೇಕಾದರೆ)
ಎಣ್ಣೆ ಮತ್ತು ತುಪ್ಪವನ್ನು ಕಾಯಿಸಿ, ಸಾಸಿವೆ,ಜೀರಿಗೆ,ಇಂಗು,ಕರಿಬೇವು ಮತ್ತು ಗೋಡಂಬಿಯನ್ನು ಹಾಕಿ ಇಳಿಸಿ. ಈ ಒಗ್ಗರಣೆಯನ್ನು ಮೇಲೆ ತಿಳಿಸಿರುವ ಸಾಂಬಾರ್ ನಲ್ಲಿ ಹಾಕಿ ಬೆರೆಸಿ.
ನಂತರ ಬಿಸಿ-ಬಿಸಿಯಾಗಿ ತಯಾರಿಸಿದ ಇಡ್ಲಿಯೊಂದಿಗೆ ಈ ಸಾಂಬಾರ್ ಅನ್ನು ತಿನ್ನಲು ನೀಡಿ.
ಆರೋಗ್ಯಕ್ಕೆ ಉತ್ತಮವಾಗಿರುವ ಇಡ್ಲಿ ಮತ್ತು ಸಾಂಬಾರ್ ರೆಡಿ.
-------
* ಸಾಂಬಾರ್ ತಯಾರಿಸುವಾಗ ಹುರಿದುಕೊಳ್ಳುವ ಸಾಮಗ್ರಿಗಳನ್ನು ಹುರಿಯುವಾಗ ಸೀದಿಸಬೇಡಿ, ಹದವಾಗಿ ಹುರಿಯಿರಿ.
* ಇಲ್ಲಿ ಶುಂಠಿ ಮತ್ತು ಬೆಳ್ಳುಳ್ಳಿಯ ಅಗತ್ಯವಿಲ್ಲ
* ಈ ಸಾಂಬಾರ್ ಇಡ್ಲಿಗೆ ಹೆಚ್ಚು ರುಚಿಕೊಡುತ್ತದೆ.
* ಸಾಂಬಾರ್ ತಯಾರಿಸಲು, ನಿಮಗೆ ಬೇಕಾದ ತರಕಾರಿಗಳನ್ನು ಮಾತ್ರ ಹಾಕಿಕೊಳ್ಳಬಹುದು, ಎಲ್ಲವನ್ನು ಹಾಕಲೇಬೇಕು ಅಂತ ಕಡ್ಡಾಯವಿಲ್ಲ. ಏನೇ ಹಾಕಲಿ,ಹೇಗೆ ಹಾಕಲಿ,ರುಚಿಯಾಗಿ ಸಾಂಬಾರ್ ತಯಾರಿಸುವ ರೀತಿ ನಿಮ್ಮ ಕೈನಲ್ಲಿದೆ.
* ಮಕ್ಕಳಿಗಂತೂ ಚಟ್ನಿಗಿಂತ ಸಾಂಬಾರ್ ಜೊತೆ ಇಡ್ಲಿ ತಿನ್ನುವುದೇ ಬಹಳ ಖುಷಿ. ಚಟ್ನಿ ಕೆಲವು ಮಕ್ಕಳಿಗೆ ಮಾತ್ರ ಇಷ್ಟವಾಗುತ್ತದೆ. ನನ್ನ ಅಮ್ಮ ಕೂಡ ತುಂಬಾ ಚೆನ್ನಾಗಿ ಸಾಂಬಾರ್ ತಯಾರಿಸುತ್ತಿದ್ದರು. ಅದನ್ನು ನೋಡಿಯೇ ನಾನು ಸಹ ತಯಾರಿಸುವುದು. ಅವರ ಕೈ ರುಚಿಯೇ ಒಂದು ರೀತಿ ಚೆಂದ.
* ಇಡ್ಲಿಯ ಹಿಟ್ಟು ದೋಸೆ ಹಿಟ್ಟಿಗಿಂತ ಗಟ್ಟಿಯಿರಲಿ. ಹಿಟ್ಟು ರುಬ್ಬಿಟ್ಟು ಮಾರನೇದಿನ ಅಥವಾ ಏಳೆಂಟು ಗಂಟೆಗಳ ನಂತರ ಇಡ್ಲಿಯನ್ನು ತಯಾರಿಸಿ. ಹಿಟ್ಟು ಹುದುಗು ಬಂದಿದ್ದರೆ ಮಾತ್ರ ಇಡ್ಲಿಗಳು ಚೆನ್ನಾಗಿ ಬರುತ್ತವೆ.