Bassaru /ಸೊಪ್ಪಿನ ಬಸ್ಸಾರು ಮತ್ತು ಸೊಪ್ಪಿನ ಪಲ್ಯ

0 comments


ಬಸ್ಸಾರು ಮತ್ತು ಸೊಪ್ಪಿನ ಪಲ್ಯ:

ಸಾರಿಗೆ ಬೇಕಾಗುವ ಸಾಮಾಗ್ರಿಗಳು:

ತೊಗರಿಬೇಳೆ - ಒಂದು ಕಪ್
ಸಬ್ಬಸ್ಸಿಗೆ ಸೊಪ್ಪು/ಬೆರೆಕೆಸೊಪ್ಪು/ದಂಟಿನಸೊಪ್ಪು
ಈರುಳ್ಳಿ ಒಂದು
ಬೆಳ್ಳುಳ್ಳಿ
ಜೀರಿಗೆ ಒಂದು ದೊಡ್ಡ ಚಮಚ
ಮೆಣಸು ಏಳೆಂಟು ಕಾಳು
ಅರಿಶಿಣ
ಹುಣಸೆಹಣ್ಣು ಅಥವಾ ಹುಣಸೆರಸ
ಅಚ್ಚಖಾರದ ಪುಡಿ
ಸಾಂಬಾರ್/ಸಾರಿನ ಪುಡಿ - ಅರ್ಧ ಚಮಚ
ಕೊತ್ತುಂಬರಿಸೊಪ್ಪು
ಕರಿಬೇವಿನ ಸೊಪ್ಪು
ಉಪ್ಪು
ಎಣ್ಣೆ
ತಯಾರಿಸುವವಿಧಾನ:
ಮೊದಲು ಸೊಪ್ಪನ್ನು ಚೆನ್ನಾಗಿ ಬಿಡಿಸಿಕೊಂಡು, ತೊಳೆದು, ಸಣ್ಣಗೆ ಹೆಚ್ಚಿಕೊಳ್ಳಿ.ಪಾತ್ರೆಯಲ್ಲಿ ನೀರು ಹಾಕಿ, ಅದಕ್ಕೆ ತೊಳೆದ ತೊಗರೆಬೇಳೆಯನ್ನು, ಚಿಟಿಕೆ ಅರಿಶಿಣ ಮತ್ತು ಒಂದು ಚಮಚ ಎಣ್ಣೆಯನ್ನು ಹಾಕಿ,ಬೇಳೆ ಬೇಯಲು ಬಿಡಿ.ಬೇಳೆಯನ್ನು ತುಂಬಾ ನುಣ್ಣಗೆ ಬೇಯಿಸಬೇಡಿ, ಸ್ವಲ್ಪ ಬೆಂದ ನಂತರ ಅದಕ್ಕೆ ಹೆಚ್ಚಿಟ್ಟುಕೊಂಡಿರುವ ಸೊಪ್ಪನ್ನು ಹಾಕಿ ಜೊತೆಯಲ್ಲಿ ಸ್ವಲ್ಪ ಉಪ್ಪನ್ನು ಹಾಕಿ,ಸೊಪ್ಪು ಬೇಯುವವರೆಗೂ ಬೇಯಿಸಿ, ಬೇಳೆ ಕರಗದಂತೆ ಬೇಯಿಸಿಕೊಳ್ಳಿ. ನಂತರ ಬೇಳೆ ಮತ್ತು ಸೊಪ್ಪಿನ ಮಿಶ್ರಣವನ್ನು ಜಾಲರಿಯಲ್ಲಿ ಸೋಸಿಕೊಂಡು,ಸೊಪ್ಪಿನ ಕಟ್ಟು ಮತ್ತು ಸೊಪ್ಪನ್ನು ಬೇರೆಬೇರೆಯಾಗಿ ತೆಗೆದಿಟ್ಟುಕೊಳ್ಳಿ.
ಸಾರಿಗೆ ರುಬ್ಬಿಕೊಳ್ಳಲು:
ಈರುಳ್ಳಿ ಮತ್ತು ಬೆಳ್ಳುಳ್ಳಿಯನ್ನು ಒಂದೆರಡು ನಿಮಿಷ ಹುರಿದುಕೊಂಡು,ಅದಕ್ಕೆ ಒಂದೆರಡು ಚಮಚ ಬೇಯಿಸಿದ ಬೇಳೆ ಮತ್ತು ಸೊಪ್ಪಿನ ಮಿಶ್ರಣವನ್ನು,ಎರಡು ಚಮಚ ಕಾಯಿತುರಿ/ಕೊಬ್ರಿ, ಜೀರಿಗೆ, ಅಚ್ಚಖಾರದಪುಡಿ, ಮೆಣಸು, ಸಾರಿನಪುಡಿ, ಹುಣಸೆಹಣ್ಣು, ಕೊತ್ತುಂಬರಿಸೊಪ್ಪು ಎಲ್ಲವನ್ನೂ ಸೇರಿಸಿ, ನುಣ್ಣಗೆ ರುಬ್ಬಿಕೊಳ್ಳಿ.
ಸಾರಿನ ಒಗ್ಗರಣೆಗೆ-
ಒಂದೆರಡು ಚಮಚ ಎಣ್ಣೆ ಹಾಕಿ, ಸಾಸಿವೆ ಮತ್ತು ಜೀರಿಗೆ ಹಾಕಿ, ಕರಿಬೇವು, ಇಂಗು ಮತ್ತು ಜಜ್ಜಿದ ಬೆಳ್ಳುಳ್ಳಿಯನ್ನು ಹಾಕಿ ಅದರ ನಂತರ ರುಬ್ಬಿದ ಮಸಾಲೆಯನ್ನು ಹಾಕಿ ಒಂದು ನಿಮಿಷ ಕುದಿಸಿ, ಬಸಿದಿಟ್ಟುಕೊಂಡ ಸೊಪ್ಪಿನಕಟ್ಟನ್ನು ಹಾಕಿ, ಚೆನ್ನಾಗಿ ಬೆರೆಸಿ. ರುಚಿಗೆ ತಕ್ಕಷ್ಟು ಉಪ್ಪನ್ನು ಹಾಕಿ ಒಂದೇ ಒಂದು ಕುದಿ ಬರಿಸಿ ಇಳಿಸಿ. ಬಸ್ಸಾರು ತಯಾರು.
ಈಗ ಸೊಪ್ಪಿನ ಪಲ್ಯಕ್ಕೆ:
ಒಗ್ಗರಣೆಗೆ -
ಎಣ್ಣೆಹಾಕಿ, ಸಾಸಿವೆ, ಕರಿಬೇವು, ಜಜ್ಜಿದ ಬೆಳ್ಳುಳ್ಳಿ, ಸಣ್ಣಗೆ ಹೆಚ್ಚಿಟ್ಟುಕೊಂಡ ಈರುಳ್ಳಿ ಮತ್ತು ಹಸಿಮೆಣಸಿನಕಾಯಿಯನ್ನು ಹಾಕಿ, ಅದನ್ನು ಹುರಿದುಕೊಂಡ ನಂತರ ಸೊಪ್ಪುಬೇಳೆ ಮಿಶ್ರಣವನ್ನು ಹಾಕಿ, ಚೆನ್ನಾಗಿ ಬೆರೆಸಿ. ಉಪ್ಪನ್ನು ಬೇಯುವಾಗ ಹಾಕಿರುವುದರಿಂದ ಈಗ ಬೇಕೆನಿಸಿದರೆ ಹಾಕಿಕೊಳ್ಳಿ. ಕೊನೆಯಲ್ಲಿ ತೆಂಗಿನತುರಿ ಹಾಕಿ ಚೆನ್ನಾಗಿ ಬೆರೆಸಿ. ಸೊಪ್ಪಿನ ಪಲ್ಯ ತಯಾರು.
* ಹುಣಸೆಹಣ್ಣನ್ನು ಹಾಕಿದರೆ ರುಬ್ಬುವಾಗ ಹಾಕಿ ಅಥವಾ ಹುಣಸೆರಸವನ್ನು ಉಪಯೋಗಿಸುವುದಾದರೆ ಸಾರು ಕುದಿಯುವಾಗ ಹಾಕಿ, ಕುದಿಸಿ, ಇಳಿಸಿ.
* ಸಾರಿಗೆ ಒಂದು ಸ್ವಲ್ಪ ಬೆಲ್ಲವನ್ನು ಹಾಕಬಹುದು.(ಇಷ್ಟಪಡುವವರು)
*ಸೊಪ್ಪಿನ ಪಲ್ಯಕ್ಕೆ ಕಾಯಿತುರಿ ಬೇಕಾದರೆ ಹಾಕಬಹುದು, ರುಚಿ ಹೆಚ್ಚು ಕೊಡುತ್ತದೆ. ಇಲ್ಲ ಅಂದರೆ ಕೊಕೊನಟ್ ಪೌಡರ್ ಕೂಡ ಹಾಕಬಹುದು.
*ಬಸ್ಸಾರಿಗೆ ಕೊತ್ತುಂಬರಿ ಸೊಪ್ಪು, ಬೆಳ್ಳುಳ್ಳಿ ಹೆಚ್ಚಿಗೆ ಇದ್ದರೆ ರುಚಿ ಜಾಸ್ತಿ. ಉಪ್ಪು ಮತ್ತು ಕಾರವೆಲ್ಲಾ ನಿಮ್ಮ ರುಚಿಗೆ ತಕ್ಕಂತೆ ಹಾಕಿ ತಯಾರಿಸಿ.
*ಸೊಪ್ಪಿನಬಸ್ಸಾರನ್ನು ರಾಗಿಮುದ್ದೆ ಮತ್ತು ಬಿಳಿ ಅನ್ನದೊಂದಿಗೆ ಸರ್ವ್ ಮಾಡಿ. ಬಸ್ಸಾರು ತಯಾರಿಸಿದ ದಿನಕ್ಕಿಂತ ಮಾರನೇದಿನ ತುಂಬಾ ರುಚಿಯಾಗಿರುತ್ತದೆ. ಈ ಸಾರು ಕುದಿಸಿದಷ್ಟು ರುಚಿ ಹೆಚ್ಚು.
*ಈ ರೀತಿಯ ಸೊಪ್ಪಿನ ಬಸ್ಸಾರು, ಪಲ್ಯ ಮತ್ತು ರಾಗಿಮುದ್ದೆ ನಮ್ಮ ಕರ್ನಾಟಕದಲ್ಲಿ ತುಂಬಾ ಮನೆಮಾತಾಗಿದೆ. ರೋಗಕ್ಕೆ ರಾಮಬಾಣ ರಾಗಿಮುದ್ದೆ.

Chick Peas Sabji - ಕಡ್ಲೆಕಾಳು ಉಸಲಿ:

0 comments

ಕಡ್ಲೆಕಾಳು ಉಸಲಿ:

ಸಾಮಗ್ರಿಗಳು:

ಕಡ್ಲೆಕಾಳು - ಒಂದು ಬಟ್ಟಲು
ಹೆಚ್ಚಿದ ಈರುಳ್ಳಿ ಸ್ವಲ್ಪ
ಹೆಚ್ಚಿದ ಹಸಿಮೆಣಸಿನಕಾಯಿ
ಒಂದು ಟೀ ಬ್ಯಾಗ್
ಎಣ್ಣೆ, ಸಾಸಿವೆ
ಕರಿಬೇವು
ಚಿಟಿಕೆ ಇಂಗು
ಹುಣಸೇಹುಳಿ ರಸ/ನಿಂಬೆರಸ-ಕಾಲು ಚಮಚ
ಉಪ್ಪು ರುಚಿಗೆ
ಕೊತ್ತುಂಬರಿಸೊಪ್ಪು
ಕಾಯಿತುರಿ

ವಿಧಾನ:

ಹಿಂದಿನ ದಿನ ರಾತ್ರಿ ಕಡ್ಲೆಕಾಳನ್ನು ಚೆನ್ನಾಗಿ ತೊಳೆದು,ನೀರು ಹಾಕಿ ನೆನೆಸಿಡಿ. ಬೆಳಗ್ಗೆ ಮತ್ತೆ ನೀರಿನಲ್ಲಿ ಚೆನ್ನಾಗಿ ತೊಳೆಯಿರಿ. ಕುಕ್ಕರ್ ಗೆ ಕಾಳುಗಳನ್ನು ಹಾಕಿ ಒಂದು ಲೋಟ ನೀರು ಹಾಕಿ,ಒಂದು ಟೀ ಬ್ಯಾಗ್,ಉಪ್ಪು ಮತ್ತು ಎಣ್ಣೆ ಸ್ವಲ್ಪ ಹಾಕಿ. ಬೇಯಿಸಿಕೊಳ್ಳಿ. ನೀರು ಜಾಸ್ತಿ ಹಾಕಿದ್ದರೆ ನೀರು ಬಸಿಯಿರಿ.
ಪಾತ್ರೆ/ಬಾಣಲೆಗೆ ಒಂದೆರಡು ಚಮಚ ಎಣ್ಣೆ ಹಾಕಿ,ಸಾಸಿವೆ,ಕರಿಬೇವು,ಚಿಟಿಕೆ ಇಂಗು,ಹಸಿಮೆಣಸಿನಕಾಯಿ,ಈರುಳ್ಳಿಯನ್ನು ಹಾಕಿ,ಕೆಲವು ನಿಮಿಷ ಹುರಿಯಿರಿ,ಈರುಳ್ಳಿಯೂ ಸ್ವಲ್ಪ ಬಣ್ಣ ನಂತರ ಚಿಟಿಕೆ ಉಪ್ಪು ಹಾಕಿ ,ಬೇಯಿಸಿರುವ ಕಡ್ಲೆಕಾಳನ್ನು ಹಾಕಿ,ಎಲ್ಲವನ್ನು ಚೆನ್ನಾಗಿ ಬೆರೆಸಿ. ಕಾಯಿತುರಿ ಮತ್ತು ಕೊತ್ತುಂಬರಿ ಸೊಪ್ಪನ್ನು ಹಾಕಿ ಸರಿಯಾಗಿ ಬೆರೆಸಿ. ಇದನ್ನು ಊಟಕ್ಕೆ ನೆಂಚಿಕೊಳ್ಳಬಹುದು.ಇದನ್ನು ಸಂಜೆ ಕಾಫಿಯೊಂದಿಗೆ ಸ್ನಾಕ್ ತರಹ ಸರ್ವ್ ಮಾಡಿ. ಈ ಕಡ್ಲೆಕಾಳು ಉಸಲಿಯನ್ನು ಸರ್ವ್ ಮಾಡುವಾಗ ಸ್ವಲ್ಪ ಕತ್ತರಿಸಿದ ಹಸಿ ಈರುಳ್ಳಿಯನ್ನು ಮೇಲೆ ಹಾಕಿ ಕೊಡಿ.
*ನಿಂಬೆರಸ ಹಾಕುವುದಾದರೆ ಕೊನೆಯಲ್ಲಿ ಬೆರೆಸಿ / ಹುಣಸೇರಸ ಹಾಕುವುದಾದರೆ ಒಗ್ಗರಣೆಯಲ್ಲಿ ಹಾಕಿ.

Cabbage-Bengalgram kurma-ಎಲೆಕೋಸು ಕಡ್ಲೆಬೇಳೆ ಕೂಟು:

0 comments


ಎಲೆಕೋಸು ಕಡ್ಲೆಬೇಳೆ ಕೂಟು:

ಸಾಮಾಗ್ರಿಗಳು:
ಕಡ್ಲೆಬೇಳೆ - ಒಂದು ಬಟ್ಟಲು
ಹೆಚ್ಚಿದ ಎಲೆಕೋಸು - ಒಂದು ಬಟ್ಟಲು
ಈರುಳ್ಳಿ ಸಣ್ಣಗೆ ಹೆಚ್ಚಿದ್ದು
ಒಂದು ಹಸಿಮೆಣಸಿನ ಕಾಯಿ ಮದ್ಯಕ್ಕೆ ಸೀಳಿದ್ದು
ಎಣ್ಣೆ, ಸಾಸಿವೆ, ಕರಿಬೇವು
ಚೆಕ್ಕೆ,ಲವಂಗ
ಅರಿಶಿಣದ ಪುಡಿ
ಧನಿಯಾಪುಡಿ
ಖಾರದಪುಡಿ
ಸಾಂಬಾರ್ ಪುಡಿ (ಸಾರಿನ ಪುಡಿ)
ಉಪ್ಪು
ತೆಂಗಿನತುರಿ ಬೇಕಾದರೆ
ಕೊತ್ತುಂಬರಿಸೊಪ್ಪು

ವಿಧಾನ:

ಕಡ್ಲೆಬೇಳೆಯನ್ನು,ಎಣ್ಣೆ ಒಂದು ಚಮಚ,ಸ್ವಲ್ಪ ಅರಿಶಿಣ ಹಾಕಿ,ನೀರು ಹಾಕಿ ಸ್ವಲ್ಪ ಗಟ್ಟಿಯಾಗಿಯೇ ಬೇಯಿಸಿಕೊಂಡು,(ಕಡ್ಲೆಬೇಳೆಯನ್ನು ತುಂಬಾ ಮೆತ್ತಗೆ ಅಥವಾ ನುಣ್ಣಗೆ ಬೇಯಿಸ ಬೇಡಿ) ಅದಕ್ಕೆ ಹೆಚ್ಚಿದ ಎಲೆಕೋಸು,ಸಾರಿನಪುಡಿ,ಖಾರದಪುಡಿ,ಧನಿಯಾಪುಡಿ,ಉಪ್ಪು ಮತ್ತು ಹಸಿಮೆಣಸಿನಕಾಯಿ ಹಾಕಿ, ಚೆನ್ನಾಗಿ ಬೆರೆಸಿ, ಎಲೆಕೋಸು ಬೇಯುವವರೆಗೂ ಬೇಯಿಸಿಕೊಳ್ಳಿ.ಕೋಸು ಬೇಗ ಬೇಯುವುದು.ಈ ಸಮಯದಲ್ಲಿ ಬೇಳೆ ಹದವಾಗಿ ಬೇಯುತ್ತದೆ. ಕೊನೆಯಲ್ಲಿ ತೆಂಗಿನತುರಿ ಮತ್ತು ಕೊತ್ತುಂಬರಿ ಸೊಪ್ಪು ಮತ್ತು ಒಗ್ಗರಣೆಯನ್ನು ಹಾಕಿ,ಚೆನ್ನಾಗಿ ಬೆರೆಸಿ,ಒಂದೆರಡು ನಿಮಿಷ ಕುದಿಸಿ,ಇಳಿಸಿ. ಇದನ್ನು ಊಟಕ್ಕೆ ಅಥವಾ ಚಪಾತಿ,ರೊಟ್ಟಿ ಅಥವಾ ಪೂರಿಯೊಂದಿಗೆ ತಿನ್ನಲು ಕೊಡಿ.

* ಒಗ್ಗರಣೆ - ಎಣ್ಣೆಯನ್ನು ಬಿಸಿಮಾಡಿ,ಸಾಸಿವೆ,ಚೆಕ್ಕೆ,ಲವಂಗ,ಕರಿಬೇವು ಮತ್ತು ಈರುಳ್ಳಿಯನ್ನು ಹಾಕಿ ಒಂದೆರಡು ನಿಮಿಷ ಹದವಾಗಿ ಹುರಿದು ಅದನ್ನು ಬೆರೆಸಿ.

*ಕುಕ್ಕರ್ ನಲ್ಲಿ ತಯಾರಿಸುವುದಾದರೆ ಬೇಳೆಯನ್ನು ಮೊದಲು 5-10 ನಿಮಿಷ ಬೇಯಿಸಿಕೊಂಡು, ಎಲ್ಲವನ್ನೂ ಹಾಕಿ ಮುಚ್ಚಿಟ್ಟು ಒಂದು ಕೂಗು ಕೂಗಿಸಿ ಇಳಿಸಿ.ಒಗ್ಗರಣೆ ಬೆರೆಸಿ,ಸರಿಯಾಗಿ ಕಲೆಸಿ,ಕಡ್ಲೆಬೇಳೆ ಎಲೆಕೋಸುಕೂಟು ರೆಡಿಯಾಗುತ್ತದೆ.

ಚಟ್ನಿಪುಡಿ

0 comments


ಚಟ್ನಿಪುಡಿ:

ಸಾಮಗ್ರಿಗಳು:

ಉದ್ದಿನಬೇಳೆ - ಒಂದು ಬಟ್ಟಲು
ಕಡಲೆಬೇಳೆ - ಒಂದು ಬಟ್ಟಲು
ಒಣ
ಒಣಕೊಬ್ಬರಿ ತುರಿ - ಒಂದು ಕಪ್
ಹುಣಸೇಹಣ್ಣು ಸ್ವಲ್ಪ ಹುಳಿಗೆ
ಬೆಲ್ಲ ಸ್ವಲ್ಪ
ಜೀರಿಗೆ
ಕರಿಬೇವು
ಉಪ್ಪು

ವಿಧಾನ:

ಉದ್ದಿನಬೇಳೆ ಮತ್ತು ಕಡಲೆಬೇಳೆಯನ್ನು ಸ್ವಲ್ಪ ಕೆಂಪಾಗುವವರೆಗೆ, ಹಸಿ ವಾಸನೆ ಹೋಗುವವರೆಗೆ ಹುರಿದುಕೊಳ್ಳಿ. ಮೆಣಸಿನಕಾಯಿ,ಕರಿಬೇವು,ಹುಣಸೇಹಣ್ಣು ಎಲ್ಲವನ್ನು ಹುರಿದುಕೊಂಡು, ಕೊಬ್ಬರಿಯನ್ನು ಕೂಡ ಸ್ವಲ್ಪ ಹುರಿದು, ಹುರಿದಿಟ್ಟ ಎಲ್ಲಾ ಸಾಮನುಗಳನ್ನು ಸೇರಿಸಿ ಅದರ ಜೊತೆ ಬೆಲ್ಲ ಮತ್ತು ಉಪ್ಪು ಹಾಕಿ ತರಿ ತರಿಯಾಗಿ ಪುಡಿ ಮಾಡಿಕೊಳ್ಳಿ.
ಒಣ
ಮೆಣಸಿನಕಾಯಿ - ರುಚಿಗೆ

ಪುದೀನ ಸೊಪ್ಪಿನ ಚಟ್ನಿ/ಗೊಜ್ಜು / Mint chutney

0 comments

ಸಾಮಗ್ರಿಗಳು:

ಪುದೀನಸೊಪ್ಪು - ಒಂದು ಕಟ್ಟು
ಕೊತ್ತುಂಬರಿಸೊಪ್ಪು ಸ್ವಲ್ಪ
ಒಣಮೆಣಸಿನಕಾಯಿಗಳು ರುಚಿಗೆ
ಎಣ್ಣೆ, ಸಾಸಿವೆ, ಜೀರಿಗೆ
ಕಡ್ಲೆಬೇಳೆ, ಉದ್ದಿನಬೇಳೆ
ಹುಣಸೆ ಹಣ್ಣು - ಒಂದಿಂಚು ಚೂರು
ಉಪ್ಪು ರುಚಿಗೆ
ನಿಂಬೆರಸ ಸ್ವಲ್ಪ

ವಿಧಾನ:
ಮೊದಲು ಬಾಣಲೆಗೆ ಒಂದು ಚಮಚ ಎಣ್ಣೆ ಹಾಕಿ,ಸಾಸಿವೆ,ಜೀರಿಗೆ,ಕಡ್ಲೆಬೇಳೆ,ಉದ್ದಿನಬೇಳೆ,ಒಣಮೆಣಸಿನಕಾಯಿ ಮತ್ತು ಹುಣಸೆಹಣ್ಣನ್ನು ಎಲ್ಲವನ್ನು ಒಂದೊಂದಾಗಿ ಹಾಕಿ,ಹುರಿದಿಟ್ಟುಕೊಂಡು ತೆಗೆದಿಡಿ. ಅದೇ ಬಾಣಲೆಗೆ ಪುದೀನ ಸೊಪ್ಪನ್ನು ಹಾಕಿ ಹುರಿದುಕೊಳ್ಳಿ.ನಂತರ ಎಲ್ಲವನ್ನು ಸೇರಿಸಿ ಸ್ವಲ್ಪ ನೀರು ಹಾಕಿ ಗಟ್ಟಿಯಾಗಿ ರುಬ್ಬಿಕೊಳ್ಳಿ. ತುಂಬಾ ನುಣ್ಣಗೆ ರುಬ್ಬ ಬೇಕು ಅಂತೇನು ಇಲ್ಲ. ಸ್ವಲ್ಪ ತರಿತರಿಯಾಗಿ ರುಬ್ಬಿಕೊಂಡರೆ ಸಾಕು,ಇದು ಅನ್ನ/ಚಪಾತಿ/ಪೂರಿ ಎಲ್ಲಕ್ಕು ಚೆನ್ನಾಗಿರುತ್ತದೆ.

Roasted Gram salad / ಹುರಿಗಡಲೆ ಕೋಸುಂಬರಿ

0 comments

ಹುರಿಗಡಲೆ ಕೋಸುಂಬರಿ,:

ಹುರಿಗಡಲೆ/ಕಡ್ಲೆ/ಪುಟಾಣಿ
ಈರುಳ್ಳಿ
ಕ್ಯಾರೆಟ್ ತುರಿ
ಕಾಯಿತುರಿ
ಕಾರದ ಪುಡಿ
ಕೊತ್ತುಂಬರಿಸೊಪ್ಪು
ಉಪ್ಪು

ವಿಧಾನ:
ಸಣ್ಣಗೆ ಹೆಚ್ಚಿದ ಈರುಳ್ಳಿ, ತುರಿದ ಕ್ಯಾರೆಟ್, ಕೊತ್ತುಂಬರಿಸೊಪ್ಪು, ಉಪ್ಪು ಮತ್ತು ಕಾರದ ಪುಡಿ, ಕಾಯಿತುರಿ,ಕೊತ್ತುಂಬರಿಸೊಪ್ಪು ಮತ್ತು ಹುರಿಗಡಲೆ ಸೇರಿಸಿ ಎಲ್ಲವನ್ನು ಚೆನ್ನಾಗಿ ಬೆರೆಸಿ. ಇದು ದಿಡೀರ್ ತಯಾರಿಸುವ ಕೋಸುಂಬರಿ,ತಯಾರಿಸುವುದು ಸುಲಭ,ವೇಳೆ ಕೂಡ ಜಾಸ್ತಿ ತೆಗೆದುಕೊಳ್ಳುವುದಿಲ್ಲ.

*ಹುರಿಗಡಲೆ ಬಿಟ್ಟು ಎಲ್ಲ ಪದಾರ್ಥಗಳನ್ನು ಮೊದಲೇ ಬೆರೆಸಿಟ್ಟು ಕೊಂಡಿದ್ದು, ಬಡಿಸುವಾಗ ಹುರಿಗಡಲೆ ಸೇರಿಸಿ. ಮೊದಲೆ ಸೇರಿಸಿದರೆ ಕಡ್ಲೆ ಮೆತ್ತಗೆ ಆಗುತ್ತದೆ.

Bell Pepper bajji - ಮೆಣಸಿನಕಾಯಿ ಬಜ್ಜಿ:

0 comments

ಮೆಣಸಿನಕಾಯಿ ಬಜ್ಜಿ:

ಮೆಣಸಿನಕಾಯಿಗಳಲ್ಲಿ ಹಲವು ವಿಧ. ಅದರಲ್ಲಿ ತುಂಬಾ ಖಾರ ಇರುತ್ತವೆ ಕೆಲವು. ಬಜ್ಜಿ ಮೆಣಸಿನಕಾಯಿಗಳನ್ನು ಮಾತ್ರ ತನ್ನಿ.

ಬೇಕಾಗುವ ಸಾಮಗ್ರಿಗಳು:

ದಪ್ಪ/ದೊಣ್ಣೆ ಮೆಣಸಿನ ಕಾಯಿ
ಕಡ್ಲೆಹಿಟ್ಟು - ಒಂದು ಬಟ್ಟಲು
ಅಕ್ಕಿಹಿಟ್ಟು - ಎರಡು ಚಮಚ
ಓಮಕಾಳು - ಕಾಲು ಚಮಚ
ಚಿಟಿಕೆ ಸೋಡ
ಅಚ್ಚಖಾರದ ಪುಡಿ
ಉಪ್ಪು
ಕಾದ ಎಣ್ಣೆ - ಒಂದು ಚಮಚ
ಕಲೆಸಲು ಬೇಕಾಗುವಷ್ಟು ನೀರು
ಕರಿಯಲು ಎಣ್ಣೆ

ತಯಾರಿಸುವ ವಿಧಾನ:
* ದಪ್ಪಮೆಣಸಿನಕಾಯಿಗಳನ್ನು ಮಧ್ಯಕ್ಕೆ ಸೀಳಿ ಅಥವಾ ತುದಿಯನ್ನು ಕತ್ತರಿಸಿ. ಅದರೊಳಗೆ ಇರುವ ಬೀಜಗಳನ್ನು ತೆಗೆಯಿರಿ. ಉದ್ದಕ್ಕೆ ಕತ್ತರಿಸಿ. ನಾಲ್ಕು ಭಾಗ ಮಾಡಿ.
ಕಡ್ಲೆಹಿಟ್ಟು,ಅಕ್ಕಿಹಿಟ್ಟು,ಓಮಕಾಳು,ಉಪ್ಪು,ಅಚ್ಚಖಾರದ ಪುಡಿ ಮತ್ತು ಸೋಡ ಹಾಕಿ ಚೆನ್ನಾಗಿ ಬೆರೆಸಿ,ಅದಕ್ಕೆ ಕಾದಿರುವ ಎಣ್ಣೆ ಹಾಕಿ,ಜೊತೆಯಲ್ಲಿ ನೀರು ಹಾಕಿ,ಕಲೆಸಿಕೊಳ್ಳಿ,ಎಲ್ಲವನ್ನು ಚೆನ್ನಾಗಿ ಬೆರೆಸಿ ದೋಸೆ ಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ. ಎಣ್ಣೆಯನ್ನು ಕಾಯಲು ಇಟ್ಟು, ಅದು ಕಾದ ನಂತರ,ಹೆಚ್ಚಿರುವ ಮೆಣಸಿನಕಾಯಿಯನ್ನು ಕಲೆಸಿರುವ ಹಿಟ್ಟಿನಲ್ಲಿ ಅದ್ದಿ, ಕಾದಿರುವ ಎಣ್ಣೆಯಲ್ಲಿ ಅದನ್ನು ತೇಲಿಬಿಡಿ. ಅದು ಮೇಲೆ ಬಂದಾಗ ತಿರುವಿ ಹಾಕಿ,ಎರಡು ಬದಿಯೂ ಚೆನ್ನಾಗಿ ಬೇಯಿಸಿ. ಎಣ್ಣೆಯಿಂದ ತೆಗೆದು ಪೇಪರ್ ಟವಲ್ ಮೇಲೆ ಹಾಕಿ. ರುಚಿರುಚಿಯಾದ ಮೆಣಸಿನಕಾಯಿ ಬಜ್ಜಿ ತಯಾರ್. ಇದನ್ನು ಬಿಸಿಯಾಗಿ ತಿಂದರೆ ತುಂಬಾ ಚೆನ್ನಾಗಿ ಇರುತ್ತದೆ. ಬೇಕಾದರೆ ಚಟ್ನಿಯೊಂದಿಗೆ ಸರ್ವ್ ಮಾಡಬಹುದು.
ಊಟದೊಂದಿಗೆ ನೆಂಚಿಕೊಳ್ಳಲು /ಕಾಫಿ,ಟೀ ಜೊತೆಗೆ ಒಳ್ಳೆಯ ಕಾಂಬಿನೇಷನ್.
* ಒಂದೊಂದು ಮೆಣಸಿನಕಾಯಿ ಒಂದೊಂದು ಗಾತ್ರ ಬರುವುದರಿಂದ ನೋಡಿ ಕತ್ತರಿಸಿಕೊಳ್ಳಿ. ತುಂಬಾ ಪುಟ್ಟ ಪುಟ್ಟ ಮೆಣಸಿನಕಾಯಿಗಳು ಆದರೆ ಅವುಗಳನ್ನು ಬೀಜಗಳನ್ನು ಮತ್ರ ತೆಗೆದು, ಹಿಡಿಹಿಡಿಯಾಗಿ ಹಿಟ್ಟಿನಲ್ಲಿ ಅದ್ದಿ ಎಣ್ಣೆಗೆ ಹಾಕಿ. ಪುಟ್ಟ ಬಜ್ಜಿಗಳು ನೋಡಲು ಚೆನ್ನಾಗಿ ಕಾಣುತ್ತವೆ.

ಆಲೂಗೆಡ್ಡೆ ಪಲಾವ್

0 comments

ಆಲೂಗೆಡ್ಡೆ ಪಲಾವ್

ಸಾಮಗ್ರಿಗಳು:
ಈರುಳ್ಳಿ ಹೆಚ್ಚಿದ್ದು
ಹಸಿಮೆಣಸಿನಕಾಯಿ
ಶುಂಠಿ-ಬೆಳ್ಳುಳ್ಳಿ ಪೇಸ್ಟ್
ಜೀರಿಗೆ
ಅರಿಶಿಣದ ಪುಡಿ
ಚೆಕ್ಕೆ, ಲವಂಗ,ಏಲಕ್ಕಿ ಮತ್ತು ಪತ್ರೆ
ಕಾಯಿತುರಿ
ಅಕ್ಕಿ - ನೆನೆಸಿದ್ದು
ಕೊತ್ತುಂಬರಿ ಸೊಪ್ಪು
ನಿಂಬೆರಸ
ಉಪ್ಪು
ಎಣ್ಣೆ

ತಯಾರಿಸುವ ವಿಧಾನ:

ಕುಕ್ಕರ್ ಗೆ ಎಣ್ಣೆಯನ್ನು ಹಾಕಿ ಕಾದ ಮೇಲೆ ಜೀರಿಗೆ,ಚೆಕ್ಕೆ,ಲವಂಗ,ಪತ್ರೆ ಮತ್ತು ಏಲಕ್ಕಿ ಹಾಕಿ,ಕೆದಕಿ,ಈರುಳ್ಳಿಯನ್ನು ಮತ್ತು ಹಸಿಮೆಣಸಿನಕಾಯಿಯನ್ನು ಹಾಕಿ,ಈರುಳ್ಳಿ ಸ್ವಲ್ಪ ಕೆಂಪಾಗುವವರೆಗೂ ಬಾಡಿಸಿ,ಶುಂಠಿ,ಬೆಳ್ಳುಳ್ಳಿ ಪೇಸ್ಟ್ ಮತ್ತು ಆಲೂಗೆಡ್ಡೆಯನ್ನು ಹಾಕಿ,ಅದನ್ನು ಒಂದೆರಡು ನಿಮಿಷ ಹುರಿದು,ಅದಕ್ಕೆ ಅರಿಶಿಣ, ಉಪ್ಪು, ಕಾಯಿತುರಿ ಮತ್ತು ನೀರನ್ನು ಹಾಕಿ,ನೆನೆಸಿದ ಅಕ್ಕಿಯನ್ನು ಹಾಕಿ,ನಿಂಬೆರಸ ಮತ್ತು ಕೊತ್ತುಂಬರಿ ಸೊಪ್ಪು ಹಾಕಿ,ಚೆನ್ನಾಗಿ ಬೆರೆಸಿ, ಮುಚ್ಚಿಟ್ಟು ಒಂದು ವಿಷ್ಹಲ್ ಕೂಗಿಸಿ ಒಲೆಯಿಂದ ಇಳಿಸಿ.ಮತ್ತೆ ಸ್ವಲ್ಪ ಕೊತ್ತುಂಬರಿ ಸೊಪ್ಪಿನಿಂದ ಅಲಂಕರಿಸಿ.ಮೊಸರಿನ ರಾಯತದೊಂದಿಗೆ ಬಡಿಸಿ ಮತ್ತು ತರಕಾರಿ ಸಲಾಡ್ ಜೊತೆ ಸರ್ವ್ ಮಾಡಿ.

Vangibhat - ವಾಂಗೀಭಾತ್:

0 comments

ವಾಂಗೀಭಾತ್:

ಸಾಮಗ್ರಿಗಳು:ಬದನೆಕಾಯಿ
ಅನ್ನ- ಎರಡು ಬಟ್ಟಲು
ಉದ್ದಕ್ಕೆ ಹೆಚ್ಚಿದ ಈರುಳ್ಳಿ
ಒಣಮೆಣಸಿನಕಾಯಿ-ರುಚಿಗೆ
ಧನಿಯ-ಎರಡು ಚಮಚ
ಮೆಣಸು-ಸ್ವಲ್ಪ
ಕಡ್ಲೆಬೇಳೆ-ಒಂದು ಚಮಚ
ಉದ್ದಿನಬೇಳೆ-ಅರ್ಧ ಚಮಚ
ಇಂಗು ಸ್ವಲ್ಪ,ಅರಿಶಿನ
ಎಣ್ಣೆ, ಸಾಸಿವೆ
ಕರಿಬೇವು,ಇಂಗು ಚಿಟಿಕೆ
ಚೆಕ್ಕೆ,ಲವಂಗ,ಪತ್ರೆ,ಏಲಕ್ಕಿ
ಉಪ್ಪು ರುಚಿಗೆ
ಹುಣಸೇರಸ -ಅರ್ಧಚಮಚ
ಕಾಯಿತುರಿ ಮತ್ತು ಕೊಬ್ಬರಿ ಸ್ವಲ್ಪ
ಕೊತ್ತುಂಬರಿ ಸೊಪ್ಪು

ತಯಾರಿಸುವ ವಿಧಾನ:

ಮೊದಲು ಉದುರುಉದುರಾಗಿ ಅನ್ನ ಮಾಡಿಟ್ಟಿರುವುದಕ್ಕೆ ಸ್ವಲ್ಪ ಎಣ್ಣೆ ಹಾಕಿ ಬೆರೆಸಿ,ತಣ್ಣಗಾಗಲು ಬಿಡಿ.
ಒಣಮೆಣಸಿನಕಾಯಿ,ಧನಿಯ,ಮೆಣಸು,ಕಡ್ಲೆಬೇಳೆ,ಉದ್ದಿನಬೇಳೆ ಎಲ್ಲವನ್ನು ಹುರಿದುಕೊಂಡು ಇಂಗು ಮತ್ತು ಕೊಬ್ಬರಿ ತುರಿಯೊಂದಿಗೆ ಸೇರಿಸಿ ಪುಡಿ ಮಾಡಿಟ್ಟುಕೊಳ್ಳಿ.
ಬದನೆಕಾಯಿ ಹೆಚ್ಚಿಕೊಂಡು ಉಪ್ಪು ನೀರಿಗೆ ಹಾಕಿಡಿ.
ಒಂದು ಪಾತ್ರೆಗೆ ಸಾಕಾಷ್ಟು ಎಣ್ಣೆ ಹಾಕಿ,ಅದಕ್ಕೆ ಚೆಕ್ಕೆ,ಲವಂಗ,ಪತ್ರೆ,ಏಲಕ್ಕಿ,ಕರಿಬೇವು,ಇಂಗು ಎಲ್ಲವನ್ನು ಹಾಕಿ ಒಂದು ನಿಮಿಷ ಹುರಿಯಿರಿ.ಈರುಳ್ಳಿಯನ್ನು ಹಾಕಿ,ಒಂದೆರಡು ನಿಮಿಷ ಹುರಿದು,ನಂತರ ಅದಕ್ಕೆ ಬದನೆಕಾಯಿ ಹಾಕಿ,ಅದರಲ್ಲಿಯೇ ಹುರಿಯಿರಿ,ಎಲ್ಲಾ ಬದನೆಕಾಯಿ ಹೋಳುಗಳು ಚೆನ್ನಾಗಿ ಫ್ರೈ ಮಾಡಿಕೊಂಡು,ಅದು ಬೆಂದಿದೆ ಎನಿಸಿದ ಮೇಲೆ,ಅದಕ್ಕೆ ಅರಿಶಿನ,ಹುರಿದು ಪುಡಿ ಮಾಡಿದ ಮಸಾಲೆಯನ್ನು ಮತ್ತು ಹುಣಸೇರಸ ಹಾಕಿ,ಬಾಡಿಸಿ.ಉಪ್ಪು ಹಾಕಿ. ನೀರು ಹಾಕಬಾರದು. ಎಲ್ಲ ಮಸಾಲೆ ಚೆನ್ನಾಗಿ ಬೆರೆಯುವಂತೆ ಕೆದಕುತ್ತಿರಿ. ನಂತರ ಅದನ್ನು ಇಳಿಸಿ. ಎಷ್ಟು ಬೇಕೋ ಅಷ್ಟು ಮಾತ್ರ ಮಸಾಲೆ ತೆಗೆದುಕೊಂಡು ಅನ್ನಕ್ಕೆ ಹಾಕಿ,ಚೆನ್ನಾಗಿ ಕಲೆಸಿ,ಕಾಯಿತುರಿ ಮತ್ತು ಕೊತ್ತುಂಬರಿಸೊಪ್ಪು ಸಹ ಹಾಕಿ ಎಲ್ಲವೂ ಸರಿಯಾಗಿ ಬೆರೆಯುವಂತೆ ಕಲೆಸಿ. ವಾಂಗೀಭಾತ್ ತಯಾರಾಗುತ್ತದೆ. ಇದನ್ನು ರಾಯಿತ/ಚಟ್ನಿ ಜೊತೆ ಸರ್ವ್ ಮಾಡಿ.

