Showing posts with label Appetizers. Show all posts
Showing posts with label Appetizers. Show all posts

Monday, July 25, 2011

Simple GoLiBaje - ಗೋಳಿ ಬಜೆ:

ಗೋಳಿಬಜೆಯಲ್ಲಿ ಅನೇಕ ವಿಧಗಳಿವೆ,ಇದು ಅವುಗಳಲ್ಲಿ ಒಂದು ಬಗೆ,ತುಂಬಾ ಸುಲಭವಾದ ಮತ್ತು ಕಮ್ಮಿ ಸಾಮಗ್ರಿಗಳು ಬೇಕಾಗುವಂತಹ ರೆಸಿಪಿ. ತಕ್ಷಣವೇ ತಯಾರಿಸಬಹುದಾದ ಬೋಂಡಾ.


ಗೋಳಿ ಬಜೆ:

ಬೇಕಾಗುವ ಸಾಮಗ್ರಿಗಳು:

ಮೈದಾ ಹಿಟ್ಟು - ಒಂದು ಬಟ್ಟಲು
ಮೊಸರು - ಒಂದು ಬಟ್ಟಲು/ ಕಲೆಸಲು ಬೇಕಾಗುವಷ್ಟು
ಸಕ್ಕರೆ ಪುಡಿ - ಅರ್ಧ ಚಮಚಸೋಡ- ಚಿಟಿಕೆ
ಉಪ್ಪು- ರುಚಿಗೆ ಬೇಕಾಗುವಷ್ಟು
ಎಣ್ಣೆ - ಕರಿಯಲು

ತಯಾರಿಸುವ ವಿಧಾನ:

ಬಾಣಲೆಗೆ ಎಣ್ಣೆ ಹಾಕಿ ಕಾಯಲು ಇಡಿ.


ಮೈದಾಗೆ ಸೋಡಾ ಪುಡಿ,ಉಪ್ಪು,ಸಕ್ಕರೆಪುಡಿ ಹಾಕಿ ಚೆನ್ನಾಗಿ ಬೆರೆಸಿ, ಅದಕ್ಕೆ ಮೊಸರು ಹಾಕಿ ಗಟ್ಟಿಯಾಗಿ ಕಲೆಸಿ.ತುಂಬಾ ತೆಳ್ಳಗೆ ಇರಬಾರದು, ಇಡ್ಲಿ ಹಿಟ್ಟಿಗಿಂತ ಗಟ್ಟಿ ಇರಬೇಕು. ಕೈನಲ್ಲಿ ತೆಗೆದುಕೊಂಡು ಬಿಡುವಂತಿರಬೇಕು.
ಎಣ್ಣೆ ಕಾದ ನಂತರ ಕಲೆಸಿದ ಮಿಶ್ರಣವನ್ನು ಕೈನಲ್ಲಿ ತೆಗೆದುಕೊಂಡು ಒಂದೊಂದಾಗಿ ಚಿಕ್ಕದಾಗಿ ಗುಂಡಗೆ ಎಣ್ಣೆಯಲ್ಲಿ  ಬಿಡಿ. ಬೋಂಡಾ ತರಹ ಹಾಕಿ, ಬಂಗಾರದ ಬಣ್ಣ ಬರುವವರೆಗೆ ಕರಿದು, ತೆಗೆಯಿರಿ, ಪೇಪರ್ ಟವಲ್ ಮೇಲೆ ಹಾಕಿ, ಸಾಸ್ ಅಥವ ಚಟ್ನಿ  ಜೊತೆ ಸರ್ವ್ ಮಾಡಿ.

Monday, March 7, 2011

ಕ್ಯಾರೆಟ್-ಎಲೆಕೋಸು ಸಲಾಡ್: Carrot-Cabbage Salad

ಕ್ಯಾರೆಟ್-ಎಲೆಕೋಸು ಸಲಾಡ್:

ಬೇಕಾಗುವ ಸಾಮಗ್ರಿಗಳು:

ಕ್ಯಾರೆಟ್ ತುರಿ - ಒಂದು ಬಟ್ಟಲು
ಎಲೆಕೋಸು ತುರಿ - ಒಂದು ಬಟ್ಟಲು
ಉಪ್ಪು ಮತ್ತು ಕರಿ ಮೆಣಸಿನ ಪುಡಿ - ರುಚಿಗೆ ತಕ್ಕಂತೆ
ಮಯೊನೈಸ್ (Mayonnaise) - ಎರಡು ದೊಡ್ಡ ಚಮಚ
ಕೊತ್ತುಂಬರಿ ಸೊಪ್ಪು ಸ್ವಲ್ಪ



ತಯಾರಿಸುವ ವಿಧಾನ:

ಕ್ಯಾರೆಟ್ ಮತ್ತು ಎಲೆಕೋಸು ತುರಿಯನ್ನು ಬೆರೆಸಿ, ಅದಕ್ಕೆ ಮಯೊನೈಸ್,ಉಪ್ಪು ಮತ್ತು ಮೆಣಸಿನಪುಡಿಯನ್ನು ಸೇರಿಸಿ, ಅದು ಎಲ್ಲಾ ಕಡೆ ಸರಿಯಾಗಿ ಬೆರೆತುಕೊಳ್ಳುವಂತೆ ಚೆನ್ನಾಗಿ ಬೆರೆಸಿ, ಕೊತ್ತುಂಬರಿ ಸೊಪ್ಪಿನಿಂದ ಅಲಂಕರಿಸಿ.
ತರಕಾರಿ ಶುಚಿಗೊಳಿಸಿ ತುರಿದಿಟ್ಟುಕೊಂಡಿದ್ದರೆ ತಯಾರಿಸಲು ತುಂಬಾ ಸರಳವಿದು. ಪಾರ್ಟಿಗಳಿಗೂ ಒಪ್ಪುವ ಸಲಾಡ್.

*  ತುರಿಯನ್ನು ಮತ್ತು ಮಯೊನೈಸ್ ಅನ್ನು ಮೊದಲು ಬೆರೆಸಿಕೊಂಡು, ಸಲಾಡ್ ಉಪಯೋಗಿಸುವಾಗ ಉಪ್ಪು ಮತ್ತು ಪೆಪ್ಪರ್ ಸೇರಿಸಬಹುದು.
ತಿನ್ನುವಾಗ ಮಾತ್ರ ಉಪ್ಪು ಬೆರೆಸಿ, ಮೊದಲೇ ಬೆರೆಸಿದರೆ ಸಲಾಡ್ ನೀರು ಬಿಡುತ್ತದೆ. ಆಗ ರುಚಿ ಚೆನ್ನಾಗಿರುವುದಿಲ್ಲ.
*  ಬೆರೆಸಿದ ತಕ್ಷಣ ತಿನ್ನುವುದರಿಂದ ರುಚಿ ತುಂಬಾ ಚೆನ್ನಾಗಿರುತ್ತದೆ. ಐದು-ಹತ್ತು ನಿಮಿಷಗಳು ಪರವಾಗಿಲ್ಲ.
*  ಹಸಿಯಾಗಿ ತರಕಾರಿ ತಿನ್ನದಿರುವ ಮಕ್ಕಳಿಗೆ ಇದನ್ನು ತಯಾರಿಸಿಕೊಟ್ಟರೆ ಬೇಡಾ ಎನ್ನದೆ ಇಷ್ಟಪಟ್ಟು ತಿನ್ನುತ್ತಾರೆ ಕೆಲವು ಮಕ್ಕಳು.
*  ಪರಿಮಳಕ್ಕಾಗಿ ಬೇಕಾದರೆ ಒಂದೇಒಂದು ಹಸಿಮೆಣಸಿನಕಾಯಿಯನ್ನು ಉದ್ದಕ್ಕೆ ಸೀಳಿ ಹಾಕಬಹುದು.
ಕ್ಯಾರೆಟ್ ಅನ್ನು ಹಸಿಯಾಗಿ ತಿನ್ನುವುದರಿಂದ ಕಣ್ಣಿಗೆ ಬಹಳ ಒಳ್ಳೆಯದೆಂದು ಎಲ್ಲರಿಗು ತಿಳಿದಿರುವ ವಿಷಯ.
*  ಎಲೆಕೋಸು ಫ಼ೈಬರ್ ಹೊಂದಿರುವುದರಿಂದ ಆರೋಗ್ಯಕ್ಕೂ ಒಳ್ಳೆಯದು.

Tuesday, January 12, 2010

Brinjal bajji - ಬದನೆಕಾಯಿ ಬಜ್ಜಿ:

ಬದನೆಕಾಯಿ ಬಜ್ಜಿ:

ಬೇಕಾಗುವ ಸಾಮಗ್ರಿಗಳು:
ಬದನೆಕಾಯಿ

ಕಡ್ಲೆಹಿಟ್ಟು - ಒಂದು ಬಟ್ಟಲು

ಅಕ್ಕಿಹಿಟ್ಟು - ಎರಡು ಚಮಚ

ಅಚ್ಚಖಾರದ ಪುಡಿ

ಉಪ್ಪು

ಓಮಕಾಳು

ಕಾದ ಎಣ್ಣೆ - ಒಂದು ಚಮಚ

ಚಿಟಿಕೆ ಸೋಡ

ಕಲೆಸಲು ಬೇಕಾಗುವಷ್ಟು ನೀರು

ಕರಿಯಲು ಎಣ್ಣೆ

ತಯಾರಿಸುವ ವಿಧಾನ:

ಬದನೆಕಾಯಿಯನ್ನು ತೆಳುವಾಗಿ ಹೆಚ್ಚಿಕೊಂಡು ಸ್ವಲ್ಪ ಉಪ್ಪು ಹಾಕಿದ ನೀರಿನಲ್ಲಿ ಹಾಕಿಡಿ.

ಕಡ್ಲೆಹಿಟ್ಟು, ಅಕ್ಕಿಹಿಟ್ಟು, ಓಮಕಾಳು,ಉಪ್ಪು, ಅಚ್ಚಖಾರದ ಪುಡಿ ಮತ್ತು ಸೋಡ ಹಾಕಿ ಚೆನ್ನಾಗಿ ಬೆರೆಸಿ, ಅದಕ್ಕೆ ಕಾದಿರುವ ಎಣ್ಣೆ ಹಾಕಿ, ಜೊತೆಯಲ್ಲಿ ನೀರು ಹಾಕಿ, ಕಲೆಸಿಕೊಳ್ಳಿ, ಎಲ್ಲವನ್ನು ಚೆನ್ನಾಗಿ ಬೆರೆಸಿ ದೋಸೆ ಹಿಟ್ಟಿನ/ಬಜ್ಜಿಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ. ಎಣ್ಣೆಯನ್ನು ಕಾಯಲು ಇಟ್ಟು, ಅದು ಕಾದ ನಂತರ, ಹೆಚ್ಚಿರುವ ಬದನೆಕಾಯಿಯನ್ನು ಕಲೆಸಿರುವ ಹಿಟ್ಟಿನಲ್ಲಿ ಅದ್ದಿ, ಕಾದಿರುವ ಎಣ್ಣೆಯಲ್ಲಿ ಅದನ್ನು ತೇಲಿಬಿಡಿ. ಅದು ಮೇಲೆ ಬಂದಾಗ ತಿರುವಿ ಹಾಕಿ, ಎರಡು ಬದಿಯೂ ಚೆನ್ನಾಗಿ ಬೇಯಿಸಿ. ಎಣ್ಣೆಯಿಂದ ತೆಗೆದು ಪೇಪರ್ ಟವಲ್ ಮೇಲೆ ಹಾಕಿ. ರುಚಿರುಚಿಯಾದ ಬದನೆಕಾಯಿ ಬಜ್ಜಿ ತಯಾರ್. ಇದನ್ನು ಬಿಸಿಯಾಗಿ ತಿಂದರೆ ತುಂಬಾ ಚೆನ್ನಾಗಿ ಇರುತ್ತದೆ. ಬೇಕಾದರೆ ಚಟ್ನಿಯೊಂದಿಗೆ ಸರ್ವ್ ಮಾಡಬಹುದು.

Saturday, October 31, 2009

Onion Pakoda / Erulli pakoda-ಈರುಳ್ಳಿ ಪಕೋಡ:

ಈರುಳ್ಳಿ ಪಕೋಡ:



ಬೇಕಾಗುವ ಸಾಮಗ್ರಿಗಳು:

ಈರುಳ್ಳಿ - ಎರಡು ದೊಡ್ಡದು
ಕಡ್ಲೆಹಿಟ್ಟು - ಒಂದು ಕಪ್
ಖಾರದ ಪುಡಿ ( ಅಚ್ಚ ಮೆಣಸಿನ ಪುಡಿ) - ರುಚಿಗೆ ತಕ್ಕಷ್ಟು
ಉಪ್ಪು - ರುಚಿಗೆ ತಕ್ಕಷ್ಟು
ಓಮಕಾಳು - ಅರ್ಧ ಚಮಚ( ಬೇಕಾದರೆ)
ಚಿಟಿಕೆ ಅಡಿಗೆ ಸೋಡಾ
ಕರಿಯಲು ಎಣ್ಣೆ

ತಯಾರಿಸುವ ವಿಧಾನ:

ಮೊದಲು ಈರುಳ್ಳಿಯನ್ನು ಅರ್ಧಕ್ಕೆ ಕತ್ತರಿಸಿ ಉದ್ದಕ್ಕೆ ಹೆಚ್ಚಿಕೊಳ್ಳಿ ಅಥವಾ ಮಧ್ಯಕ್ಕೆ ಕತ್ತರಿಸಿ ಸ್ಲೈಸ್ ಮಾಡಿಕೊಂಡು ಅದನ್ನು ಬೇರ್ಪಡಿಸಿಟ್ಟುಕೊಳ್ಳಿ.
ನಂತರ ಒಂದು ಪಾತ್ರೆಗೆ ಕಡ್ಲೆಹಿಟ್ಟು, ಖಾರದ ಪುಡಿ, ಓಮಕಾಳು, ಸೋಡಾ ಮತ್ತು ಉಪ್ಪು ಹಾಕಿ ಬೆರೆಸಿ, ಅದಕ್ಕೆ ಕತ್ತರಿಸಿದ ಈರುಳ್ಳಿಯನ್ನು ಮತ್ತು ಒಂದೆರಡು ಚಮಚ ಕಾದ ಎಣ್ಣೆಯನ್ನು ಹಾಕಿ, ಚೆನ್ನಾಗಿ ಕಲೆಸಿ. ನೀರು ಅವಶ್ಯಕತೆ ಇದ್ದರೆ ಮಾತ್ರ ಸ್ವಲ್ಪ ಹಾಕಿಕೊಳ್ಳಿ, ಯಾಕೆಂದರೆ ಈರುಳ್ಳಿಯು ಕಲೆಸಿದಾಗ ನೀರು ಬಿಡುತ್ತದೆ. ತುಂಬಾ ತೆಳ್ಳಗೆ ಹಿಟ್ಟನ್ನು ಕಲೆಸಬೇಡಿ, ಕೈ ಅಥವ ಚಮಚದಲ್ಲಿ ತೆಗೆದುಕೊಳ್ಳುವಷ್ಟು ಕಲೆಸಿಕೊಳ್ಳಿ. ನಂತರ ಈ ಕಲೆಸಿದ ಮಿಶ್ರಣವನ್ನು ಕಾದ ಎಣ್ಣೆಯಲ್ಲಿ ಸ್ವಲ್ಪ ತೆಳುವಾಗಿ ಸ್ವಲ್ಪ ಸ್ವಲ್ಪವೇ ಹಿಟ್ಟು ಪಕೋಡಾ ತರಹ ಹಾಕಿ ಕರಿಯಿರಿ. ತುಂಬಾ ದಪ್ಪ ಮಿಶ್ರಣ ಹಾಕಿದರೆ ಒಳಗೆ ಹಿಟ್ಟು ಬೇಯುವುದಿಲ್ಲ, ಅದಕ್ಕೆ ತೆಳುವಾಗಿ ಹಾಕಿ. ಗೊಲ್ಡನ್ ಬ್ರೌನ್ ಬಣ್ಣ ಬರುವವರೆಗೂ ಅಥವಾ ಗರಿಗರಿಯಾಗುವವರೆಗು ಕರಿದು, ಪೇಪರ್ ಟವಲ್ ಮೇಲೆ ಹಾಕಿ, ಹೆಚ್ಚುವರಿ ಎಣ್ಣೆ ಕಮ್ಮಿ ಆಗುತ್ತದೆ, ನಂತರ ತಿನ್ನಲು ನೀಡಿ. ಬಿಸಿಯಾಗಿರುವಾಗ ತಿನ್ನಲು ತುಂಬಾ ರುಚಿಯಾಗಿರುತ್ತದೆ. ಇದನ್ನು ಊಟಕ್ಕೆ ನೆಂಚಿಕೊಳ್ಳಲು / ಕಾಫಿ ಹೊತ್ತಿಗೆ ಅಥವ ಯಾರಾದರೂ ಅತಿಥಿಗಳಿಗೆ ನೀಡಲು ತಕ್ಷಣ ತಯಾರಿಸಿಕೊಳ್ಳಬಹುದು. ಇದಕ್ಕೆ ಚಟ್ನಿಯ ಅವಶ್ಯಕತೆ ಇಲ್ಲ, ಬೇಕಾದರೆ ತಯಾರಿಸಿಕೊಳ್ಳಬಹುದು.

Monday, September 21, 2009

GoLibaje - ಗೋಳಿ ಬಜೆ:



ಗೋಳಿ ಬಜೆ:

ಬೇಕಾಗುವ ಸಾಮಗ್ರಿಗಳು:

ಮೈದಾ ಹಿಟ್ಟು - ಒಂದು ಬಟ್ಟಲು
ಮೊಸರು - ಒಂದು ಬಟ್ಟಲು/ ಕಲೆಸಲು ಬೇಕಾಗುವಷ್ಟು
ತೆಂಗಿನಕಾಯಿ ಚೂರು- ಸ್ವಲ್ಪ
ಹಸಿಮೆಣಸಿನ ಕಾಯಿ- ರುಚಿಗೆ ತಕ್ಕಷ್ಟು
ಕೊತ್ತುಂಬರಿ ಸೊಪ್ಪು ಸ್ವಲ್ಪ
ಈರುಳ್ಳಿ-1
ಓಂ ಕಾಳು - ಅರ್ಧ ಚಮಚ
ಸೋಡ- ಚಿಟಿಕೆ
ಉಪ್ಪು- ರುಚಿಗೆ ಬೇಕಾಗುವಷ್ಟು
ಎಣ್ಣೆ - ಕರಿಯಲು

ತಯಾರಿಸುವ ವಿಧಾನ:

ಈರುಳ್ಳಿ, ಹಸಿಮೆಣಸಿನಕಾಯಿ ಮತ್ತು ಕೊತ್ತುಂಬರಿ ಸೊಪ್ಪನ್ನು ಸಣ್ಣಗೆ ಹೆಚ್ಚಿಟ್ಟುಕೊಳ್ಳಿ.
ಬಾಣಲೆಗೆ ಎಣ್ಣೆ ಹಾಕಿ ಕಾಯಲು ಇಡಿ.
ಬಟ್ಟಲಿಗೆ ಮೈದಾ ಹಿಟ್ಟು, ತೆಂಗಿನಚೂರು, ಈರುಳ್ಳಿ, ಹಸಿಮೆಣಸಿನಕಾಯಿ,ಕೊತ್ತುಂಬರಿ ಸೊಪ್ಪು, ಓಂ ಕಾಳು, ಉಪ್ಪು ಮತ್ತು ಸೋಡ ಎಲ್ಲವನ್ನೂ ಚೆನ್ನಾಗಿ ಬೆರೆಸಿ, ಅದಕ್ಕೆ ಮೊಸರು ಹಾಕಿ, ಎಲ್ಲವನ್ನು ಸೇರಿಸಿ ಚೆನ್ನಾಗಿ ಕಲೆಸಿಕೊಳ್ಳಿ. ಈ ಮಿಶ್ರಣವೂ ಹೆಚ್ಚು ಗಟ್ಟಿ ಅಥವಾ ತುಂಬಾ ತೆಳ್ಳಗೂ ಇರಬಾರದು. ಬಜ್ಜಿ ಹಿಟ್ಟಿನ ಹದಕ್ಕಿಂತ ಸ್ವಲ್ಪ ಗಟ್ಟಿ ಇರಲಿ. ಕೈನಲ್ಲಿ ಅಥವಾ ಚಮಚದಲ್ಲಿ ನೇರವಾಗಿ ಕಾದ ಎಣ್ಣೆಗೆ ಚಿಕ್ಕ ಚಿಕ್ಕ ಉಂಡೆಯಂತೆ ಬಿಡಿ. ಹೊಂಬಣ್ಣ ಬರುವವರೆಗೂ ಕರಿದು, ಪೇಪರ್ ಮೇಲೆ ಹಾಕಿ. ಈಗ ಗೋಳಿಬಜೆ ತಿನ್ನಲು ರೆಡಿ,ಇದನ್ನು ಬಿಸಿ-ಬಿಸಿಯಾಗಿ ತಿಂದರೆ ರುಚಿ ಹೆಚ್ಚು. ಪುದೀನ ಚಟ್ನಿ ಅಥವಾ ಟಮೋಟ ಸಾಸ್ ಜೊತೆ ತಿನ್ನಲು ನೀಡಬಹುದು.

Thursday, May 21, 2009

Amla Raita - ನೆಲ್ಲಿಕಾಯಿ ರಾಯತ / ಪಚ್ಚಡಿ:

ನೆಲ್ಲಿಕಾಯಿ ರಾಯತ / ಪಚ್ಚಡಿ:

ಸಾಮಗ್ರಿಗಳು:
ಬೆಟ್ಟದ ನೆಲ್ಲಿಕಾಯಿ
ತೆಂಗಿನತುರಿ
ಹಸಿಮೆಣಸಿನಕಾಯಿ
ಬೆಲ್ಲ
ಉಪ್ಪು
ಕಾಳುಮೆಣಸಿನಪುಡಿ
ಮೊಸರು

ವಿಧಾನ:

ತೆಂಗಿನತುರಿ,ನೆಲ್ಲಿಕಾಯಿ,ಹಸಿಮೆಣಸಿನಕಾಯಿ,ಬೆಲ್ಲ ಮತ್ತು ಉಪ್ಪು ಎಲ್ಲವನ್ನು ಸ್ವಲ್ಪ ನೀರಿನೊಂದಿಗೆ ನುಣ್ಣಗೆ ರುಬ್ಬಿಕೊಳ್ಳಿ.
ರುಬ್ಬಿದ್ದನ್ನು ಮೊಸರಿನೊಂದಿಗೆ ಬೆರೆಸಿ, ಅದಕ್ಕೆ ಮೆಣಸಿನಪುಡಿ ಹಾಕಿ.ರಾಯತ ಸಿದ್ಧವಾಗುತ್ತದೆ.