* ಬದನೆಕಾಯಿ ಬೇಯಲು ನೀರು ಹಾಕಬಾರದು.
* ಒಗ್ಗರಣೆಗೆ ಎಣ್ಣೆ ಜಾಸ್ತಿ ಹಾಕಿ, ಅದರಲ್ಲಿಯೇ ಬದನೆ ಬೇಯುತ್ತದೆ.
* ಕಲೆಸುವಾಗ ಉಪ್ಪು-ಕಾರ ನೋಡಿಕೊಳ್ಳಿ.
* ತಕ್ಷಣ ತಿನ್ನುವುದಕ್ಕಿಂತ ಸ್ವಲ್ಪ ಹೊತ್ತಿನ ಬಳಿಕ ತಿಂದರೆ ಹೆಚ್ಚು ರುಚಿಯಾಗಿರುತ್ತದೆ. ಇದನ್ನು ತಿಂಡಿ/ಊಟ ಯಾವುದಕ್ಕಾದರೂ ಬಳಸಬಹುದು.
* ವಾಂಗೀಭಾತ್ ಮಸಾಲೆ ಎಷ್ಟು ಬೇಕೋ ಅಷ್ಟು ಮಾತ್ರ ಕಲೆಸಿ,ಮಿಕ್ಕಿದ್ದು ಎತ್ತಿಡಬಹುದು. ಯಾವಾಗ ಬೇಕಾದರೂ ಉಪಯೋಗಿಸಬಹುದು.

Gulab Jamun - ಗುಲಾಬ್ ಜಾಮೂನು

0 comments

"ಜಾಮೂನು" ಎಂದರೆ ಎಲ್ಲರಿಗೂ ಇಷ್ಟವಾಗುವ ಸಿಹಿ. ಏನೇ ಪಾರ್ಟಿಗಳನ್ನು ಮಾಡುವಾಗ ಏನು ಸ್ವೀಟ್ ಮಾಡೋದು ಅಂತ ಯೋಚಿಸುವಾಗ ಮೊದಲು ತಲೆಗೆ ಹೊಳೆಯುವುದು ಜಾಮೂನು. ಹೀಗೆ ಇದಕ್ಕೆ ಸಿಹಿಗಳಲ್ಲೆ ಮೊದಲ ಸ್ಥಾನ ಎನಿಸುತ್ತೆ. ಜಾಮೂನುಗಳನ್ನು ವಿವಿಧ ರೀತಿಯಾಗಿ ತಯಾರಿಸುತ್ತೇವೆ. ರೆಡಿಮೇಡ್ ಕಂಪನಿಗಳಂತೂ ಸುಮಾರು ಬಂದಿದೆ ಈಗ. ನಾವು ಚಿಕ್ಕವರಿದ್ದಾಗ ಒಂದೆರಡು ಮಾತ್ರ ಹೆಸರಾಂತ ಬ್ರಾಂಡ್ ಮಾತ್ರ ಇತ್ತು. ಆಗ ನಮ್ಮಮ್ಮ ಮಾಡುತ್ತಿದ್ದ ಜಾಮೂನ್ ಈಗಲೂ ನಾನು ಜಾಮೂನು ತಯಾರಿಸುವಾಗಲೆಲ್ಲ ನೆನಪು ಬರುತ್ತದೆ. ಅದೊಂಥರ ಚೆನ್ನ ಆಗ. ಜಾಮೂನು ನೆನೆದ ತಕ್ಷಣ ತಿನ್ನುವ ಆಸೆ, ಕಾಯುತ್ತಿದ್ದೆವು. ಇವರ ಮನೇಲಿ ಜಾಮೂನು ಇವತ್ತು ಅಂತ ಗೊತ್ತಾಗುತ್ತಿತ್ತು ಆಗ. ಅಷ್ಟು ಜಾಮೂನಿನ ಸುವಾಸನೆ ಮನೆಯೆಲ್ಲಾ ಹರಡಿರುತ್ತಿತ್ತು. ಅಮ್ಮ ರಾತ್ರಿ ಜಾಮೂನು ಮಾಡಿಟ್ಟರೆ, ಬೆಳಗ್ಗೆ ಯಾವಾಗಾಗುತ್ತೋ ಅಂತ ಆಸೆ.ಅಮ್ಮ ಬೌಲ್ ನಲ್ಲಿ ಜಾಮೂನುಗಳನ್ನು ಹಾಕಿ ಕೊಟ್ಟಾಗ ಅದನ್ನು ತಿನ್ನುವಾಗಿನ ಖುಷಿನೇ ಒಂದು ತರಹ, ಅದೆಲ್ಲ ಈಗ ಎಲ್ಲ ನೆನಪು ಅಷ್ಟೇ. ಈಗ ಇಲ್ಲಿ ಜಾಮೂನು ಪ್ಯಾಕೆಟ್ ತಂದು ತಯಾರಿಸುವ ಬದಲು ಮನೆಯಲ್ಲಿಯೇ ಜಾಮೂನು ಮಾಡುವ ಬಗೆ ಇದೆ. ನೀವು ತಯಾರಿಸಿ.


ಗುಲಾಬ್ ಜಾಮೂನು:
ಬೇಕಾಗುವ ಸಾಮಗ್ರಿಗಳು:

ಮೈದಾಹಿಟ್ಟು - ಮೂರು ದೊಡ್ಡ ಚಮಚ
ಕೋವಾ - ಒಂದು ಬಟ್ಟಲು
ಮಿಲ್ಕ್ ಪೌಡರ್ - ಎರಡು ದೊಡ್ಡ ಚಮಚ
ಚಿಟಿಕೆ ಅಡಿಗೆ ಸೋಡ

ಸಕ್ಕರೆ ಪಾಕಕ್ಕೆ:
ಸಕ್ಕರೆ - ಐದು ಕಪ್
ಏಲಕ್ಕಿ ಪುಡಿ
ಗುಲಾಬಿ ನೀರು - ಅರ್ಧ ಚಮಚ
ಕೇಸರಿ ದಳಗಳು ಸ್ವಲ್ಪ

ಎಣ್ಣೆ ಅಥವಾ ತುಪ್ಪ ಕರಿಯಲು

ಸಕ್ಕರೆ ಪಾಕ ತಯಾರಿಸುವ ವಿಧಾನ:

ಸಕ್ಕರೆಯನ್ನು ಒಂದು ಅಗಲವಾದ ಪಾತ್ರೆಯಲ್ಲಿ ಹಾಕಿ, ಎರಡು ಕಪ್ ನೀರು ಹಾಕಿ,ಚೆನ್ನಾಗಿ ಕುದಿಸಿ,ಅದು ಸಕ್ಕರೆ ಕರಗಿ ಎಳೆಪಾಕ ಬರುವವರೆಗೂ ಕುದಿಸಿ ಅಥವಾ ಹತ್ತು ನಿಮಿಷ ಕುದಿಸಿ. ತುಂಬಾ ಗಟ್ಟಿಯಾಗಿರಬಾರದು ಪಾಕ. ಸರಿಯಾಗಿ ನೋಡಿಕೊಂಡು ಪಾಕ ಇಳಿಸಿ. ಏಲಕ್ಕಿಪುಡಿ,ಮಿಕ್ಕಿರುವ ಕೇಸರಿ ಮತ್ತು ಗುಲಾಬಿ ನೀರು ಹಾಕಿ ಪಾಕಕ್ಕೆ ಹಾಕಿ ಬೆರೆಸಿಡಿ.ಸಕ್ಕರೆಪಾಕ ತಯಾರಾಯಿತು,ಇದು ಸ್ವಲ್ಪ ಬಿಸಿಯಾಗಿಯೇ ಇರಲಿ.

• ಮಿಲ್ಕ್ ಪೌಡರ್ ಮತ್ತು ಕೋವಾ ಎರಡನ್ನು ಸೇರಿಸಿ,ಚೆನ್ನಾಗಿ ಮಸೆಯಿರಿ/ ಕೈನಲ್ಲಿ ನಾದಿಕೊಳ್ಳಿ. ಇದಕ್ಕೆ ಮೈದಾಹಿಟ್ಟು,ಚೂರು ಕೇಸರಿ ದಳಗಳು, ಸೋಡಾ ಮತ್ತು ಚಿಟಿಕೆ ಏಲಕ್ಕಿ ಪುಡಿ ಹಾಕಿ. ಚೆನ್ನಾಗಿ ಬೆರೆಸಿ,ಸ್ವಲ್ಪ ನೀರು ಹಾಕಿ ಮೃದುವಾಗಿ ಹಿಟ್ಟಿನಂತೆ ಕಲೆಸಿಕೊಳ್ಳಿ. ಇದನ್ನು ತುಂಬಾ ಗಟ್ಟಿಯಾಗಿ ನಾದಿಕೊಳ್ಳಬೇಡಿ. ಸರಿಯಾಗಿ ಗಂಟಿಲ್ಲದಂತೆ ಕಲೆಸಿ,ಹತ್ತರಿಂದ-ಹದಿನೈದು ನಿಮಿಷ ನೆನೆಯಲು ಬಿಡಿ.
• ನಂತರ ಕಲೆಸಿದ ಹಿಟ್ಟಿನಿಂದ ಚಿಕ್ಕ ಚಿಕ್ಕ ಗೋಲಿ ಗಾತ್ರದಲ್ಲಿ ಉಂಡೆ ಮಾಡಿಕೊಂಡು,ಅದನ್ನು ಅಂಗೈನಲ್ಲಿ ಇಟ್ಟುಕೊಂಡು ಮೆತ್ತಗೆ ಅದುಮಿ ಉಂಡೆ ಮಾಡಿಕೊಳ್ಳಿ.


• ಈ ರೀತಿ ಮಾಡಿಕೊಂಡ ಉಂಡೆಗಳನ್ನು ಎಣ್ಣೆ ಅಥವಾ ತುಪ್ಪದಲ್ಲಿ ಕರಿಯಿರಿ. ತುಂಬಾ ಎಚ್ಚರಿಕೆಯಿಂದ ಕರಿಯಬೇಕು. ಎಣ್ಣೆ ತುಂಬಾ ಕಾಯಿಸಿದರೆ / ಕಾಯಿಸಿದೇ ಇದ್ದರೆ ಕೂಡ ಜಾಮೂನು ಚೆನ್ನಾಗಿ ಬರುವುದಿಲ್ಲ. ಆದ್ದರಿಂದ ಎಣ್ಣೆಯನ್ನು ಕಾಯಿಸಿ, ಮಧ್ಯಮ ಉರಿಯಲ್ಲಿ ಎಣ್ಣೆಯನ್ನು ಇಟ್ಟು ಅದರಲ್ಲಿ ಉಂಡೆಗಳನ್ನು ಅದರಲ್ಲಿ ಹಾಕಿ,ತೆಳು ಕಂದು ಬಣ್ಣ ಅಥವಾ ಹೊಂಬಣ್ಣ ಬರುವವರೆಗೂ ಕರಿಯಿರಿ.
• ತಕ್ಷಣವೇ ಕರಿದಿರುವ ಜಾಮೂನುಗಳನ್ನು ಮೊದಲೇ ತಯಾರಿಸಿ ಇಟ್ಟುಕೊಂಡಿರುವ ಬಿಸಿ ಸಕ್ಕರೆ ಪಾಕದಲ್ಲಿ ಹಾಕಿಡಿ. ಅದನ್ನು ಕಲಕಬೇಡಿ. ಸುಮಾರು ಒಂದು ಗಂಟೆಯಾದರೂ ನೆನೆಯಲು ಬಿಡಿ. ಅಥವಾ ರಾತ್ರಿ ಮಾಡಿಟ್ಟು ಮಾರನೇದಿನ ಉಪಯೋಗಿಸಿದರೆ ಇನ್ನೂ ಚೆನ್ನಾಗಿರುತ್ತದೆ.

* ಮಕ್ಕಳಿಂದ-ಮುದುಕರವರೆಗೆ ಇಷ್ಟವಾಗುವ ಜಾಮೂನು ತಯಾರಾಗುತ್ತದೆ.
• ಜಾಮೂನುಗಳನ್ನು ಸಕ್ಕರೆ ಪಾಕ ಸ್ವಲ್ಪ ಹಾಕಿ ತಿನ್ನಲು ನೀಡಿ,ಈ ಜಾಮೂನು ಅನ್ನು ಬಿಸಿ ಅಥವ ತಣ್ಣಗೆ ಕೂಡ ಸೇವಿಸಬಹುದು.
• ಇನ್ನೂ ಹೆಚ್ಚಿನ ರುಚಿ ಬೇಕೆನಿಸಿದವರೂ ಜಾಮೂನು ಜೊತೆ ಐಸ್ ಕ್ರೀಮ್ ಅಥವಾ ರೆಡಿಮೇಡ್ ಕ್ರೀಮ್ ಸಹ ಹಾಕಿ ಕೊಡಬಹುದು.

ಚಕ್ಕುಲಿ / Chakkuli / Chakli

0 comments

ಚಕ್ಕುಲಿ:

ಬೇಕಾಗುವ ಸಾಮಗ್ರಿಗಳು:
ಅಕ್ಕಿಹಿಟ್ಟು- ಎರಡು ಬಟ್ಟಲು
ಕಡ್ಲೆಹಿಟ್ಟು - ಅರ್ಧ ಬಟ್ಟಲು
ಅಚ್ಚಕಾರದ ಪುಡಿ - ಎರಡು ಚಮಚ
ಜೀರಿಗೆ ಸ್ವಲ್ಪ
ಇಂಗು ಚಿಟಿಕೆ
ಎಳ್ಳು ಸ್ವಲ್ಪ
ಉಪ್ಪು ರುಚಿಗೆ
ಬೆಣ್ಣೆ - ಎರಡು ದೊಡ್ಡ ಚಮಚ
ಎಣ್ಣೆ ಕರಿಯಲು

ತಯಾರಿಸುವ ವಿಧಾನ:

ಅಕ್ಕಿಹಿಟ್ಟು,ಕಡ್ಲೆಹಿಟ್ಟು,ಕಾರದಪುಡಿ,ಜೀರಿಗೆ,ಎಳ್ಳು,ಇಂಗು,ಉಪ್ಪು ಎಲ್ಲಾ ಚೆನ್ನಾಗಿ ಬೆರೆಸಿ, ಅದಕ್ಕೆ ಬೆಣ್ಣೆಯನ್ನು ಮತ್ತು ನೀರನ್ನು ಹಾಕಿ ಕಲೆಸಿ, ಚಪಾತಿ ಹಿಟ್ಟಿನ ಹದಕ್ಕಿಂತ ಸ್ವಲ್ಪ ಗಟ್ಟಿಯಿರಲಿ. ಚೆನ್ನಾಗಿ ನಾದಿ, ಹದವಾಗಿ ಕಲೆಸಿ.


ಚಕ್ಕುಲಿಯ ಒರಳಿಗೆ ಹಿಟ್ಟನ್ನು ತುಂಬಿ ಚಕ್ಕುಲಿಯನ್ನು ತಯಾರಿಸಿ.

ಕಾದ ಎಣ್ಣೆಗೆ ಒಂದೊಂದಾಗಿ ಹಾಕಿ, ಅದಾಗೆ ಮೇಲೆ ಬರುತ್ತದೆ. ಮಧ್ಯ ಉರಿಯಲ್ಲಿಡಿ, ಎಣ್ಣೆ ಚೆನ್ನಾಗಿ ಕಾದಿರಬೇಕು. ನಂತರ ತಿರುವಿ ಹಾಕಿ, ಬಂಗಾರದ ಅಥವಾ ಚಕ್ಕುಲಿಯ ಬಣ್ಣ ಬಂದ ತಕ್ಷಣ ತೆಗೆಯಿರಿ.


ತಣ್ಣಗಾಗಲು ಬಿಟ್ಟು , ಆಮೇಲೆ ಗಾಳಿಯಾಡದ ಡಬ್ಬದಲ್ಲಿ ತುಂಬಿ, ಯಾವ ಕಾಲದಲ್ಲಿಯಾದರೂ ಚಕ್ಕುಲಿ ರುಚಿ ಚೆನ್ನ. ಸಂಜೆ ಕಾಫಿಗೆ/ಕುರುಕು ತಿನ್ನಲು/ಅಥಿತಿಗಳು ಬಂದಾಗ ಉಪಯೋಗಿಸಬಹುದು.

Bread Custard Pudding -ಬ್ರೆಡ್ ಕಸ್ಟರ್ಡ್ ಪುಡ್ಡಿಂಗ್:

0 comments


ಬ್ರೆಡ್ ಕಸ್ಟರ್ಡ್ ಪುಡ್ಡಿಂಗ್:

ಸಾಮಗ್ರಿಗಳು:
ಬ್ರೆಡ್ - 5-6
ಸಕ್ಕರೆ ರುಚಿಗೆ - ಕಾಲು ಕಪ್
ಕಸ್ಟರ್ಡ್ ಪೌಡರ್ - ಎರಡು ದೊಡ್ಡ ಚಮಚ
ಹಾಲು ಅಗತ್ಯವಿದ್ದಷ್ಟು- ಅರ್ಧ ಲೀಟರ್
ಏಲಕ್ಕಿ ಪುಡಿ
ತುಪ್ಪ ಕರಿಯಲು
ಗುಲಾಬಿ ನೀರು (ರೋಸ್ ವಾಟರ್)
ದ್ರಾಕ್ಷಿ ಮತ್ತು ಗೋಡಂಬಿ

ತಯಾರಿಸುವ ವಿಧಾನ:


ಮೊದಲು ಬ್ರೆಡ್ ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿಕೊಂಡು, ತುಪ್ಪದಲ್ಲಿ ಹೊಂಬಣ್ಣ ಬರುವವರೆಗೂ ಅಥವಾ ಗರಿಗರಿಯಾಗುವಂತೆ ಕರಿದಿಟ್ಟುಕೊಳ್ಳಿ.
ನಂತರ ಹಾಲನ್ನು ಕಾಯಲು ಇಟ್ಟು,ಅದು ಕುದಿಯುವ ಹಂತಕ್ಕೆ ಬಂದಾಗ ಸಕ್ಕರೆಯನ್ನು ಹಾಕಿ ಬೆರೆಸಿ. ಆಮೇಲೆ ಕಸ್ಟರ್ಡ್ ಪೌಡರ್ ಅನ್ನು ಸ್ವಲ್ಪ ಹಾಲಿನಲ್ಲಿ ಗಂಟಿಲ್ಲದಂತೆ ಕಲೆಸಿ,ಈ ಮಿಶ್ರಣವನ್ನು ಕುದಿಯುತ್ತಿರುವ ಹಾಲಿಗೆ ಹಾಕಿ,ಕೈ ಬಿಡದೇ ತಿರುಗಿಸುತ್ತಿರಿ,ತಳ ಹತ್ತುತ್ತದೆ. ಆಗಾಗಿ ಸರಿಯಾಗಿ ಎಲ್ಲಾ ಮಿಶ್ರಣವೂ ಚೆನ್ನಾಗಿ ಬೆರೆಯುವಂತೆ ಎರಡು ಅಥವಾ ಮೂರು ನಿಮಿಷಗಳವರೆಗೆ / ಸ್ವಲ್ಪ ಗಟ್ಟಿಯಾಗುವವರೆಗೆ ತಿರುಗಿಸುತ್ತಲೇ ಇರಬೇಕು. ಅದು ಸರಿಯಾಗಿದೆ ಎನಿಸಿದ ತಕ್ಷಣ ಕೆಳಗಿಳಿಸಿ,ಅದಕ್ಕೆ ಏಲಕ್ಕಿ ಪುಡಿ ಮತ್ತು ಗುಲಾಬಿನೀರು ಹಾಕಿ ಬೆರೆಸಿ.
ಕರಿದಿರುವ ಬ್ರೆಡ್ ಅನ್ನು ಅಗಲವಾದ ತಟ್ಟೆ / ಪಾತ್ರೆಗೆ ಜೋಡಿಸಿ, ಅದರ ಮೇಲೆ ಹಾಲು ಮತ್ತು ಕಸ್ಟರ್ಡ್ ಮಿಶ್ರಣವನ್ನು ಸುರಿಯಿರಿ, ಎಲ್ಲಾ ಬ್ರೆಡ್ ಮೇಲೆ ಸಮನಾಗಿ ಬರುವಂತೆ ಹಾಕಿ, ಅದರ ಮೇಲೆ ತುಪ್ಪದಲ್ಲಿ ಕರಿದ ದ್ರಾಕ್ಷಿ ಮತ್ತು ಗೋಡಂಬಿಯನ್ನು ಹಾಕಿ ಅಲಂಕರಿಸಿ,ಅರ್ಧ/ಒಂದು ಗಂಟೆ ಬಿಟ್ಟು ತಿನ್ನಲು ಕೊಡಿ. ಅಷ್ಟರಲ್ಲಿ ಅದು ಚೆನ್ನಾಗಿ ನೆಂದಿರುತ್ತದೆ. ಬಿಸಿಯಾಗಿಯೂ ಕೊಡಬಹುದು. ಆದರೆ ಇನ್ನೂ ಬ್ರೆಡ್ ನೆಂದಿರುವುದಿಲ್ಲ. ನೆನೆದರೆ ತುಂಬಾ ರುಚಿಯಾಗಿರುತ್ತದೆ. ಈ ಪುಡ್ಡಿಂಗ್ ಮಕ್ಕಳಿಗೆ ತುಂಬ ಪ್ರಿಯವಾಗುತ್ತದೆ. ಸದ್ದಿಲ್ಲದೇ ಇಷ್ಟಪಟ್ಟು ತಿನ್ನುತ್ತಾರೆ.
* ತುಪ್ಪ ತುಂಬಾ ಜಾಸ್ತಿಯಾಯ್ತು ಎನ್ನುವವರು, ಎಣ್ಣೆಯಲ್ಲಿ ಬ್ರೆಡ್ ಕರಿಯಬಹುದು.
* ಅದು ಹೆವಿ ಅಂದರೆ ತುಪ್ಪದಲ್ಲಿ ತವಾ ಮೇಲೆ ಫ್ರೈ ಮಾಡಿಕೊಳ್ಳಬಹುದು. ಆದರೆ ಇದು ಸ್ವಲ್ಪ ರುಚಿ ಕಮ್ಮಿಯಾಗುತ್ತದೆ. ಅಷ್ಟೇನು ಚೆನ್ನಾಗಿ ಬರಲ್ಲ.ok,ಪರವಾಗಿಲ್ಲ.

Fenugreek dosa/ Menthe dose-ಮೆಂತ್ಯದ ದೋಸೆ

0 comments


ಮೆಂತ್ಯದ ದೋಸೆ:

ಸಾಮಗ್ರಿಗಳು:
ಅಕ್ಕಿ - ಒಂದು ಕಪ್
ಮೆಂತ್ಯ - ಎರಡು ದೊಡ್ಡ ಚಮಚ
ಚಿಟಿಕೆ ಉಪ್ಪು
ಚಿಟಿಕೆ ಸೋಡ

ವಿಧಾನ;
ಅಕ್ಕಿ ಮತ್ತು ಮೆಂತ್ಯೆಯನ್ನು ಮೂರ್ನಾಲ್ಕು ಗಂಟೆ ನೆನೆಸಿ, ಅದನ್ನು ಮೆಂತ್ಯದೊಂದಿಗೆ ರುಬ್ಬಿಕೊಳ್ಳಿ. ಉಪ್ಪು ಮತ್ತು ಸೋಡ ಸೇರಿಸಿ, ಚೆನ್ನಾಗಿ ಬೆರೆಸಿ ಅರ್ಧ ಗಂಟೆ ಬಿಟ್ಟು ತವಾ ಒಲೆಯ ಮೇಲಿಟ್ಟು, ಕಾಯಿಸಿ, ತುಪ್ಪ / ಎಣ್ಣೆ ಹಾಕಿ ಸವರಿ, ಅದರ ಮೇಲೆ ಒಂದು ಸೌಟು ರುಬ್ಬಿದ ಮಿಶ್ರಣವನ್ನು ಹಾಕಿ ದೋಸೆಯಂತೆ ಮಾಡಿ, ಬೇಯಿಸಿ , ತೆಗೆಯಿರಿ. ತುಪ್ಪ ಹಾಕಿ ತಿನ್ನಲು ಕೊಡಿ. ಇದು ತಿನ್ನಲು ರುಚಿಯಾಗಿರುತ್ತದೆ. ಮೆಂತ್ಯದ ಪರಿಮಳ ತುಂಬಾ ಚೆನ್ನಾಗಿರುತ್ತದೆ. ಇದಕ್ಕೆ ತೆಂಗಿನಕಾಯಿ ಅಥವ ಯಾವ ಚಟ್ನಿಯ ಜೊತೆಗಾದರು ತಿನ್ನಲು ನೀಡಬಹುದು.
* ಇದು ಸಕ್ಕರೆ ಖಾಯಿಲೆಯವರಿಗೆ ತುಂಬಾ ಉಪಯುಕ್ತ.
* ಮೆಂತ್ಯೆಯನ್ನು ಇನ್ನು ಜಾಸ್ತಿ ಸೇರಿಸಿಕೊಳ್ಳಬಹುದು.

Tamarind Chitranna - ಹುಳಿ ಚಿತ್ರಾನ್ನ

0 comments

ಹುಳಿ ಚಿತ್ರಾನ್ನ ತಯಾರಿಸಿದಂತೆ ತಯಾರಿಸಿ,ಹುರಿದು ಪುಡಿ ಮಾಡಿದ ಮಸಾಲೆ ಹಾಕಿ ತಯಾರಿಸುವುದು-ಈ ಚಿತ್ರಾನ್ನ. ಇದು ಎಲ್ಲಾ ಚಿತ್ರಾನ್ನಗಳಿಗಿಂತ ತುಂಬಾ ರುಚಿಯಾಗಿರುತ್ತದೆ. ಸ್ವಲ್ಪ ಜಾಸ್ತಿ ತಿಂದರೂ ಗೊತ್ತಾಗಲ್ಲ. ನನ್ನ ಅಜ್ಜಿ ತುಂಬಾ ಚೆನ್ನಾಗಿ ಮಾಡುತ್ತಿದ್ದರು ಇದನ್ನು.ಅಮ್ಮ ಸಹ. ಆಗಿನ ಕಾಲದ ರುಚಿಗಳು ಈಗ ಇಲ್ಲ.ಅವರು ಕಡ್ಲೆಕಾಯಿಬೀಜದ ಬದಲಿಗೆ ಕಡ್ಲೆಕಾಳು ಹಾಕುತ್ತಿದ್ದರು.ತಿನ್ನುವಾಗ ಕಡ್ಲೆಕಾಳು ಸಿಕ್ಕಿದಾಗ ಅದೊಂಥರ ತುಂಬಾ ರುಚಿಯಾಗಿರುತ್ತಿತ್ತು. ಅಜ್ಜಿ ಮತ್ತು ಅಮ್ಮನ ನೆನಪಿನೊಂದಿಗೆ ಈ ರೆಸಿಪಿ ಬರೆದಿರುವೆ.
ಮಸಾಲೆ ಹುಳಿ ಚಿತ್ರಾನ್ನ:

ಬೇಕಾಗುವ ಸಾಮಗ್ರಿಗಳು;
ಅನ್ನ- ಎರಡು ಬಟ್ಟಲು,
ಹುಣಸೇಹಣ್ಣಿನ ರಸ (ಟ್ಯಾಮರಿಂಡ್ ಪಲ್ಪ್)-ಒಂದು ದೊಡ್ಡ ಚಮಚ
ಹೆಚ್ಚಿದ ಈರುಳ್ಳಿ
ಹೆಚ್ಚಿದ ಹಸಿಮೆಣಸಿನಕಾಯಿ
ಒಣಮೆಣಸಿನಕಾಯಿ-ಎರಡು
ಎಣ್ಣೆ
ಸಾಸಿವೆ, ಜೀರಿಗೆ
ಕರಿಬೇವು, ಅರಿಶಿಣ
ಕಡ್ಲೆಬೇಳೆ,ಉದ್ದಿನಬೇಳೆ
ಕಡ್ಲೆಕಾಯಿ ಬೀಜ
ಉಪ್ಪು, ನಿಂಬೆರಸ
ಕೊತ್ತುಂಬರಿಸೊಪ್ಪು ,ಕಾಯಿತುರಿ

ಹುರಿದು ಪುಡಿ ಮಾಡಿಕೊಳ್ಳಲು ಪದಾರ್ಥಗಳು:

ಜೀರಿಗೆ - ಎರಡು ಚಮಚ
ಮೆಂತ್ಯ- ಅರ್ಧ ಚಮಚ
ಸಾಸಿವೆ- ಒಂದು ಚಮಚ
ಎಳ್ಳು- ಎರಡು ಚಮಚ

ಇದಿಷ್ಟನ್ನು ಎಣ್ಣೆ ಹಾಕದೆ ಸ್ವಲ್ಪ ಹುರಿದು ಪುಡಿ ಮಾಡಿಕೊಳ್ಳಿ. ಎಳ್ಳನ್ನು ತರಿತರಿಯಾಗಿ ಪುಡಿ ಮಾಡಿ.

ತಯಾರಿಸುವ ವಿಧಾನ:ಉದುರು ಉದುರಾಗಿ ಮಾಡಿಕೊಂಡಿರುವ ಅನ್ನವನ್ನು ಅಗಲವಾದ ಪಾತ್ರೆಗೆ ಹಾಕಿ,ತಣ್ಣಗಾಗಲು ಬಿಡಿ.
ಬೇರೆ ಪಾತ್ರೆಯಲ್ಲಿ ಎಣ್ಣೆ ಹಾಕಿ,ಕಡ್ಲೆಕಾಯಿಬೀಜಗಳನ್ನು ಹಾಕಿ,ಅದನ್ನು ಚೆನ್ನಾಗಿ ಹುರಿದು ತೆಗೆದಿಟ್ಟುಕೊಳ್ಳಿ. ಅದೇ ಎಣ್ಣೆಗೆ ಸಾಸಿವೆ, ಜೀರಿಗೆ, ಕರಿಬೇವು , ಕಡ್ಲೆಬೇಳೆ, ಉದ್ದಿನಬೇಳೆ, ಹಸಿಮೆಣಸಿನಕಾಯಿ ಮತ್ತು ಒಣಮೆಣಸಿನಕಾಯಿ ಹಾಕಿ, ಒಂದು ನಿಮಿಷ ಹುರಿದು,ಹೆಚ್ಚಿದ ಈರುಳ್ಳಿಯನ್ನು ಹಾಕಿ, ಅದು ಸ್ವಲ್ಪ ಬೆಂದಿದೆ ಎನಿಸಿದ ಮೇಲೆ,ಹುಣಸೇರಸ,ಅರಿಶಿಣ ಮತ್ತು ಉಪ್ಪು ಹಾಕಿ,ಮತ್ತೆ ಒಂದೆರಡು ನಿಮಿಷ ಬಾಡಿಸಿ. ಒಗ್ಗರಣೆಯನ್ನು ಕೆಳಗಿಳಿಸಿ,ಚೆನ್ನಾಗಿ ಬೆರೆಸಿ. ಈ ಒಗ್ಗರಣೆಯನ್ನು ಆರಿದ ಅನ್ನಕ್ಕೆ ಹಾಕಿ,ಅದರ ಜೊತೆ ಹುರಿದ ಕಡ್ಲೆಕಾಯಿ ಬೀಜಗಳನ್ನು ಹಾಕಿ,ಎಲ್ಲವೂ ಚೆನ್ನಾಗಿ ಬೆರೆತುಕೊಳ್ಳುವಂತೆ ಕಲೆಸಿ.ಕಾಯಿತುರಿ ಮತ್ತು ಕೊತ್ತುಂಬರಿಸೊಪ್ಪು ಸಹ ಹಾಕಿ ಬೆರೆಸಿ. ಇದೆಲ್ಲವನ್ನು ಕಲೆಸಿದ ಮೇಲೆ ಪುಡಿ ಮಾಡಿಟ್ಟು ಕೊಂಡಿರುವಂತ ಪದಾರ್ಥಗಳನ್ನು ಉದುರಿಸಿ, ಮತ್ತೆ ಚೆನ್ನಾಗಿ ಎಲ್ಲ ಕಡೆಯೂ ಬೆರೆಯುವಂತೆ ಕೈನಲ್ಲಿಯೇ ಚೆನ್ನಾಗಿ ಕಲೆಸಿಡಿ. ಇದನ್ನು ತಯಾರಿಸದ ತಕ್ಷಣವೇ ತಿನ್ನುವುದಕ್ಕಿಂತ ಸ್ವಲ್ಪ ಸಮಯದ ನಂತರ ತಿಂದರೆ ಒಂದು ರೀತಿ ರುಚಿ. ಒಗ್ಗರಣೆ ಒಂದೆರಡು ದಿನ ಚೆನ್ನಾಗಿ ಇರುತ್ತದೆ. ಯಾವಾಗ ಬೇಕಾದರು ಕಲೆಸಿಕೊಳ್ಳಬಹುದು. ರುಚಿಯಾದ ಮಸಾಲೆ ಹುಳಿ ಚಿತ್ರಾನ್ನ ತಯಾರಾಗುತ್ತದೆ.

Maddur Vada / ಮದ್ದೂರು ವಡೆ

0 comments

ಮದ್ದೂರು ವಡೆ:

"ಮದ್ದೂರು" ಬೆಂಗಳೂರು ಮತ್ತು ಮೈಸೂರು ಮಧ್ಯೆ ಬರುವಂತ ಒಂದು ಊರಿನ ಹೆಸರು. ಈ ಊರಿನಲ್ಲಿ ತಯಾರಿಸಿದಂತ ವಡೆ ಇದು. ಅದಕ್ಕೆ ಒಂದು ಪುಟ್ಟ ಕಥೆ ಇದೆ. ಅಂದು ವಿಧಿಯಿಲ್ಲದೇ ತಯಾರಿಸಿದಂತ ವಡೆಗೆ ಬಹಳ ಬೇಡಿಕೆ ಬಂತು ,ಆಗಾಗಿ ಅವತ್ತಿನಿಂದ ಇದು ಒಂದು ಹೋಟೆಲ್ ಮೆನುನಲ್ಲಿ ಸೇರಿಕೊಂಡಿತು. ಅದು ದಿನಕಳೆದಂತೆ ಈ ವಡೆ ಪ್ರಸ್ಧಿದ್ಧಿಯಾಯಿತೆಂತು ಹೀಗೆ ಎಲ್ಲೋ ಓದಿದ ನೆನಪು. ಕೊನೆಗೆ ಆ ವಡೆಗೆ ಮದ್ದೂರು ವಡೆ ಅಂತನೆ ನಾಮಕರಣವಾಗಿ, ಅದು ನಮ್ಮ ಕರ್ನಾಟಕದ ಎಲ್ಲರ ಮನೆ ಮಾತಾಯಿತು. ಮದ್ದೂರು ಊರನ್ನು ಹಾದು ಹೋಗುವಾಗ ಅಲ್ಲಿಯ ಮದ್ದೂರು ವಡೆಯ ಸವಿಯನ್ನು ಸಾಮಾನ್ಯವಾಗಿ ಎಲ್ಲರು ನೋಡಿರುತ್ತಾರೆ. ಅದಂತೂ ಈಗ ಸುಮಾರು ವರುಷಗಳಿಂದ ಎಲ್ಲಾ ಊರಿನ ಹೋಟೆಲ್ ಮತ್ತು ಮನೆಗಳಲ್ಲೂ ತಯಾರಿಸುವಂತ ವಡೆಯಾಗಿಬಿಟ್ಟಿದೆ. ಈ ಇತಿಹಾಸ ಇರುವ ಮದ್ದೂರು ವಡೆಯನ್ನು ನಮಗೆ ಬಂದ ರೀತಿಯಲ್ಲಿ ತಯಾರಿಸೋಣ.

ಬೇಕಾಗುವ ಸಾಮಗ್ರಿಗಳು:

ಒಂದು ಬಟ್ಟಲು ಅಕ್ಕಿಹಿಟ್ಟು
ಕಾಲು ಬಟ್ಟಲು ಚಿರೋಟಿ ರವೆ
ಕಾಲು ಬಟ್ಟಲು ಮೈದಾಹಿಟ್ಟು
ಎರಡು ಚಮಚ ಕಾಯಿಸಿದ ಎಣ್ಣೆ
ಸಣ್ಣಗೆ ಹೆಚ್ಚಿದ ಈರುಳ್ಳಿ
ಸಣ್ಣಗೆ ಹೆಚ್ಚಿದ ಹಸಿಮೆಣಸಿನಕಾಯಿ
ಕೊತ್ತುಂಬರಿಸೊಪ್ಪು
ಕರಿಬೇವು
ಉಪ್ಪು
ಎಣ್ಣೆ ಕರಿಯಲು

ತಯಾರಿಸುವ ವಿಧಾನ:

ಮೊದಲಿಗೆ ಅಕ್ಕಿಹಿಟ್ಟು,ಮೈದಾಹಿಟ್ಟು,ರವೆ ಮತ್ತು ಉಪ್ಪನ್ನು ಹಾಕಿ ಚೆನ್ನಾಗಿ ಬೆರೆಸಿ,ಈರುಳ್ಳಿ,ಹಸಿಮೆಣಸಿನಕಾಯಿ,ಕಾಯಿಸಿರುವ ಎಣ್ಣೆ,ಹೆಚ್ಚಿದ ಕೊತ್ತುಂಬರಿ ಮತ್ತು ಕರಿಬೇವಿನ ಸೊಪ್ಪುಗಳನ್ನು ಹಾಕಿ, ಸ್ವಲ್ಪ ನೀರು ನೋಡಿ ಹಾಕಿಕೊಂಡು ಗಟ್ಟಿಯಾಗಿ ಕಲೆಸಿಕೊಂಡು ಚಿಕ್ಕ, ಚಿಕ್ಕ ಉಂಡೆ ಮಾಡಿ,ಎಣ್ಣೆ ಸವರಿದ ಕವರ್ ಮೇಲೆ ಪುಟ್ಟ ಪೂರಿಯಂತೆ ತಟ್ಟಿ, ಕಾದಿರುವ ಎಣ್ಣೆಯಲ್ಲಿ ಹಾಕಿ,ಎರಡು ಕಡೆಯು ಬೇಯಿಸಿ,ಹೊಂಬಣ್ಣ ಬರುವವರೆಗೆ ಅಥವಾ ಬೆಂದಿದೆ ಎನಿಸಿದ ನಂತರ ತೆಗೆದು ಪೇಪರ್ ಟವಲ್ ಮೇಲೆ ಹಾಕಿ. ಇದು ಬಿಸಿಯಾಗಿಯೂ ತಿನ್ನಲು ಚೆನ್ನಾಗಿರುತ್ತದೆ. ತಣ್ಣಗಾದರೂ ಚೆನ್ನ. ಈ ವಡೆಯನ್ನು ಹಾಗೆಯೇ ತಿನ್ನಬಹುದು. ಆದರೂ ಕಾಯಿಚಟ್ನಿಯೊಂದಿಗೆ ತುಂಬಾನೇ ರುಚಿಯಾಗಿರುತ್ತದೆ.

* ಮದ್ದೂರುವಡೆಯನ್ನು ಸ್ವಲ್ಪ ದಪ್ಪ ತಟ್ಟಿಕೊಂಡು ಸಹ ತಯಾರಿಸಿ. ಉಪ್ಪು ಮತ್ತು ಕಾರ ನಿಮಗೆ ಸೇರಿದ್ದು.
* ಕೆಲವರು ತೆಳುವಾಗಿ ತಯಾರಿಸುತ್ತಾರೆ. ದಪ್ಪ,ತೆಳು,ದೊಡ್ಡದು,ಚಿಕ್ಕದು ಎಲ್ಲಾ ನಿಮಗೆ ಹೇಗೇ ಬೇಕೋ ಆಗೆ ತಯಾರಿಸಿಕೊಳ್ಳಬಹುದು. ಆದರೆ ಹೇಗೇ ತಯಾರಿಸಿದರೂ ಕಲೆಸುವ ಹದ ಮತ್ತು ಎಣ್ಣೆಯಲ್ಲಿ ಕರಿಯುವ ಹದ ತಿಳಿದುಕೊಂಡರೆ ವಡೆಗಳು ಚೆನ್ನಾಗಿ ಬರುತ್ತವೆ.
* ಈರುಳ್ಳಿಯನ್ನು ಹೆಚ್ಚಾಗಿ ಹಾಕಿ.ನೀರನ್ನು ನೋಡಿಕೊಂಡು ಹಾಕಿ,ಏಕೆಂದರೆ ಈರುಳ್ಳಿಯು ನೀರು ಬಿಡುತ್ತದೆ. ಒಂದೊಂದು ಸಾರಿ ಅದೇ ಸಾಕಾಗುತ್ತದೆ.
ರುಚಿಕರವಾದ ಮದ್ದೂರುವಡೆಯನ್ನು ತಯಾರಿಸುವಾಗ ಡಯಟಿಂಗ್ ಮಾಡಬೇಡಿ. ಈ ವಡೆಗಳು ಮೂರ್ನಾಲ್ಕು ದಿನಗಳು ಕೆಡದೆ ಚೆನ್ನಾಗಿ ಇರುತ್ತದೆ.ಈ ವಡೆಗಳು ಹೇಗೆ ತಯಾರಿಸಿದರು ರುಚಿ ಚೆನ್ನಾಗಿಯೇ ಇರುತ್ತವೆ.

Shankara Poli / ಖಾರದ ಶಂಕರ ಪೋಳಿ

0 comments

ಖಾರದ ಶಂಕರ ಪೋಳಿ:

ಸಾಮಗ್ರಿಗಳು:

ಮೈದಾಹಿಟ್ಟು - ಒಂದು ಬಟ್ಟಲು
ಅಚ್ಚಖಾರದ ಪುಡಿ ರುಚಿಗೆ /ಒಂದು ಟೀ ಚಮಚ
ಉಪ್ಪು ರುಚಿಗೆ

ವಿಧಾನ:

ಮೇಲೆ ತಿಳಿಸಿರುವ ಎಲ್ಲಾ ಸಾಮಗ್ರಿಗಳನ್ನು ನೀರು ಹಾಕಿಕೊಂಡು ಗಟ್ಟಿಯಾಗಿ ಪೂರಿ ಹಿಟ್ಟಿನ ಹದಕ್ಕೆ ಅಥವ ಅದಕ್ಕಿಂತ ಸ್ವಲ್ಪ ಗಟ್ಟಿಯಾಗಿ ಕಲೆಸಿ. ಇದನ್ನು ಹದಿನೈದು ನಿಮಿಷ ಮುಚ್ಚಿಡಿ. ನಂತರ ಹಿಟ್ಟಿನಿಂದ ಕಿತ್ತಳೆಗಾತ್ರದ ಉಂಡೆಯನ್ನು ತೆಗೆದುಕೊಂಡು ಅದನ್ನು ಚಪಾತಿಯಂತೆ ಮಣೆ ಮೇಲೆ ಲಟ್ಟಿಸಿ ಸ್ವಲ್ಪ ತೆಳುವಾಗಿರಲಿ. ಆಮೇಲೆ ಅದನ್ನು ಚಾಕು ಅಥವಾ ಕಟ್ಟರ್ ನಿಂದ ಡೈಮಂಡ್ ಆಕಾರಕ್ಕೆ ಕತ್ತರಿಸಿ. ಕಾದಿರುವ ಎಣ್ಣೆಯಲ್ಲಿ ಒಂದೊಂದಾಗಿ ತೆಗೆದು ಹಾಕಿ. ಬಾಣಲೆಗೆ ಎಷ್ಟು ಹಿಡಿಸುತ್ತದೋ ಅಷ್ಟು ಹಾಕಿ, ಅವೆಲ್ಲವೂ ಚೆನ್ನಾಗಿ ಬೆಂದು ಮೇಲೆ ತೇಲುತ್ತವೆ, ಮತ್ತೆ ತಿರುಗಿಸಿ, ತೆಳು ಕಂದು ಬಣ್ಣ ಬಂದ ನಂತರ ಬೇಗ ಎಲ್ಲವನ್ನು ತೆಗೆದು, ಎಣ್ಣೆ ಹೀರಿಕೊಳ್ಳಲು ಪೇಪರ್ ಟವಲ್ ಮೇಲೆ ಹಾಕಿ. ಅದೇ ರೀತಿ ಎಲ್ಲವನ್ನು ತಯಾರಿಸಿ. ತಣ್ಣಗಾಗಲು ಬಿಡಿ. ತಣ್ಣಗಾದ ಮೇಲೆ ಗಾಳಿಯಾಡದ ಡಬ್ಬಿಯಲ್ಲಿ ತುಂಬಿಡಿ. ಇದು ಯಾವಾಗ ಬೇಕಾದರು ತಿನ್ನಲು ರುಚಿಯಾಗಿರುತ್ತದೆ.

Cucumber Lassi-ಸೌತೆಕಾಯಿ ಲಸ್ಸಿ:

0 comments

ಸೌತೆಕಾಯಿ ಲಸ್ಸಿ:

ಸಾಮಗ್ರಿಗಳು;
ಸೌತೆಕಾಯಿ
ಕಾಳುಮೆಣಸಿನಪುಡಿ
ಉಪ್ಪು
ಕೊತ್ತುಂಬರಿಸೊಪ್ಪು
ನಿಂಬೆರಸ
ಮೊಸರು

ವಿಧಾನ:

ಮೇಲೆ ತಿಳಿಸಿರುವ ಎಲ್ಲಾ ಸಾಮಗ್ರಿಗಳನ್ನು ರುಬ್ಬಿದರೆ ಸೌತೆಕಾಯಿ ಲಸ್ಸಿ ರೆಡಿಯಾಗುತ್ತದೆ.
*ಬ್ಲೆಂಡರ್ ನಲ್ಲಿ ಬ್ಲೆಂಡ್ ಮಾಡಿದರೂ ಸಾಕು.

Massoppu Saaru - ಕಾಳು ಮಸ್ಸೊಪ್ಪು ಸಾರು:

2 comments

* ಈ ಮಸ್ಸೊಪ್ಪು ಸಾರು ತುಂಬಾ ರುಚಿಯಾಗಿರುತ್ತದೆ. ವಿವಿಧ ಕಾಳುಗಳು ಅದರಲ್ಲೂ ಮೊಳಕೆ ಕಾಳುಗಳು ಸೇರಿರುವುದರಿಂದ ಬಹಳ ಪೌಷ್ಟಿಕವಾಗಿಯೂ, ಆರೋಗ್ಯಕರವಾಗಿಯೂ ತುಂಬಾನೇ ಸೊಗಸಾಗಿರುತ್ತದೆ. ನಮ್ಮ ಅಜ್ಜಿ ಇದನ್ನು ನಾನು ಚಿಕ್ಕವಳಿದ್ದಾಗ ಹೆಚ್ಚಾಗಿ ತಯಾರಿಸುತ್ತಿದ್ದರು. ಇದಕ್ಕೆ ರೊಟ್ಟಿ ತುಂಬಾ ಚೆನ್ನಾಗಿ ಹೊಂದುತ್ತದೆ. ಮುದ್ದೆ ಸಹ. ಆಗ ಅಜ್ಜಿ ಮಾಡುತ್ತಿದ್ದ ರುಚಿ ಈಗ ಬರಲ್ಲ. ಈಗಿನ ಕಾಳುಗಳೆಲ್ಲಾ ಹೈಬ್ರೀಡ್ ಆಗಿರುವುದರಿಂದ ಅಜ್ಜಿ ತಯಾರಿಸುತ್ತಿದ್ದ ಅಡುಗೆಗಳು ಈಗ ನಾವು ಹೇಗೆ ತಯಾರಿಸಿದರು ಪರವಾಗಿಲ್ಲ ಎನಿಸುತ್ತೆ. ಆಗಿನ ಕಾಲದಲ್ಲಿ ಎಲ್ಲಾ ನಾಟಿ ಬೆಳೆಗಳನ್ನು ಬೆಳೆಯುತ್ತಿದ್ದುದರಿಂದ ಅದರಲ್ಲಿ ಪೌಷ್ಠಿಕಾಂಶಗಳು,ಖನಿಜ,ಲವಣ,ವಿಟಮಿನ್ ಗಳು ಎಲ್ಲಾ ಆಹಾರ ಪದಾರ್ಥಗಳಲ್ಲಿ ಹೇರಳವಾಗಿ ಇರುತ್ತಿತ್ತು. ಅದಕ್ಕೆ ನಮ್ಮಗಳಿಗೆ ಆಗಿನ ಕಾಲದ ಅಡುಗೆಗಳೇ ಹೆಚ್ಚು ಇಷ್ಟವಾಗುತ್ತವೆ ಏನೋ ಅನಿಸುತ್ತೆ. ಇಷ್ಟೆಲ್ಲಾ ಒಂದೇ ಅಡುಗೆಗಳಿಗೆ ಹಾಕಿ ಆಗಿನ ಕಾಲದಲ್ಲಿ ಅಡುಗೆಗಳನ್ನು ತಯಾರಿಸುತ್ತಿದ್ದುದಕ್ಕೆ ಇರಬೇಕು ಅವರುಗಳು ಅಷ್ಟು ವಯಸ್ಸಾದರೂ ಏನು ಕಾಯಿಲೆಗಳು ಬರದೇ,ಓಡಾಡಿಕೊಂಡು ಗಟ್ಟಿಮುಟ್ಟಾಗಿ ಚೆನ್ನಾಗಿದ್ದರೇನೋ ಅಲ್ವಾ!! ಈ ಮಸ್ಸೊಪ್ಪಿಗೂ ನಾವು ಒಂದು ಚೂರು ಬೇಳೆಗೆ ಒಂದು ರೀತಿದು ಯಾವುದೋ ಒಂದು ಸೊಪ್ಪು ಹಾಕಿ,ತಯಾರಿಸಿದ ಮಸ್ಸೊಪ್ಪು ರುಚಿಗೂ ಬಹಳ ವ್ಯತ್ಯಾಸವಿದೆ. ಬೇಯಿಸಿದ ಕಾಳುಗಳನ್ನು ಮಸೆದು ತಯಾರಿಸಿದಾಗ ಅದು ಇನ್ನು ರುಚಿ ಹೆಚ್ಚು. ತಯಾರಿಸಿ ನೋಡಿ,ಈಗಿನ ದೀಡೀರ್ ಮಸ್ಸೊಪ್ಪಿನ ಸಾರಿಗೂ ,ನಮ್ಮ ಅಜ್ಜಿ ಕಾಲದ ಮಸ್ಸೊಪ್ಪು ಸಾರಿಗೂ ಇರುವ ವ್ಯತ್ಯಾಸವನ್ನು!!!! ಈ ಮಸ್ಸೊಪ್ಪು ಸಾರು ಕುದಿಸಿದಷ್ಟು,ಅಂದರೆ ಹಳೆಯದಾದರೆ ರುಚಿ ಇನ್ನೂ ಜಾಸ್ತಿಯಾಗುತ್ತದೆ. ಮಾರನೇದಿನಕ್ಕೆ ತುಂಬಾ ರುಚಿ.

ಕಾಳು ಮಸ್ಸೊಪ್ಪು ಸಾರು:

ಬೇಕಾಗುವ ಸಾಮಗ್ರಿಗಳು:

ತೊಗರಿಬೇಳೆ - ಒಂದು ಕಪ್
ಮೊಳಕೆ ಕಡ್ಲೆಕಾಳು
ಮೊಳಕೆ ಹುರುಳಿಕಾಳು
ಹೆಸರುಕಾಳು
ಹಲಸಂದೆಕಾಳು
ಹರಿವೆ ಸೊಪ್ಪು
ದಂಟುಸೊಪ್ಪು
ಬೆರೆಕೆ ಸೊಪ್ಪು
ಸಾರಿನಪುಡಿ /ಸಾಂಬಾರ್ ಪುಡಿ
ಈರುಳ್ಳಿ
ಬೆಳ್ಳುಳ್ಳಿ
ಅರಿಸಿನ
ಇಂಗು
ಕರಿಬೇವು
ಎಣ್ಣೆ,ಸಾಸಿವೆ
ಉಪ್ಪು
ಕಾಯಿತುರಿ
ಹುಣಸೇರಸ

ತಯಾರಿಸುವ ರೀತಿ:

ಎಲ್ಲಾ ಕಾಳುಗಳನ್ನು ಕ್ರಮವಾಗಿ ಕಾಲು ಬಟ್ಟಲು ತೆಗೆದುಕೊಳ್ಳಿ, ಎಲ್ಲಾ ಕಾಳುಗಳನ್ನು ನೀರು,ಉಪ್ಪು,ಅರಿಸಿನ ಮತ್ತು ಒಂದು ಚಮಚ ಎಣ್ಣೆ ಹಾಕಿ ಬೇಯಿಸಿಕೊಳ್ಳಿ. ಇದರ ಜೊತೆಗೆ ತೊಗರಿಬೇಳೆಯನ್ನು ಬೇಯಿಸಿಕೊಂಡು ಅದಕ್ಕೆ ತೊಳೆದು,ಕತ್ತರಿಸಿದ ಎಲ್ಲಾ ಸೊಪ್ಪುಗಳನ್ನು ಹಾಕಿ, ಅದಕ್ಕೆ ಒಂದೆರಡು ಅಳಕು ಬೆಳ್ಳುಳ್ಳಿಯನ್ನು ಹಾಕಿ,ಟಮೋಟ ಕೂಡ ಹಾಕಿ ಸೊಪ್ಪು ಬೇಯುವವರೆಗು ಬೇಯಿಸಿ. ಬೆಂದ ನಂತರ ಕಾಳು-ಬೇಳೆ-ಸೊಪ್ಪಿನ ಮಿಶ್ರಣವನ್ನು ಸ್ವಲ್ಪ ಮಸೆದುಕೊಳ್ಳಿ.
ಈ ಕಡೆ ಕಾಯಿತುರಿ,ಸ್ವಲ್ಪ ಈರುಳ್ಳಿ,ಸಾರಿನಪುಡಿ,ಒಂದು ಅಳಕುಬೆಳ್ಳುಳ್ಳಿಯನ್ನು ಸೇರಿಸಿ ಒಟ್ಟಿಗೆ ರುಬ್ಬಿಕೊಳ್ಳಿ.
ನಂತರ ಪಾತ್ರೆಗೆ ಒಂದೆರಡು ಚಮಚ ಎಣ್ಣೆಯನ್ನು ಹಾಕಿ,ಸಾಸಿವೆ,ಕರಿಬೇವು,ಇಂಗು ಜಜ್ಜಿದ ಬೆಳ್ಳುಳ್ಳಿ ಮತ್ತು ರುಬ್ಬಿದ ಮಿಶ್ರಣ ಹಾಕಿ,ಕುದಿಸಿ,ಉಪ್ಪು ಸೇರಿಸಿ,ಮಸೆದಿರುವ ಕಾಳು,ಬೇಳೆ ಮತ್ತು ಸೊಪ್ಪಿನ ಮಿಶ್ರಣವನ್ನು ಹಾಕಿ,ಹುಣಸೇಹುಳಿ ಸೇರಿಸಿ,ಒಂದು ಬಾರಿ ಕುದಿಸಿ.ಕೆಳಗಿಳಿಸಿ.ಈ ಸಾರನ್ನು ಮುದ್ದೆ ಮತ್ತು ಅನ್ನದೊಂದಿಗೆ ನೀಡಬೇಕು. ಇದು ಚಪಾತಿ ಮತ್ತು ರೊಟ್ಟಿಗೂ ಚೆನ್ನಾಗಿರುತ್ತದೆ. ಆದರೆ ಗಟ್ಟಿಯಾಗಿ ತಯಾರಿಸಬೇಕು.
* ಕಾಳು ಮತ್ತು ಸೊಪ್ಪುಗಳನ್ನು ನಿಮಗೆ ಬೇಕಾದ ಅಳತೆಯಲ್ಲಿ ಹಾಕಿಕೊಳ್ಳಿ. ಎಲ್ಲಾ ಹಾಕುವುದು ಕಷ್ಟ ಎನಿಸಿದರೆ,ನಿಮಗೆ ಬೇಕಾದ ಕಾಳು ಮತ್ತು ಸೊಪ್ಪನ್ನು ಹಾಕಿಕೊಳ್ಳಿ.

Tomato Juice - ಟಮೋಟೋಹಣ್ಣಿನ ಶರಬತ್ತು:

0 comments

ಟಮೋಟೋಹಣ್ಣಿನ ಶರಬತ್ತು:

ಸಾಮಗ್ರಿಗಳು:
ಟಮೋಟ ಹಣ್ಣುಗಳು
ನೀರು
ಚಿಟಿಕೆ ಉಪ್ಪು
ಸಕ್ಕರೆ ರುಚಿಗೆ
ಏಲಕ್ಕಿ ಪುಡಿ ಸ್ವಲ್ಪ
ಜೇನುತುಪ್ಪ- ಅರ್ಧ ಚಮಚ

ವಿಧಾನ:

ನೀರಿಗೆ ಟಮೋಟೋ ಹಣ್ಣು,ಸಕ್ಕರೆ,ಉಪ್ಪು,ಜೇನುತುಪ್ಪ ಮತು ಏಲಕ್ಕಿ ಪುಡಿಯನ್ನು ಸೇರಿಸಿ,ಚೆನ್ನಾಗಿ ರುಬ್ಬಿಕೊಂಡು ಅದನ್ನು ಸೋಸಿದರೆ,ಟಮೋಟ ಶರಬತ್ತು/ಪಾನೀಯ ತಯಾರಾಗುತ್ತದೆ.
*ತಣ್ಣಗೆ ಇಷ್ಟಪಡುವವರು ತಣ್ಣನೆಯ ನೀರು ಬಳಸಿ ಅಥವಾ ಐಸ್ ಕ್ಯುಬ್ಸ್ ಹಾಕಿ. ಇದು ಆರೋಗ್ಯಕ್ಕೆ ಹಿತಕರ ಮತ್ತು ತಂಪು ಹಾಗೂ ಬಾಯಾರಿಕೆಗಳನ್ನು ನಿವಾರಿಸುತ್ತದೆ. ದಣಿವು ಆರಿಸುತ್ತದೆ. ತಯಾರಿಸಲು ಸಹ ಸುಲಭ. ಅಲ್ಲದೇ ಎಲ್ಲಾ ಸಾಮಗ್ರಿಗಳು ಮನೆಯಲ್ಲಿ ಇದ್ದೇ ಇರುತ್ತವೆ. ನಮ್ಮಲ್ಲಿ ಮೊದಲಿಂದಲೂ ಯಾರ ಮನೆಗಾದರೂ ಬಿಸಿಲಿನಲ್ಲಿ ಹೋದ ತಕ್ಷಣ ಪಾನಕ, ಶರಬತ್ತು ಅಥವಾ ಮಜ್ಜಿಗೆ ಕೊಡುವ ವಾಡಿಕೆ ಇದೆ ಅಲ್ಲವೇ!ಅದೊಂದು ತರಹ ಸಂಪ್ರದಾಯವೇ ಆಗಿತ್ತು ಆಗ. ಆಯಾಸಕ್ಕೆ ಪರಿಹಾರ ನೀಡುವ ಅಂಶ ಅದರಲ್ಲಿದೆ.
*ಇದಕ್ಕೆ ಸ್ವಲ್ಪ ಕಾಳುಮೆಣಸಿನಪುಡಿ ಬೆರೆಸಿ ಕುಡಿದರೆ ಇನ್ನೂ ರುಚಿಯಾಗಿರುತ್ತದೆ.ಟಮೋಟದಲ್ಲಿ ಶಕ್ತಿವರ್ಧಕ ಅಂಶ ಹೆಚ್ಚಾಗಿರುವುದರಿಂದ ಇದು ಆರೋಗ್ಯಕ್ಕೆ ಮತ್ತು ದೇಹಕ್ಕೂ ಒಳ್ಳೆಯದು.

Groundnut Burfi-ಕಡ್ಲೆಕಾಯಿ ಮಿಠಾಯಿ /ಬರ್ಫಿ

0 comments

ಕಡ್ಲೆಕಾಯಿ ಬರ್ಫಿ:

ಸಾಮಗ್ರಿಗಳು:
ಒಂದು ಬಟ್ಟಲು ಕಡ್ಲೆಕಾಯಿಬೀಜ
ಒಂದು ಬಟ್ಟಲು ಅಥವಾ ರುಚಿಗೆ -ಬೆಲ್ಲ/ಸಕ್ಕರೆ

ವಿಧಾನ:
ಕಡ್ಲೆಕಾಯಿಬೀಜಗಳನ್ನು ಹುರಿದು, ತರಿ / ಸ್ವಲ್ಪ ದಪ್ಪಗೆ ಪುಡಿ ಮಾಡಿಕೊಳ್ಳಿ.
ಪಾತ್ರೆಗೆ ಸ್ವಲ್ಪ ನೀರು ಹಾಕಿ, ಬೆಲ್ಲ ಅಥವಾ ಸಕ್ಕರೆ ಹಾಕಿ, ಸ್ವಲ್ಪ ಎಳೆಪಾಕ ಬರುವಾಗ, ಕಡ್ಲೆಕಾಯಿಬೀಜದ ಪುಡಿಯನ್ನು ಹಾಕಿ, ಗೊಟಾಯಿಸುತ್ತಿರಿ, ಕೈ ಬಿಡದೇ ತಿರುಗಿಸಿ. ಗಟ್ಟಿಯಾಗುತ್ತಿದೆ ಎನಿಸಿದಾಗ, ಜಿಡ್ಡು ಸವರಿದ ತಟ್ಟೆ ಅಥವಾ ಮಣೆ ಮೇಲೆ ಹಾಕಿ, ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿ.

Cucumber Simple Salad/ ಸೌತೆಕಾಯಿ ಸಲಾಡ್

0 comments

ಸೌತೆಕಾಯಿ ಸಲಾಡ್:

ಸೌತೆಕಾಯಿಯನ್ನು ಹೇಗೆ ಬೇಕೋ ಆಗೆ ಹೆಚ್ಚಿಕೊಂಡು, ಅದಕ್ಕೆ ಉಪ್ಪು ಮತ್ತು ಮೆಣಸಿನಪುಡಿ ಉದುರಿಸಿ.

********************************

ಸೌತೆಕಾಯಿ ಸ್ಲೈಸ್:

ಹಸಿಮೆಣಸಿನಕಾರ ತಯಾರಿಸಲು-
ಹಸಿಮೆಣಸಿನಕಾಯಿ,ಕೊತ್ತುಂಬರಿಸೊಪ್ಪು ಮತ್ತು ಉಪ್ಪು ರುಬ್ಬಿಕೊಳ್ಳಿ.

ಸೌತೆಕಾಯಿ ಉದ್ದಕ್ಕೆ ಸೀಳಿಕೊಂಡು ಉದ್ದಕ್ಕೆ ಕತ್ತರಿಸಿ. ಅದಕ್ಕೆ ಉಪ್ಪು ಮತ್ತು ಹಸಿಮೆಣಸಿನಕಾರವನ್ನು ಹಚ್ಚಿ. ಮೇಲೆ ನಿಂಬೆರಸ ಹಿಂಡಿ.
*ವೇಳೆ ಕೂಡ ಜಾಸ್ತಿ ತೆಗೆದುಕೊಳ್ಳುವುದಿಲ್ಲ,ತಯಾರಿಸುವುದು ಸುಲಭವಾದರೂ ರುಚಿ ಮಾತ್ರ ಬಹಳ ಚೆನ್ನಾಗಿರುತ್ತವೆ.

Aloo Peas Curry /ಆಲೂ-ಬಟಾಣಿ ಮಸಾಲೆ:

0 comments


ಆಲೂ-ಬಟಾಣಿ ಮಸಾಲೆ:
ಬೇಕಾಗುವ ಸಾಮಗ್ರಿಗಳು;
ಬಟಾಣಿ
ಆಲೂಗೆಡ್ಡೆಯನ್ನು ಹೆಚ್ಚಿಕೊಳ್ಳಿ
ಹೆಚ್ಚಿದ ಈರುಳ್ಳಿ
ಒಂದು ಹಸಿಮೆಣಸಿನಕಾಯಿ
ಅಚ್ಚಖಾರದಪುಡಿ
ಧನಿಯ
ಜೀರಿಗೆಪುಡಿ
ಗರಂಮಸಾಲಾ
ಕೊತ್ತುಂಬರಿಸೊಪ್ಪು
ಎಣ್ಣೆ, ಜೀರಿಗೆ, ಕರಿಬೇವು
ಉಪ್ಪು ರುಚಿಗೆ

ವಿಧಾನ;
ಪಾತ್ರೆಗೆ ಎಣ್ಣೆಯನ್ನು ಹಾಕಿ, ಜೀರಿಗೆ ಹಾಕಿ ಚಟಪಟ ಅಂದಾಗ ಕರಿಬೇವು, ಹಸಿಮೆಣಸಿನಕಾಯಿ ಮತ್ತು ಈರುಳ್ಳಿಯನ್ನು ಹಾಕಿ ಬಾಡಿಸಿ. ಎರಡು ನಿಮಿಷದ ನಂತರ ಆಲೂಗೆಡ್ಡೆಯನ್ನು ಹಾಕಿ. ಒಂದೆರಡು ನಿಮಿಷ ಹುರಿದು ಬಟಾಣಿ ಕಾಳುಗಳನ್ನು ಹಾಕಿ,ಅದರ ಜೊತೆಗೆ ಅರಿಶಿನ ಮತ್ತು ಉಪ್ಪನ್ನು ಹಾಕಿ ಚೆನ್ನಾಗಿ ಬೆರೆಸಿ. ಐದಾರು ನಿಮಿಷ ಹುರಿದು,ಕಾರದಪುಡಿ,ಧನಿಯ ಮತ್ತು ಜೀರಿಗೆಪುಡಿಯನ್ನು ಹಾಕಿ,ಒಂದೆರಡು ನಿಮಿಷ ಬಾಡಿಸಿ. ಎಷ್ಟು ಅಗತ್ಯವೋ ಅಷ್ಟು ಮಾತ್ರ ನೀರನ್ನು ಹಾಕಿ,ಬಟಾಣಿ ಮತ್ತು ಆಲೂಗೆಡ್ಡೆ ಬೇಯುವವರೆಗೆ ಬೇಯಿಸಿ, ಕೊನೆಯಲ್ಲಿ ಕೊತ್ತುಂಬರಿಸೊಪ್ಪು ಮತ್ತು ಗರಂಮಸಾಲ ಬೆರೆಸಿ. ಒಂದು ನಿಮಿಷದ ನಂತರ ಇಳಿಸಿ,ಮತ್ತೆ ಸ್ವಲ್ಪ ಕೊತ್ತುಂಬರಿ ಸೊಪ್ಪು ಹಾಕಿ,ಈ ಮಸಾಲೆಯನ್ನು ಚಪಾತಿ ಮತ್ತು ಪರೋಟದೊಂದಿಗೆ ನೀಡಬಹುದು.
* ಹಸಿಬಟಾಣಿ ಉಪಯೋಗಿಸುವವರು ನೇರವಾಗಿ ಒಗ್ಗರಣೆಗೆ ಸೇರಿಸಿ.
* ಒಣಗಿದ ಬಟಾಣಿ ಉಪಯೋಗಿಸುವವರು ನಾಲ್ಕು-ಐದು ಗಂಟೆ ನೆನೆಸಿ.

Chapathi - ಚಪಾತಿ

0 comments

ಚಪಾತಿ:

ಸಾಮಗ್ರಿಗಳು:
ಗೋಧಿಹಿಟ್ಟು
ಸ್ವಲ್ಪ ಹಾಲು
ಎಣ್ಣೆ ಎರಡು ಚಮಚ
ಉಪ್ಪು

ವಿಧಾನ:

ಗೋಧಿಹಿಟ್ಟಿಗೆ, ಉಪ್ಪು , ಎಣ್ಣೆ ಹಾಕಿ ಬೆರೆಸಿ, ಅದಕ್ಕೆ ಹಾಲು ಮತ್ತು ಬೇಕಾಗುವಷ್ಟು ಮಾತ್ರ ನೀರನ್ನು ಹಾಕಿಕೊಂಡು ಕಲೆಸಿ. ಅರ್ಧ/ ಒಂದು ಗಂಟೆ ಬಿಟ್ಟು ಚಪಾತಿ ಲಟ್ಟಿಸಿ. ಕಾದ ತವಾ ಮೇಲೆ ಬೇಯಿಸಿ, ಎರಡು ಬದಿಯೂ ಎಣ್ಣೆ ಹಾಕಿ. ಇದು ಎಲ್ಲಾ ತರಹದ ಗೊಜ್ಜು, ಸಾರು, ಚಟ್ನಿ ಮತ್ತು ಪಲ್ಯ ಎಲ್ಲಕ್ಕೂ ಸೇರಿಸಿಕೊಂಡು ತಿನ್ನಲು ಚೆನ್ನಾಗಿರುತ್ತದೆ. ಆರೋಗ್ಯಕ್ಕೂ ಹಿತಕರ ಮತ್ತು ಪೌಷ್ಠಿಕವಾಗಿಯೂ ಇರುತ್ತದೆ.

Baadam Puris/almond puris/ಬಾದಾಮಿ ಸಿಹಿ ಪೂರಿ

0 comments

ಬಾದಾಮಿ ಸಿಹಿ ಪೂರಿ:
ಸಾಮಗ್ರಿಗಳು:

ಬಾದಾಮಿ - ಒಂದು ಕಪ್
ಮೈದಾಹಿಟ್ಟು - ಒಂದು ಬಟ್ಟಲು
ಡಾಲ್ಡ / ಬೆಣ್ಣೆ / ತುಪ್ಪ- ಸ್ವಲ್ಪ
ಕೇಸರಿಬಣ್ಣ ಚಿಟಿಕೆ
ಚಿಟಿಕೆ ಉಪ್ಪು
ಸಕ್ಕರೆ - ಎರಡು ಕಪ್
ಕೊಬ್ಬರಿತುರಿ ಸ್ವಲ್ಪ
ಎಣ್ಣೆ ಕರಿಯಲು

ತಯಾರಿಸುವ ವಿಧಾನ:

-ಮೊದಲು ಬಾದಾಮಿಯನ್ನು ಪೇಸ್ಟ್ ತರಹ ತಯಾರಿಸಿಕೊಳ್ಳಿ. ತುಂಬಾ ನುಣ್ಣಗೆ ರುಬ್ಬಬೇಡಿ.
-ಬೇರೆ ಪಾತ್ರೆಯಲ್ಲಿ ಸಕ್ಕರೆ ಮತ್ತು ಒಂದು ಲೋಟ ನೀರು ಹಾಕಿ, ಅದನ್ನು ಕುದಿಸಿ, ಸ್ವಲ್ಪ ಗಟ್ಟಿ ಪಾಕ ಬಂದ ನಂತರ ಅದನ್ನು ತೆಗೆದಿಡಿ.
-ಮೈದಾ,ಡಾಲ್ಡ,ಕೇಸರಿಬಣ್ಣ ಮತ್ತು ಉಪ್ಪು ಎಲ್ಲವನ್ನು ಚೆನ್ನಾಗಿ ಬೆರೆಸಿ, ನೀರು ಹಾಕಿಕೊಂಡು ಗಟ್ಟಿಯಾಗಿ ಪೂರಿ ಹಿಟ್ಟಿನ ಹದಕ್ಕೆ ಅಥವ ಅದಕ್ಕಿಂತ ಸ್ವಲ್ಪ ಗಟ್ಟಿಯಾಗಿ ಕಲೆಸಿ. ಇದನ್ನು ಅರ್ಧಗಂಟೆ ಮುಚ್ಚಿಡಿ. ನಂತರ ಹಿಟ್ಟಿನಿಂದ ದಪ್ಪನೆಲ್ಲಿಗಾತ್ರದ ಉಂಡೆಯನ್ನು ತೆಗೆದುಕೊಂಡು ಅದನ್ನು ಪೂರಿಯಂತೆ ಮಣೆ ಮೇಲೆ ಲಟ್ಟಿಸಿ ಸ್ವಲ್ಪ ತೆಳುವಾಗಿರಲಿ. ಅದಕ್ಕೆ ಬಾದಾಮಿ ಪೇಸ್ಟ್ ಅನ್ನು ಸವರಿ ಪೂರಿಯನ್ನು ಮೊದಲು ಮಧ್ಯಕ್ಕೆ ಮಡಿಸಿ,ಮತ್ತೆ ಮಡಿಸಿ ಅಂದರೆ ಅದು ತ್ರಿಕೋನಾಕಾರದಲ್ಲಿ ಬರಬೇಕು.ಅದಕ್ಕೆ ತುದಿಗೆ ಒಂದು ಲವಂಗ ಸಿಕ್ಕಿಸಿ, ಆಮೇಲೆ ಅದನ್ನು ಕಾದಿರುವ ಎಣ್ಣೆಯಲ್ಲಿ ತೆಗೆದು ಹಾಕಿ.ಬೇಯಿಸಿ, ಮೇಲೆ ತೇಲುತ್ತವೆ, ಮತ್ತೆ ತಿರುಗಿಸಿ, ಬೇಗ ಬೇಯುತ್ತದೆ, ಆಗಾಗಿ ಉರಿ ನೋಡಿಕೊಳ್ಳಿ. ಎರಡು ಬದಿ ಚೆನ್ನಾಗಿ ಬೇಯಿಸಿ, ಬಂಗಾರದ ಬಣ್ಣ ಬಂದ ನಂತರ ಬೇಗ ತೆಗೆದು, ಎಣ್ಣೆ ಹೀರಿಕೊಳ್ಳಲು ಪೇಪರ್ ಟವಲ್ ಮೇಲೆ ಹಾಕಿ. ತಕ್ಷಣವೇ ಸಕ್ಕರೆ ಪಾಕಕ್ಕೆ ಹಾಕಿ ತೆಗೆದು, ದೊಡ್ಡ ತಟ್ಟೆಯಲ್ಲಿ ಜೋಡಿಸಿ. ತಕ್ಷಣ ಹಾಕಿದರೆ ಸಕ್ಕರೆಪಾಕವನ್ನು ಅದು ಹೀರಿಕೊಳ್ಳುತ್ತದೆ. ಅದೇ ರೀತಿ ಎಲ್ಲವನ್ನು ತಯಾರಿಸಿ. ತಣ್ಣಗಾಗಲು ಬಿಡಿ. ತಣ್ಣಗಾದ ಮೇಲೆ ತಿನ್ನಬಹುದು ಅಥವಾ ಬಿಸಿ ಇರುವಾಗಲು ನೀಡಬಹುದು, ಇದು ಯಾವಾಗ ಬೇಕಾದರು ತಿನ್ನಲು ರುಚಿಯಾಗಿರುತ್ತದೆ. ಮಕ್ಕಳಿಗೆ ತುಂಬಾ ಇಷ್ಟವಾಗುತ್ತದೆ.
*ಕೊಬ್ರಿ ತುರಿಗೆ ಬಣ್ಣ ಸೇರಿಸಿ ಕಲರ್ ಫುಲ್ ಆಗಿಯೂ ತಯಾರಿಸಬಹುದು. ಕೊಬ್ಬರಿತುರಿ ಬೇಕಾದರೆ ಹಾಕಬಹುದು ನಿಮ್ಮಿಷ್ಟ.
*ಪೂರಿಯ ಮೇಲೆ ಬೇಕೆನಿಸಿದರೆ ಒಂದೊಂದು ಬಾದಾಮಿ ಇಟ್ಟು ಸರ್ವ್ ಮಾಡಬಹುದು.
*ಇದು ಬೇಗ ಹಾಳಾಗುವುದಿಲ್ಲ. ತಕ್ಷಣವೇ ತಿನ್ನಬೇಕು ಅಂತ ಇಲ್ಲ. ಎರಡು-ಮೂರು ದಿನ ಕೂಡ ಇಟ್ಟು ತಿನ್ನಬಹುದು.

Karbujahannina Seekarane /Muskmelon delight

0 comments

ಕರಬೂಜಹಣ್ಣಿನ ಸೀಕರಣೆ:
ಬೇಕಾಗುವ ಸಾಮಗ್ರಿಗಳು:
ಕರಬೂಜಹಣ್ಣು
ಬೆಲ್ಲದಪುಡಿ ರುಚಿಗೆ
ಅವಲಕ್ಕಿ -2 ಟೇಬಲ್ ಚಮಚ
ಹಾಲು - 1/2 ಕಪ್
ತೆಂಗಿನಹಾಲು-1/2 ಕಪ್
ಏಲಕ್ಕಿಪುಡಿ- ಸ್ವಲ್ಪ
ಜೇನುತುಪ್ಪ-2ಟೇಬಲ್ ಚಮಚ

ವಿಧಾನ:
ಕರಬೂಜ ಹಣ್ಣನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಅದನ್ನು ಒಂದು ಬಟ್ಟಲಿಗೆ ಹಾಕಿ, ಅದಕ್ಕೆ ಅವಲಕ್ಕಿ,ಬೆಲ್ಲದಪುಡಿ,ತೆಂಗಿನಗಟ್ಟಿಹಾಲು,ಹಾಲು,ಏಲಕ್ಕಿಪುಡಿ ಮತ್ತು ಜೇನುತುಪ್ಪವನ್ನು ಹಾಕಿ, ಚೆನ್ನಾಗಿ ಬೆರೆಸಿ, ಸರ್ವ್ ಮಾಡಿ. ತಣ್ಣಗೆ ಇಷ್ಟಪಡುವವರು ಫ್ರಿಡ್ಜ್ ನಲ್ಲಿಟ್ಟು ತಿನ್ನಬಹುದು.