Friday, April 17, 2009

Water Melon Juice/ಕಲ್ಲಂಗಡಿ ಹಣ್ಣಿನ ಪಾನೀಯ:

ಕಲ್ಲಂಗಡಿ ಹಣ್ಣಿನ ಪಾನೀಯ:

ಕಲ್ಲಂಗಡಿ ಹಣ್ಣು
ಉಪ್ಪು
ಮೆಣಸಿನಪುಡಿ
ಜೇನುತುಪ್ಪ
ನಿಂಬೆರಸ

ವಿಧಾನ:

ಕಲ್ಲಂಗಡಿ ಹಣ್ಣಿನ ಹೋಳುಗಳನ್ನು ಮಿಕ್ಸಿಗೆ ಹಾಕಿ, ಸ್ವಲ್ಪ ನೀರು ಮತ್ತು ಜೇನುತುಪ್ಪ ಹಾಕಿ ಬ್ಲೆಂಡ್ ಮಾಡಿಕೊಳ್ಳಿ. ಅದನ್ನು ಲೋಟಕ್ಕೆ ಹಾಕಿ ಚಿಟಿಕೆ ಉಪ್ಪು ಮತ್ತು ಕಾಳುಮೆಣಸಿನಪುಡಿ ಹಾಕಿ.ನಿಂಬೆರಸ ಸೇರಿಸಿ ಕಲಕಿ.ಸರ್ವ್ ಮಾಡಿ.ತಣ್ಣಗೆ ಬೇಕಾದವರು ಐಸ್ ಕ್ಯೂಬ್ಸ್ ಹಾಕಿಕೊಳ್ಳಬಹುದು.

Monday, March 16, 2009

Simple Salads / ದಿಡೀರ್ ಸಲಾಡ್

ದಿಡೀರ್ ಸಲಾಡ್:

ಟಮೋಟ ಸಲಾಡ್:

ಟಮೋಟ ಸಣ್ಣಗೆ ಕತ್ತರಿಸಿ,ಅದಕ್ಕೆ ಹೆಚ್ಚಿದ ಈರುಳ್ಳಿ,ಉಪ್ಪು,ಕರಿ ಮೆಣಸಿನ ಪುಡಿ,ಕೊತ್ತುಂಬರಿಸೊಪ್ಪು ಬೆರೆಸಿ.
*********************************

ಕ್ಯಾರೆಟ್ ಸಲಾಡ್:

ಕ್ಯಾರೆಟ್ ಅನ್ನು ತುರಿದುಕೊಂಡು ಅದಕ್ಕೆ ಕಾರ,ಮೆಣಸಿನಪುಡಿ ಮತ್ತು ಉಪ್ಪು ಹಾಕಿ ಚೆನ್ನಾಗಿ ಬೆರೆಸಿ. ನಂತರ ಕಾಯಿತುರಿ ಮತ್ತು ಕೊತ್ತುಂಬರಿಸೊಪ್ಪು ಹಾಕಿ.
*********************************

ಈರುಳ್ಳಿ ಸಲಾಡ್:

ಈರುಳ್ಳಿಯನ್ನು ಸಣ್ಣಗೆ ಹೆಚ್ಚಿಕೊಂಡು,ಅದಕ್ಕೆ ಹೆಚ್ಚಿದ ಕೊತ್ತುಂಬರಿ,ಕಾಯಿತುರಿ,ಉಪ್ಪು ಮತ್ತು ಮೆಣಸಿನಕಾರ ಹಾಕಿ ಕಲೆಸಿ. ನಿಂಬೆರಸ ಸಹ ಹಾಕಬಹುದು.

Potato Wedges - ಆಲೂ ಟಿಕ್ಕಿ/ಆಲೂ ವೆಡ್ಜಸ್:


ಆಲೂಗೆಡ್ಡೆಯಿಂದ ತಯಾರಿಸದ ತಿಂಡಿಗಳೇ ಇಲ್ಲ. ಆಲೂ ಮನೆಯಲ್ಲಿ ಸಾಮಾನ್ಯವಾಗಿ ಸದಾ ಸ್ಟಾಕ್ ಇದ್ದೇಇರುತ್ತದೆ. ಸಾಮಾನ್ಯವಾಗಿ ಇದನ್ನು ಜಾಸ್ತಿ ಅಡಿಗೆಗಳಿಗೆ ಬಳಸುತ್ತೇವೆ. ಆಲೂಗೆಡ್ಡೆಯಿಂದ ಯಾವುದೇ ಪದಾರ್ಥ ತಯಾರಿಸಿದರೂ,ಅದು ರುಚಿಯಾಗಿಯೇ ಇರುತ್ತದೆ. ಮಕ್ಕಳಿಗಂತೂ ಪೊಟ್ಯಾಟೋ ಅಂದರೆ ಒಂದು ಖುಷಿ. ಅದರಲ್ಲೂ ಎಲ್ಲಕ್ಕಿಂತ ಹೆಚ್ಚಾಗಿ ಫ್ರೆಂಚ್ ಫ್ರೈಸ್ ಮತ್ತು ಆಲೂಗೆಡ್ಡೆ ಬಜ್ಜಿ ಎಂದರೆ ಯಾವ ಸಮಯದಲ್ಲಾದರೂ ಸರಿ ತಿನ್ನುತ್ತಾರೆ. ಈ ರೀತಿ ಫ್ರೈಸ್ ನಲ್ಲಿ ಎಣ್ಣೆಯ ಅಂಶ ಜಾಸ್ತಿ ಇರುತ್ತದೆ. ಅದಕ್ಕಾಗಿ ಆಲೂ ವೆಡ್ಜಸ್ ತಯಾರಿಸಿ ಕೊಡಿ. ಇದು ಹೆಚ್ಚು ಎಣ್ಣೆ ತೆಗೆದುಕೊಳ್ಳುವುದಿಲ್ಲ.ಮಕ್ಕಳು ಕೂಡ ತಿನ್ನಲು ಬೇಡಾ ಎನ್ನುವುದಿಲ್ಲ.ಜೊತೆಲಿ ದೊಡ್ಡವರು ಸಹ! ಇದನ್ನು ತಯಾರಿಸಲು ಸಮಯ ತುಂಬಾ ಬೇಕಾಗಿಲ್ಲ.