Potato bajji /Aalugedde bajji-ಆಲೂಗೆಡ್ಡೆ ಬಜ್ಜಿ

0 comments


ಆಲೂಗೆಡ್ಡೆ ಬಜ್ಜಿ:

ಬೇಕಾಗುವ ಸಾಮಗ್ರಿಗಳು:

ಆಲೂಗೆಡ್ಡೆ
ಕಡ್ಲೆಹಿಟ್ಟು - ಒಂದು ಬಟ್ಟಲು
ಅಕ್ಕಿಹಿಟ್ಟು - ಎರಡು ಚಮಚ
ಅಚ್ಚಖಾರದ ಪುಡಿ
ಓಮಕಾಳು ಸ್ವಲ್ಪ
ಕಾದ ಎಣ್ಣೆ - ಒಂದು ಚಮಚ
ಚಿಟಿಕೆ ಸೋಡ
ಉಪ್ಪು
ಕರಿಯಲು ಎಣ್ಣೆ

ತಯಾರಿಸುವ ವಿಧಾನ:

ಆಲೂಗೆಡ್ಡೆ ಸಿಪ್ಪೆ ತೆಗೆದು,ತೆಳುವಾಗಿ (ತುಂಬಾ ತೆಳುವಾಗಿ ಅಲ್ಲ. ಸ್ವಲ್ಪ ದಪ್ಪ ಇರಲಿ)ಹೆಚ್ಚಿಕೊಂಡು ಸ್ವಲ್ಪ ಉಪ್ಪು ಹಾಕಿದ ನೀರಿನಲ್ಲಿ ಹಾಕಿಡಿ.
ಕಡ್ಲೆಹಿಟ್ಟು,ಅಕ್ಕಿಹಿಟ್ಟು,ಓಮಕಾಳು,ಉಪ್ಪು,ಅಚ್ಚಖಾರದ ಪುಡಿ ಮತ್ತು ಸೋಡ ಹಾಕಿ ಚೆನ್ನಾಗಿ ಬೆರೆಸಿ,ಅದಕ್ಕೆ ಕಾದಿರುವ ಎಣ್ಣೆ ಹಾಕಿ,ಜೊತೆಯಲ್ಲಿ ನೀರು ಹಾಕಿ,ಕಲೆಸಿಕೊಳ್ಳಿ,ಎಲ್ಲವನ್ನು ಚೆನ್ನಾಗಿ ಬೆರೆಸಿ ದೋಸೆ ಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ. ಎಣ್ಣೆಯನ್ನು ಕಾಯಲು ಇಟ್ಟು,ಅದು ಕಾದ ನಂತರ,ಹೆಚ್ಚಿರುವ ಆಲೂಗೆಡ್ಡೆಯ ಸ್ಲೈಸ್ ಅನ್ನು ಕಲೆಸಿರುವ ಹಿಟ್ಟಿನಲ್ಲಿ ಅದ್ದಿ,ಕಾದಿರುವ ಎಣ್ಣೆಯಲ್ಲಿ ಅದನ್ನು ತೇಲಿಬಿಡಿ. ಅದು ಮೇಲೆ ಬಂದಾಗ ತಿರುವಿ ಹಾಕಿ,ಎರಡು ಬದಿಯೂ ಚೆನ್ನಾಗಿ ಬೇಯಿಸಿ. ಎಣ್ಣೆಯಿಂದ ತೆಗೆದು ಪೇಪರ್ ಟವಲ್ ಮೇಲೆ ಹಾಕಿ. ಹೆಚ್ಚುವರಿ ಎಣ್ಣೆ ಹೀರಿಕೊಳ್ಳುತ್ತದೆ. ರುಚಿರುಚಿಯಾದ ಆಲೂಗೆಡ್ಡೆ ಬಜ್ಜಿ ತಯಾರ್. ಇದನ್ನು ಬಿಸಿಯಾಗಿ ತಿಂದರೆ ತುಂಬಾ ಚೆನ್ನಾಗಿ ಇರುತ್ತದೆ. ಚಟ್ನಿಯೊಂದಿಗೆ ಸರ್ವ್ ಮಾಡಬಹುದು. ಕೆಚಪ್ ಕೂಡ ಓಕೆ.

Khaarada Puris/Spicy puris-ಖಾರದ ಪೂರಿ:

0 comments

ಖಾರದ ಪೂರಿ:

ಸಾಮಗ್ರಿಗಳು:
ಗೋಧಿಹಿಟ್ಟು- ಒಂದು ಕಪ್
ಅಕ್ಕಿಹಿಟ್ಟು - ಅರ್ಧ ಕಪ್
ಮೈದಾಹಿಟ್ಟು- ಎರಡು ಚಮಚ
ಈರುಳ್ಳಿ
ಹಸಿಮೆಣಸಿನಕಾಯಿ
ತೆಂಗಿನತುರಿ
ಕೊತ್ತುಂಬರಿ
ಕರಿಬೇವು
ಉಪ್ಪು
ಎಣ್ಣೆ

ವಿಧಾನ:

ಮೊದಲು ತೆಂಗಿನತುರಿ,ಈರುಳ್ಳಿ,ಹಸಿಮೆಣಸಿನಕಾಯಿ,ಕರಿಬೇವು,ಕೊತ್ತುಂಬರಿ ಮತ್ತು ಉಪ್ಪು ಸೇರಿಸಿ, ಸ್ವಲ್ಪ ತರಿಯಾಗಿ ರುಬ್ಬಿಕೊಳ್ಳಿ.
ಗೋಧಿಹಿಟ್ಟು,ಅಕ್ಕಿಹಿಟ್ಟು ಮತ್ತು ಮೈದಾಹಿಟ್ಟು ಎಲ್ಲಾ ಸೇರಿಸಿ, ಚೆನ್ನಾಗಿ ಬೆರೆಸಿ, ಅದಕ್ಕೆ ಕಾಯಿಸಿರುವ ಎರಡು ಚಮಚ ಎಣ್ಣೆ ಮತ್ತು ರುಬ್ಬಿದ ಮಿಶ್ರಣ ಹಾಕಿ,ಸ್ವಲ್ಪ ನೀರು ಹಾಕಿ ಪೂರಿ ಹಿಟ್ಟಿನ ಹದಕ್ಕೆ ಕಲೆಸಿ,ಚಿಕ್ಕ ಉಂಡೆ ಮಾಡಿಕೊಂಡು,ಪೂರಿ ತರಹ ಲಟ್ಟಿಸಿ, ಕಾದಿರುವ ಎಣ್ಣೆಯಲ್ಲಿ ಕರಿಯಿರಿ.

Tomato Cucumaber Salad/ಟಮೋಟ ಸೌತೆಕಾಯಿ ಸಲಾಡ್

0 comments

ಟಮೋಟ ಸೌತೆಕಾಯಿ ಸಲಾಡ್:

ಟಮೋಟ
ಸೌತೆಕಾಯಿ
ಈರುಳ್ಳಿ
ಕ್ಯಾರೆಟ್ ತುರಿ
ನಿಂಬೆರಸ
ಕೊತ್ತುಂಬರಿಸೊಪ್ಪು
ಕಾಯಿತುರಿ (ಬೇಕಾದರೆ)
ಕಾರದ ಪುಡಿ
ಉಪ್ಪು

ವಿಧಾನ:

ಟಮೋಟ ಮತ್ತು ಸೌತೆಕಾಯಿಯನ್ನು ಬಿಲ್ಲೆಗಳನ್ನಾಗಿ (ಸ್ಲೈಸ್) ಮಾಡಿಕೊಳ್ಳಿ.
ಸಣ್ಣಗೆ ಹೆಚ್ಚಿದ ಈರುಳ್ಳಿ, ತುರಿದ ಕ್ಯಾರೆಟ್, ಕೊತ್ತುಂಬರಿಸೊಪ್ಪು, ಉಪ್ಪು ಮತ್ತು ಕಾರದ ಪುಡಿ ಸಿದ್ಧ ಮಾಡಿಕೊಳ್ಳಿ.
ಮೊದಲು ಅಗಲವಾದ ತಟ್ಟೆ / ಟ್ರೇ ನಲ್ಲಿ ಸೌತೆಕಾಯಿ ಜೋಡಿಸಿ, ಅದರ ಮೇಲೆ ಟಮೋಟ ಇಡಿ.ಅದರ ಮೇಲೆ ಉಪ್ಪು,ಕಾರ ಉದುರಿಸಿ,
ನಿಂಬೆರಸ ಹಾಕಿ,ಮತ್ತೆ ಮೇಲೆ ಕ್ಯಾರೆಟ್ ತುರಿ ಮತ್ತು ಕೊತ್ತುಂಬರಿಸೊಪ್ಪನ್ನು ಉದುರಿಸಿ. ಇದು ತುಂಬಾ ರುಚಿಯಾದ ಸಲಾಡ್.
*ಬೇಕೆನಿಸಿದರೆ ಕಾಯಿತುರಿ ಸಹ ಹಾಕಿಕೊಳ್ಳಬಹುದು. ಇನ್ನು ರುಚಿ ಹೆಚ್ಚುತ್ತದೆ.
*ಇನ್ನೂ ರುಚಿ ಬೇಕಾದರೆ ಸೇವ್ ಕೂಡ ಉದುರಿಸಿ,ತಿನ್ನಬಹುದು.

BisiBeleBath -Bcube / ಬಿಸಿಬೇಳೆಭಾತ್

0 comments

ಬಿಸಿಬೇಳೆಬಾತ್ ತಯಾರಿಸುವಾಗಲೆಲ್ಲ ನನ್ನ ಅಮ್ಮನ ನೆನಪು ಬರುತ್ತದೆ. ಅವರು ಇದನ್ನು ತಯಾರಿಸುತ್ತಿದ್ದಂತ ರೀತಿ,ಅದಕ್ಕಾಗಿಯೇ ಎಷ್ಟು ಆಸಕ್ತಿಯಿಂದ ತಯಾರಿ ಮಾಡುತ್ತಿದ್ದರು. ಅದಕ್ಕೆ ಬೇಕಾದ ಪದಾರ್ಥಗಳನ್ನೆಲ್ಲಾ ಹದವಾಗಿ ಹುರಿದು. ಎಲ್ಲಾ ಸರಿಯಾಗಿ ರೆಡಿಮಾಡಿಕೊಂಡು,ತಯಾರಿಸುತ್ತಿದ್ದರು. ಬಿಸಿಬೇಳೆಬಾತ್ ತಿನ್ನುವುದಕ್ಕೆ ಕಾಯುತ್ತಿದ್ದೆವು. ಸದಾ ಅದು ಒಂದು ತಿಂಡಿ ಲಿಸ್ಟ್ ನಲ್ಲಿ ಸೇರಿಕೊಂಡಿದ್ದರು ಸಹ,ಅದೇನೋ ಅಮ್ಮ ತಯಾರಿಸುತ್ತಿದ್ದುದರಿಂದ ಆ ರುಚಿಗೆ ತಿನ್ನಲು ಕಾಯುತ್ತಿದ್ದೆವು. ಜೊತೆಗೆ ಮೊದಲೇ ತಂದ ಚಿಪ್ಸ್ ಮತ್ತು ಖಾರಬೂಂದಿ ಜೊತೆ ಅದರ ಗಮ್ಮತ್ತೇ ಬೇರೆ. ಇದಲ್ಲದೇ ಯಾವುದಾದರು ಸಣ್ಣ ಪುಟ್ಟ ಪಾರ್ಟಿಗಳಿಗೆ ಬೇರೆ ಅಡಿಗೆ ಮತ್ತು ಸಿಹಿ ಜೊತೆ ಇದು ಖಾಯಂ,ಜೊತೆಗೆ ಮೆಣಸಿನಕಾಯಿ ಬಜ್ಜಿ ಕೂಡ. ಅಮ್ಮನಿಗೆ ಎಲ್ಲವು ಚೆನ್ನಾಗಿರಬೇಕು. ಅವರು ತಯಾರಿಸುತ್ತಿದ್ದ ಎಲ್ಲಾ ಅಡಿಗೆಗಳು ಸೂಪರ್ಬ್!! ಅವರಿಗೆ ಚೆನ್ನಾಗಿತ್ತು ಎಂದರೆ ಸಾಕು ಅಷ್ಟಕ್ಕೆ ಅದೇನು ಸಂತಸಪಡುತ್ತಿದ್ದರು. ಅಜ್ಜಿ ಮತ್ತು ಅಮ್ಮಗಳ ಅಡಿಗೆಯೇ ನಾವಿಂದು ಸುಮಾರು ತಯಾರಿಸುತ್ತೇವೆ. ಅವರ ಕೈರುಚಿ ತುಂಬಾ ಚೆನ್ನಾಗಿರುತ್ತಿತ್ತು. ಅದು ಹೇಳಲು ಮಾತೇ ಇಲ್ಲ ಎನಿಸುತ್ತೆ. ನಾವೇ ಧನ್ಯರು!! ಈಗ ಇಲ್ಲಿ ನಾನು ಅದೇ ರೀತಿ ತಯಾರಿಸುವ ಬಿಸಿಬೇಳೆಬಾತ್ ತಿಳಿಸಿರುವೆ. ಅದೇ ರುಚಿಗೆ ಮೋಸ ಇಲ್ಲ ಅನ್ಕೊತಿನಿ, ಸ್ವಲ್ಪ ಪರವಾಗಿಲ್ಲವೇನೋ. ಅವರಷ್ಟು ಅಲ್ಲದಿದ್ದರು ಒಕೆ. ಹೇಗಿದೆ ಅಂತ ನೀವು ತಯಾರಿಸಿ ನಂತರ ತಿಳಿಸಿ.

ಬಿಸಿಬೇಳೆಭಾತ್:
ಬೇಕಾಗುವ ಸಾಮಗ್ರಿಗಳು:

ಅಕ್ಕಿ - ಒಂದು ಬಟ್ಟಲು
ತೊಗರಿಬೇಳೆ - ಒಂದು ಬಟ್ಟಲು
ತರಕಾರಿ ಉಪಯೋಗಿಸುವುದಾದರೆ-
ಕ್ಯಾರೆಟ್,ಬೀನ್ಸ್,ಆಲೂಗೆಡ್ಡೆ,ಟಮೋಟ ಮತ್ತು ಬಟಾಣಿ
ಈರುಳ್ಳಿ ಸ್ವಲ್ಪ ಹೆಚ್ಚಿದ್ದು
ಹುಣಸೇರಸ
ಬೆಲ್ಲ ಚೂರು
ಅರಿಶಿನ
ಉಪ್ಪು

ಬಿಸಿಬೇಳೆ ಭಾತಿನ ಪುಡಿ ತಯಾರಿಸಲು ಸಾಮಗ್ರಿಗಳು

ಒಣಮೆಣಸಿನಕಾಯಿ -ಹತ್ತು /ರುಚಿಗೆ
ಧನಿಯ- ಎರಡು ಚಮಚ
ಮೆಂತ್ಯ -ಅರ್ಧ ಚಮಚ
ಜೀರಿಗೆ-ಒಂದು ಚಮಚ
ಗಸಗಸೆ-ಅರ್ಧ ಚಮಚ
ಏಲಕ್ಕಿ-
ಲವಂಗ
ಚೆಕ್ಕೆ
ಮೆಣಸು ಮತ್ತು
ಒಣಕೊಬ್ಬರಿ

ಒಗ್ಗರಣೆಗೆ ಸಾಮಗ್ರಿಗಳು:
ಎಣ್ಣೆ,ತುಪ್ಪ,ಸಾಸಿವೆ,ಜೀರಿಗೆ,ಇಂಗು,ಕರಿಬೇವು
ಒಣಮೆಣಸಿನಕಾಯಿ
ಗೋಡಂಬಿ

ತಯಾರಿಸುವ ವಿಧಾನ:

• ತರಕಾರಿಗಳನ್ನು ಉಪಯೋಗಿಸುವುದಾದರೆ, ಸಣ್ಣಗೆ ಹೆಚ್ಚಿಕೊಳ್ಳಿ.
• ಬಟಾಣಿ ಮತ್ತು ಹೆಚ್ಚಿದ ತರಕಾರಿಗಳನ್ನು , ಅಕ್ಕಿ ಮತ್ತು ತೊಗರಿಬೇಳೆಯನ್ನು ,ನೀರು,ಒಂದು ಚಮಚ ಎಣ್ಣೆ, ಅರಿಶಿನ ಮತ್ತು ಸ್ವಲ್ಪ ಉಪ್ಪು ಹಾಕಿ ಎಲ್ಲವನ್ನು ಸೇರಿಸಿ. ಕುಕ್ಕರ್ ನಲ್ಲಿ ಇಟ್ಟು ಕುಕ್ ಮಾಡಿಕೊಳ್ಳಿ. ನೀರನ್ನು ಮಾಮುಲಿಗಿಂತ ಸ್ವಲ್ಪ ಜಾಸ್ತಿ ಹಾಕಿ.

• ಪುಡಿ ಮಾಡಿಕೊಳ್ಳಲು ತಿಳಿಸಿರುವ ಸಾಮಗ್ರಿಗಳನ್ನು ಒಂದು ಚಮಚ ಎಣ್ಣೆ ಹಾಕಿ,ಒಂದೊಂದಾಗಿ ಹುರಿದುಕೊಂಡು,ಎಲ್ಲವನ್ನು ಒಟ್ಟಿಗೆ ಸೇರಿಸಿ ಪುಡಿ ಮಾಡಿಟ್ಟು ಕೊಳ್ಳಿ. ಬಿಸಿಬೇಳೆಭಾತ್ ಪುಡಿ ರೆಡಿಯಾಗುತ್ತದೆ.

• ಬೇಯಿಸಿರುವ ಅಕ್ಕಿ ಮತ್ತು ಬೇಳೆ ಮಿಶ್ರಣವನ್ನು ತೆಗೆದು. ಸ್ವಲ್ಪ ಲಘುವಾಗಿ ಚೆನ್ನಾಗಿ ಬೆರೆಸಿಡಿ. ನೀರು ಹಾಕಿ ಸ್ವಲ್ಪ ತೆಳುವಾಗಿರಲಿ.
• ಈಗ ಕೊನೆಯ ಹಂತ ಒಂದು ಅಗಲ ಪಾತ್ರೆಗೆ ಒಗ್ಗರಣೆಗೆ ಸಾಕಾಗುವಷ್ಟು ಎಣ್ಣೆ ಮತ್ತು ತುಪ್ಪವನ್ನು ಹಾಕಿ ಅದು ಕಾದ ಬಳಿಕ, ಸಾಸಿವೆ,ಜೀರಿಗೆ,ಇಂಗು, ಒಣಮೆಣಸಿನಕಾಯಿ ಮುರಿದು ಹಾಕಿ, ನಂತರ ಕರಿಬೇವಿನ ಸೊಪ್ಪು ಹಾಕಿದ ಮೇಲೆ ಸ್ವಲ್ಪ ನೀರು ಹಾಕಿ, ಅದಕ್ಕೆ ಪುಡಿ ಮಾಡಿಟ್ಟುಕೊಂಡಿರುವ ಮಸಾಲ ಪುಡಿಯನ್ನು ಹಾಕಿ. ಒಂದೆರಡು ನಿಮಿಷ ಕುದಿಸಿ. ನಂತರ ಹುಣಸೇಹಣ್ಣಿನ ರಸ,ಬೆಲ್ಲ ಮತ್ತು ಉಪ್ಪನ್ನು ಹಾಕಿ ಚೆನ್ನಾಗಿ ಬೆರೆಸಿ, ಅಕ್ಕಿ-ಬೇಳೆ ಮಿಶ್ರಣವನ್ನು ಹಾಕಿ ಎಲ್ಲವೂ ಸರಿಯಾಗಿ ಹೊಂದಿಕೊಳ್ಳುವಂತೆ ತಿರುಗಿಸಿ. ತುಪ್ಪದಲ್ಲಿ ಕರಿದ ಗೋಡಂಬಿಗಳನ್ನು ಸೇರಿಸಿ. ಉಪ್ಪು,ಕಾರ ಮತ್ತು ಭಾತಿನ ಹದ ನಿಮ್ಮ ಇಷ್ಟದಂತೆ ತಯಾರಿಸಿಕೊಳ್ಳಿ.
• ಎಲ್ಲವನ್ನು ಬೆರೆಸಿದ ಮೇಲೆ ಒಂದು ಕುದಿ ಕುದಿಸಿ, ಇಳಿಸಿ.

• ರುಚಿರುಚಿಯಾದ ಬಿಸಿಬೇಳೆಭಾತ್ ತಿನ್ನಲು ತಯಾರಾಗುತ್ತದೆ. ಈ ಭಾತ್ ಗೆ ಖಾರಬೂಂದಿ ಚೌ-ಚೌ ಮತ್ತು ಆಲೂಗೆಡ್ಡೆ ಚಿಪ್ಸ್ ಚೆನ್ನಾಗಿರುತ್ತದೆ. ಅಲ್ಲದೇ ರಾಯತ, ತರಕಾರಿ ಸಲಾಡ್ ಮತ್ತು ಬಜ್ಜಿಗಳನ್ನು ಜೊತೆಯಲ್ಲಿ ನೀಡಬಹುದು.ಬಿಸಿಯಾದ ಭಾತ್ ಮೇಲೆ ತುಪ್ಪವನ್ನು ಹಾಕಿಕೊಂಡರೆ ರುಚಿ ಹೆಚ್ಚುತ್ತದೆ.
* ಒಣ ಮೆಣಸಿನಕಾಯಿಗಳನ್ನು ಖಾರಕ್ಕೆ ತಕ್ಕಂತೆ ಹಾಕಿ. ಇಲ್ಲವೆಂದರೆ ಕೆಂಪುಕಾರದ ಪುಡಿಯನ್ನಾದರೂ ಮೆಣಸಿನಕಾಯಿ ಬದಲಿಗೆ ಹಾಕಬಹುದು.ಧನಿಯಬೀಜದ ಬದಲು,ಧನಿಯಪುಡಿ ಸಹ ಬಳಸಬಹುದು. ಆದರೂ ಮೆಣಸಿನಕಾಯಿ ಮತ್ತು ಧನಿಯವನ್ನು ಪ್ರೆಶ್ ಆಗಿ ಹುರಿದು ಪುಡಿ ಮಾಡಿಕೊಂಡರೆ,ರುಚಿ ಮತ್ತು ಪರಿಮಳ ಚೆನ್ನಾಗಿರುತ್ತದೆ.ಮಸಾಲೆ ಪುಡಿ ಮತ್ತು ಬಾತ್ ಕೂಡ ಘಮ ಘಮ ವಾಸನೆ ಬರುತ್ತದೆ.
* ಅಕ್ಕಿ ಮತ್ತು ಬೇಳೆಯನ್ನು ಬೇರೆಯಾಗಿ ಬೇಯಿಸಿಕೊಂಡು ಸಹ ಸೇರಿಸಬಹುದು.
* ತರಕಾರಿಗಳು ಇಷ್ಟಪಡುವವರು ಇದಕ್ಕೆ ಸೇರಿಸಿಕೊಳ್ಳಬಹುದು. ಇಲ್ಲವೆಂದರೆ ಬೇಡಾ! ಹಾಕಲೇ ಬೇಕು ಅಂತ ಏನಿಲ್ಲ.
* ಬಿಸಿಬೇಳೆಭಾತಿನ ಪುಡಿಯನ್ನು ಮೊದಲೇ ಹೆಚ್ಚಾಗಿ ತಯಾರಿಸಿ,ಗಾಳಿಯಾಡದ ಡಬ್ಬಿಯಲ್ಲಿ ಶೇಖರಿಸಿ ಇಟ್ಟುಕೊಂಡಿದ್ದರೆ, ಯಾವಾಗ ಬೇಕೋ ಆಗ ಭಾತ್ ತಯಾರಿಸುವುದು ತುಂಬಾ ಸುಲಭ. ಆದರೂ ಪುಡಿಯನ್ನು ಬೇಕಾದಾಗ ತಯಾರಿಸಿ, ಹಾಕಿದರೆ ಹೆಚ್ಚು ರುಚಿ ಮತ್ತು ಪರಿಮಳವೂ ಆಗಿರುತ್ತದೆ.
* ಈ ರೀತಿ ಅಡಿಗೆಗಳಿಗೆ ಫ್ರೆಶ್ ಆಗಿ ತಯಾರಿಸಿಕೊಂಡ ಪುಡಿಗಳು ಉತ್ತಮ.
* ಈ ಭಾತ್ ತಣ್ಣಗಾದಾಗ ಬೇಗ ಗಟ್ಟಿಯಾಗುತ್ತದೆ. ಆಗಾಗಿ ಬಿಸಿ ಇದ್ದಾಗ ತಿಂದರೆ ತುಂಬಾ ಚೆನ್ನಾಗಿರುತ್ತದೆ. ತಣ್ಣಗೆ ಗಟ್ಟಿಯಾದಾಗ ಅದಕ್ಕೆ ಮತ್ತೆ ಒಂದು ಲೋಟ ಬಿಸಿಯಾದ ನೀರು ಹಾಕಿ, ಚೆನ್ನಾಗಿ ಬೆರೆಸಿ, ಕುದಿಸಿ.

Erulli bajji / Onion bajji-ಈರುಳ್ಳಿ ಬಜ್ಜಿ:

0 comments

ಈರುಳ್ಳಿ ಬಜ್ಜಿ:

ಬೇಕಾಗುವ ಸಾಮಗ್ರಿಗಳು:

ಈರುಳ್ಳಿ ಸ್ವಲ್ಪ ದೊಡ್ಡದು
ಕಡ್ಲೆಹಿಟ್ಟು - ಒಂದು ಬಟ್ಟಲು
ಅಕ್ಕಿಹಿಟ್ಟು - ಎರಡು ಚಮಚ
ಚಿಟಿಕೆ ಸೋಡ
ಅಚ್ಚಖಾರದ ಪುಡಿ
ಉಪ್ಪು
ಕಾದ ಎಣ್ಣೆ - ಒಂದು ಚಮಚ
ಸ್ವಲ್ಪ ನೀರು
ಕರಿಯಲು ಎಣ್ಣೆ

ತಯಾರಿಸುವ ವಿಧಾನ:


ಈರುಳ್ಳಿಯನ್ನು ಸ್ಲೈಸ್ ಮಾಡಿಕೊಳ್ಳಿ, ಅದು ಬೇರೆಬೇರೆಯಾಗದಂತೆ ಸರಿಯಾಗಿ ಇಟ್ಟುಕೊಳ್ಳಿ.
ಕಡ್ಲೆಹಿಟ್ಟು, ಅಕ್ಕಿಹಿಟ್ಟು, ಅಚ್ಚಖಾರದ ಪುಡಿ,ಉಪ್ಪು,ಮತ್ತು ಸೋಡ ಹಾಕಿ ಚೆನ್ನಾಗಿ ಬೆರೆಸಿ, ಅದಕ್ಕೆ ಕಾದಿರುವ ಎಣ್ಣೆ ಹಾಕಿ, ಜೊತೆಯಲ್ಲಿ ನೀರು ಹಾಕಿ, ಕಲೆಸಿಕೊಳ್ಳಿ, ಎಲ್ಲವನ್ನು ಚೆನ್ನಾಗಿ ಬೆರೆಸಿ ದೋಸೆ ಹಿಟ್ಟಿನ ಹದಕ್ಕೆ ಕಲೆಸಿಕೊಳ್ಳಿ. ಎಣ್ಣೆಯನ್ನು ಕಾಯಲು ಇಟ್ಟು, ಅದು ಕಾದ ನಂತರ, ಹೆಚ್ಚಿರುವ ಈರುಳ್ಳಿ ಬಿಲ್ಲೆಗಳನ್ನು ಕಲೆಸಿರುವ ಹಿಟ್ಟಿನ ಮಿಶ್ರಣದಲ್ಲಿ ಅದ್ದಿ, ಕಾದಿರುವ ಎಣ್ಣೆಯಲ್ಲಿ ಅದನ್ನು ತೇಲಿಬಿಡಿ. ಅದು ಮೇಲೆ ಬಂದಾಗ ತಿರುವಿ ಹಾಕಿ, ಎರಡು ಬದಿಯೂ ಚೆನ್ನಾಗಿ ಬೇಯಿಸಿ. ಬಂಗಾರಬಣ್ಣ ಬರುವವರೆಗೂ ಬೇಯಿಸಿ, ಎಣ್ಣೆಯಿಂದ ತೆಗೆದು ಪೇಪರ್ ಟವಲ್ ಮೇಲೆ ಹಾಕಿ. ರುಚಿರುಚಿಯಾದ ಈರುಳ್ಳಿ ಬಜ್ಜಿ ತಿನ್ನಲು ತಯಾರಾಗಿದೆ. ಇದನ್ನು ಬಿಸಿಯಾಗಿ ತಿಂದರೆ ಗರಿಗರಿಯಾಗಿ ತುಂಬಾ ಚೆನ್ನಾಗಿ ಇರುತ್ತದೆ. ಕಾಯಿಚಟ್ನಿಯೊಂದಿಗೆ ಸರ್ವ್ ಮಾಡಬಹುದು. ಚಟ್ನಿಯೊಂದಿಗೆ ಇನ್ನೂ ರುಚಿ ಹೆಚ್ಚುತ್ತದೆ.

Milk Puris - ಹಾಲು ಹೋಳಿಗೆ / ಹಾಲು ಪೂರಿ

0 comments

ಹಾಲು ಹೋಳಿಗೆ / ಹಾಲು ಪೂರಿ:

ಬೇಕಾಗುವ ಸಾಮಗ್ರಿಗಳು:

ಮೈದಾಹಿಟ್ಟು - ಒಂದು ಕಪ್
ಗೋಧಿಹಿಟ್ಟು - ಒಂದು ಕಪ್
ತೆಂಗಿನತುರಿ ಅಥವ ಕೊಬ್ಬರಿ ತುರಿ - ಎರಡು ಕಪ್
ಗಸಗಸೆ - ಎರಡು ಚಮಚ
ಅಕ್ಕಿ - ಒಂದು ಚಮಚ
ಸಕ್ಕರೆ ರುಚಿಗೆ ತಕ್ಕಷ್ಟು
ಏಲಕ್ಕಿ ಪುಡಿ, ಚಿಟಿಕೆ ಉಪ್ಪು
ಎಣ್ಣೆ

ತಯಾರಿಸುವ ವಿಧಾನ:

ಎರಡು ಹಿಟ್ಟನ್ನು ಚೆನ್ನಾಗಿ ಬೆರೆಸಿ,ಅದಕ್ಕೆ ಚಿಟಿಕೆ ಉಪ್ಪು ಮತ್ತು ಒಂದು ಚಮಚ ಎಣ್ಣೆ /ತುಪ್ಪ ಹಾಕಿ ಗಟ್ಟಿಯಾಗಿ ಪೂರಿಹಿಟ್ಟಿನ ಹದಕ್ಕೆ ಕಲೆಸಿ, ಚೆನ್ನಾಗಿ ನಾದಿಡಿ. ತುಂಬಾ ಹೊತ್ತು ನೆನೆಸಬೇಡಿ.
ಕೊಬ್ಬರಿ/ತೆಂಗಿನತುರಿಯನ್ನು, ಗಸಗಸೆ, ಅಕ್ಕಿ ಮತ್ತು ಏಲಕ್ಕಿ/ಏಲಕ್ಕಿಪುಡಿಯೊಂದಿಗೆ ಸ್ವಲ್ಪ ನೀರು/ಹಾಲನ್ನು ಹಾಕಿ ರುಬ್ಬಿಕೊಂಡು, ಅದನ್ನು ಒಲೆಯ ಮೇಲಿಟ್ಟು ಚೆನ್ನಾಗಿ ಕುದಿಸಿ, ಹಾಗೆಯೇ ಒಂದು ಕಪ್ ಹಾಲನ್ನು ಸೇರಿಸಿ, ಸಕ್ಕರೆ ಸಹ ಬೆರೆಸಿ, ಹಸಿವಾಸನೆ ಹೋಗುವವರೆಗೂ ಕುದಿಸಿ ತೆಗೆದಿಡಿ. ಬೇಗ ತಳಹತ್ತುತ್ತದೆ, ಕೈ ಬಿಡದೆ ತಿರುಗಿಸುತ್ತಿರಿ. ತಳಹತ್ತಿದರೆ ವಾಸನೆ ಬರುತ್ತದೆ.

ಕಲೆಸಿರುವ ಹಿಟ್ಟಿನಲ್ಲಿ ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿಕೊಂಡು, ಅದನ್ನು ತೆಳ್ಳಗೆ ಲಟ್ಟಿಸಿ, ದಪ್ಪವಾಗಿ ಲಟ್ಟಿಸಬೇಡಿ. ಪೂರಿಯಷ್ಟು ಅಗಲವಾಗಿ ಒತ್ತಿ. ಕಾದ ಎಣ್ಣೆಯಲ್ಲಿ ಕರಿಯಿರಿ. ಇದು ಸ್ವಲ್ಪ ಗಟ್ಟಿಯಾಗಿಯೇ ಇದ್ದರೆ ಚೆನ್ನ. ಪೂರಿಯಂತೆ ಊದಿಕೊಳ್ಳದೆ, ಮೆತ್ತಗಿರದೆ, ಗಟ್ಟಿಯಾಗಿರುವಂತೆ ಪೂರಿ ಮಾಡಿಕೊಳ್ಳಿ.

ಈ ಪೂರಿಗಳನ್ನು ಮೊದಲು ತಯಾರಿಸಿದ ಹೂರಣದಲ್ಲಿ ಅದ್ದಿ ತೆಗೆದು,ಜೋಡಿಸಿ ಅದರ ಮೇಲೆ ತುಪ್ಪದಲ್ಲಿ ಕರಿದ ಗೋಡಂಬಿ ಮತ್ತು ದ್ರಾಕ್ಷಿಯಿಂದ ಅಲಂಕರಿಸಿ.ಬಣ್ಣದ ಕೊಬ್ಬರಿ ತುರಿಯಿಂದ ಕೂಡ ಅಲಂಕರಿಸಿ.

ಹಾಲು ಹೋಳಿಗೆ ತಿನ್ನಲು ತಯಾರಾಗಿರುತ್ತದೆ. ಹೋಳಿಗೆಯ ಮೇಲೆ ಬಿಸಿ ತುಪ್ಪವನ್ನು ಹಾಕಿ ಸವಿಯಲು ನೀಡಿ.


* ಪೂರಿಯನ್ನು ಮೊದಲೆ ತಯಾರಿಸಿ ಇಟ್ಟುಕೊಂಡು, ತಿನ್ನುವಾಗ ಹೂರಣವನ್ನು ಅದರ ಮೇಲೆ ಹಾಕಿಕೊಂಡು ತಿನ್ನಬಹುದು.
* ಸ್ವಲ್ಪ ಮೆತ್ತಗೆ ನೆನೆದಿರಬೇಕೆಂದರೆ, ಮೊದಲೆ ಹೂರಣದಲ್ಲಿ ಅದ್ದಿ ಇಡಬಹುದು, ತುಂಬಾ ಮೆತ್ತಗೆ ಬೇಕಾದವರೂ ಹೂರಣದಲ್ಲಿ ಮುಳಗಿಸಿ ಇಟ್ಟು ತಿನ್ನಬಹುದು. ಒಬ್ಬೊಬ್ಬರ ರುಚಿ ಒಂದೊಂದು ತರಹ ಇರುತ್ತದೆ, ಅವರಿಗೆ ಇಷ್ಟವಿರುವ ರೀತಿಯಲ್ಲಿ ತಯಾರಿಸಿಕೊಳ್ಳಬಹುದು.
*ಹೋಳಿಗೆಯಂತೆ ಬೇರೆ ಬೇರೆ ಬೇಡವೆಂದರೆ, ಹೂರಣವನ್ನು ದೊಡ್ಡಪಾತ್ರೆಯಲ್ಲಿಯೇ ಕುದಿಸಿಟ್ಟುಕೊಂಡು, ಪೂರಿಯನ್ನು ಕರಿಯುತ್ತಿರುವಂತೆಯೇ ಹೂರಣದ ಪಾತ್ರೆಗೆ ಹಾಕಿ, ಒಂದೊಂದಾಗಿ ಬಿಸಿಯಿರುವಂತೆಯೇ ಹಾಕಿ, ತುಪ್ಪದಲ್ಲಿ ಕರಿದ ದ್ರಾಕ್ಷಿ ಮತ್ತು ಗೋಡಂಬಿಯನ್ನು ಸೇರಿಸಿ, ಚೆನ್ನಾಗಿ ಬೆರೆಸಿ ಕೂಡ ಇಡಬಹುದು. ಇದು ಎಲ್ಲವೂ ಬೆರೆತು ಸ್ವಲ್ಪ ಪುಡಿಪುಡಿಯಂತೆ ಇರುತ್ತದೆ.

Brinjal Sabji - ಬದನೆಕಾಯಿ ಮಸೆದ ಪಲ್ಯ/ಮಸ್ಕಾಯಿ ಪಲ್ಯ:

0 comments


ಬದನೆಕಾಯಿ ಮಸೆದ ಪಲ್ಯ/ಮಸ್ಕಾಯಿ ಪಲ್ಯ:
ಸಾಮಗ್ರಿಗಳು:

ಬದನೆಕಾಯಿ - ಅರ್ಧಕೆಜಿ
ಈರುಳ್ಳಿ-ಹೆಚ್ಚಿದ್ದು
ಹಸಿಮೆಣಸಿನಕಾಯಿಗಳು - ಉದ್ದಕ್ಕೆ ಹೆಚ್ಚಿಕೊಳ್ಳಿ
ಎಣ್ಣೆ, ಸಾಸಿವೆ
ಕರಿಬೇವು
ಕಡ್ಲೆಬೇಳೆ
ಉದ್ದಿನಬೇಳೆ
ಉಪ್ಪು
ನಿಂಬೆರಸ
ಕೊತ್ತುಂಬರಿ ಸೊಪ್ಪು

ತಯಾರಿಸುವ ರೀತಿ:

ಮೊದಲು ಎಣ್ಣೆಯನ್ನು ಕಾಯಿಸಿ,ಸಾಸಿವೆ,ಕರಿಬೇವು,ಕಡ್ಲಬೇಳೆ,ಉದ್ದಿನಬೇಳೆ ಹಾಕಿ,ನಂತರ ಹಸಿಮೆಣಸಿನಕಾಯಿ ಮತ್ತು ಈರುಳ್ಳಿ ಹಾಕಿ ಐದು ನಿಮಿಷ ಬಾಡಿಸಿ. ಬದನೆಕಾಯಿ ಹಾಕಿ,ಒಗ್ಗರಣೆಯಲ್ಲಿಯೇ ಕೆಲವು ನಿಮಿಷ ಬಾಡಿಸಿ. ಅದು ಸ್ವಲ್ಪ ಬೆಂದಿದೆ ಎನಿಸಿದ ತಕ್ಷಣ ಸ್ವಲ್ಪ ನೀರು ಮತ್ತು ರುಚಿಗೆ ಉಪ್ಪನ್ನು ಹಾಕಿ ಚೆನ್ನಾಗಿ ಬೇಯಿಸಿ. ನಿಂಬೆರಸ ಮತ್ತು ಕೊತ್ತುಂಬರಿಸೊಪ್ಪು ಸೇರಿಸಿ.ನಂತರ ಹಾಗೇ ಸ್ವಲ್ಪ ಮಸೆಯಿರಿ, ಇದೀಗ ತಯಾರಾಗುತ್ತದೆ,ಮಸ್ಕಾಯಿ ಪಲ್ಯ.
* ಕಾಯಿ ತುರಿ ಬೇಕಾದವರು,ಬದನೆ ಬೇಯಿಸುವಾಗಲೇ ಸೇರಿಸಿ.
* ಈ ಮಸ್ಕಾಯಿ ಪಲ್ಯವು ರೊಟ್ಟಿ ಮತ್ತು ಚಪಾತಿಗೆ ತುಂಬಾ ರುಚಿಯಾಗಿ ಚೆನ್ನಾಗಿರುತ್ತದೆ.
* ಇದಕ್ಕೆ ಇನ್ನ್ಯಾವುದೆ ಮಸಾಲೆ ಹಾಕುವುದಿಲ್ಲ. ಹಸಿಮೆಣಸಿನಕಾಯಿ ರುಚಿಗೆ ತಕ್ಕಷ್ಟು ಹಾಕಿ.
* ಹಸಿರು ಬದನೆಕಾಯಿಯಲ್ಲಿ ತಯಾರಿಸಿದರೆ ರುಚಿ ಹೆಚ್ಚು.

Kesari Bhath / Shira - ಕೇಸರಿ ಭಾತ್ / ಶಿರಾ

0 comments

ಕೇಸರಿ ಭಾತ್:

ಬೇಕಾಗುವ ಸಾಮಗ್ರಿಗಳು:

ರವೆ (ಸಣ್ಣ ರವೆ/ಚಿರೋಟಿ ರವೆ)-ಒಂದು ಕಪ್
ಸಕ್ಕರೆ ರುಚಿಗೆ
ತುಪ್ಪ -ಎರಡು ಚಮಚ
ರಿಫೈಂಡ್ ಆಯಿಲ್ -ಎರಡು ಚಮಚ
ಹಾಲು - ಅರ್ಧ ಕಪ್
ಕೇಸರಿ ದಳಗಳು ಸ್ವಲ್ಪ
ಏಲಕ್ಕಿ ಪುಡಿ
ದ್ರಾಕ್ಷಿ ಮತ್ತು ಗೋಡಂಬಿ

ತಯಾರಿಸುವ ರೀತಿ:

ಒಂದೆರಡು ಚಮಚ ಹಾಲಿನಲ್ಲಿ ಕೇಸರಿ ದಳಗಳನ್ನು ನೆನೆಸಿಡಿ.
ಮೊದಲು ರವೆಯನ್ನು ತುಪ್ಪ ಹಾಕಿ ಹುರಿದುಕೊಳ್ಳಿ, ಹಸಿವಾಸನೆ ಹೋಗಿ ಘಂ ಎನ್ನುವ ವಾಸನೆ ಬರುವವರೆಗೂ ರವೆಯನ್ನು ಸೀದಿಸದೆ ಹುರಿದುಕೊಳ್ಳಿ.
ಪಾತ್ರೆಗೆ ತುಪ್ಪ ಮತ್ತು ಎಣ್ಣೆಯನ್ನು ಹಾಕಿ ದ್ರಾಕ್ಷಿ ಮತ್ತು ಗೋಡಂಬಿಯನ್ನು ಹುರಿಯಿರಿ, ಅದಕ್ಕೆ ಹಾಲು ಮತ್ತು ಸ್ವಲ್ಪ ನೀರು ನಿಮಗೆ ಬೇಕಾದ ಅಳತೆ ಹಾಕಿಕೊಂಡು ಕುದಿಯಲು ಇಟ್ಟು, ಅದಕ್ಕೆ ಸಕ್ಕರೆ ಸೇರಿಸಿ, ಸಕ್ಕರೆ ಕರಗಿ ಕುದಿ ಬರುತ್ತಿರುವಾಗ ಏಲಕ್ಕಿ ಪುಡಿ ಮತ್ತು ಹಾಲಿನಲ್ಲಿ ನೆನೆಸಿದ ಕೇಸರಿದಳ ಹಾಕಿ, ಮತ್ತೆರಡು ಚಮಚ ತುಪ್ಪ ಹಾಕಿ, ಆಮೇಲೆ ಹುರಿದಿರುವ ರವೆಯನ್ನು ಸ್ವಲ್ಪ ಸ್ವಲ್ಪವೇ ಹಾಕುತ್ತಾ ಗಂಟು ಕಟ್ಟದಂತೆ ಎಲ್ಲ ಬೆರೆತುಕೊಳ್ಳುವಂತೆ ಚೆನ್ನಾಗಿ ತಿರುಗಿಸಿ. ಕೆಳಗಿಳಿಸಿ,ಮುಚ್ಚಿಡಿ. ಕೇಸರಿಭಾತ್ ತಯಾರಿಸುವಾಗ ಸ್ವಲ್ಪ ತೆಳುವಾಗಿ ತಯಾರಿಸಿ, ನಂತರ ತಣ್ಣಗಾದ ಮೇಲೆ ಅದು ತುಂಬಾ ಗಟ್ಟಿಯಾಗುತ್ತದೆ. ತುಪ್ಪ ಸ್ವಲ್ಪ ಜಾಸ್ತಿ ಹಾಕಿ. ಬಿಸಿಬಿಸಿಯಾದ ಕೇಸರಿಭಾತ್ ತಿನ್ನಲು ತಯಾರಾಗಿದೆ. ಬಿಸಿಯಾದ ಕೇಸರಿಭಾತ್ ಬಹಳ ಚೆನ್ನಾಗಿರುತ್ತದೆ.

* ರವೆಯನ್ನು ಹುರಿಯುವಾಗ ತುಂಬಾ ಹುಷಾರಾಗಿ ಹುರಿಯಬೇಕು.
* ಕೇಸರಿಭಾತ್ ಗೆ ಬರೀ ನೀರನ್ನು ಹಾಕದೆ ಹಾಲನ್ನು ಸೇರಿಸಿದರೆ ರುಚಿ ಹೆಚ್ಚು.
* ತುಪ್ಪದ ಜೊತೆ ಎಣ್ಣೆಯನ್ನು ಹಾಕುವುದರಿಂದ ಬೇಗ ಗಟ್ಟಿಯಾಗುವುದಿಲ್ಲ.
* ಕೆಲವರು ಕೇಸರಿಬಣ್ಣ ಹಾಕುತ್ತಾರೆ, ಇದರಿಂದ ಕೇಸರಿಭಾತ್ ಬಣ್ಣ ಚೆನ್ನಾಗಿ ಆಕರ್ಷಕವಾಗಿ ಬರುತ್ತದೆ. ಆದರೆ ಕೇಸರಿ ದಳಗಳು ಆರೋಗ್ಯಕ್ಕೆ ಒಳ್ಳೆಯದು, ಆಗಾಗಿ ಅದನ್ನು ಉಪಯೋಗಿಸಿ. ಬಣ್ಣ ಹಾಕಲೇ ಬೇಕೆನಿಸಿದವರು ಒಳ್ಳೆಯ ಪ್ರಾಡಕ್ಟ್ ಬಣ್ಣವನ್ನು ತನ್ನಿ.ಅದು ಚಿಟಿಕೆ ಹಾಕಿದರೆ ಸಾಕು.
* ಇದು ಬೇಗನೇ ತಯಾರಿಸಬಹುದಾದಂತಹ ಸಿಹಿ. ಕೆಲವರು ಈ ಸಿಹಿತಿಂಡಿಗೆ "ಶಿರಾ" ಎಂದು ಕೂಡ ಕರೆಯುತ್ತಾರೆ.

Radish Samber / Moolangi Saaru

0 comments

ಮೂಲಂಗಿ ಹುಳಿ:

ಬೇಕಾಗುವ ಸಾಮಗ್ರಿಗಳು:

ತೊಗರಿಬೇಳೆ
ಮೂಲಂಗಿ, ಹೆಚ್ಚಿದ್ದು
ಈರುಳ್ಳಿ ಸ್ವಲ್ಪ
ಕಾಯಿತುರಿ ಸ್ವಲ್ಪ
ಸಾರಿನ ಪುಡಿ
ಹುಣಸೇರಸ - ೧ ಚಮಚ
ಅರಿಶಿಣದ ಪುಡಿ
ಎಣ್ಣೆ
ಉಪ್ಪು

ತಯಾರಿಸುವ ವಿಧಾನ:

ತೊಗರಿಬೇಳೆಗೆ ಅರಿಶಿಣ ಮತ್ತು ಸ್ವಲ್ಪ ಎಣ್ಣೆಯನ್ನು ಹಾಕಿ ಬೇಯಿಸಿಕೊಂಡು ಅದಕ್ಕೆ ಮೂಲಂಗಿ ಮತ್ತು ಟಮೋಟ ಹಾಕಿ, ಮೂಲಂಗಿ ಬೇಯುವವರೆಗೂ ಬೇಯಿಸಿ, ನಂತರ ಸಾರಿನಪುಡಿ, ಹುಣಸೇರಸ ,ಉಪ್ಪು ಮತ್ತು ರುಬ್ಬಿದ ಮಿಶ್ರಣ ಹಾಕಿ, ಚೆನ್ನಾಗಿ ಕುದಿಸಿ. ನಂತರ ಅದಕ್ಕೆ ಒಗ್ಗರಣೆ ಸೇರಿಸಿ. ಇಳಿಸಿ.
*ರುಬ್ಬಲು - ಕಾಯಿತುರಿ, ಈರುಳ್ಳಿ ಮತ್ತು ಸಾರಿನಪುಡಿಯನ್ನು ಸೇರಿಸಿ ರುಬ್ಬಿಕೊಳ್ಳಿ.
*ಒಗ್ಗರಣೆ - ಎಣ್ಣೆ ಹಾಕಿ, ಸಾಸಿವೆ, ಇಂಗು, ಕರಿಬೇವು ಮತ್ತು ಚುಟುಕ ಈರುಳ್ಳಿ ಹಾಕಿ ಬಾಡಿಸಿ.
* - ರುಬ್ಬಿಕೊಳ್ಳಲು ವೇಳೆ/ಬಿಡುವು ಇಲ್ಲದವರು ಕಾಯಿತುರಿ ರುಬ್ಬಿಕೊಳ್ಳದೆ ಆಗೆ ಕೂಡ ಸಾಂಬಾರ್ ತಯಾರಿಸಿಕೊಳ್ಳಬಹುದು. ಆಗ ಸಾರಿಗೆ ರುಬ್ಬಿದ ಮಿಶ್ರಣದ ಹಾಕುವ ಬದಲು ಬರೀ ಸಾರಿನ ಪುಡಿ ಹಾಕಿ ಕುದಿಸಿದರೆ ಆಯಿತು. ಈ ಸಾಂಬಾರ್ ಕೂಡ ರುಚಿಯಾಗಿಯೇ ಇರುತ್ತದೆ.
* ಮೂಲಂಗಿ ಜೊತೆ ಹುರುಳಿಕಾಯಿ/ಆಲೂಗೆಡ್ಡೆ/ಕ್ಯಾರೆಟ್ ಸಹ ಸೇರಿಸಿ ತಯಾರಿಸಬಹುದು.

Bittergourd /ಹಾಗಲಕಾಯಿ ಗೊಜ್ಜು

0 comments

ಹಾಗಲಕಾಯಿ ಎಷ್ಟೇ ಕಹಿ ಆಗಿದ್ದರೂ ಅದು ತುಂಬಾ ಹೆಸರುವಾಸಿಯಾಗಿದೆ. ಇದು ಮಧುಮೇಹ ರೋಗಕ್ಕೆ ರಾಮಬಾಣವಾದ್ದರಿಂದ ಎಲ್ಲರಿಗೂ ಹತ್ತಿರವಾಗುತ್ತಿದೆ. ಇದರಿಂದ ಅನೇಕ ಅಡಿಗೆಗಳನ್ನು ಮಾಡಬಹುದು. ಈ ಕಾಯಿಯ ರಸವನ್ನು ಪ್ರತಿದಿನ ಶುಗರ್ ಇರುವವರು ಕುಡಿದರೆ ಉಪಯುಕ್ತ. ಕಹಿಯಾಗಿದ್ದರೂ ಒಂದು ವಿಚಿತ್ರ ರೀತಿಯ ರುಚಿ ಕೊಡುವ ಹಾಗಲಕಾಯಿ ನೋಡಲು ಚೆಂದ. ಅದು ಬಳ್ಳಿಯಲ್ಲಿ ಕಾಯಿ ಬಿಟ್ಟಿದ್ದಾಗ ಅದೊಂದು ತರಹ ಸೊಗಸಾಗಿ ಕಾಣುತ್ತದೆ. ಕಹಿಯಾದರೂ ಅದು ಅಮೃತವಿದ್ದಂತೆ. ಈಗ ಇಲ್ಲಿ ಹಾಗಲಕಾಯಿ ಗೊಜ್ಜು ಬಗ್ಗೆ ತಿಳಿಸಿದೆ. ನೀವು ತಯಾರಿಸಿ ನೋಡಿ.


ಹಾಗಲಕಾಯಿ ಗೊಜ್ಜು:

ಬೇಕಾಗುವ ಸಾಮಗ್ರಿಗಳು:

ಹೆಚ್ಚಿದ ಹಾಗಲಕಾಯಿ - ಒಂದು ಬಟ್ಟಲು
ಹೆಚ್ಚಿದ ಈರುಳ್ಳಿ ಸ್ವಲ್ಪ
ಅರಿಶಿಣದ ಪುಡಿ
ಬೆಲ್ಲ ಸ್ವಲ್ಪ
ಹುಣೆಸೇರಸ ಒಂದೆರಡು ಚಮಚ
ಕರಿಬೇವು
ಕಾಯಿತುರಿ ಸ್ವಲ್ಪ
ಒಂದು ಸಣ್ಣ ಈರುಳ್ಳಿ
ಅಚ್ಚ ಮೆಣಸಿನ ಪುಡಿ
ಧನಿಯಾ ಪುಡಿ
ಹೆಚ್ಚಿದ ಕೊತ್ತುಂಬರಿ ಸೊಪ್ಪು
ಉಪ್ಪು
ಎಣ್ಣೆ

ವಿಧಾನ:

ಮೊದಲು ಸಣ್ಣ ಈರುಳ್ಳಿ, ತೆಂಗಿನಕಾಯಿತುರಿ, ಕಾರದಪುಡಿ,ಧನಿಯಾಪುಡಿಯನ್ನು ಸೇರಿಸಿ ರುಬ್ಬಿಕೊಳ್ಳಿ.
ಪಾತ್ರೆಗೆ ಎಣ್ಣೆಯನ್ನು ಹಾಕಿ ಅದು ಕಾದ ಬಳಿಕ,ಸಾಸಿವೆ,ಕರಿಬೇವು,ಅರಿಶಿಣ,ಹೆಚ್ಚಿದ ಈರುಳ್ಳಿ ಹಾಕಿ,ಬಾಡಿಸಿ. ಹಾಗಲಕಾಯಿಗಳನ್ನು ಹಾಕಿ ಒಗ್ಗರಣೆಯಲ್ಲಿಯೇ ಸ್ವಲ್ಪ ಹೊತ್ತು ಹುರಿಯಿರಿ. ನಂತರ ಅದಕ್ಕೆ ರುಬ್ಬಿದ ಮಸಾಲೆಯನ್ನು ಸೇರಿಸಿ, ಉಪ್ಪು ಮತ್ತು ಬೆಲ್ಲ ಹಾಕಿ, ನೀರು ಎಷ್ಟು ಬೇಕೋ ಅಷ್ಟನ್ನು ಹಾಕಿ, ಬೇಯಲು ಬಿಡಿ. ಬೆಂದ ನಂತರ ಇಳಿಸಿ,ಕೊತ್ತುಂಬರಿ ಸೊಪ್ಪನ್ನು ಹಾಕಿ ಬೆರೆಸಿ.ಮನೆಯಲ್ಲಿ ಎಲ್ಲರು ತಿನ್ನಬಹುದಾದಂತ ಹಾಗಲಕಾಯಿ ಗೊಜ್ಜು ತಯಾರಾಗಿದೆ. ಇದನ್ನು ಅನ್ನ,ಚಪಾತಿ,ರೊಟ್ಟಿಗಳೊಂದಿಗೆ ಬಡಿಸಬಹುದು. ಅನ್ನಕ್ಕೂ ತುಂಬಾ ರುಚಿಯಾಗಿರುತ್ತದೆ ಅಥವಾ ಊಟಕ್ಕೆ ನೆಂಚಿಕೊಳ್ಳಲು ಚೆನ್ನಾಗಿರುತ್ತದೆ.ಈ ಗೊಜ್ಜು ಸ್ವಲ್ಪ ದೊಡ್ಡ ಮಕ್ಕಳಿಗೆ ಸಹ ಇಷ್ಟವಾಗುತ್ತದೆ.

Poha Uppittu /ಅವಲಕ್ಕಿ ಒಗ್ಗರಣೆ

0 comments

ಅವಲಕ್ಕಿ ಒಗ್ಗರಣೆ:

ತೊಳೆದು ನೆನೆಸಿದ ಅವಲಕ್ಕಿ
ಹೆಚ್ಚಿದ ಈರುಳ್ಳಿ
ಹಸಿಮೆಣಸಿನಕಾಯಿ
ಎಣ್ಣೆ, ಸಾಸಿವೆ, ಕರಿಬೇವು
ಕಡ್ಲೆಬೇಳೆ, ಉದ್ದಿನಬೇಳೆ
ಅರಿಶಿನ,ಉಪ್ಪು
ಕಡಲೆಕಾಯಿಬೀಜಗಳು
ಕಾಯಿತುರಿ ಮತ್ತು
ಕೊತ್ತುಂಬರಿ ಸೊಪ್ಪು
ನಿಂಬೆರಸ/ಹುಣಸೆರಸ

ವಿಧಾನ:

ಅವಲಕ್ಕಿಯನ್ನು ನೆನೆಸುವ ಕಾಲವೂ ಅವಲಕ್ಕಿಯನ್ನು ಅವಲಂಬಿಸಿರುತ್ತದೆ. ಏಕೆಂದರೆ ಅವಲಕ್ಕಿಯಲ್ಲಿ ಸುಮಾರು ವಿಧಗಳಿವೆ. ಅದಕ್ಕಾಗಿ ಅದು ಯಾವುದು ಉಪಯೋಗಿಸುತ್ತೀರೋ ಅದನ್ನು ನೋಡಿ ನೆನೆಸಿ. ನೀರಿನಲ್ಲಿ ತೊಳೆದು ಇಟ್ಟರೆ ಸಾಕು ನೆನೆಯುತ್ತದೆ.
ಮೊದಲು ಪಾತ್ರೆ ಅಥವ ಬಾಣಲೆಗೆ ಅವಶ್ಯಕತೆ ಇದ್ದಷ್ಟು ಎಣ್ಣೆ ಹಾಕಿ,ಸಾಸಿವೆ,ಕಡ್ಲೆಕಾಯಿಬೀಜಗಳನ್ನು ಹಾಕಿ,ಅದನ್ನು ಸರಿಯಾಗಿ ಹದವಾಗಿ, ಹುರಿದುಕೊಂಡು,ಕಡ್ಲೆಬೇಳೆ,ಉದ್ದಿನಬೇಳೆಯನ್ನು ಹುರಿದ ನಂತರ ಹಸಿಮೆಣಸಿನಕಾಯಿ,ಈರುಳ್ಳಿಯನ್ನು ಹಾಕಿ ನಾಲ್ಕೈದು ನಿಮಿಷ ಹುರಿದು ಅದಕ್ಕೆ ಅರಿಶಿನ ಮತ್ತು ಉಪ್ಪು ಹಾಕಿ,ನೆನೆಸಿದ ಅವಲಕ್ಕಿಯನ್ನು ಹಾಕಿ,ಇಳಿಸಿ.ಬೆರೆಸಿ,ನಿಂಬೆರಸ,ಕಾಯಿತುರಿ ಮತ್ತು ಕೊತ್ತುಂಬರಿ ಸೊಪ್ಪನ್ನು ಹಾಕಿ ಎಲ್ಲವೂ ಚೆನ್ನಾಗಿ ಬೆರೆತುಕೊಳ್ಳುವಂತೆ ತಿರುಗಿಸಿ,ಕಲೆಸಿ.
*ಹುಣಸೆರಸ ಹಾಕುವುದಾದರೆ ಒಗ್ಗರಣೆಯಲ್ಲಿಯೇ ಹಾಕಿ, ಬೆರೆಸಿ

Kadubu- ಕಡುಬು:ಸಿಹಿ ಕಡುಬು

0 comments

ಕಡುಬು:
ಬೇಕಾಗುವ ಸಾಮಾನುಗಳು:

ಹಿಟ್ಟು ಅಥವಾ ಮುದ್ದೆಗೆ:ಅಕ್ಕಿ ಹಿಟ್ಟು - ಎರಡು ಬಟ್ಟಲು
ಅರ್ಧ ಚಮಚ ಉಪ್ಪು

ಹೂರಣಕ್ಕೆ:

ಹುರಿಗಡಲೆ -ಬೇಕಾಗುವಷ್ಟು
ಗಸಗಸೆ ಸ್ವಲ್ಪ
ಎಳ್ಳು ಸ್ವಲ್ಪ
ಬೆಲ್ಲ ರುಚಿಗೆ
ಏಲಕ್ಕಿ ಪುಡಿ ಸ್ವಲ್ಪ
ಕಾಯಿತುರಿ - ಒಂದು ಕಾಯಿ

ತಯಾರಿಸುವ ವಿಧಾನ:

ಒಂದು ಪಾತ್ರೆಯಲ್ಲಿ ನೀರು ಕಾಯಿಸಿ, ಅದು ಕುದಿಯುತ್ತಿರುವಾಗ ಅಕ್ಕಿ ಹಿಟ್ಟನ್ನು ಮಧ್ಯಕ್ಕೆ ಹಾಕಿ, ಉಪ್ಪು ಹಾಕಿಡಿ. ಅದು ಚೆನ್ನಾಗಿ ಬೇಯಸಿ, ಅದನ್ನು ಏನು ಕಲಕದೇ ಬೇಯಲು ಬಿಟ್ಟು ಹತ್ತರಿಂದ ಹದಿನೈದು ನಿಮಿಷ ಬೇಯಿಸಿ. ಒಂದು ಹಿಟ್ಟಿನ ಕೋಲು ಅಥವಾ ಸೌಟ್ ನಿಂದ ಹಿಟ್ಟನ್ನು ತಿರುಗಿಸಿ, ತಿರುಗಿಸುವಾಗ ಗಂಟು ಆಗದಂತೆ ಎಚ್ಚರಿಕೆವಹಿಸಿ. ಎಲ್ಲಾ ಕಡೆಯ ಹಿಟ್ಟನ್ನು ನೀರಿನಲ್ಲಿ ಕಲಕಿ, ಅದೆಲ್ಲವೂ ಚೆನ್ನಾಗಿ ಬೆರೆಯುವಂತೆ ತಿರುಗಿಸಿ. ಸ್ವಲ್ಪ ಗಟ್ಟಿ ಎನಿಸಿದರೆ, ಬಿಸಿನೀರು ಕಾಯಿಸಿಕೊಂಡು ಮತ್ತೆ ಚೆನ್ನಾಗಿ ತಿರುಗಿಸಿ. ಇದನ್ನು ಅಂದರೆ ಈ ರೀತಿ ಹಿಟ್ಟು ಅಥವ ಮುದ್ದೆಯನ್ನು ತಯಾರಿಸುವಾಗ ಹುಷಾರಾಗಿ ನೋಡಿಕೊಂಡು ಹದವಾಗಿ ತಿರುಗಿಸಬೇಕಾಗುತ್ತದೆ. ಇದಕ್ಕೆ ಹಿಟ್ಟು ತೊಳೆಸುವುದು ಅಥವ ಹಿಟ್ಟು ಕೂಡಿಸುವುದು ಅಥವ ಹಿಟ್ಟು ತಿರುಗಿಸುವುದು ಎಂದು ಒಂದೊಂದು ರೀತಿ ಕರೆಯುತ್ತಾರೆ. ಅದೇನೇ ಕರೆದರು ತಯಾರಿಸುವ ರೀತಿ ಒಂದೇ. ಹಿಟ್ಟನ್ನು ಗಂಟುಗಳಿಲ್ಲದಂತೆ ಚೆನ್ನಾಗಿ ತಿರುಗಿಸಿ, ಹಿಟ್ಟನ್ನು ತಟ್ಟೆ / ಮಣೆ/ ಕಟ್ಟಿಂಗ್ ಬೋರ್ಡ್ ಮೇಲೆ ಹಾಕಿಕೊಂಡು ಚೆನ್ನಾಗಿ ನಾದಿ. ಬಿಸಿಯಿರುವಾಗಲೇ ಇದನ್ನೆಲ್ಲಾ ಮಾಡಿಕೊಳ್ಳಬೇಕು. ನಾದಿಟ್ಟ ಮೇಲೆ ಅದರಿಂದ ಪುಟ್ಟ ಪುಟ್ಟ ಉಂಡೆ ಮಾಡಿಕೊಳ್ಳಿ. ಇದು ಸ್ವಲ್ಪ ಕಷ್ಟದ ಕೆಲಸ. ಯಾವಾಗಲೂ ಸರಿಯಾಗಿಯೇ ಬರುತ್ತದೆ ಎಂದು ಹೇಳಕ್ಕೆ ಆಗಲ್ಲ. ಏಕೆಂದರೆ ಈಗ ನಾವು ತರುವ ಹಿಟ್ಟಿನ ಮೇಲೆ ಅವಲಂಬಿಸಿರುತ್ತದೆ.ಕೆಲವು ಹಿಟ್ಟು ಬಾಯ್ಲ್ಡ್ ರೈಸ್ ನಿಂದ ಮಾಡಿರುತ್ತಾರೆ. ಅದಕ್ಕೆ ಸ್ವಲ್ಪ ನೀರು ಜಾಸ್ತಿ ಬೇಕಾಗುತ್ತೆ ಮತ್ತು ಬೇಗ ಹಿಟ್ಟು ಗಟ್ಟಿಯಾಗುತ್ತೆ ಸಹ. ಅದಕ್ಕಾಗಿ ಸ್ವಲ್ಪ ಹದ ತಿಳಿದು, ತಯಾರಿಸುವುದು ಉತ್ತಮ. ಈ ತರಹದ ಕಡುಬುಗಳಿಗೆ ಅಕ್ಕಿಯನ್ನು ತೊಳೆದು, ನೆರಳಲ್ಲಿ ಒಣಗಿಸಿ,ಮಿಲ್ ಗೆ ಹಾಕಿಸುವಂತ ನಾವೇ ತಯಾರಿಸಿದ ಅಕ್ಕಿ ಹಿಟ್ಟನ್ನು ಉಪಯೋಗಿಸಿದರೆ ತುಂಬ ಚೆನ್ನಾಗಿ ಅಕ್ಕಿಹಿಟ್ಟು/ಮುದ್ದೆ ಬರುತ್ತದೆ.
ಈ ರೀತಿ ತಯಾರಿಸಿದಂತ ಮುದ್ದೆ ಅಥವ ಹಿಟ್ಟನ್ನು ಚಿಕ್ಕ ಚಿಕ್ಕ ಉಂಡೆ ಮಾಡಿಕೊಂಡು ಪೂರಿಯಂತೆ ಲಟ್ಟಿಸಿ, ಅದರೊಳಗೆ ಹೂರಣವನ್ನು ತುಂಬ ಬೇಕು. ಮಧ್ಯಕ್ಕೆ ಅಂದರೆ ಅರ್ಧ ಭಾಗಕ್ಕೆ ಮಡಿಚಿ ಅಂಚುಗಳನ್ನು ಒತ್ತಿ ಮುಚ್ಚಬೇಕು. ಚಿತ್ತಾರ ಮಾಡಲು ಬಂದರೆ ಆ ತರ ಮಡಿಸಿ, ಇಲ್ಲವೆಂದರೆ ಹೆಚ್ಚಿನ ಭಾಗದ ಹಿಟ್ಟನ್ನು ಕತ್ತರಿಸಿ. (ಎಡ್ಜ್ ಕಟ್ ಮಾಡಿ, ಅದರಿಂದ ಬರುವ ಎಕ್ಸ್ಟ್ರಾ ಹಿಟ್ಟನ್ನು ತೆಗೆದು ಮತ್ತೆ ಉಪಯೋಗಿಸಿ)ಅದನ್ನು ತೆಗೆದಿಡಿ. ಮತ್ತೆ ಉಪಯೋಗಿಸಿ. ಈ ಕಡುಬುಗಳನ್ನು ಹಬೆಯಲ್ಲಿ ಕೆಲವರು ಬೇಯಿಸಿ ತಿನ್ನುತ್ತಾರೆ, ಕೆಲವರು ಹಾಗೇ ಇಷ್ಟಪಡುತ್ತಾರೆ.ಸಿಹಿ ಕಡುಬುಗಳನ್ನಾದರೆ ಬೇಯಿಸದೆ ತಿನ್ನಬಹುದು. ಖಾರದ ಕಡುಬು ಅಥವಾ ಹೆಸರುಬೇಳೆ ಕಡುಬು ತಯಾರಿಸಿದರೆ ಹಬೆಯಲ್ಲಿ ಬೇಯಿಸಬೇಕು.ಇದಿಷ್ಟು ಕಡುಬಿನ ಹಿಟ್ಟಿನ ಬಗ್ಗೆ.

ಹೂರಣ ತಯಾರಿಸಲು:

ಹುರಿಗಡಲೆಯನ್ನು ಪುಡಿ ಮಾಡಿಕೊಳ್ಳಿ, ಗಸಗಸೆ ಮತ್ತು ಎಳ್ಳನ್ನು ಹುರಿದುಕೊಂಡು ಪುಡಿ ಮಾಡಿ, ಬೆಲ್ಲವನ್ನು ಸಹ ಸಣ್ಣ ಪುಡಿ ಮಾಡಿಕೊಂಡು ಅದಕ್ಕೆ ಹುರಿಗಡಲೆ ಪುಡಿ, ಗಸಗಸೆ,ಎಳ್ಳು ಮತ್ತು ಏಲಕ್ಕಿ ಪುಡಿಯನ್ನು ಬೆರೆಸಿ, ಎಲ್ಲವನ್ನು ಚೆನ್ನಾಗಿ ಹೊಂದಿಕೊಳ್ಳುವಂತೆ ಕೈನಲ್ಲಿ ಬೆರೆಸಿ. ಇದನ್ನು ಕಡುಬಿಗೆ ತುಂಬುವ ಹೂರಣ ಎನ್ನುತ್ತೇವೆ. ಕಡುಬು ತಯಾರಿಸುವಾಗ ಇದಕ್ಕೆ ಹಸಿ ಕಾಯಿತುರಿಯನ್ನು ಹಾಕಬೇಕು ಮತ್ತು ಚೆನ್ನಾಗಿ ಬೆರೆಸಬೇಕು, ಕಾಯಿತುರಿ ಜಾಸ್ತಿ ಇದ್ದಷ್ಟು ರುಚಿ ಜಾಸ್ತಿ. ಅದಕ್ಕೆ ಪುಡಿ ಅಂದರೆ ಹೂರಣ ತಯಾರಿಸುವಾಗ ಬೆಲ್ಲವನ್ನು ಸ್ವಲ್ಪ ಜಾಸ್ತಿಯೇ ಹಾಕಬೇಕು. ಅದು ಕಾಯಿತುರಿ ಹಾಕಿದಾಗ ಸರಿಯಾಗುತ್ತದೆ.
ಅಕ್ಕಿ ಹಿಟ್ಟು ಅಥವ ಮುದ್ದೆಯಿಂದ ಸಣ್ಣ ಉಂಡೆಯನ್ನು ತೆಗೆದುಕೊಂಡು ಅದನ್ನು ಬಟ್ಟಲಿನ ಆಕಾರ ಅಥವಾ ಪೂರಿಯಂತೆ ತಟ್ಟಿಕೊಂಡು ಅದರೊಳಗೆ ಕಡ್ಲೆಮಿಶ್ರಣದ ಹೂರಣವನ್ನು ತುಂಬಿ, ಮಧ್ಯ/ಅರ್ಧ ಭಾಗಕ್ಕೆ ಮಡಿಸಿಕೊಂಡು ಎರಡು ಬದಿಯ ಅಂಚನ್ನು ಒಂದಕ್ಕೊಂದು ನೀರು/ಹಾಲು/ತೆಂಗಿನಹಾಲು ಯಾವುದಾದರೂ ಉಪಯೋಗಿಸಿ ಅಂಟಿಸಿ. ಅಂಚು ಕತ್ತರಿಸಿ/ಡಿಸೈನ್ ಮಾಡಿ. ಇದೇರೀತಿ ಎಲ್ಲವನ್ನು ತಯಾರಿಸಿ, ಸಿಹಿಕಡುಬು ತಿನ್ನಲು ತಯಾರಾಗುತ್ತದೆ.

* ಹೂರಣವನ್ನು ಹಿಂದಿನ ದಿನ/ ಮೊದಲೆ ತಯಾರಿಸಿಕೊಳ್ಳಬಹುದು, ಇದಕ್ಕೆ ನೀರು ಸೇರಿಸದೆ ಇರುವುದರಿಂದ ಹೂರಣ ಅಂದರೆ ಕಡ್ಲೆಮಿಶ್ರಣ ಪುಡಿಯೂ ಸುಮಾರು ದಿನ ಇರುತ್ತದೆ. ತಯಾರಿಸಿಟ್ಟುಕೊಂಡಿದ್ದರೆ ಯಾವಾಗ ಬೇಕೋ ಆಗ ಕಡುಬನ್ನು ಮಾಡಿಕೊಳ್ಳಬಹುದು.
*ಗಸಗಸೆ,ಎಳ್ಳು ಹುರಿದು, ಅದರ ಜೊತೆ ಕಡ್ಲೆ ಮತ್ತು ಬೆಲ್ಲವನ್ನು ಸೇರಿಸಿ, ಒಟ್ಟಿಗೆ ಎಲ್ಲವನ್ನು ಮಿಕ್ಸಿಗೆ ಹಾಕಿ ಪುಡಿ ಮಾಡಿಕೊಳ್ಳಬಹುದು.
* ಕಡುಬು ತಯಾರಿಸುವಾಗ ಹಸಿ ತೆಂಗಿನಕಾಯಿ ತುರಿಯನ್ನು ಮರೆಯದೆ ಸೇರಿಸಿ,ಬೆರೆಸಿ. ಅದೇ ತೆಂಗಿನ ತುರಿಯಿಂದ ಸ್ವಲ್ಪ ಹಾಲು ಹಿಂಡಿಕೊಳ್ಳಿ. ಅಂಚುಗಳನ್ನು ಅಂಟಿಸುವಾಗ ಉಪಯೋಗಿಸಲು ಬೇಕು.
*ಯಾವ ರೀತಿಯ ಕಡುಬುಗಳನ್ನೆ ಆಗಲಿ ತಯಾರಿಸುವಾಗ ಅಂಚುಗಳನ್ನು ಸರಿಯಾಗಿ ಅಂಟಿಸಿ, ಬಿಟ್ಟುಕೊಳ್ಳುತ್ತವೆ ಕೆಲವೊಮ್ಮೆ, ಆಗ ಹೂರಣವೆಲ್ಲಾ ಚೆಲ್ಲುತ್ತದೆ/ಆಚೆ ಬರುತ್ತದೆ.
* ಇದೇ ರೀತಿ ಮೋದಕವನ್ನು ತಯಾರಿಸಲು ಅಕ್ಕಿ ಹಿಟ್ಟಿನಿಂದ ಪುಟ್ಟ ಬಟ್ಟಲಿನ ಆಕಾರ ಮಾಡಿ ಅದಕ್ಕೆ ಹೂರಣ ತುಂಬಿ, ಮೇಲ್ಭಾಗದಲ್ಲಿ ಎಲ್ಲಾ ಅಂಚುಗಳನ್ನು ಮೇಲಕ್ಕೆ ತಗೊಂಡು ಮುಚ್ಚಿ, ಈ ಮೋದಕ ಸಿಹಿಯು ನಮ್ಮ ಗಣಪನಿಗೆ ಬಹಳ ಅಚ್ಚುಮೆಚ್ಚು.
* ಈ ಕಡುಬುಗಳನ್ನು ಹಾಗೇಯೇ ತಿನ್ನಬಹುದು, ಆವಿಯಲ್ಲಿ ಬೇಯಿಸುವ ಅಗತ್ಯವಿಲ್ಲ. ಕೆಲವರು ಮಾತ್ರ ಬೇಯಿಸಿ ತಿನ್ನುತಾರೆ. ಸಾಮನ್ಯವಾಗಿ ಹಾಗೇ ತಿನ್ನುತ್ತಾರೆ, ತಿನ್ನುವಾಗ ಕಡುಬುಗಳ ಮೇಲೆ ತುಪ್ಪ ಹಾಕಿಕೊಂಡು ತಿನ್ನಬೇಕು.

ಕಡುಬುಗಳನ್ನು ಭೀಮನ ಅಮವಾಸ್ಯೆ ಮತ್ತು ಗಣೇಶ ಚತುರ್ಥಿ ಹಬ್ಬದಲ್ಲಿ ಖಾಯಂ ಆಗಿ ತಯಾರಿಸುತ್ತಾರೆ

Kadubina Hittu/Mudde - ಅಕ್ಕಿಹಿಟ್ಟು/ಮುದ್ದೆ

0 comments

ಕಡುಬುಗಳನ್ನು ಭೀಮನ ಅಮವಾಸ್ಯೆ ಮತ್ತು ಗಣೇಶ ಚತುರ್ಥಿ ಹಬ್ಬದಲ್ಲಿ ಖಾಯಂ ಆಗಿ ತಯಾರಿಸುತ್ತಾರೆ. ಕಡುಬಿನಹಿಟ್ಟು ಬಗ್ಗೆ ಒಂದಿಷ್ಟು ಮಾಹಿತಿ.