ಆಲೂ ಟಿಕ್ಕಿ/ಆಲೂ ವೆಡ್ಜಸ್:

ಬೇಕಾಗುವ ಸಾಮಗ್ರಿಗಳು:

ಆಲೂಗೆಡ್ಡೆಯನ್ನು ಉದ್ದಕ್ಕೆ ಹೆಚ್ಚಿಕೊಳ್ಳಿ
ಮೆಣಸಿನಪುಡಿ
ಧನಿಯಾ ಪುಡಿ
ಅರಿಶಿನ ಸ್ವಲ್ಪ
ಗರಂ ಮಸಾಲಾ ಸ್ವಲ್ಪ
ಉಪ್ಪು ರುಚಿಗೆ
ಎಣ್ಣೆ

ವಿಧಾನ:

ಪ್ಯಾನ್ ಗೆ ಒಂದೆರಡು ಚಮಚ ಎಣ್ಣೆಯನ್ನು ಹಾಕಿ, ಅದಕ್ಕೆ ಆಲೂಗೆಡ್ಡೆ ಹೋಳುಗಳನ್ನು ಹಾಕಿ,ಹಾಗೇ ಹುರಿಯುತ್ತಿರಿ. ಆಲೂ ಬಣ್ಣ ಬದಲಾಗುವವರೆಗೂ ಅಂದರೆ ಅದು ಚೆನ್ನಾಗಿ ಎಣ್ಣೆಯಲ್ಲಿಯೇ ಹೊಂಬಣ್ಣ ಬರುವವರೆಗು ಹುರಿದುಕೊಂಡು, ಆಮೇಲೆ ಅರಿಶಿನ ಮತ್ತು ಉಪ್ಪು ಹಾಕಿ ಬೆರೆಸಿ . ನಂತರ ಅದಕ್ಕೆ ಅಚ್ಚಮೆಣಸಿನಪುಡಿ, ಧನಿಯಾಪುಡಿ ಮತ್ತು ಗರಂಮಸಾಲ ಹಾಕಿ ಚೆನ್ನಾಗಿ ಬೆರೆಸಿ,ಪೂರ್ತಿ ಎಲ್ಲಾ ಹೋಳುಗಳಿಗೂ ಮಸಾಲೆ ಹತ್ತಿದ ಮೇಲೆ ಕೆಳಗಿಳಿಸಿ. ಇದನ್ನು ಸ್ನಾಕ್ಸ್ ತರಹ/ಊಟಕ್ಕೆ ನೆಂಜಿಕೊಳ್ಳಲು/ಊಟಕ್ಕೆ ಮೊದಲು ನೀಡಬಹುದು. ಮಕ್ಕಳಿಗಂತೂ ತುಂಬಾ ಪ್ರಿಯವಾಗುತ್ತದೆ. ಫ್ರೆಂಚ್ ಫ್ರೈ ಗಳಿಗಿಂತ ಇದು ಉತ್ತಮ. ಎಣ್ಣೆಯಲ್ಲಿ ಕರಿಯದೇ ಇರುವುದರಿಂದ ಮಕ್ಕಳಿಗೆ ಒಳ್ಳೆಯದು.

Saturday, August 16, 2008

Cucumber-Carrot salad / ಸೌತೆಕಾಯಿ ಮತ್ತು ಕ್ಯಾರೆಟ್ ಸಲಾಡ್:


ಸೌತೆಕಾಯಿ ಮತ್ತು ಕ್ಯಾರೆಟ್ ಸಲಾಡ್:

ಸೌತೆಕಾಯಿ ಮತ್ತು ಕ್ಯಾರೆಟ್ ಅನ್ನು ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿ, ಅದರ ಮೇಲೆ ಉಪ್ಪು ಮತ್ತು ಕಾಳು ಮೆಣಸಿನ ಪುಡಿಯನ್ನು ಉದುರಿಸಿ.ಇದು ಸರಳವಾದ ಸಲಾಡ್.

Wednesday, May 14, 2008

Masala Papad /happala - ಮಸಾಲೆ ಹಪ್ಪಳ


ಮಸಾಲೆ ಹಪ್ಪಳ:
ಹಪ್ಪಳ
ಹೆಚ್ಚಿದ ಈರುಳ್ಳಿ
ಕಾಯಿತುರಿ
ಕಾರದ ಪುಡಿ
ಉಪ್ಪು
ಹಸಿಮೆಣಸಿನಕಾಯಿ (ಬೇಕಾದರೆ)
ಕೊತ್ತುಂಬರಿ ಸೊಪ್ಪು

ವಿಧಾನ:
ಹಪ್ಪಳವನ್ನು ಎಣ್ಣೆಯಲ್ಲಿ ಕರೆದಿಟ್ಟುಕೊಂಡು ಅದರ ಮೇಲೆ ಹೆಚ್ಚಿದ ಈರುಳ್ಳಿ, ಕಾಯಿತುರಿ, ಕಾರದಪುಡಿ ಮತ್ತು ಉಪ್ಪು ಉದುರಿಸಿ. ಕೊತ್ತುಂಬರಿ ಸೊಪ್ಪಿನಿಂದ ಅಲಂಕರಿಸಿ, ಚಾಟ್ ಮಸಾಲಾ ಸಿಂಪಡಿಸಿ, ತಕ್ಷಣ ತಿನ್ನಲು ಕೊಡಿ , ಹಪ್ಪಳ ಬೇಗ ಮೆತ್ತಗೆ ಆಗುತ್ತದೆ.
* ಮೊಳಕೆ ಹೆಸರುಕಾಳು ಇದ್ದರೆ ಅದನ್ನು ಸೇರಿಸಿದರೆ, ಇನ್ನೂ ರುಚಿ ಹೆಚ್ಚುತ್ತದೆ.
* ಮಸಾಲೆ ಹಾಕಿದ ಮೇಲೆ ನಿಂಬೆರಸ ಸಹ ಹಿಂಡಬಹುದು.

Monday, April 14, 2008

Jeera Pani - ಜೀರಿಗೆ ಶರಬತ್ತು/ಜೀರಿಗೆ ಪಾನೀಯ

ಜೀರಿಗೆ ಶರಬತ್ತು:

ಜೀರಿಗೆ - ಎರಡು ಚಮಚ
ಒಣಮೆಣಸಿನಕಾಯಿ -ಒಂದೆರಡು
ಪುದೀನ ಸೊಪ್ಪು ಸ್ವಲ್ಪ
ಸಕ್ಕರೆ - ಒಂದು ಚಮಚ
ನಿಂಬೆರಸ - ಒಂದು ಚಮಚ /ರುಚಿಗೆ
ಉಪ್ಪು -ರುಚಿಗೆ

ವಿಧಾನ:

ಜೀರಿಗೆಯನ್ನು ಎಣ್ಣೆ ಹಾಕದೇ ಆಗೇ ಸ್ವಲ್ಪ ಕಂದು ಬಣ್ಣ ಬರುವಂತೆ ಹುರಿದುಕೊಂಡು,ಸ್ವಲ್ಪ ಕುಟ್ಟಿಕೊಳ್ಳಿ. ಒಂದು ಪಾತ್ರೆಗೆ ನೀರು ಹಾಕಿ ಅದರಲ್ಲಿ ಈ ಜೀರಿಗೆ ಪುಡಿಯನ್ನು ಹಾಕಿ ಚೆನ್ನಾಗಿ ಕುದಿಸಿ. ಅದಕ್ಕೆ ಮೆಣಸಿನಕಾಯಿ, ಪುದೀನ,ಸಕ್ಕರೆ ಮತ್ತು ಉಪ್ಪು ಹಾಕಿ ಬೆರೆಸಿ. ಹತ್ತು / ಹದಿನೈದು ನಿಮಿಷಗಳವರೆಗೆ ಕುದಿಸಿ. ನಿಂಬೆರಸ ಸೇರಿಸಿ ಇಳಿಸಿ. ತಣ್ಣಗಾದ ಮೇಲೆ ಸೋಸಿಟ್ಟರೆ ಜೀರಿಗೆ ಶರಬತ್ತು ತಯಾರಾಗುತ್ತದೆ.
* ಇದನ್ನು ಊಟಕ್ಕೆ ಮುಂಚೆ ಕುಡಿದರೆ ಒಳ್ಳೆಯದು ಅಥವಾ ಊಟ ಮಾಡುವಾಗಲೂ ಸೇವಿಸಬಹುದು.

Popular Posts