ಕಡುಬಿನ ಹಿಟ್ಟು ತಯಾರಿಸುವ ರೀತಿ:

ಬೇಕಾಗುವ ಸಾಮಗ್ರಿಗಳು:
ಅಕ್ಕಿ ಹಿಟ್ಟು
ಕಾಲು ಚಮಚ ಉಪ್ಪು
ಎಣ್ಣೆ - ಒಂದು ಚಮಚ
ನೀರು

ಒಂದು ಪಾತ್ರೆಯಲ್ಲಿ ನೀರು ಕಾಯಿಸಿ, ಅದು ಕುದಿಯುತ್ತಿರುವಾಗ ಅಕ್ಕಿ ಹಿಟ್ಟನ್ನು ಮಧ್ಯಕ್ಕೆ ಹಾಕಿ, ,ಎಣ್ಣೆ ಮತ್ತು ಉಪ್ಪು ಹಾಕಿಡಿ. ಹಿಟ್ಟನ್ನು ಚೆನ್ನಾಗಿ ಬೇಯಸಿ, ಅದನ್ನು ಏನು ಕಲಕದೇ ಬೇಯಲು ಬಿಟ್ಟು ಹತ್ತರಿಂದ ಹದಿನೈದು ನಿಮಿಷ ಬೇಯಿಸಿ. ಒಂದು ಹಿಟ್ಟಿನ ಕೋಲು ಅಥವಾ ಸೌಟ್ ನಿಂದ ಹಿಟ್ಟನ್ನು ತಿರುಗಿಸಿ, ತಿರುಗಿಸುವಾಗ ಗಂಟು ಆಗದಂತೆ ಎಚ್ಚರಿಕೆವಹಿಸಿ. ಎಲ್ಲಾ ಕಡೆಯ ಹಿಟ್ಟನ್ನು ನೀರಿನಲ್ಲಿ ಕಲಕಿ, ಅದೆಲ್ಲವೂ ಚೆನ್ನಾಗಿ ಬೆರೆಯುವಂತೆ ತಿರುಗಿಸಿ. ಸ್ವಲ್ಪ ಗಟ್ಟಿ ಎನಿಸಿದರೆ, ಬಿಸಿನೀರು ಕಾಯಿಸಿಕೊಂಡು ಮತ್ತೆ ಚೆನ್ನಾಗಿ ತಿರುಗಿಸಿ. ಇದನ್ನು ಅಂದರೆ ಈ ರೀತಿ ಹಿಟ್ಟು ಅಥವ ಮುದ್ದೆಯನ್ನು ತಯಾರಿಸುವಾಗ ಹುಷಾರಾಗಿ ನೋಡಿಕೊಂಡು ಹದವಾಗಿ ತಿರುಗಿಸಬೇಕಾಗುತ್ತದೆ. ಇದಕ್ಕೆ ಹಿಟ್ಟು ತೊಳೆಸುವುದು ಅಥವ ಹಿಟ್ಟು ಕೂಡಿಸುವುದು ಅಥವ ಹಿಟ್ಟು ತಿರುಗಿಸುವುದು ಎಂದು ಒಂದೊಂದು ರೀತಿ ಕರೆಯುತ್ತಾರೆ. ಅದೇನೇ ಕರೆದರು ತಯಾರಿಸುವ ರೀತಿ ಒಂದೇ. ಹಿಟ್ಟನ್ನು ಗಂಟುಗಳಿಲ್ಲದಂತೆ ಚೆನ್ನಾಗಿ ತಿರುಗಿಸಿ, ಹಿಟ್ಟನ್ನು ತಟ್ಟೆ / ಮಣೆ/ ಕಟ್ಟಿಂಗ್ ಬೋರ್ಡ್ ಮೇಲೆ ಹಾಕಿಕೊಂಡು ಚೆನ್ನಾಗಿ ನಾದಿ. ಬಿಸಿಯಿರುವಾಗಲೇ ಇದನ್ನೆಲ್ಲಾ ಮಾಡಿಕೊಳ್ಳಬೇಕು. ನಾದಿಟ್ಟ ಮೇಲೆ ಅದರಿಂದ ಪುಟ್ಟ ಪುಟ್ಟ ಉಂಡೆ ಮಾಡಿಕೊಳ್ಳಿ. ಇದು ಸ್ವಲ್ಪ ಕಷ್ಟದ ಕೆಲಸ. ಯಾವಾಗಲೂ ಸರಿಯಾಗಿಯೇ ಬರುತ್ತದೆ ಎಂದು ಹೇಳಕ್ಕೆ ಆಗಲ್ಲ. ಏಕೆಂದರೆ ಈಗ ನಾವು ತರುವ ಹಿಟ್ಟಿನ ಮೇಲೆ ಅವಲಂಬಿಸಿರುತ್ತದೆ.ಕೆಲವು ಹಿಟ್ಟು ಬಾಯ್ಲ್ಡ್ ರೈಸ್ ನಿಂದ ಮಾಡಿರುತ್ತಾರೆ. ಅದಕ್ಕೆ ಸ್ವಲ್ಪ ನೀರು ಜಾಸ್ತಿ ಬೇಕಾಗುತ್ತೆ ಮತ್ತು ಬೇಗ ಹಿಟ್ಟು ಗಟ್ಟಿಯಾಗುತ್ತೆ ಸಹ. ಅದಕ್ಕಾಗಿ ಸ್ವಲ್ಪ ಹದ ತಿಳಿದು, ತಯಾರಿಸುವುದು ಉತ್ತಮ. ಈ ತರಹದ ಕಡುಬುಗಳಿಗೆ ಅಕ್ಕಿಯನ್ನು ತೊಳೆದು, ನೆರಳಲ್ಲಿ ಒಣಗಿಸಿ,ಮಿಲ್ ಗೆ ಹಾಕಿಸುವಂತ ನಾವೇ ತಯಾರಿಸಿದ ಅಕ್ಕಿ ಹಿಟ್ಟನ್ನು ಉಪಯೋಗಿಸಿದರೆ ತುಂಬ ಚೆನ್ನಾಗಿ ಅಕ್ಕಿಹಿಟ್ಟು/ಮುದ್ದೆ ಬರುತ್ತದೆ.

ಕಡುಬನ್ನು ತಯಾರಿಸುವ ರೀತಿ:

ಈ ರೀತಿ ತಯಾರಿಸಿದಂತ ಮುದ್ದೆ ಅಥವ ಹಿಟ್ಟನ್ನು ಚಿಕ್ಕ ಚಿಕ್ಕ ಉಂಡೆ ಮಾಡಿಕೊಂಡು ಪೂರಿಯಂತೆ ಲಟ್ಟಿಸಿ, ಅದರೊಳಗೆ ಹೂರಣವನ್ನು ತುಂಬ ಬೇಕು. ಮಧ್ಯಕ್ಕೆ ಅಂದರೆ ಅರ್ಧ ಭಾಗಕ್ಕೆ ಮಡಿಚಿ ಅಂಚುಗಳನ್ನು ಒತ್ತಿ ಮುಚ್ಚಬೇಕು. ಚಿತ್ತಾರ ಮಾಡಲು ಬಂದರೆ ಆ ತರ ಮಡಿಸಿ, ಇಲ್ಲವೆಂದರೆ ಹೆಚ್ಚಿನ ಭಾಗದ ಹಿಟ್ಟನ್ನು ಕತ್ತರಿಸಿ. (ಎಡ್ಜ್ ಕಟ್ ಮಾಡಿ, ಅದರಿಂದ ಬರುವ ಎಕ್ಸ್ಟ್ರಾ ಹಿಟ್ಟನ್ನು ತೆಗೆದು ಮತ್ತೆ ಉಪಯೋಗಿಸಿ)ಅದನ್ನು ತೆಗೆದಿಡಿ. ಮತ್ತೆ ಉಪಯೋಗಿಸಿ. ಈ ಕಡುಬುಗಳನ್ನು ಹಬೆಯಲ್ಲಿ ಕೆಲವರು ಬೇಯಿಸಿ ತಿನ್ನುತ್ತಾರೆ, ಕೆಲವರು ಹಾಗೇ ಇಷ್ಟಪಡುತ್ತಾರೆ.ಸಿಹಿ ಕಡುಬುಗಳನ್ನಾದರೆ ಬೇಯಿಸದೆ ತಿನ್ನಬಹುದು. ಖಾರದ ಕಡುಬು ಅಥವಾ ಹೆಸರುಬೇಳೆ ಕಡುಬು ತಯಾರಿಸಿದರೆ ಹಬೆಯಲ್ಲಿ ಬೇಯಿಸಬೇಕು.ಇದಿಷ್ಟು ಕಡುಬಿನ ಬಗ್ಗೆ ಮಾಹಿತಿ.

* ಇದೇ ರೀತಿ ಮೋದಕವನ್ನು ತಯಾರಿಸಲು ಅಕ್ಕಿ ಹಿಟ್ಟಿನಿಂದ ಪುಟ್ಟ ಬಟ್ಟಲಿನ ಆಕಾರ ಮಾಡಿ ಅದಕ್ಕೆ ಹೂರಣ ತುಂಬಿ, ಮೇಲ್ಭಾಗದಲ್ಲಿ ಎಲ್ಲಾ ಅಂಚುಗಳನ್ನು ಮೇಲಕ್ಕೆ ತಗೊಂಡು ಮುಚ್ಚಿ, ಈ ಮೋದಕ ಸಿಹಿಯು ನಮ್ಮ ಗಣಪನಿಗೆ ಬಹಳ ಅಚ್ಚುಮೆಚ್ಚು.

ಕಡುಬುಗಳಲ್ಲಿ ವಿವಿಧ ರೀತಿ, ಹಲವು ಬಗೆ, ಒಬ್ಬೊಬ್ಬರು ಒಂದೊಂದು ರೀತಿ ತಯಾರಿಸುತ್ತಾರೆ. ಕೆಲವು ರೆಸಿಪಿಗಳನ್ನು ತಿಳಿಸಿರುವೆ, ಕಡುಬಿನ ಲೇಬಲ್ ನಲ್ಲಿ ನೋಡಿ

Gasagase Payasa / Khuskhus Kheer

0 comments




ಗಸಗಸೆ ಪಾಯಸ

ಸಾಮಗ್ರಿಗಳು :

ಗಸಗಸೆ - 1 ಕಪ್,
ಬಾದಾಮಿ - 7-8
ಅಕ್ಕಿ - 1 ಚಮಚ,
ತೆಂಗಿನಕಾಯಿ - 1 ಅಥವ ( ಹಾಲು 5-6 ಕಪ್ )
ಏಲಕ್ಕಿ - 5,
ಸಕ್ಕರೆ/ಬೆಲ್ಲ - 21/2 ಕಪ್
ತುಪ್ಪ - 2 ಚಮಚ
ದ್ರಾಕ್ಷಿ ಮತ್ತು ಗೋಡಂಬಿ ಸ್ವಲ್ಪ

ತಯಾರಿಸುವ ವಿಧಾನ :

ಒಂದು ಕಪ್ ಗಸಗಸೆಯನ್ನು ಘಂ ಎಂದು ಚಟಚಟ ಅನ್ನುವವರೆಗೆ ಹುರಿಯಿರಿ. ಅದಕ್ಕೆ ಬಾದಾಮಿಯನ್ನು ಹಾಕಿ ಹುರಿದುಕೊಳ್ಳಿ. ಮೊದಲೇ1 ಟೀ ಚಮಚ ಅಕ್ಕಿಯನ್ನು ನೀರಿನಲ್ಲಿ ನೆನಸಿಡಿ.1 ತೆಂಗಿನಕಾಯಿ ತುರಿಯನ್ನು ಮಿಕ್ಸಿಗೆ ಹಾಕಿ ತೆಂಗಿನ ಕಾಯಿ ಹಾಲನ್ನು ತೆಗೆದಿಟ್ಟುಕೊಳ್ಳಿ. ಇದಕ್ಕೆ ಬಿಡುವಿಲ್ಲ ಅರ್ಜೆಂಟ್ ಆಗಿ ಪಾಯಸ ಮಾಡಬೇಕಾದರೆ ಮಾಮುಲಿ ಗಟ್ಟಿ ಹಾಲನ್ನು ಬಳಸಿ. ಇದು ನಿಮ್ಮ ಅವಶ್ಯಕತೆಗೆ ಸೇರಿದ್ದು. ಹಾಲು ಬೇರೆ ಪಾತ್ರೆಯಲ್ಲಿ ಕಾಯಿಸಿಕೊಳ್ಳಿ.
ತೆಂಗಿನಹಾಲು ತೆಗೆಯಲು ಕಷ್ಟ ಎನಿಸಿದರೆ ಒಣಗಿದ ಕೊಬ್ಬರಿ ತುರಿಯನ್ನು ರುಬ್ಬುವಾಗ ಉಪಯೋಗಿಸಬಹುದು,ಅಥವಾ ರೆಡಿಮೇಡ್ ಕೊಕೋನಟ್ ಮಿಲ್ಕ್ ಉಪಯೋಗಿಸಬಹುದು.

ಮಾಡುವ ವಿಧಾನ : ಗಸಗಸೆ, ಬಾದಾಮಿ, ಅಕ್ಕಿ, ಏಲಕ್ಕಿಯನ್ನು ಮಿಕ್ಸಿಗೆ ಹಾಕಿ ನುಣ್ಣಗೆ ರುಬ್ಬಬೇಕು. ಮಿಕ್ಸಿಗೆ ಹಾಕಿರುವ ಪದಾರ್ಥ, ತೆಂಗಿನ ಹಾಲು ಅಥವಾ(ಕಾಯಿಸಿದ ಹಾಲು)ಎಲ್ಲವನ್ನು ಒಂದು ಪಾತ್ರೆಗೆ ಹಾಕಿ, ಸಣ್ಣ ಹುರಿಯಲ್ಲಿ ಕುದಿಸಬೇಕು. ಕುದಿಯುತ್ತಿರುವಾಗಲೆ ಬೆಲ್ಲ ಅಥವ ಸಕ್ಕರೆ ಸೇರಿಸಿ(ಸಕ್ಕರೆ ಹಾಕಿದರೆ ರುಚಿ ಚೆನ್ನಾಗಿರುತ್ತದೆ), ಮಧ್ಯೆ ಮಧ್ಯೆ ಕಲಕುತ್ತಿರಬೇಕು ಇಲ್ಲವಾದರೆ ಗಂಟು ಆಗುತ್ತದೆ ಮತ್ತು ತಳ ಹಿಡಿಯುತ್ತದೆ. ಬೇಕಾದರೆ ಕುದಿಯುವಾಗ ಒಂದು ಚಿಕ್ಕಚೂರು ಜಾಕಾಯಿ ಅಥವ ಜಾಯಿಕಾಯಿ ರಸ ಮತ್ತು 3-4 ಲವಂಗ ಹಾಕಬಹುದು. ಜೊತೆಯಲ್ಲಿ ಕೇಸರಿ ದಳಗಳನ್ನು 2 ಚಮಚ ಹಾಲಿನಲ್ಲಿ ನೆನಸಿ, ಕುದಿಯುವಾಗ ಹಾಕಿ, ತಳಹತ್ತದಂತೆ ಚೆನ್ನಾಗಿ ಒಂದೆರಡು ಕುದಿ ಕುದಿಸಿ, ಇಳಿಸಿ. ನಂತರ ಅದಕ್ಕೆ ತುಪ್ಪದಲ್ಲಿ ಕರಿದ ದ್ರಾಕ್ಷಿ ಮತ್ತು ಗೋಡಂಬಿ ಹಾಗು ಬಾದಾಮಿಗಳನ್ನು ಹಾಕಬಹುದು. ಇದು ತುಂಬಾ ರುಚಿಯಾದ ಮತ್ತು ಶಕ್ತಿದಾಯಕ ಪಾಯಸವೂ ಹೌದು. ಮಕ್ಕಳಿಗೆ ಇದೊಂದು ಒಳ್ಳೆಯ ಪೌಷ್ಠಿಕ ಪಾನೀಯ.

Tomato Peas Pulao/ಟೊಮೆಟೊ ಬಟಾಣಿ ಭಾತ್‌

0 comments



ಟೊಮೆಟೊ ಬಟಾಣಿ ಭಾತ್‌ :

ಬೇಕಾಗುವ ಸಾಮಗ್ರಿಗಳು:

1ಕಪ್‌ ಅಕ್ಕಿ
4-5 ಚೆನ್ನಾಗಿ ಹಣ್ಣಾಗಿರುವ ಟೊಮೆಟೊ
1/2 ಕಪ್‌ ಹಸಿ ಬಟಾಣಿ
2 ಈರುಳ್ಳಿ
2-3 ಹಸಿ ಮೆಣಸಿನಕಾಯಿ
1 ಚೆಕ್ಕೆ, ಲವಂಗ, ಏಲಕ್ಕಿ, ಪಲಾವ್‌
ಎಲೆಎಣ್ಣೆ ಸಾಸಿವೆ, ಜೀರಿಗೆ, ಕರಿಬೇವುಇಂಗು ( ಬೇಕಿದ್ದರೆ)
ಬೆಳ್ಳುಳ್ಳಿ ಮತ್ತು ಶುಂಠಿಪೇಸ್ಟ್‌
1/4 ಚಮಚ ಕಾರದ ಪುಡಿ
1/2 ಚಮಚ ಧನಿಯಾ ಪುಡಿ
1/4 ಚಮಚ ಗರಮ್‌ ಮಸಾಲ,
ಉಪ್ಪು2 ಕಪ್‌ ನೀರು,
ಹೆಚ್ಚಿದ ಕೊತ್ತಂಬರಿ ಸೊಪ್ಪು
ಕಾಯಿ ಅಥವಾ ಕೊಬ್ರಿ
1 ಚಮಚ ನಿಂಬೆರಸ
ಮಾಡುವ ವಿಧಾನ :
ಅಕ್ಕಿ ತೊಳೆದು ನೆನೆಹಾಕಿ. ಟೊಮೆಟೊ, ಈರುಳ್ಳಿ ಮತ್ತು ಹಸಿಮೆಣಸಿನಕಾಯಿ ಹೆಚ್ಚಿಕೊಳ್ಳಿ.

ಕುಕ್ಕರ್‌ ಅಥವಾ ದಪ್ಪ ತಳದ ಪಾತ್ರೆಗೆ ಎಣ್ಣೆ ಹಾಕಿ ಕಾದ ನಂತರ ಸಾಸಿವೆ, ಜೀರಿಗೆ, ಚೆಕ್ಕೆ, ಲವಂಗ, ಏಲಕ್ಕಿ, ಎಲೆ ಹಾಕಿ, ಕರಿಬೇವು, ಇಂಗು ಹಾಕಿ ಆಮೇಲೆ ಬೆಳ್ಳುಳ್ಳಿ ಶುಂಠಿ ಪೇಸ್ಟ್‌ ಹಾಕಬೇಕು.

ಈರುಳ್ಳಿ, ಹಸಿ ಮೆಣಸಿನಕಾಯಿ ಹಾಕಿ ಬಾಡಿಸಿದ ನಂತರ 2 ನಿಮಿಷ ಬಿಟ್ಟು ಅರಿಶಿನ, ಟೊಮೆಟೊ ಹಾಕಿ ಚೆನ್ನಾಗಿ ಬೆರೆಸಿ. ಬಟಾಣಿ ಬೆರೆಸಿ 5 ನಿಮಿಷದ ನಂತರ ನೀರು ಮತ್ತು ಉಪ್ಪು ಹಾಕಿ ಜೊತೆಯಲ್ಲಿಯೇ ಪುಡಿಗಳನ್ನೆಲ್ಲ ಹಾಕಿ ಕೈಯಾಡಿಸಿ.

ನೀರು ಕುದಿ ಬಂದ ನಂತರ ನೆನೆಸಿಟ್ಟುಕೊಂಡ ಅಕ್ಕಿ ಹಾಕಿ, ಬೇಕಾದರೆ ನಿಂಬೆರಸ ಹಿಂಡಿ. ಕಾಯಿತುರಿ ಹಾಕಿ ಮುಚ್ಚಳ ಮುಚ್ಚಿ. ಅಡುಗೆ ತಯಾರಾಗುತ್ತೆ.


Hesarubele Payasa / Moongdal Kheer

0 comments

ಹೆಸರುಬೇಳೆ ಪಾಯಸ:

ಸಾಮಗ್ರಿಗಳು :

ಹೆಸರುಬೇಳೆ- 1 ಕಪ್,
ಬಾದಾಮಿ - 7-8
ಅಕ್ಕಿ - 1 ಚಮಚ,
ತೆಂಗಿನಕಾಯಿ - 1 ಅಥವ ( ಹಾಲು 5-6 ಕಪ್ )
ಏಲಕ್ಕಿ - 5,
ಸಕ್ಕರೆ/ಬೆಲ್ಲ - 21/2 ಕಪ್
ತುಪ್ಪ - 2 ಚಮಚ
ದ್ರಾಕ್ಷಿ ಮತ್ತು ಗೋಡಂಬಿ ಸ್ವಲ್ಪ

ತಯಾರಿಸುವ ವಿಧಾನ :

ಒಂದು ಕಪ್ ಹೆಸರುಬೇಳೆಯನ್ನು ಒಂದು ಚಮಚ ತುಪ್ಪ ಹಾಕಿ ಘಂ ಎಂದು ಸ್ವಲ್ಪ ಕೆಂಪಗೆ ಆಗುವವರೆಗೂ ಹುರಿಯಿರಿ. ಮೊದಲೇ1 ಟೀ ಚಮಚ ಅಕ್ಕಿಯನ್ನು ನೀರಿನಲ್ಲಿ ನೆನಸಿಡಿ.1 ತೆಂಗಿನಕಾಯಿ ತುರಿಯನ್ನು ಮಿಕ್ಸಿಗೆ ಹಾಕಿ ತೆಂಗಿನ ಕಾಯಿ ಹಾಲನ್ನು ತೆಗೆದಿಟ್ಟುಕೊಳ್ಳಿ. ಇದಕ್ಕೆ ಬಿಡುವಿಲ್ಲ ಅರ್ಜೆಂಟ್ ಆಗಿ ಪಾಯಸ ಮಾಡಬೇಕಾದರೆ ಮಾಮುಲಿ ಗಟ್ಟಿ ಹಾಲನ್ನು ಬಳಸಿ. ಇದು ನಿಮ್ಮ ಅವಶ್ಯಕತೆಗೆ ಸೇರಿದ್ದು. ಹಾಲು ಬೇರೆ ಪಾತ್ರೆಯಲ್ಲಿ ಕಾಯಿಸಿಕೊಳ್ಳಿ.
ತೆಂಗಿನಹಾಲು ತೆಗೆಯಲು ಕಷ್ಟ ಎನಿಸಿದರೆ ಒಣಗಿದ ಕೊಬ್ಬರಿ ತುರಿಯನ್ನು ರುಬ್ಬುವಾಗ ಉಪಯೋಗಿಸಬಹುದು,ಅಥವಾ ರೆಡಿಮೇಡ್ ಕೊಕೋನಟ್ ಮಿಲ್ಕ್ ಉಪಯೋಗಿಸಬಹುದು.

ಮಾಡುವ ವಿಧಾನ :

ಬಾದಾಮಿ, ಅಕ್ಕಿ, ಏಲಕ್ಕಿಯನ್ನು ಮಿಕ್ಸಿಗೆ ಹಾಕಿ ನುಣ್ಣಗೆ ರುಬ್ಬಬೇಕು. ಮಿಕ್ಸಿಗೆ ಹಾಕಿರುವ ಪದಾರ್ಥ, ತೆಂಗಿನ ಹಾಲು ಅಥವಾ(ಕಾಯಿಸಿದ ಹಾಲು)ಎಲ್ಲವನ್ನು ಒಂದು ಪಾತ್ರೆಗೆ ಹಾಕಿ, ಹುರಿದ ಹೆಸರುಬೇಳೆಯನ್ನು ಸೇರಿಸಿ ಬೇಳೆ ಬೇಯಲು ಎರಡು ಬಟ್ಟಲು ನೀರು ಹಾಕಿ ಕುದಿಸಬೇಕು. ಹೆಸರುಬೇಳೆ ಬೇಯುವವರೆಗೂ ಚೆನ್ನಾಗಿ ಬೇಯಿಸಿ. ಕುದಿಯುತ್ತಿರುವಾಗಲೆ ಬೆಲ್ಲ ಅಥವ ಸಕ್ಕರೆ ಸೇರಿಸಿ(ಸಕ್ಕರೆ ಹಾಕಿದರೆ ರುಚಿ ಚೆನ್ನಾಗಿರುತ್ತದೆ), ಮಧ್ಯೆ ಮಧ್ಯೆ ಕಲಕುತ್ತಿರಬೇಕು. ಬೇಕಾದರೆ ಕುದಿಯುವಾಗ ಒಂದು ಚಿಕ್ಕಚೂರು ಜಾಕಾಯಿ ಅಥವ ಜಾಯಿಕಾಯಿ ರಸ ಮತ್ತು 3-4 ಲವಂಗ ಹಾಕಬಹುದು. ಜೊತೆಯಲ್ಲಿ ಕೇಸರಿ ದಳಗಳನ್ನು 2 ಚಮಚ ಹಾಲಿನಲ್ಲಿ ನೆನಸಿ, ಕುದಿಯುವಾಗ ಹಾಕಿ, ತಳಹತ್ತದಂತೆ ಚೆನ್ನಾಗಿ ಒಂದೆರಡು ಕುದಿ ಕುದಿಸಿ, ಇಳಿಸಿ. ನಂತರ ಅದಕ್ಕೆ ತುಪ್ಪದಲ್ಲಿ ಕರಿದ ದ್ರಾಕ್ಷಿ ಮತ್ತು ಗೋಡಂಬಿ ಹಾಗು ಬಾದಾಮಿಗಳನ್ನು ಹಾಕಬಹುದು. ಇದು ತುಂಬಾ ರುಚಿಯಾದ,ತಂಪು ಮತ್ತು ಶಕ್ತಿದಾಯಕ ಪಾಯಸವೂ ಹೌದು.ಇದೊಂದು ಒಳ್ಳೆಯ ಪೌಷ್ಠಿಕ ಪಾನೀಯ.

ಖಾರದ ಹೆಸರುಬೇಳೆ ಪೊಂಗಲ್/ Pongal

0 comments

ಖಾರದ ಹೆಸರುಬೇಳೆ ಪೊಂಗಲ್:

ಸಾಮಗ್ರಿಗಳು:

ಅಕ್ಕಿ - ಒಂದು ಕಪ್
ಹೆಸರುಬೇಳೆ - ಒಂದು ಕಪ್
ತುಪ್ಪ - ಎರಡು ದೊಡ್ಡ ಚಮಚ
ಜೀರಿಗೆ ಸ್ವಲ್ಪ
ಮೆಣಸು - ಸ್ವಲ್ಪ,ತರಿಯಾಗಿ ಕುಟ್ಟಿಕೊಳ್ಳಿ
ಉಪ್ಪು ರುಚಿಗೆ
ಎಣ್ಣೆ, ಕರಿಬೇವು
ಗೋಡಂಬಿ ಸ್ವಲ್ಪ

ತಯಾರಿಸುವ ವಿಧಾನ:

ಮೊದಲು ಹೆಸರುಬೇಳೆಯನ್ನು ಸ್ವಲ್ಪ ಹಾಕಿ ಘಂ ಎನ್ನುವಂತೆ ಹುರಿದುಕೊಳ್ಳಿ. ಹದವಾಗಿ ಹುರಿದಿಡಿ.
ಅಕ್ಕಿ ಮತ್ತು ಹೆಸರುಬೇಳೆಯನ್ನು ಕುಕ್ಕರ್ ಅಥವಾ ರೈಸ್ ಕುಕ್ಕರ್ ಗೆ ಹಾಕಿ, ಚಿಟಿಕೆ ಉಪ್ಪು ಮತ್ತು ಅಳತೆಗೆ ತಕ್ಕಂತೆ ನೀರು ಹಾಕಿ, ಬೇಯಿಸಿಕೊಳ್ಳಿ.
ಬೇರೆ ಪಾತ್ರೆಯಲ್ಲಿ ತುಪ್ಪವನ್ನು ಹಾಕಿ ಗೋಡಂಬಿಯನ್ನು ಹುರಿದುಕೊಂಡು , ಅದೇ ತುಪ್ಪದಲ್ಲಿ ಜೀರಿಗೆ,ಮೆಣಸು,ಕರಿಬೇವು ಹಾಕಿ. ನಂತರ ಬೆಂದ ಅಕ್ಕಿ ಮತ್ತು ಹೆಸರುಬೇಳೆ ಮಿಶ್ರಣವನ್ನು ಹಾಕಿ, ಚೆನ್ನಾಗಿ ಬೆರೆಸಿ. ಹುರಿದ ಗೋಡಂಬಿ ಮತ್ತು ಸ್ವಲ್ಪ ತುಪ್ಪ ಹಾಕಿ ಬೆರೆಸಿ. ಉಪ್ಪು ಕೂಡ ಹಾಕಿ.ಪೊಂಗಲ್ ಆರಿದ ಮೇಲೆ ತುಂಬಾ ಗಟ್ಟಿಯಾಗುತ್ತದೆ. ಅದಕ್ಕಾಗಿ ತಯಾರಿಸುವಾಗ ಸ್ವಲ್ಪ ತೆಳುವಾಗಿಯೇ ಮಾಡಿಕೊಳ್ಳಿ.ನೀರು ಹಾಕಿ ಸರಿ ಮಾಡಿಕೊಂಡು ಚೆನ್ನಾಗಿ ಬೆರೆಸಿ,ಇಳಿಸಿ. ಪೊಂಗಲ್ ತಿನ್ನಲು ತಯಾರಾಗುತ್ತದೆ.

* ಹೆಸರುಬೇಳೆಯನ್ನು ಸೀದಿಸಬೇಡಿ, ಹಸಿವಾಸನೆ ಹೋಗುವವರೆಗೂ/ ಸ್ವಲ್ಪ ಬಣ್ಣ ಬದಲಾಗುವವರೆಗೂ ಮಾತ್ರ ಹುರಿದುಕೊಳ್ಳಿ.

Green Beans usali-ಹುರುಳಿಕಾಯಿ ಪಲ್ಯ/ಉಸಲಿ:

0 comments

ಹುರುಳಿಕಾಯಿ ಪಲ್ಯ/ಉಸಲಿ:

ಬೇಕಾಗುವ ಪದಾರ್ಥಗಳು;

ಹುರುಳಿಕಾಯಿ (ಬೀನ್ಸ್)
ಈರುಳ್ಳಿ - ಒಂದು
ಹಸಿಮೆಣಸಿನಕಾಯಿ ರುಚಿಗೆ
ಕಾಯಿತುರಿ,ಕೊತ್ತುಂಬರಿಸೊಪ್ಪು
ನಿಂಬೆರಸ
ಎಣ್ಣೆ,ಸಾಸಿವೆ
ಕರಿಬೇವು
ಕಡ್ಲೆಬೇಳೆ
ಉದ್ದಿನಬೇಳೆ
ಅರಿಶಿನ
ಉಪ್ಪು ರುಚಿಗೆ

ವಿಧಾನ:ಮೊದಲು ಹುರುಳಿಕಾಯಿಯನ್ನು ಸಣ್ಣಗೆ ಕತ್ತರಿಸಿ.

ಬಾಣಲೆಗೆ ಎಣ್ಣೆ ಹಾಕಿ,ಕಾದ ಬಳಿಕ,ಸಾಸಿವೆ,ಕಡ್ಲೆಬೇಳೆ,ಉದ್ದಿನಬೇಳೆ,ಈರುಳ್ಳಿ,ಹಸಿಮೆಣಸಿನಕಾಯಿ ಹಾಕಿ,ಬಾಡಿಸಿ,ಕರಿಬೇವು,ಅರಿಶಿನ ಮತ್ತು ಉಪ್ಪು ಹಾಕಿ ಒಂದೆರಡು ನಿಮಿಷ ಹುರಿದು,ಈರುಳ್ಳಿ ಬೆಂದಿದೆ ಎನಿಸಿದ ಬಳಿಕ ಹುರುಳಿಕಾಯಿಯನ್ನು ಸೇರಿಸಿ,ಸ್ವಲ್ಪ ಹೊತ್ತು ಅದರಲ್ಲಿಯೇ ಹುರಿದು ಬೇಯಿಸಿ. ಮಧ್ಯೆ ಮಧ್ಯೆ ತಿರುವುತ್ತಿರಿ. ನೀರು ಸ್ವಲ್ಪ ಹಾಕಿ ಹುರುಳಿಕಾಯಿ ಬೇಯುವವರೆಗು ಬೇಯಿಸಿ. ನಂತರ ಅದಕ್ಕೆ ಕಾಯಿತುರಿ ಮತ್ತು ಕೊತ್ತುಂಬರಿ ಸೊಪ್ಪು ಹಾಗು ನಿಂಬೆರಸ ಎಲ್ಲವನ್ನು ಹಾಕಿ ಚೆನ್ನಾಗಿ ಬೆರೆಸಿ. ಇಳಿಸಿ. ಇದನ್ನು ಊಟಕ್ಕೆ ನೆಂಚಿಕೊಳ್ಳಲು ಸೈಡ್ ಡಿಶ್ ಆಗಿ / ಚಪಾತಿಗೆ ಕೊಡಬಹುದು. ಬ್ರೆಡ್ ಮಧ್ಯೆ ಸ್ಯಾಂಡ್ ವಿಚ್ ತರಹ ತುಂಬಿ ತಿನ್ನಲು ಕೂಡ ಚೆನ್ನಾಗಿರುತ್ತದೆ.

Lemon Rice/ Nimbehannina chitranna

0 comments



ನಿಂಬೆಹಣ್ಣಿನ ಚಿತ್ರಾನ್ನ:

ಬೇಕಾಗುವ ಸಾಮಗ್ರಿಗಳು;

ಅನ್ನ ಎರಡು ಬಟ್ಟಲು
ಹೆಚ್ಚಿದ ಈರುಳ್ಳಿ
ಹೆಚ್ಚಿದ ಹಸಿಮೆಣಸಿನಕಾಯಿ
ಎಣ್ಣೆ
ಸಾಸಿವೆ, ಜೀರಿಗೆ
ಕರಿಬೇವು, ಅರಿಶಿಣ
ಕಡ್ಲೆಬೇಳೆ,ಉದ್ದಿನಬೇಳೆ
ಕಡ್ಲೆಕಾಯಿ ಬೀಜ
ಉಪ್ಪು, ನಿಂಬೆರಸ
ಕೊತ್ತುಂಬರಿಸೊಪ್ಪು ,ಕಾಯಿತುರಿ

ತಯಾರಿಸುವ ವಿಧಾನ:
ಅನ್ನ ಮಾಡಿದ ನಂತರ ಅದನ್ನು ಅಗಲವಾದ ಪಾತ್ರೆಗೆ ಹಾಕಿ , ಅದಕ್ಕೆ ಸ್ವಲ್ಪ ನಿಂಬೆರಸ ಬೆರೆಸಿ, ತಣ್ಣಗಾಗಲು ಬಿಡಿ.
ಬೇರೆ ಪಾತ್ರೆಯಲ್ಲಿ ಎಣ್ಣೆ ಹಾಕಿ, ಕಡ್ಲೆಕಾಯಿಬೀಜಗಳನ್ನು ಹಾಕಿ, ಅದನ್ನು ಚೆನ್ನಾಗಿ ಹುರಿದು ತೆಗೆದಿಟ್ಟುಕೊಳ್ಳಿ. ಅದೇ ಎಣ್ಣೆಗೆ ಸಾಸಿವೆ, ಜೀರಿಗೆ, ಕರಿಬೇವು , ಕಡ್ಲೆಬೇಳೆ, ಉದ್ದಿನಬೇಳೆ, ಹಸಿಮೆಣಸಿನಕಾಯಿ ಹಾಕಿ, ಒಂದು ನಿಮಿಷ ಹುರಿದು, ಹೆಚ್ಚಿದ ಈರುಳ್ಳಿಯನ್ನು ಹಾಕಿ, ಅದು ಸ್ವಲ್ಪ ಬೆಂದಿದೆ ಎನಿಸಿದ ಮೇಲೆ, ಅರಿಶಿಣ ಮತ್ತು ಉಪ್ಪು ಹಾಕಿ, ಮತ್ತೆ ಒಂದೆರಡು ನಿಮಿಷ ಬಾಡಿಸಿ. ಒಗ್ಗರಣೆಯನ್ನು ಕೆಳಗಿಳಿಸಿ, ಇದು ತಣ್ಣಗಾದ ಮೇಲೆ ಅದಕ್ಕೆ ನಿಂಬೆರಸ ಹಿಂಡಿ,ಚೆನ್ನಾಗಿ ಬೆರೆಸಿ. ಈ ಒಗ್ಗರಣೆಯನ್ನು ಆರಿದ ಅನ್ನಕ್ಕೆ ಹಾಕಿ, ಅದರ ಜೊತೆ ಹುರಿದ ಕಡ್ಲೆಕಾಯಿ ಬೀಜಗಳನ್ನು ಹಾಕಿ, ಎಲ್ಲವೂ ಚೆನ್ನಾಗಿ ಬೆರೆತುಕೊಳ್ಳುವಂತೆ ಕಲೆಸಿ.ಕಾಯಿತುರಿ ಮತ್ತು ಕೊತ್ತುಂಬರಿಸೊಪ್ಪು ಸಹ ಹಾಕಿ ಬೆರೆಸಿ. ಒಗ್ಗರಣೆ ಒಂದೆರಡು ದಿನ ಚೆನ್ನಾಗಿ ಇರುತ್ತದೆ. ಯಾವಾಗ ಬೇಕಾದರು ಕಲೆಸಿಕೊಳ್ಳಬಹುದು. ರುಚಿಯಾದ ನಿಂಬೆಹಣ್ಣಿನ ಚಿತ್ರಾನ್ನ ತಯಾರ್.

Kesari Bath - ಕೇಸರಿ ಭಾತ್/ಶಿರಾ

0 comments

ಕೇಸರಿ ಭಾತ್:

ಬೇಕಾಗುವ ಸಾಮಗ್ರಿಗಳು:

ರವೆ (ಸಣ್ಣ ರವೆ/ಚಿರೋಟಿ ರವೆ)-ಒಂದು ಕಪ್
ಸಕ್ಕರೆ ರುಚಿಗೆ
ತುಪ್ಪ -ಎರಡು ಚಮಚ
ರಿಫೈಂಡ್ ಆಯಿಲ್ -ಎರಡು ಚಮಚ
ಹಾಲು - ಅರ್ಧ ಕಪ್
ಕೇಸರಿ ದಳಗಳು ಸ್ವಲ್ಪ
ಏಲಕ್ಕಿ ಪುಡಿ
ದ್ರಾಕ್ಷಿ ಮತ್ತು ಗೋಡಂಬಿ

ತಯಾರಿಸುವ ರೀತಿ:

ಒಂದೆರಡು ಚಮಚ ಹಾಲಿನಲ್ಲಿ ಕೇಸರಿ ದಳಗಳನ್ನು ನೆನೆಸಿಡಿ.
ಮೊದಲು ರವೆಯನ್ನು ತುಪ್ಪ ಹಾಕಿ ಹುರಿದುಕೊಳ್ಳಿ, ಹಸಿವಾಸನೆ ಹೋಗಿ ಘಂ ಎನ್ನುವ ವಾಸನೆ ಬರುವವರೆಗೂ ರವೆಯನ್ನು ಸೀದಿಸದೆ ಹುರಿದುಕೊಳ್ಳಿ.
ಪಾತ್ರೆಗೆ ತುಪ್ಪ ಮತ್ತು ಎಣ್ಣೆಯನ್ನು ಹಾಕಿ ದ್ರಾಕ್ಷಿ ಮತ್ತು ಗೋಡಂಬಿಯನ್ನು ಹುರಿಯಿರಿ, ಅದಕ್ಕೆ ಹಾಲು ಮತ್ತು ಸ್ವಲ್ಪ ನೀರು ನಿಮಗೆ ಬೇಕಾದ ಅಳತೆ ಹಾಕಿಕೊಂಡು ಕುದಿಯಲು ಇಟ್ಟು, ಅದಕ್ಕೆ ಸಕ್ಕರೆ ಸೇರಿಸಿ, ಸಕ್ಕರೆ ಕರಗಿ ಕುದಿ ಬರುತ್ತಿರುವಾಗ ಏಲಕ್ಕಿ ಪುಡಿ ಮತ್ತು ಹಾಲಿನಲ್ಲಿ ನೆನೆಸಿದ ಕೇಸರಿದಳ ಹಾಕಿ, ಮತ್ತೆರಡು ಚಮಚ ತುಪ್ಪ ಹಾಕಿ, ಆಮೇಲೆ ಹುರಿದಿರುವ ರವೆಯನ್ನು ಸ್ವಲ್ಪ ಸ್ವಲ್ಪವೇ ಹಾಕುತ್ತಾ ಗಂಟು ಕಟ್ಟದಂತೆ ಎಲ್ಲ ಬೆರೆತುಕೊಳ್ಳುವಂತೆ ಚೆನ್ನಾಗಿ ತಿರುಗಿಸಿ. ಕೆಳಗಿಳಿಸಿ,ಮುಚ್ಚಿಡಿ. ಕೇಸರಿಭಾತ್ ತಯಾರಿಸುವಾಗ ಸ್ವಲ್ಪ ತೆಳುವಾಗಿ ತಯಾರಿಸಿ, ನಂತರ ತಣ್ಣಗಾದ ಮೇಲೆ ಅದು ತುಂಬಾ ಗಟ್ಟಿಯಾಗುತ್ತದೆ. ತುಪ್ಪ ಸ್ವಲ್ಪ ಜಾಸ್ತಿ ಹಾಕಿ. ಬಿಸಿಬಿಸಿಯಾದ ಕೇಸರಿಭಾತ್ ತಿನ್ನಲು ತಯಾರಾಗಿದೆ. ಬಿಸಿಯಾದ ಕೇಸರಿಭಾತ್ ಬಹಳ ಚೆನ್ನಾಗಿರುತ್ತದೆ.

* ರವೆಯನ್ನು ಹುರಿಯುವಾಗ ತುಂಬಾ ಹುಷಾರಾಗಿ ಹುರಿಯಬೇಕು.
* ಕೇಸರಿಭಾತ್ ಗೆ ಬರೀ ನೀರನ್ನು ಹಾಕದೆ ಹಾಲನ್ನು ಸೇರಿಸಿದರೆ ರುಚಿ ಹೆಚ್ಚು.
* ತುಪ್ಪದ ಜೊತೆ ಎಣ್ಣೆಯನ್ನು ಹಾಕುವುದರಿಂದ ಬೇಗ ಗಟ್ಟಿಯಾಗುವುದಿಲ್ಲ.
* ಕೆಲವರು ಕೇಸರಿಬಣ್ಣ ಹಾಕುತ್ತಾರೆ, ಇದರಿಂದ ಕೇಸರಿಭಾತ್ ಬಣ್ಣ ಚೆನ್ನಾಗಿ ಆಕರ್ಷಕವಾಗಿ ಬರುತ್ತದೆ. ಆದರೆ ಕೇಸರಿ ದಳಗಳು ಆರೋಗ್ಯಕ್ಕೆ ಒಳ್ಳೆಯದು, ಆಗಾಗಿ ಅದನ್ನು ಉಪಯೋಗಿಸಿ. ಬಣ್ಣ ಹಾಕಲೇ ಬೇಕೆನಿಸಿದವರು ಒಳ್ಳೆಯ ಪ್ರಾಡಕ್ಟ್ ಬಣ್ಣವನ್ನು ತನ್ನಿ.ಅದು ಚಿಟಿಕೆ ಹಾಕಿದರೆ ಸಾಕು.
* ಇದು ಬೇಗನೇ ತಯಾರಿಸಬಹುದಾದಂತಹ ಸಿಹಿ. ಕೆಲವರು ಈ ಸಿಹಿತಿಂಡಿಗೆ "ಶಿರಾ" ಎಂದು ಕೂಡ ಕರೆಯುತ್ತಾರೆ.

Holige/Obbattu Saaru - ಹೋಳಿಗೆ/ಒಬ್ಬಟ್ಟಿನ ಸಾರು:

0 comments


ಹೋಳಿಗೆ /ಒಬ್ಬಟ್ಟಿನ ಸಾರು:

ಬೇಳೆ ಕಟ್ಟು ತೆಗೆಯುವ ವಿಧಾನವು ಹೋಳಿಗೆ ರೆಸಿಪಿಯಲ್ಲಿ ಇದೆ. ಬೇಳೆಯನ್ನು ತುಂಬಾ ನೀರು ಹಾಕಿ ಬೇಯಿಸಿಕೊಳ್ಳಬೇಕು.ಬೇಳೆಯೂ ಕರಗದಂತೆ ಬೇಯಿಸಿ,ಗಟ್ಟಿಯಿರುವಾಗಲೆ ಅದನ್ನು ಇಳಿಸಿ ನೀರು ಸೋಸಿ ಬಸಿದುಕೊಳ್ಳಿ.ಅದರಿಂದ ಬರುವ ನೀರನ್ನೆ "ಬೇಳೆ ಕಟ್ಟು"ಎನ್ನುತ್ತೇವೆ. ಬಸಿದಾಗ ಬಂದಿರುವ ಬೇಳೆಗೆ ಬೆಲ್ಲ ಮತ್ತು ಏಲಕ್ಕಿ ಹಾಕಿ,ಬೆರೆಸಿ,ಒಲೆ ಮೇಲಿಟ್ಟು ಕುದಿಸಿ,ರುಬ್ಬಿಕೊಳ್ಳುವ ಮಿಶ್ರಣವೇ "ಹೂರಣ".
ಬೇಕಾಗುವ ಸಾಮಗ್ರಿಗಳು:

ತೊಗರಿಬೇಳೆ ಬೇಯಿಸಿ ಬಸಿದು ತೆಗೆದ ಬೇಳೆಕಟ್ಟು
ಕರಿಬೇವು ಎಸಳು - ಎರಡು
ಹೂರಣ (ಬೇಳೆ-ಬೆಲ್ಲದ ರುಬ್ಬಿದ ಮಿಶ್ರಣ)- ಎರಡು ಚಮಚ
ಈರುಳ್ಳಿ - ಒಂದು
ಬೆಳ್ಳುಳ್ಳಿ ಐದಾರು ಎಸಳು
ತೆಂಗಿನಕಾಯಿ ತುರಿ ಸ್ವಲ್ಪ
ಹುಣಸೇಹಣ್ಣು / ಹುಣಸೇರಸ(ಪಲ್ಪ್)
ಕೊತ್ತುಂಬರಿಸೊಪ್ಪು ಸ್ವಲ್ಪ
ಎಣ್ಣೆ / ತುಪ್ಪ
ಸಾಸಿವೆ, ಕರಿಬೇವು
ಇಂಗು,ಜೀರಿಗೆ
ಉಪ್ಪು

ಹುರಿದು ಮಸಾಲೆಪುಡಿ ಮಾಡಿಕೊಳ್ಳಬೇಕಾದ ಸಾಮಗ್ರಿಗಳು:

ಒಣಮೆಣಸಿನಕಾಯಿ ರುಚಿಗೆ
ಧನಿಯಾ - ಎರಡು ದೊಡ್ಡ ಚಮಚಗಳು
ಜೀರಿಗೆ - ಒಂದು ದೊಡ್ಡ ಚಮಚ
ಮೆಣಸು - ಕಾಲು ಚಮಚ
ಮೆಂತ್ಯ - ಕಾಲು ಚಮಚ
ಸಾಸಿವೆ - ಕಾಲು ಚಮಚ
ಚೆಕ್ಕೆ - ಚಿಕ್ಕ ಚೂರು,ಲವಂಗ -ಒಂದು

ತಯಾರಿಸುವ ರೀತಿ:

ಬೇಳೆ ಬಸಿದುಕೊಂಡ ಕಟ್ಟು ನೀರಿಗೆ ಅದು ಬಿಸಿಯಾಗಿರುವಾಗಲೆ ಒಂದೆರಡು ಎಸಳು ತೊಳೆದಿರುವ ಕರಿಬೇವಿನಸೊಪ್ಪು ಹಾಕಿಡಿ.
ಮೊದಲು ಈರುಳ್ಳಿ ಮತ್ತು ಬೆಳ್ಳುಳ್ಳಿಯನ್ನು ಚೂರು ಎಣ್ಣೆ ಹಾಕಿ ಹುರಿದುಕೊಳ್ಳಿ.
ಹುರಿದುಕೊಂಡು ಪುಡಿ ಮಾಡಲು ಹೇಳಿರುವ ಸಾಮಾನುಗಳನ್ನೆಲ್ಲಾ ಹುರಿದು ಪುಡಿಮಾಡಿಕೊಳ್ಳಿ.
ತೆಂಗಿನಕಾಯಿ ತುರಿಗೆ,ಹುರಿದಿರುವ ಈರುಳ್ಳಿ,ಬೆಳ್ಳುಳ್ಳಿ,ಮಸಾಲೆಪುಡಿ,ಹುಣಸೇಹಣ್ಣು,ಬೇಳೆ ಹೂರಣ,ಕೊತ್ತುಂಬರಿಸೊಪ್ಪು ಮತ್ತು ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ.
ಈಗ ಒಂದು ಪಾತ್ರೆಗೆ ಸ್ವಲ್ಪ ಎಣ್ಣೆ ಮತ್ತು ಒಂದು ಚಮಚ ತುಪ್ಪ ಹಾಕಿ,ಸಾಸಿವೆ,ಜೀರಿಗೆ,ಕರಿಬೇವು,ಇಂಗು ಮತ್ತು ಒಂದು ಜಜ್ಜಿದ ಬೆಳ್ಳುಳ್ಳಿ ಹಾಕಿ ಒಗ್ಗರಣೆ ಮಾಡಿಕೊಂಡು,ಅದಕ್ಕೆ ರುಬ್ಬಿದ ಮಸಾಲೆ ಹಾಕಿ ಮತ್ತು ಬೇಳೆ ಕಟ್ಟು ಕೂಡ ಸೇರಿಸಿ,ಎರಡನ್ನು ಚೆನ್ನಾಗಿ ಬೆರೆಸಿ,ಕುದಿಯಲು ಬಿಡಿ.ರುಚಿಗೆ ತಕ್ಕ ಉಪ್ಪು ಮತ್ತು ಕಾರ ಸೇರಿಸಿಕೊಳ್ಳಿ.ಒಂದು ಕುದಿ ಮಾತ್ರ ಕುದಿಸಿ ಇಳಿಸಿ.ಹೋಳಿಗೆ ಸಾರು ತಯಾರಾಗುತ್ತದೆ.
* ಈ ಹೋಳಿಗೆ ಸಾರನ್ನು ಮೊದಲ ಸಾರಿ ಮಾತ್ರ ಒಂದು ಸಾರಿ ಕುದಿಸಿದರೆ ಸಾಕು.
* ಈ ಸಾರು ಮಾರನೇದಿನ ತುಂಬಾ ರುಚಿಯಾಗಿರುತ್ತದೆ,ಕುದಿಸಿ,ಕುದಿಸಿ,ಸ್ವಲ್ಪ ಗಟ್ಟಿ ಬಂದಾಗ ಇನ್ನೂ ರುಚಿ ಜಾಸ್ತಿಯಾಗುತ್ತದೆ.

ಹೋಳಿಗೆ/ಒಬ್ಬಟ್ಟು - Holige / Obbattu

0 comments

ತೊಗರಿಬೇಳೆ ಹೋಳಿಗೆ:

"ಹೋಳಿಗೆ" ಎಂದರೆ ಅದಕ್ಕೆ ಒಂದು ವಿಧವಾದ ಮಹತ್ವವಿದೆ. ಕೆಲವರು”ಹೋಳಿಗೆ’ಎನ್ನುತ್ತಾರೆ, ಮತ್ತೆ ಕೆಲವರು "ಒಬ್ಬಟ್ಟು" ಎನ್ನುತ್ತಾರೆ. ಯಾವುದು ಕರೆದರು ಒಂದೇ, ರೂಢಿ ಹೇಗಿದೆಯೋ ಹಾಗೆ ಕರೆಯುತ್ತಾರೆ. ಹಬ್ಬ-ಹರಿದಿನಗಳಲ್ಲಿ, ನೆಂಟರು ಬಂದಾಗ, ವಿಶೇಷ ದಿನಗಳಲ್ಲಿ ಹೋಳಿಗೆಗೆ ಹೆಚ್ಚು ಮಹತ್ವ. ಹೋಳಿಗೆಗಳನ್ನು ತಯಾರಿಸುವುದು ಸ್ವಲ್ಪ ಕಷ್ಟ ಸಾಧ್ಯವೇ ಆದರೂ ರುಚಿಯಂತು ತುಂಬಾ ಚೆನ್ನಾಗಿರುತ್ತದೆ. ಹೋಳಿಗೆ ತಯಾರಿಸುವುದೇ ಒಂದು ಹಬ್ಬ ಎನಿಸುತ್ತೆ. ಹೋಳಿಗೆಗಳಲ್ಲಿ ಸುಮಾರು ತರಹ ತಯಾರಿಸುತ್ತೇವೆ. ಅದರಲ್ಲಿ ತುಂಬಾ ಹೆಸರಾಗಿರುವುದು ಬೇಳೆ ಹೋಳಿಗೆ. ಅದನ್ನು ತಯಾರಿಸುವ ರೀತಿ ತಿಳಿಯೋಣ.

ತೊಗರಿಬೇಳೆ ಹೋಳಿಗೆ:

ಬೇಕಾಗುವ ಸಾಮಗ್ರಿಗಳು:

ತೊಗರಿಬೇಳೆ - ಅರ್ಧ ಕೆಜಿ
ತೆಂಗಿನಕಾಯಿ ತುರಿ - ಒಂದು ಬಟ್ಟಲು
ಬೆಲ್ಲ ರುಚಿಗೆ - ಕುಟ್ಟಿರುವುದು
ಏಲಕ್ಕಿ ಪುಡಿ ಸ್ವಲ್ಪ
ಮೈದಾಹಿಟ್ಟು - ಎರಡು ಬಟ್ಟಲು
ಚಿರೋಟಿ ರವೆ - ಕಾಲು ಕಪ್
ಹಾಲು - ಕಾಲು ಕಪ್
ತುಪ್ಪ - ಎರಡು ಚಮಚ
ಚಿಟಿಕೆ ಅರಿಸಿನ
ಉಪ್ಪು ಚಿಟಿಕೆ
ಎಣ್ಣೆ

ತಯಾರಿಸುವ ವಿಧಾನ:

ಮೊದಲು ಮೈದಾಹಿಟ್ಟು ಮತ್ತು ಚಿರೋಟಿರವೆಯನ್ನು ಚೆನ್ನಾಗಿ ಬೆರೆಸಿ, ಇದಕ್ಕೆ ಅರಿಶಿನ,ಉಪ್ಪು ಮತ್ತು ತುಪ್ಪ ಹಾಕಿಕೊಂಡು ಬೆರೆಸಿ, ನೀರು ಹಾಕಿಕೊಂಡು ಚಪಾತಿ ಹಿಟ್ಟಿನ ಹದಕ್ಕಿಂತ ತುಂಬಾ ಮೃದುವಾಗಿ ಕಲೆಸಿ. ಗಟ್ಟಿಯಾಗಿರಬಾರದು. ಅದನ್ನು ನಾಲ್ಕು ಅಥವ ಐದು ಗಂಟೆಗಳ ಕಾಲ ನೆನೆಯಲು ಬಿಡಿ. ಎಣ್ಣೆಯನ್ನು ಸ್ವಲ್ಪ ಜಾಸ್ತಿ ಸವರಿಡಿ. ಹೆಚ್ಚಾಗಿ ಎಣ್ಣೆ ಹಾಕಿದಷ್ಟು ಒಳ್ಳೆಯದು. ಹಿಟ್ಟು ಕೈಗೆ ಅಂಟಿಕೊಳ್ಳುವುದಿಲ್ಲ. ಉಪಯೋಗಿಸುವಾಗ ಹಿಟ್ಟನ್ನು ಚೆನ್ನಾಗಿ ನಾದಿಕೊಳ್ಳಿ, ಹೀಗೆ ಕಲೆಸಿರುವ ಹಿಟ್ಟನ್ನು "ಕಣಕ" ಎಂದು ಕರೆಯುತ್ತೀವಿ.

ನಂತರ ತೊಗರಿಬೇಳೆಯನ್ನು, ಚಿಟಿಕೆ ಅರಿಶಿನ ಮತ್ತು ಒಂದು ಚಮಚ ಎಣ್ಣೆಯನ್ನು ಹಾಕಿ, ಹೆಚ್ಚು ನೀರು ಹಾಕಿ ಬೇಯಿಸಿಕೊಳ್ಳಿ. ಆಗ ಅದಕ್ಕೆ ಒಂದು ಇಂಚು ಶುಂಠಿ ಹಾಕಿ. ಬೇಳೆಯನ್ನು ನುಣ್ಣಗೆ ಬೇಯಿಸದೆ ಸ್ವಲ್ಪ ಗಟ್ಟಿಯಾಗಿರುವಾಗಲೇ ತೆಗೆಯಬೇಕು. ಆಗಾಗಿ ಬೇಳೆ ಬೇಯುವಾಗ ನೋಡುತ್ತಿರಿ. ನೀರು ಹೆಚ್ಚಾಗಿ ಹಾಕಿ, ಆ ಬಸಿದ ರಸದಿಂದ ಸಾರು ತಯಾರಿಸಬಹುದು. ಅಂಚು ಒಡೆದು ಬೆಂದಿದೆ ಎನಿಸಿದ ಮೇಲೆ ಬೆಂದ ತೊಗರಿಬೇಳೆಯ ನೀರನ್ನು ಬಸಿದುಕೊಳ್ಳಿ. ಶುಂಠಿಯನ್ನು ತೆಗೆದುಹಾಕಿ. ಆಮೇಲೆ ಬಸಿದ ಬೇಳೆಗೆ ಕುಟ್ಟಿದ ಬೆಲ್ಲ ಸೇರಿಸಿ, ಬೆಂದ ಬೇಳೆಯ ಅಳತೆಗೆ ಅರ್ಧದಷ್ಟು ಬೆಲ್ಲವನ್ನು ಸರಿಯಾಗಿ ಹಾಕಿ, ಇದಕ್ಕೆ ಕಾಯಿತುರಿ, ಏಲಕ್ಕಿ ಪುಡಿ ಎಲ್ಲವನ್ನು ಬೆರೆಸಿ, ಒಲೆಯ ಮೇಲಿಟ್ಟು ಸ್ವಲ್ಪ ಎಲ್ಲವೂ ಚೆನ್ನಾಗಿ ಬೆರೆಯುವಂತೆ ತಿರುಗಿಸಿ. ಬೆಲ್ಲ ಮತ್ತು ಬೇಳೆ ಹೊಂದಿದ ಮೇಲೆ ಸ್ಟೌವ್ ಆರಿಸಿ. ಸ್ವಲ್ಪ ತಣ್ಣಗಾದ ಮೇಲೆ ಈ ಬೇಳೆಯನ್ನು ನುಣ್ಣಗೆ ರುಬ್ಬಿಕೊಳ್ಳಬೇಕು. ನೀರು ಸೇರಿಸದೆ ರುಬ್ಬಬೇಕು. ನುಣ್ಣಗೆ ರುಬ್ಬಿದ ಮಿಶ್ರಣಕ್ಕೆ "ಹೂರಣ"ವೆಂದು ಕರೆಯುತ್ತೇವೆ.

--ಇಲ್ಲಿಯವರೆಗೂ ಕಣಕ ಮತ್ತು ಹೂರಣವನ್ನು ತಯಾರಿಸಿಕೊಂಡಿದ್ದಾಯಿತು.

•ಈಗ ಹೋಳಿಗೆ ಹೇಗೆ ಮಾಡೋದು ತಿಳಿಯೋಣ:
•ಮೈದಾ ಮಿಶ್ರಣವನ್ನು ದಪ್ಪ ಗೋಲಿಗಾತ್ರದ ಅಳತೆಯಲ್ಲಿ ಸಣ್ಣ ಸಣ್ಣ ಉಂಡೆ ಮಾಡಿಕೊಳ್ಳಿ.
•ಹೂರಣದ ಮಿಶ್ರಣವನ್ನು ಕಿತ್ತಳೆ ಗಾತ್ರದಲ್ಲಿ ಉಂಡೆ ಮಾಡಿಕೊಳ್ಳಿ.
•ಬಾಳೆ ಎಲೆ/ಅಲ್ಯುಮಿನಿಯಂ ಫಾಯಿಲ್/ ಪ್ಲಾಸ್ಟಿಕ್ ಕವರ್/ ಹೋಳಿಗೆ ತಟ್ಟುವ ಕವರ್ -ನಿಮಗೆ ಯಾವುದು ಬೇಕೋ ಅದು ತೆಗೆದುಕೊಂಡು ಅದಕ್ಕೆ ಎಣ್ಣೆ ಸವರಿಕೊಂಡು ಮೊದಲು ಕಣಕವನ್ನು ಇಟ್ಟು ಸ್ವಲ್ಪ ಸಣ್ಣ ಪೂರಿ ಅಳತೆಗೆ ಒತ್ತಿಕೊಳ್ಳಿ. ಆಗೇ ಕೈನಲ್ಲಿಯೇ ತಟ್ಟಬಹುದು. ಅದರ ಮಧ್ಯ ಭಾಗಕ್ಕೆ ಬೇಳೆ ಹೂರಣವನ್ನು ಇಟ್ಟು ಒಂದು ಬದಿಯಿಂದ ಹಿಟ್ಟನ್ನು ತೆಗೆದು ಮೇಲೆ ಹಾಕುತ್ತಾ ಸ್ವಲ್ಪ ಸ್ವಲ್ಪವೇ ಹಾಕಿ,ಹೀಗೆ ಎಲ್ಲವನ್ನು ಅಂದರೆ ಹೂರಣವು ಕಾಣಿಸದಂತೆ ಒಳಭಾಗಕ್ಕೆ ಮುಚ್ಚಿ.

ಆಮೇಲೆ ಹೂರಣವನ್ನು ಕವರ್ ಮಾಡಿರುವ ತುದಿಯನ್ನು ಕೆಳಭಾಗಕ್ಕೆ ಹಾಕಿ, ಎಣ್ಣೆ ಸವರಿಕೊಂಡು ಮತ್ತೆ ಲಘುವಾಗಿ ಅದನ್ನು ಹಾಗೆಯೇ ತಟ್ಟಿ.

ನಿಮಗೆ ಯಾವ ಅಳತೆ ಅಗಲ ಬೇಕೋ ಅಷ್ಟು ತಟ್ಟಿಕೊಂಡು,ಕಾಯಿಸುವ ತವಾ ಮೇಲೆ ಎಣ್ಣೆ ಹಚ್ಚಿ ಹೋಳಿಗೆಯನ್ನು ಹಾಕಿ. ಸರಿಯಾದ ಉರಿಯಲ್ಲಿ ಬೇಯಿಸಿ. ಎರಡು ಬದಿಯು ತಿರುವಿ ಹಾಕಿ ಎಣ್ಣೆ ಹಾಕಿ ಬೇಯಿಸಿ.

ಅಗಲವಾದ ತಟ್ಟೆಯಲ್ಲಿ ಹಾಕಿ. ಇದೇ ರೀತಿ ಎಲ್ಲಾ ಹೋಳಿಗೆಗಳನ್ನು ತಯಾರಿಸಿ, ಒಂದರ ಮೇಲೆ ಒಂದು ಹಾಕಬೇಡಿ,ಪಕ್ಕಕ್ಕೆ ಜೋಡಿಸಿಕೊಳ್ಳಿ. ಹೋಳಿಗೆಯನ್ನು ತುಪ್ಪ ಹಾಕಿ,ತಿನ್ನಬಹುದು. ಜೊತೆಗೆ ಬೇಕಾದರೆ ಹಾಲನ್ನು ಕೂಡ ಹಾಕಿ ತಿನ್ನಬಹುದು. ಇದು ತುಂಬಾ ರುಚಿಕರವಾದ ಮತ್ತು ನಮ್ಮ ದಕ್ಷಿಣ ಭಾರತದಲ್ಲಿ ಸಾಮಾನ್ಯವಾಗಿ ಎಲ್ಲರು ತಯಾರಿಸುವ,ಪ್ರಸಿದ್ಧಿ ಪಡೆದಿರುವ ಅಡಿಗೆ.


•ಕೆಲವರಿಗೆ ಹೋಳಿಗೆ ದಪ್ಪ ಇಷ್ಟಪಡುತ್ತಾರೆ. ಆಗ ತಟ್ಟುವಾಗ ಹೂರಣ ಜಾಸ್ತಿ ತುಂಬಿ, ಸ್ವಲ್ಪ ಚಿಕ್ಕದಾಗಿ ತಟ್ಟಿ.
•ತೆಳುವಾಗಿ ಇಷ್ಟಪಡುವವರು ತೆಳ್ಳಗೆ ತಟ್ಟಿಕೊಂಡು ಬೇಯಿಸಿ.
•ಹೂರಣ ತುಂಬಿ ಕವರ್ ಮಾಡುವಾಗ ಸರಿಯಾಗಿ ಮುಚ್ಚಿ. (ಸ್ಟಫ್ ಮಾಡಿಕೊಳ್ಳಿ)
•ಎಣ್ಣೆಯನ್ನು ಸವರಿಕೊಳ್ಳುತ್ತಾ ಇರಬೇಕಾಗುತ್ತದೆ. ಆಗ ಹಿಟ್ಟು ಕೈಗೆ ಅಂಟಿಕೊಳ್ಳುವುದಿಲ್ಲ.
•ಬೇಯಿಸುವಾಗಲೂ ಅಷ್ಟೇ ಹುಷಾರಾಗಿ ಬೇಯಿಸಿ. ಹೋಳಿಗೆಗಳು ಎರಡು ದಿನ ಹಾಳಾಗದೆ ಚೆನ್ನಾಗಿ ಇರುತ್ತವೆ.
•ಬೇಳೆ ಬಸಿದ ನೀರನ್ನು ಚೆಲ್ಲದೆ ಅದನ್ನು ಹೋಳಿಗೆ ಸಾರಿನಂತೆ ಉಪಯೋಗಿಸಿ,ಈ ಸಾರು ತುಂಬಾ ರುಚಿ ಮತ್ತು ಪೌಷ್ಠಿಕ ವಾಗಿರುತ್ತದೆ. ಏಕೆಂದರೆ ರಸವೆಲ್ಲ ಇದರಲ್ಲೆ ಇರುವುದರಿಂದ ಬರೀ ಬೇಳೆಯಲ್ಲಿ ಏನು ಇರುವುದಿಲ್ಲ.
• ಸಾರಿನ ರೆಸಿಪಿ ಕೂಡ ತಿಳಿಸಿದ್ದೇನೆ,ಹೋಳಿಗೆ ಸಾರು -ಸಾಂಬಾರ್ ಲೇಬಲ್ ನಲ್ಲಿದೆ.

Gulab Jamun / ಗುಲಾಬ್ ಜಾಮೂನು:

0 comments

"ಜಾಮೂನು" ಎಂದರೆ ಎಲ್ಲರಿಗೂ ಇಷ್ಟವಾಗುವ ಸಿಹಿ. ಏನೇ ಪಾರ್ಟಿಗಳನ್ನು ಮಾಡುವಾಗ ಏನು ಸ್ವೀಟ್ ಮಾಡೋದು ಅಂತ ಯೋಚಿಸುವಾಗ ಮೊದಲು ತಲೆಗೆ ಹೊಳೆಯುವುದು ಜಾಮೂನು. ಹೀಗೆ ಇದಕ್ಕೆ ಸಿಹಿಗಳಲ್ಲೆ ಮೊದಲ ಸ್ಥಾನ ಎನಿಸುತ್ತೆ. ಜಾಮೂನುಗಳನ್ನು ವಿವಿಧ ರೀತಿಯಾಗಿ ತಯಾರಿಸುತ್ತೇವೆ. ರೆಡಿಮೇಡ್ ಕಂಪನಿಗಳಂತೂ ಸುಮಾರು ಬಂದಿದೆ ಈಗ. ನಾವು ಚಿಕ್ಕವರಿದ್ದಾಗ ಒಂದೆರಡು ಮಾತ್ರ ಹೆಸರಾಂತ ಬ್ರಾಂಡ್ ಮಾತ್ರ ಇತ್ತು. ಆಗ ನಮ್ಮಮ್ಮ ಮಾಡುತ್ತಿದ್ದ ಜಾಮೂನ್ ಈಗಲೂ ನಾನು ಜಾಮೂನು ತಯಾರಿಸುವಾಗಲೆಲ್ಲ ನೆನಪು ಬರುತ್ತದೆ. ಅದೊಂಥರ ಚೆನ್ನ ಆಗ. ಜಾಮೂನು ನೆನೆದ ತಕ್ಷಣ ತಿನ್ನುವ ಆಸೆ, ಕಾಯುತ್ತಿದ್ದೆವು. ಇವರ ಮನೇಲಿ ಜಾಮೂನು ಇವತ್ತು ಅಂತ ಗೊತ್ತಾಗುತ್ತಿತ್ತು ಆಗ. ಅಷ್ಟು ಜಾಮೂನಿನ ಸುವಾಸನೆ ಮನೆಯೆಲ್ಲಾ ಹರಡಿರುತ್ತಿತ್ತು. ಅಮ್ಮ ರಾತ್ರಿ ಜಾಮೂನು ಮಾಡಿಟ್ಟರೆ, ಬೆಳಗ್ಗೆ ಯಾವಾಗಾಗುತ್ತೋ ಅಂತ ಆಸೆ.ಅಮ್ಮ ಬೌಲ್ ನಲ್ಲಿ ಜಾಮೂನುಗಳನ್ನು ಹಾಕಿ ಕೊಟ್ಟಾಗ ಅದನ್ನು ತಿನ್ನುವಾಗಿನ ಖುಷಿನೇ ಒಂದು ತರಹ, ಅದೆಲ್ಲ ಈಗ ಎಲ್ಲ ನೆನಪು ಅಷ್ಟೇ. ಈಗ ಇಲ್ಲಿ ಜಾಮೂನು ಪ್ಯಾಕೆಟ್ ತಂದು ತಯಾರಿಸುವ ಬದಲು ಮನೆಯಲ್ಲಿಯೇ ಜಾಮೂನು ಮಾಡುವ ಬಗೆ ಇದೆ. ನೀವು ತಯಾರಿಸಿ.


ಗುಲಾಬ್ ಜಾಮೂನು:

ಬೇಕಾಗುವ ಸಾಮಗ್ರಿಗಳು:

ಮೈದಾಹಿಟ್ಟು - ಮೂರು ದೊಡ್ಡ ಚಮಚ
ಕೋವಾ - ಒಂದು ಬಟ್ಟಲು
ಮಿಲ್ಕ್ ಪೌಡರ್ - ಎರಡು ದೊಡ್ಡ ಚಮಚ
ಚಿಟಿಕೆ ಅಡಿಗೆ ಸೋಡ

ಸಕ್ಕರೆ ಪಾಕಕ್ಕೆ:
ಸಕ್ಕರೆ - ಐದು ಕಪ್
ಏಲಕ್ಕಿ ಪುಡಿ
ಗುಲಾಬಿ ನೀರು - ಅರ್ಧ ಚಮಚ
ಕೇಸರಿ ದಳಗಳು ಸ್ವಲ್ಪ

ಎಣ್ಣೆ ಅಥವಾ ತುಪ್ಪ ಕರಿಯಲು

ಸಕ್ಕರೆ ಪಾಕ ತಯಾರಿಸುವ ವಿಧಾನ:
ಸಕ್ಕರೆಯನ್ನು ಒಂದು ಅಗಲವಾದ ಪಾತ್ರೆಯಲ್ಲಿ ಹಾಕಿ, ಎರಡು ಕಪ್ ನೀರು ಹಾಕಿ,ಚೆನ್ನಾಗಿ ಕುದಿಸಿ,ಅದು ಸಕ್ಕರೆ ಕರಗಿ ಎಳೆಪಾಕ ಬರುವವರೆಗೂ ಕುದಿಸಿ ಅಥವಾ ಹತ್ತು ನಿಮಿಷ ಕುದಿಸಿ. ತುಂಬಾ ಗಟ್ಟಿಯಾಗಿರಬಾರದು ಪಾಕ. ಸರಿಯಾಗಿ ನೋಡಿಕೊಂಡು ಪಾಕ ಇಳಿಸಿ. ಏಲಕ್ಕಿಪುಡಿ,ಮಿಕ್ಕಿರುವ ಕೇಸರಿ ಮತ್ತು ಗುಲಾಬಿ ನೀರು ಹಾಕಿ ಪಾಕಕ್ಕೆ ಹಾಕಿ ಬೆರೆಸಿಡಿ.ಸಕ್ಕರೆಪಾಕ ತಯಾರಾಯಿತು,ಇದು ಸ್ವಲ್ಪ ಬಿಸಿಯಾಗಿಯೇ ಇರಲಿ.

• ಮಿಲ್ಕ್ ಪೌಡರ್ ಮತ್ತು ಕೋವಾ ಎರಡನ್ನು ಸೇರಿಸಿ,ಚೆನ್ನಾಗಿ ಮಸೆಯಿರಿ/ ಕೈನಲ್ಲಿ ನಾದಿಕೊಳ್ಳಿ. ಇದಕ್ಕೆ ಮೈದಾಹಿಟ್ಟು,ಚೂರು ಕೇಸರಿ ದಳಗಳು, ಸೋಡಾ ಮತ್ತು ಚಿಟಿಕೆ ಏಲಕ್ಕಿ ಪುಡಿ ಹಾಕಿ. ಚೆನ್ನಾಗಿ ಬೆರೆಸಿ,ಸ್ವಲ್ಪ ನೀರು ಹಾಕಿ ಮೃದುವಾಗಿ ಹಿಟ್ಟಿನಂತೆ ಕಲೆಸಿಕೊಳ್ಳಿ. ಇದನ್ನು ತುಂಬಾ ಗಟ್ಟಿಯಾಗಿ ನಾದಿಕೊಳ್ಳಬೇಡಿ. ಸರಿಯಾಗಿ ಗಂಟಿಲ್ಲದಂತೆ ಕಲೆಸಿ,ಹತ್ತರಿಂದ-ಹದಿನೈದು ನಿಮಿಷ ನೆನೆಯಲು ಬಿಡಿ.
• ನಂತರ ಕಲೆಸಿದ ಹಿಟ್ಟಿನಿಂದ ಚಿಕ್ಕ ಚಿಕ್ಕ ಗೋಲಿ ಗಾತ್ರದಲ್ಲಿ ಉಂಡೆ ಮಾಡಿಕೊಂಡು,ಅದನ್ನು ಅಂಗೈನಲ್ಲಿ ಇಟ್ಟುಕೊಂಡು ಮೆತ್ತಗೆ ಅದುಮಿ ಉಂಡೆ ಮಾಡಿಕೊಳ್ಳಿ.


• ಈ ರೀತಿ ಮಾಡಿಕೊಂಡ ಉಂಡೆಗಳನ್ನು ಎಣ್ಣೆ ಅಥವಾ ತುಪ್ಪದಲ್ಲಿ ಕರಿಯಿರಿ. ತುಂಬಾ ಎಚ್ಚರಿಕೆಯಿಂದ ಕರಿಯಬೇಕು. ಎಣ್ಣೆ ತುಂಬಾ ಕಾಯಿಸಿದರೆ / ಕಾಯಿಸಿದೇ ಇದ್ದರೆ ಕೂಡ ಜಾಮೂನು ಚೆನ್ನಾಗಿ ಬರುವುದಿಲ್ಲ. ಆದ್ದರಿಂದ ಎಣ್ಣೆಯನ್ನು ಕಾಯಿಸಿ, ಮಧ್ಯಮ ಉರಿಯಲ್ಲಿ ಎಣ್ಣೆಯನ್ನು ಇಟ್ಟು ಅದರಲ್ಲಿ ಉಂಡೆಗಳನ್ನು ಅದರಲ್ಲಿ ಹಾಕಿ,ತೆಳು ಕಂದು ಬಣ್ಣ ಅಥವಾ ಹೊಂಬಣ್ಣ ಬರುವವರೆಗೂ ಕರಿಯಿರಿ.
• ತಕ್ಷಣವೇ ಕರಿದಿರುವ ಜಾಮೂನುಗಳನ್ನು ಮೊದಲೇ ತಯಾರಿಸಿ ಇಟ್ಟುಕೊಂಡಿರುವ ಬಿಸಿ ಸಕ್ಕರೆ ಪಾಕದಲ್ಲಿ ಹಾಕಿಡಿ. ಅದನ್ನು ಕಲಕಬೇಡಿ. ಸುಮಾರು ಒಂದು ಗಂಟೆಯಾದರೂ ನೆನೆಯಲು ಬಿಡಿ. ಅಥವಾ ರಾತ್ರಿ ಮಾಡಿಟ್ಟು ಮಾರನೇದಿನ ಉಪಯೋಗಿಸಿದರೆ ಇನ್ನೂ ಚೆನ್ನಾಗಿರುತ್ತದೆ.

* ಮಕ್ಕಳಿಂದ-ಮುದುಕರವರೆಗೆ ಇಷ್ಟವಾಗುವ ಜಾಮೂನು ತಯಾರಾಗುತ್ತದೆ.
• ಜಾಮೂನುಗಳನ್ನು ಸಕ್ಕರೆ ಪಾಕ ಸ್ವಲ್ಪ ಹಾಕಿ ತಿನ್ನಲು ನೀಡಿ,ಈ ಜಾಮೂನು ಅನ್ನು ಬಿಸಿ ಅಥವ ತಣ್ಣಗೆ ಕೂಡ ಸೇವಿಸಬಹುದು.
• ಇನ್ನೂ ಹೆಚ್ಚಿನ ರುಚಿ ಬೇಕೆನಿಸಿದವರೂ ಜಾಮೂನು ಜೊತೆ ಐಸ್ ಕ್ರೀಮ್ ಅಥವಾ ರೆಡಿಮೇಡ್ ಕ್ರೀಮ್ ಸಹ ಹಾಕಿ ಕೊಡಬಹುದು

Tomato Gojju/ palya / ಟೊಮೆಟೋ ಗೊಜ್ಜು

0 comments

ಟೊಮೊಟೊ ಹಣ್ಣಿನಿಂದ ತುಂಬಾ ಡಿಶಸ್‌ ಮಾಡಬಹುದು, ಅದರಲ್ಲಿ ಇದು ಒಂದು. ಇದು ಚಪಾತಿಗೆ ನೆಂಚಿಕೊಳ್ಳಲು ಬಲು ಚೆಂದ. ಬೇಗ ತಯಾರಿಸಬಹುದು.

ಟೊಮೆಟೋ ಗೊಜ್ಜು :

ಬೇಕಾಗುವ ಪದಾರ್ಥಗಳು :
ಹಣ್ಣಾಗಿರುವ ಟೊಮೊಟೊ 4ರಿಂದ 5,
ಈರುಳ್ಳಿ 2
ಹಸಿಮೆಣಸಿನಕಾಯಿ 2
ಕರಿಬೇವು(ಬೇಕಾದರೆ),
ಎಣ್ಣೆ,
ಸಾಸಿವೆ
ಉದ್ದಿನಬೇಳೆ,
ಕಡಲೆಬೇಳೆ ,
ಕೆಂಪು ಮೆಣಸಿನ ಪುಡಿ ,
ಉಪ್ಪು,
ಕೊತ್ತಂಬರಿ ಸೊಪ್ಪು

ಮಾಡುವ ವಿಧಾನ :

ಮೊದಲಿಗೆ ಈರುಳ್ಳಿ, ಹಸಿಮೆಣಸಿನಕಾಯಿ , ಕೊತ್ತುಂಬರಿ ಹೆಚ್ಚಿಕೊಳ್ಳಿ.
ಒಗ್ಗರಣೆಗೆ ಪಾತ್ರೆ ಇಟ್ಟು ಎಣ್ಣೆ ಹಾಕಿ, ಕಾದ ಬಳಿಕ ಸಾಸಿವೆ,ಉದ್ದಿನಬೇಳೆ, ಕರಿಬೇವು, ಹೆಚ್ಚಿದ ಈರುಳ್ಳಿ, ಮೆಣಸಿನಕಾಯಿ ಹಾಕಿ ಬಾಡಿಸಿ, ನಂತರ ಟೊಮೊಟೊ ಹಾಕಿ ಚೆನ್ನಾಗಿ ತಿರುವಿ. ಟೊಮೊಟೊ ಬೇಯಲು ಬಿಡಿ.ಸ್ವಲ್ಪ ಹೊತ್ತು ಎಣ್ಣೆಯಲ್ಲಿ ಬೆಂದ ನಂತರ ತೆಳುವಾಗಿ, ಹೆಚ್ಚಾಗಿ ಬೇಕಾಗಿದ್ದರೆ ಸ್ವಲ್ಪ ನೀರು ಹಾಕಿ, ಉಪ್ಪು ಮತ್ತು ಕೆಂಪುಮೆಣಸಿನಪುಡಿ ಹಾಕಿ ಚೆನ್ನಾಗಿ ತಿರುವಿ. ಸ್ವಲ್ಪ ಹೊತ್ತು ಹಾಗೆ ಬಿಟ್ಟು ನಂತರ ಕೊತ್ತುಂಬರಿ ಉದುರಿಸಿ. ಇದಕ್ಕೆ ಬೇಕಾದರೆ ಕೊಬ್ರಿ ತುರಿ ಇಲ್ಲಾ ಹಸಿಕಾಯಿತುರಿ ಹಾಕಿ ಬೆರಸಿ. ಇದು ಚಪಾತಿ ಮತ್ತು ಬ್ರೆಡ್‌ ಜೊತೆ ತಿನ್ನಲು ಚೆನ್ನಾಗಿರುತ್ತದೆ. ಬೇಗ ಕೂಡಾ ಆಗುತ್ತದೆ. ಉಪ್ಪು , ಖಾರ ಹೆಚ್ಚಾಗಿ ಹಾಕಿದರೆ ಅನ್ನಕ್ಕೂ ಕಲಸಿಕೊಂಡು ತಿನ್ನಬಹುದು.

Mango delight/ MaavinaHannina Seekarane

0 comments

ಮಾವಿನಹಣ್ಣಿನ ಸೀಕರಣೆ:

ಬೇಕಾಗುವ ಸಾಮಗ್ರಿಗಳು:

ಮಾವಿನಹಣ್ಣು
ಸಕ್ಕರೆ ರುಚಿಗೆ
ಹಾಲು/ಮಿಲ್ಕ್ ಮೆಯ್ಡ್- 1/2 ಕಪ್
ತೆಂಗಿನಹಾಲು-1/2 ಕಪ್
ಏಲಕ್ಕಿಪುಡಿ-ಸ್ವಲ್ಪ
ಜೇನುತುಪ್ಪ-2ಟೇಬಲ್ ಚಮಚ

ತಯಾರಿಸುವ ವಿಧಾನ:
ಮಾವಿನ ಹಣ್ಣನ್ನು ಸಣ್ಣಗೆ ಹೆಚ್ಚಿಕೊಳ್ಳಿ. ಅದನ್ನು ಒಂದು ಬಟ್ಟಲಿಗೆ ಹಾಕಿ, ಚೆನ್ನಾಗಿ ಕೈನಲ್ಲಿ ಹಿಸುಕಿ ಪೇಸ್ಟ್ ತರಹ ಮಾಡಿಕೊಳ್ಳಿ. ಇಲ್ಲವೆಂದರೆ ಬ್ಲೆಂಡರ್ ನಲ್ಲಿ ಪ್ಯೂರಿ ಮಾಡಿಕೊಳ್ಳಿ. ಏನಂದರೂ ಕೈನಲ್ಲಿ ತಯಾರಿಸಿದ್ದು ರುಚಿ ಹೆಚ್ಚು. ಆ ಮಾವಿನಹಣ್ಣಿನ ಪೇಸ್ಟ್ ಗೆ ಸಕ್ಕರೆ,ತೆಂಗಿನಗಟ್ಟಿಹಾಲು,ಹಾಲು,ಏಲಕ್ಕಿಪುಡಿ ಮತ್ತು ಜೇನುತುಪ್ಪವನ್ನು ಹಾಕಿ, ಚೆನ್ನಾಗಿ ಬೆರೆಸಿ, ಸರ್ವ್ ಮಾಡಿ. ತಣ್ಣಗೆ ಇಷ್ಟಪಡುವವರು ಫ್ರಿಡ್ಜ್ ನಲ್ಲಿಟ್ಟು ತಿನ್ನಬಹುದು.
*ಅವಲಕ್ಕಿ ಬೇಕಾದರೆ ಸೇರಿಸಿಕೊಳ್ಳಬಹುದು.
*ಬೇಕೆನಿಸಿದರೆ ದ್ರಾಕ್ಷಿ, ಗೋಡಂಬಿ ಕೂಡ ಬೆರೆಸಿಕೊಳ್ಳಬಹುದು.

Kodubale / Spicy Rings - ಕೋಡುಬಳೆ

0 comments

ಕೋಡುಬಳೆ:

ಕುರುಕಲು ತಿಂಡಿ ಎಂದರೆ ನೆನಪಾಗೋದೇ ಅಮ್ಮ ಮಾಡುತ್ತಿದ್ದ ತಿಂಡಿಗಳು. ಈಗ ನಾವುಗಳು ಎಷ್ಟೇ ತಿಂಡಿ ಅವರು ತಯಾರಿಸುತ್ತಿದ ರೀತಿಯೇ ಮನೆಯಲ್ಲಿ ಮಾಡಿದರು ಸಹ ಮತ್ತು ಈಗೆಲ್ಲಾ ಬೇಕರಿಗಳಲ್ಲೂ ತುಂಬಾ ಚೆನ್ನಾಗಿ ಅದೇ ತರಹ ತಿಂಡಿಗಳು ಸಿಕ್ಕುತ್ತವೆ, ಅದನ್ನು ತಗೊಂಡು ಬಂದು ತಿಂದರು ಕೂಡ ಅಜ್ಜಿ ಮತ್ತು ಅಮ್ಮ ಮಾಡಿದ ತಿಂಡಿಗಳ ನೆನಪು ಮರೆಯಲಾಗದು ಅಂತ ನನಗನ್ನಿಸುತ್ತೆ. ನಮ್ಮ ಅಮ್ಮಂದಿರು ಕುರುಕಲು ತಿಂಡಿ ತಯಾರಿಸುವಾಗ ಅದಕ್ಕೆ ಹೆಚ್ಚು ಗಮನ ಕೊಟ್ಟು ತಯಾರಿಸುತ್ತಿದ್ದರು,ಅಕ್ಕಿಯಿಂದ ತಯಾರಿಸುವ ತಿಂಡಿಗಳಿಗಂತೂ ಅದಕ್ಕೆಂದೇ ಅಕ್ಕಿಯನ್ನು ತೊಳೆದು,ನೆರಳಲ್ಲಿ ಒಣಗಿಸಿ,ಮಿಲ್ ನಲ್ಲಿ ನೀಟಾಗಿ ಹಿಟ್ಟು ಹಾಕಿಸಿಕೊಂಡು ಬರುತ್ತಿದ್ದರು. ಆ ರೀತಿ ಅಕ್ಕಿಹಿಟ್ಟಿನಿಂದ ತಯಾರಿಸಿದ ತಿಂಡಿಗಳಂತೂ ಬಹಳ ರುಚಿ. ನಾವುಗಳೋ ಈಗ ರೆಡಿಮೇಡ್ ಅಕ್ಕಿ ಹಿಟ್ಟು ತಂದು ತಯಾರಿಸುವುದು. ಅದರಲ್ಲಿ ತಯಾರಿಸೋದೇ ಕಷ್ಟ. ಇನ್ನು ತೊಳೆದು,ಒಣಗಿಸಿ,ಮಿಷನ್ ಗೆ ಹಾಕಿಸಿಕೊಂಡು ಬರುವಷ್ಟು ತಾಳ್ಮೆ ನಮಗೆಲ್ಲಿ ಬರಬೇಕು ಅಲ್ವಾ? ಆದರೂ ಹೇಗೋ ಈಗ ಸಧ್ಯ ನಮ್ಮಂತವರಿಗೆ ಅಂತ ಈ ರೀತಿ ಒಳ್ಳೆಯ ಅಕ್ಕಿಹಿಟ್ಟು ಸಿಗುವುದು ನಮ್ಮ ಪುಣ್ಯ. ಆದರೂ ಅಮ್ಮ ತಯಾರಿಸಿದ ಕುರುಕಲು ತಿಂಡಿ ತಿನ್ನುವಾಗ ತುಂಬಾ ರುಚಿ,ಈಗ ನಾವು ತಯಾರಿಸುವಾಗ ಹಿಟ್ಟು ಮಾಡಿಸುವ ಕೆಲಸ ಒಂದನ್ನು ಬಿಟ್ಟು ಮಿಕ್ಕಿದ್ದೆಲ್ಲಾ ಎಲ್ಲಾ ಕೆಲಸಗಳು ಮಾಮುಲಿ. ಕುರುಕಲು ಅಥವಾ ಯಾವುದೇ ಎಣ್ಣೆ ತಿಂಡಿಗಳನ್ನು ತಯಾರಿಸುವಾಗ ಸ್ವಲ್ಪ ಕಷ್ಟನೇ,ಒಂದೇ ಒಂದು ದಿನ ಕಷ್ಟಪಟ್ಟರೆ ರುಚಿಯಾದ ತಿಂಡಿ ತಯಾರುಮಾಡಿಟ್ಟುಕೊಂಡು ಬೇಕಾದಾಗ ಉಪಯೋಗಿಸಬಹುದು. ಈಗ ಇಲ್ಲಿ ಕೋಡುಬಳೆ ತಯಾರಿಸೋಣ.ಕೋಡುಬಳೆಯನ್ನು ತಯಾರಿಸುವುದರಲ್ಲೂ ಅನೇಕ ವಿಧಗಳಿವೆ,ಅವುಗಳಲ್ಲಿ ಇದು ಒಂದು.

ಬೇಕಾಗುವ ಸಾಮಾಗ್ರಿಗಳು:

೪ ಕಪ್ ಅಕ್ಕಿಹಿಟ್ಟು
೧ ಕಪ್ ಮೈದಾ ಹಿಟ್ಟು
೧ ಕಪ್ ಚಿರೋಟಿ ರವೆ
೧ ಕಪ್ ಹುರಿಗಡಲೆ ಹಿಟ್ಟು /ಪುಡಿ
ಜೀರಿಗೆ ೧ ಟೇಬಲ್ ಸ್ಪೂನ್
ಎಳ್ಳು ೧ ಟೇಬಲ್ ಸ್ಪೂನ್
ಇಂಗಿನ ಪುಡಿ ೧ ಟೀ ಸ್ಪೂನ್
೪ ಟೇಬಲ್ ಸ್ಪೂನ್ ಕಾಯಿಸಿದ ಎಣ್ಣೆ
ಕರಿಬೇವಿನ ಸೊಪ್ಪು ಸಣ್ಣಗೆ ಹೆಚ್ಚಿದ್ದು (ಬೇಕಿದ್ದರೆ)
ಅಚ್ಚಖಾರದ ಪುಡಿ ಮತ್ತು ಉಪ್ಪು ರುಚಿಗೆ ತಕ್ಕಷ್ಟು

ತಯಾರಿಸುವ ವಿಧಾನ:

ಎಲ್ಲಾ ಸಾಮಾಗ್ರಿಗಳನ್ನು ಒಂದು ಅಗಲವಾದ ಪಾತ್ರೆಯಲ್ಲಿ ಹಾಕಿ ಚೆನ್ನಾಗಿ ಬೆರೆಸಿ,ಎಷ್ಟು ಅಗತ್ಯವೊ ಅಷ್ಟು ಮಾತ್ರ ನೀರನ್ನು ಹಾಕಿಕೊಂಡು ಹಿಟ್ಟನ್ನು ಗಟ್ಟಿಯಾಗಿ ಕಲೆಸಿಕೊಳ್ಳಿ, ಸ್ವಲ್ಪ ಮೆದುವಾಗಿರುವಂತೆ ಕಲೆಸಿಕೊಳ್ಳಿ, ತುಂಬಾ ಗಟ್ಟಿಯಾಗಿರಬಾರದು. ನಂತರ ಅದರಿಂದ ಚಿಕ್ಕಚಿಕ್ಕ ಉಂಡೆ ತೆಗೆದುಕೊಂಡು,ಮಣೆಯ ಮೇಲೆ ಅದನ್ನು ಕೋಡುಬಳೆ ಆಕಾರದಲ್ಲಿ ರಿಂಗ್ ತರಹ ಮಾಡಿಕೊಂಡು ಕಾದಿರುವ ಎಣ್ಣೆಯಲ್ಲಿ ಕರಿಯಿರಿ, ಉರಿ ತುಂಬಾ ಇರಬಾರದು,ಒಳಗೆ ಹಿಟ್ಟು ಬೇಯುವುದಿಲ್ಲ, ಮೀಡಿಯಂ ಅಥವಾ ಸಣ್ಣ ಉರಿಯಲ್ಲಿ ಕಂದು ಬಣ್ಣ ಬರುವವರೆಗು ಗರಿಗರಿಯಾಗಿ ಕರಿಯಿರಿ, ಇದೇ ರೀತಿ ಎಲ್ಲಾ ಕರಿದಿಟ್ಟು,ಚೆನ್ನಾಗಿ ತಣ್ಣಗಾದ ಮೇಲೆ ಗಾಳಿ ಆಡದ ಡಬ್ಬದಲ್ಲಿ ತುಂಬಿಡಿ,ಇದು ಸುಮಾರು ದಿನ ಚೆನ್ನಾಗಿ ಇರುತ್ತದೆ. ಈ ಕುರುಕು ತಿಂಡಿ ಕಾಫಿ ,ಟೀ,ಎಲ್ಲದಕ್ಕೂ ಸೈ.

Puliyogare - ಪುಳಿಯೋಗರೆ:

0 comments

ಪುಳಿಯೋಗರೆ ಎಂದರೆ ದೇವಸ್ಥಾನದಲ್ಲಿ ಕೊಡುವ ಪ್ರಸಾದದ ನೆನಪೇ ಬರುತ್ತದೆ. ಪ್ರಸಾದದ ಪುಳಿಯೋಗರೆ ರುಚಿಯೇ ಬೇರೆ. ಅದು ಹೇಳಲು ಆಗುವುದಿಲ್ಲ . ಅದನ್ನು ತಿಂದವರೆ ಬಲ್ಲರು. ದೇವಸ್ಥಾನದ ಪ್ರಸಾದದ ಲಿಸ್ಟ್ ನಲ್ಲಿ ಪುಳಿಯೋಗರೆಗೆ ಮೊದಲ ಸ್ಥಾನ ಎನಿಸುತ್ತೆ. ಅಲ್ಲಿ ದೇವರ ದರ್ಶನಕ್ಕಾಗಿ ಕಾದು ನಿಂತು,ಸುಸ್ತಾಗಿ,ದರ್ಶನ ಮಾಡಿದ ಮೇಲೆ ಪ್ರಸಾದವೇ ಪರಮಾನ್ನ. ಅದೇನೋ ಗೊತ್ತಿಲ್ಲ ಪ್ರಸಾದ ಒಂದೆರಡು ತುತ್ತು ತಿನ್ನುತ್ತಿದ್ದಂತೆಯೇ ಅಷ್ಟೊತ್ತಿನವರೆಗಿನ ಆಯಾಸ, ಸುಸ್ತು ಎಲ್ಲವೂ ಮಾಯವಾಗುತ್ತದೆ. ಏನೋ ತುಂಬ ಊಟವನ್ನೆ ಮಾಡಿದಿವೆನೋ ಎನಿಸುತ್ತೆ ಅಲ್ಲವೇ? ನನಗಂತೂ ಅನಿಸುತ್ತೆ. ದೇವಸ್ಥಾನದಲ್ಲಿ ದೇವರಿಗೆ ಇಟ್ಟ ಪ್ರಸಾದದ ಪುಳಿಯೋಗರೆಯು ತುಂಬಾ ಚೆನ್ನಾಗಿರುತ್ತದೆ. ಇದು ನಾನು ಬರೆದಿರುವ ರೆಸಿಪಿ ನನ್ನ ಅಮ್ಮ ಮಾಡುತ್ತಿರುತ್ತಾರೆ. ಅವರು ತುಂಬಾ ಚೆನ್ನಾಗಿ ಪುಳಿಯೋಗರೆ ತಯಾರಿಸುತ್ತಾರೆ. ಅವರು ತಯಾರಿಸುವ ರುಚಿ ಬಹಳ ಚೆನ್ನಾಗಿರುತ್ತದೆ. ನಾನು ಅವರು ತಯಾರಿಸುವಾಗ ನೋಡಿ ಕಲಿತಿದ್ದು ಅಷ್ಟೇ. ಆಗ ಪುಳಿಯೋಗರೆ ಮಾಡಿ, ಅದನ್ನು ಬಾಟಲ್ ಗೆ ಹಾಕಿ ತುಂಬಿಡುವವರೆಗೆ ಮನೆಯಲ್ಲಿ ಅದೇ ದೊಡ್ಡ ಕೆಲಸ ಅವತ್ತಿನ ದಿನ. ಆದರೆ ಒಂದು ದಿನ ಕಷ್ಟಪಟ್ಟರೆ ಬೇಕಾದಾಗ ಪುಳಿಯೋಗರೆ ಮಾಡಿಕೊಂಡು ತಿನ್ನುವುದು ಬಲು ಸುಲಭ. ಈಗೆಲ್ಲಾ ರೆಡಿಮೇಡ್ ಪೌಡರ್ ಹಾಕಿ ಮಾಡುವುದೇ ಸರ್ವೇಸಾಮಾನ್ಯವಾಗಿದೆ. ಆದರೆ ಅದು ಈ ನಮ್ಮ ಸಂಪ್ರದಾಯದಂತೆ ತಯಾರಿಸಿದ ರುಚಿ ಬರುವುದಿಲ್ಲ. ಅದಕ್ಕೆ ನಾನು ಕಲಿತಿರುವ ರೆಸಿಪಿಯನ್ನು ಬರೆದಿರುವೆ. ಇದು ಕೂಡ ಅಮ್ಮನ ಪುಳಿಯೋಗರೆಯ ರುಚಿಗೆ ಸ್ವಲ್ಪ ಹತ್ತಿರ ಬರುತ್ತದೆ. ನಾನೇ ತಯಾರಿಸಿ ಕಲಿತಿರುವ ಈ ಪುಳಿಯೋಗರೆಯ ರೆಸಿಪಿಯನ್ನು ಬರೆದಿರುವೆ. ತಯಾರಿಸುವ ಬಗೆಯನ್ನು ನೀವು ತಿಳಿಯಿರಿ.


ಪುಳಿಯೋಗರೆ:

*ಮೊದಲು ಪುಳಿಯೋಗರೆ ಗೊಜ್ಜನ್ನು ತಯಾರಿಸಿಕೊಳ್ಳಿ.

ಪುಡಿ ಮಾಡಿಕೊಳ್ಳಲು ಬೇಕಾಗುವ ಸಾಮಗ್ರಿಗಳು:
ಒಣಮೆಣಸಿನಕಾಯಿ ರುಚಿಗೆ
ಧನಿಯಾ - ಎರಡು ಚಮಚ
ಜೀರಿಗೆ - ಎರಡು ಚಮಚ
ಮೆಣಸು - ಒಂದು ಚಮಚ
ಕಡ್ಲೆಬೇಳೆ ಮತ್ತು ಉದ್ದಿನಬೇಳೆ- ಒಂದೊಂದು ಚಮಚ
ಚೆಕ್ಕೆ,ಲವಂಗ ಸ್ವಲ್ಪ

ಒಗ್ಗರಣೆಗೆ:
ಎಣ್ಣೆ - ಒಂದು ಬಟ್ಟಲು
ಸಾಸಿವೆ,
ಮತ್ತು ಇಂಗು ಚಿಟಿಕೆ


ಗೊಜ್ಜಿಗೆ:
ಹುಣಸೇಹಣ್ಣು ಅಥವಾ ಹುಣಸೇಹಣ್ಣಿನ ಪೇಸ್ಟ್
ಬೆಲ್ಲ ಸ್ವಲ್ಪ / ಬೆಲ್ಲದ ಪುಡಿ - ಒಂದು ಚಮಚ
ಕಾಲು ಚಮಚ ಅರಿಶಿನ
ಉಪ್ಪು
ಎಣ್ಣೆ ಸಾಕಾಗುವಷ್ಟು

ತಯಾರಿಸುವ ರೀತಿ:
• ಹುಣಸೇಹಣ್ಣನ್ನು ಉಪಯೋಗಿಸುವುದಾದರೆ, ಹುಣಸೇಯನ್ನು ಚೆನ್ನಾಗಿ ತೊಳೆದು ನೀರಿನಲ್ಲಿ ನೆನೆಹಾಕಿ ಸುಮಾರು ಹೊತ್ತು. ನಂತರ ಅದರಿಂದ ರಸವನ್ನು ತೆಗೆದುಕೊಳ್ಳಿ. ಈ ರಸವೂ ತುಂಬಾ ಗಟ್ಟಿಯಾಗಿರಬೇಕು. ಹೀಗೆ ಸ್ವಲ್ಪ ಸ್ವಲ್ಪ ನೀರು ಹಾಕಿ ಹಿಂಡಿಕೊಂಡು ರಸ ತೆಗೆದು. ಅದನ್ನು ಸೋಸಿಕೊಳ್ಳಿ. ಆ ಕಡೆ ಇಡಿ.
• ಪುಡಿ ಮಾಡಿಕೊಳ್ಳಲು ಹೇಳಿರುವ ಸಾಮಗ್ರಿಗಳನ್ನು ಒಂದು ಪ್ಯಾನ್ ಗೆ ಒಂದು ಚಮಚ ಎಣ್ಣೆ ಹಾಕಿ ಅದೆಲ್ಲವನ್ನು ಒಂದೊಂದಾಗಿ ಹುರಿದಿಟ್ಟುಕೊಳ್ಳಿ.
• ಬೇರೆ ಸ್ವಲ್ಪ ದಪ್ಪ ತಳದ ಪಾತ್ರೆಗೆ ಐದಾರು ಚಮಚ ಎಣ್ಣೆಯನ್ನು ಹಾಕಿ, ಸಾಸಿವೆ ಮತ್ತು ಇಂಗು ಹಾಕಿ, ಅದಕ್ಕೆ ಹುಣಸೇಹಣ್ಣಿನ ರಸವನ್ನು ಹಾಕಿ, ಕುದಿಯಲು ಇಡಿ. ಅದರ ನೀರಿನ ಅಂಶವೆಲ್ಲಾ ಹೋದ ಮೇಲೆ ಪುಡಿ ಮಾಡಿಟ್ಟುಕೊಂಡಿರುವ ಮಸಾಲೆ ಪುಡಿಯನ್ನು ಹಾಕಿ, ಎಲ್ಲವೂ ಚೆನ್ನಾಗಿ ಬೆರಸಿ, ಕೈ ಬಿಡದೇ ತಿರುಗಿಸುತ್ತಿರಿ. ಅರಿಶಿನ,ಉಪ್ಪು ಮತ್ತು ಬೆಲ್ಲ ಸೇರಿಸಿ, ಮತ್ತೆರಡು ಚಮಚ ಎಣ್ಣೆ ಹಾಕಿ. ಈ ಸಮಯದಲ್ಲಿ ನಿಮಗೆ ಬೇಕಾದಂತೆ ಉಪ್ಪು ಮತ್ತು ಕಾರವನ್ನು ಸರಿಯಾಗಿದೆಯಾ ಎಂದು ನೋಡಿ, ಏನು ಬೇಕೋ ಅದನ್ನು ಹಾಕಿ. ಉಪ್ಪು ಮತ್ತು ಕಾರ ಸ್ವಲ್ಪ ಜಾಸ್ತಿ ಇದ್ದರೆ ಒಳ್ಳೆಯದು. ಆಮೇಲೆ ಅನ್ನಕ್ಕೆ ಕಲಸುವಾಗ ಸಪ್ಪೆ ಬರುತ್ತೆ ಇಲ್ಲ ಅಂದರೆ. ಅದಕ್ಕೆ ಈಗ ಜಾಸ್ತಿ ಹಾಕಿಕೊಳ್ಳಬೇಕು. ಮಧ್ಯೆ-ಮಧ್ಯೆ ತಿರುಗಿಸುತ್ತಿರಿ. ಎಲ್ಲಾ ಮಸಾಲೆ ಮತ್ತು ಹುಣಸೇರಸವು ಚೆನ್ನಾಗಿ ಬೆಂದ ನಂತರ ಪಾತ್ರೆಗೆ ಅಂಟಿಕೊಳ್ಳದೇ ಎಣ್ಣೆಯಿಂದ ಬೇರ್ಪಟ್ಟ ಮೇಲೆ ಗೊಜ್ಜಿನ ರೀತಿ ಹದ ಬಂದಾಗ ಉರಿಯಿಂದ ಇಳಿಸಿ. ಇದು "ಪುಳಿಯೋಗರೆ ಗೊಜ್ಜು".

• ಗೊಜ್ಜು ತಯಾರಿಸುವಾಗ ತುಂಬಾ ಹೆಚ್ಚಾಗಿ ತಯಾರಿಸಿಕೊಂಡರೆ, ಅದನ್ನು ತಣ್ಣಗಾದ ಮೇಲೆ ಗಾಳಿಯಾಡದ ಬಾಟಲ್ ನಲ್ಲಿ ತುಂಬಿಡಬಹುದು.
• ಈ ಗೊಜ್ಜನ್ನು ತಿಂಗಳುಗಟ್ಟಲೆ ಇಟ್ಟುಕೊಳ್ಳಬಹುದು. ಹೆಚ್ಚಾಗಿ ಎಣ್ಣೆಯನ್ನು ಹಾಕಿ, ಎಣ್ಣೆ ಗೊಜ್ಜಿನ ಮೇಲೆ ತೇಲುತ್ತಿರಬೇಕು.
• ಗೊಜ್ಜನ್ನು ಫ್ರಿಡ್ಜ್ ನಲ್ಲಿ ಇಟ್ಟರೆ ಇನ್ನೂ ಹೆಚ್ಚುಕಾಲ ಇರುತ್ತದೆ. ಬೇಕಾದಾಗ ತೆಗೆದು ಉಪಯೋಗಿಸಿಕೊಳ್ಳಬಹುದು.
• ಫ್ರೆಶ್ ಆಗಿ ತಯಾರಿಸಿಕೊಂಡರೆ ಹೆಚ್ಚು ರುಚಿ. ಇದನ್ನು ತಯಾರಿಸುವುದು ಸ್ವಲ್ಪ ಕಷ್ಟವಾಗಿರುವುದರಿಂದ ಗೊಜ್ಜನ್ನು ಮಾಡಿಟ್ಟುಕೊಂಡರೆ ಸುಲಭವಾಗುತ್ತದೆ.

** ಈಗ ಪುಳಿಯೋಗರೆ ತಯಾರಿಸೋಣ :
ಪುಳಿಯೋಗರೆ ಅನ್ನಕ್ಕೆ ಸಾಮಾಗ್ರಿಗಳು:

ಎಣ್ಣೆ, ಸಾಸಿವೆ, ಇಂಗು
ಕಡ್ಲೆಬೇಳೆ, ಉದ್ದಿನಬೇಳೆ
ಒಣಮೆಣಸಿನಕಾಯಿ
ಕಡ್ಲೆಕಾಯಿಬೀಜ
ಕರಿಬೇವು
ಗೋಡಂಬಿ (ಬೇಕಾದರೆ)
ಅನ್ನ - ಅನ್ನವನ್ನು ಉದುರುಉದುರಾಗಿ ತಯಾರಿಸಿ, ತಣ್ಣಗಾಗಲು ಬಿಡಿ.

ಒಗ್ಗರಣೆಗೆ ಸ್ವಲ್ಪ ಎಣ್ಣೆ ಹಾಕಿ, ಅದರಲ್ಲಿ ಕಡ್ಲೆಕಾಯಿಬೀಜಗಳನ್ನು ಹದವಾಗಿ,ಹುರಿದು ತೆಗೆದಿಡಿ.
ಅದೇ ಪ್ಯಾನ್ ನಲ್ಲಿ ಸಾಸಿವೆ,ಇಂಗು,ಕಡ್ಲೆಬೇಳೆ, ಉದ್ದಿನಬೇಳೆ,ಒಣಮೆಣಸಿನಕಾಯಿ ಮತ್ತು ಕರಿಬೇವು ಹಾಕಿ ಒಂದೆರಡು ನಿಮಿಷ ಬಾಡಿಸಿ.
ತಣ್ಣಗಾದ ಅನ್ನಕ್ಕೆ, ಒಗ್ಗರಣೆ ಮತ್ತು ಒಂದೆರಡು ಚಮಚ ಪುಳಿಯೋಗರೆ ಗೊಜ್ಜು ಎಷ್ಟು ಬೇಕೋ ಅಷ್ಟು ಮಾತ್ರ ಹಾಕಿಕೊಂಡು ಚೆನ್ನಾಗಿ ಕಲೆಸಿ . ಗೊಜ್ಜು ಹಾಕುವ ಪ್ರಮಾಣವು ನೀವು ತೆಗೆದುಕೊಂಡಿರುವ ಅನ್ನದ ಮೇಲೆ ಅವಲಂಬಿಸಿರುತ್ತದೆ. ಆಗಾಗಿ ಅನ್ನ ನೋಡಿ ಗೊಜ್ಜು ಹಾಕಿಕೊಂಡು ಕಲೆಸಿ, ಹುರಿದ ಕಡ್ಲೆಕಾಯಿಬೀಜಗಳನ್ನು, ಒಣಕೊಬ್ಬರಿತುರಿ,ಮತ್ತು ಹುರಿದು ಕುಟ್ಟಿದ ಎಳ್ಳು ಮತ್ತು ಜೀರಿಗೆಯನ್ನು ಹಾಕಿ ಎಲ್ಲವೂ ಸರಿಯಾಗಿ ಹೊಂದಿಕೊಳ್ಳುವಂತೆ ಕೈನಲ್ಲಿಯೇ ಚೆನ್ನಾಗಿ ಕಲೆಸಿಡಿ. ಉಪ್ಪು ಮತ್ತು ಕಾರ ನೋಡಿ ಹಾಕಿಕೊಳ್ಳಿ.ಅನ್ನಕ್ಕೆ,ಒಗ್ಗರಣೆ,ಗೊಜ್ಜು ಮತ್ತು ಪುಡಿಗಳು ಎಲ್ಲವೂ ಸರಿಯಾಗಿ ಬೆರೆಯುವಂತೆ ಕಲೆಸಿ.ಈಗ ಪುಳಿಯೋಗರೆಯೂ ತಯಾರಾದಂತೆ. ತಿನ್ನಲು ಸಿದ್ಧ. ಕರಿದ ಗೋಡಂಬಿಗಳನ್ನು ಹಾಕಿ ಅಲಂಕರಿಸಿ.
• ಪುಳಿಯೋಗರೆಯು ಕಲೆಸಿದ ತಕ್ಷಣ ತಿನ್ನುವುದಕ್ಕಿಂತ, ಸ್ವಲ್ಪ ಹೊತ್ತಾದ ಮೇಲೆ ತಿನ್ನುವುದರಿಂದ ರುಚಿ ಹೆಚ್ಚುತ್ತದೆ.
• ಮತ್ತೆ ಇನ್ನೊಂದು - ಅನ್ನ ಕಲೆಸುವಾಗ ಗೊಜ್ಜು ಯಾವಾಗಲೂ ಜಾಸ್ತಿ ಹಾಕಬೇಕು,ಉಪ್ಪು ಮತ್ತು ಗೊಜ್ಜನ್ನು ಕಮ್ಮಿ ಹಾಕಿದರೆ ಅದು ನೆನೆದ ನಂತರ ಸಪ್ಪೆಯಾಗುತ್ತದೆ.
ಇದನ್ನು ಬೇಕೆನಿಸಿದರೆ ರಾಯತ ಮತ್ತು ಹಪ್ಪಳದೊಂದಿಗೆ ಸರ್ವ್ ಮಾಡಬಹುದು.
*ಪುಳಿಯೋಗರೆ ಗೊಜ್ಜನ್ನು ತಯಾರಿಸಿಟ್ಟುಕೊಂಡರೆ,ತಕ್ಷಣಕ್ಕೆ ಬೇಗ ಬರೀ ಒಗ್ಗರಣೆ ಮಾತ್ರ ಹಾಕಿಕೊಂಡು ಅನ್ನಕ್ಕೆ ಬೆರೆಸಿ,ತಯಾರಿಸಬಹುದು. ಎಷ್ಟು ಬೇಕೋ ಅಷ್ಟು ಮಾತ್ರ ಉಪಯೋಗಿಸಿ,ತೆಗೆದಿಡಿ. ಒದ್ದೆ ಚಮಚಗಳನ್ನು ಬಳಸಬೇಡಿ. ನೀರು ಬಿದ್ದರೆ ಬೂಸ್ಟ್ ಬರುತ್ತದೆ.
*ಪುಳಿಯೋಗರೆ ಮಾಡುವುದು ಸುಲಭ,ಆದರೆ ಗೊಜ್ಜು ತಯಾರಿಸುವುದೇ ಕಷ್ಟ.
*ತುಂಬಾ ಅರ್ಜೆಂಟ್ ಇದ್ದರೆ ಆಗೆ ಕಲೆಸಿ ತಿನ್ನಬಹುದು.

Cashewnut Burfi / ಗೋಡಂಬಿ ಬರ್ಫಿ:

0 comments


ಗೋಡಂಬಿ ಬರ್ಫಿ:

ಬೇಕಾಗುವ ಸಾಮಗ್ರಿಗಳು:

ಗೋಡಂಬಿ - ಒಂದು ಕಪ್
ಸಕ್ಕರೆ - ಒಂದು ಕಪ್/ರುಚಿಗೆ ತಕ್ಕಷ್ಟು
ಹಾಲು - ಅರ್ಧ ಕಪ್
ಕಂಡೆನ್ಸ್ಡ್ ಮಿಲ್ಕ್ - ಒಂದು ಟಿನ್
ತುಪ್ಪ - ಎರಡು ದೊಡ್ಡ ಚಮಚ
ಏಲಕ್ಕಿ ಪುಡಿ ಸ್ವಲ್ಪ

ತಯಾರಿಸುವ ವಿಧಾನ:

ಗೋಡಂಬಿಯನ್ನು ಪುಡಿ ಮಾಡಿಕೊಳ್ಳಿ.
ಪಾತ್ರೆಗೆ ಸಕ್ಕರೆ ಮತ್ತು ಕಂಡೆನ್ಸ್ಡ್ ಮಿಲ್ಕ್ ಹಾಕಿ ಬೆರೆಸಿ,ಅದಕ್ಕೆ ಗೋಡಂಬಿ ಪುಡಿಯನ್ನು ಹಾಕಿ ಕೆದಕುತ್ತಿರಿ,ಸ್ವಲ್ಪ ಹೊತ್ತಿನ ನಂತರ ತುಪ್ಪ ಮತ್ತು ಏಲಕ್ಕಿ ಪುಡಿಯನ್ನು ಸೇರಿಸಿ. ಕೈ ಬಿಡದೇ ಚೆನ್ನಾಗಿ ಕೆದಕುತ್ತಿರಿ,ತಳ ಹಿಡಿಯದಂತೆ ತಿರುಗಿಸಿ,ಸ್ವಲ್ಪ ಹೊತ್ತಿಗೆ ಅದು ತಳ ಬಿಡುತ್ತಾ ಬರುತ್ತದೆ. ಬರ್ಫಿಯ ಹದ ಬಂದಿದೆ ಎನಿಸಿದ ತಕ್ಷಣ ತುಪ್ಪ ಸವರಿದ ತಟ್ಟೆಗೆ ಹಾಕಿ,ಸಮ ಮಾಡಿ. ಸ್ವಲ್ಪ ತಣ್ಣಗಾದ ಮೇಲೆ ನಿಮಗೆ ಬೇಕಾದ ಆಕಾರದಲ್ಲಿ ಕತ್ತರಿಸಿ. ತಿನ್ನಲು ಗೋಡಂಬಿ ಬರ್ಫಿ ತಯಾರಾಗುತ್ತದೆ.ಮಕ್ಕಳಿಗೆ ಪ್ರಿಯವಾದ ಗೋಡಂಬಿ ಬರ್ಫಿ ತಯಾರಾಗುತ್ತದೆ.

Khara -Sev / ಖಾರ ಸೇವ್

0 comments

ಖಾರ ಸೇವ್:

ಕಡ್ಲೆಹಿಟ್ಟು - ಒಂದು ಬಟ್ಟಲು
ನಿಂಬೆರಸ ಸ್ವಲ್ಪ
ಉಪ್ಪು ಸ್ವಲ್ಪ - ಅರ್ಧ ಚಮಚ
ಓಮಕಾಳು - ದೊಡ್ಡ ಚಮಚ
ಇಂಗು ಚಿಟಿಕೆ

ವಿಧಾನ:


ಎಲ್ಲಾ ಸಾಮಗ್ರಿಗಳನ್ನು ಚೆನ್ನಾಗಿ ಬೆರೆಸಿ,ನೀರು ಹಾಕಿ ಕಲೆಸಿ,ಚೆನ್ನಾಗಿ ನಾದಿಕೊಳ್ಳಿ.ಚಕ್ಕುಲಿ ಒರಳಿಗೆ ದಪ್ಪ ಶ್ಯಾವಿಗೆಯ ಬಿಲ್ಲೆ ಹಾಕಿಕೊಳ್ಳಿ.
ನಂತರ ಹಿಟ್ಟನ್ನು ಚಕ್ಕುಲಿ ಒರಳಿಗೆ ಹಾಕಿ,ನೇರವಾಗಿ ಕಾದ ಎಣ್ಣೆಗೆ ಬಿಟ್ಟು,ಹೊಂಬಣ್ಣ ಬರುವವರೆಗೂ/ಬೆಂದಿದೆ ಎನಿಸಿದ ತಕ್ಷಣ ತೆಗೆದು,ಪೇಪರ್ ಟವಲ್ ಮೇಲೆ ಹಾಕಿ,ಎಣ್ಣೆ ಹೀರಿಕೊಳ್ಳುತ್ತದೆ. ನಂತರ ತಣ್ಣಗಾದ ಮೇಲೆ ಡಬ್ಬಕ್ಕೆ ತುಂಬಿರಿ. ಬೇಕಾದಾಗ ತಿನ್ನಬಹುದು. ಇದು ಪುರಿ ಜೊತೆ ಹಾಕಿಕೊಂಡು ತಿನ್ನಲು,ಊಟಕ್ಕೆ ನೆಂಚಿಕೊಳ್ಳಲು ಚೆನ್ನಾಗಿರುತ್ತದೆ.

Popular Posts

 
  • Adige Recipes-ಅಡಿಗೆ ಸವಿರುಚಿ © 2012 | Designed by Designer Link, in collaboration with Web Hosting , Blogger Templates and WP Themes